Sú-tô͘ hêng-toān Tē-chhit chio͘ⁿ 使徒行傳 第七章

7 : 1 Tōa-chè-si chiū mn̄g Su-thê-hoán:” Chiah-ê tāi-chì kám ah-ne?”

7 : 2 I ìn:” Kok-ūi hū-ló kap hiaⁿ-tī, chhiáⁿ thiaⁿ góa kóng! Lán ê chó͘-sian A-pek-lah-hán, iau tòa tī Bí-só-pho-tāi-bí, tī beh sóa-khì Ha̍p-lân í-chêng, êng-kng ê Siōng-chú ǹg i hián-hiān,

7 : 3 Tùi I kóng:「Lí tio̍h lī-khui lí ê kò͘-hiong hām chin-cho̍k, khì Góa só͘ chí-sī ê só͘-chāi.」

7 : 4 I chiū lī-khui Ka-le̍k-tí-lâng ê tē-thâu, khì tòa-tī Hap-lân. In lāu-pē sí liáu-āu, Siōng-chú hō͘ i án hia poaⁿ-lâi lín hiān-chāi teh tòa ê só͘-chāi.

7 : 5 Tī chia, Siōng-chú pēng bô hō͘ i sán-gia̍p, liân kià-kha ê só͘-chāi to bô. Siōng-chú èng-ún beh chiong chit-tè thó͘-tē sió͘ⁿ-sù hō͘ i kap i ê āu-tāi, hit-ê sî i iàu-bô kiáⁿ.

7 : 6 Siōng-chú ah-ne kā i kóng:「LÍ ê kiáⁿ-sun ē tòa tī gōa-kok, chò lâng ê lô͘-châi, hō͘ lâng khó͘-to̍k sì-pah nî kú.」

7 : 7 Siōng-chú koh kóng:「Góa ē sìm-phòaⁿ hit-ê hō͘ in chò lô͘-châi ê kok-ka. Jiân-āu, in ē tùi hit-kok chhut-lâi, tī chi̍t-ê só͘-chāi kèng-pài Góa.」

7 : 8 Siōng-chú chiū ēng kiâⁿ kat-lé chò hām i li̍p-iok ê kì-hō. Só͘-í, i seⁿ Í-sat ê tē-peh-  ji̍t, chiū kā i kiâⁿ kat-lé. Āu-lâi, Í-sat seⁿ Ngá-kok, Ngá-kok seⁿ cha̍p-jī ê cho̍k-tió͘ⁿ.

7 : 9「Chiah-ê cho̍k-tió͘ⁿ chit-tò͘ Iok-sek, kā i bē khì Ai-ki̍p, Siōng-chú khiok kap i tī-teh,

7 : 10 Kiù i thoat-lī it-chhè ê khó͘-lān, hō͘ i tī Ai-ki̍p ông Hoat-ló ê bīn-chêng tit-tio̍h un-tián kap tì-hūi, Hoat-ló chiū siat-li̍p i chò chái-siòng, koh koán-lí choân ông-sek.

7 : 11 Í-āu, Ai-ki̍p hām Ka-lâm choân-tē lóng ki-hng, chin-pháiⁿ seng-oa̍h, lán ê chó͘-sian bô niô͘ⁿ-sit thang chia̍h.

7 : 12 Tú-tng Ngá-kok thiaⁿ-tio̍h Ai-ki̍p ū niô͘ⁿ-sit, chiū phài lán ê chó͘-sian khì. Che-sī tē-it pái.

7 : 13 Khì tē-jī pái ê sî, Iok-sek hō͘ i ê hiaⁿ-tī jīn-chhut i, só͘-í Hoat-ló mā chai-iáⁿ hia-ê lâng sī Iok-sek ê chhin-lâng.

7 : 14 Iok-sek phài lâng khì thong-tī in lāu-pē Ngá-kok, chhiáⁿ i kap choân ka-cho̍k chhit-cha̍p gō͘-cha̍p lâng lâi Ai-ki̍p.

7 : 15 Ngá-kok chiū khì, āu-lâi i hām lán ê chó͘-sian lóng sí tī hia.

7 : 16 In ê ûi-hâi ūn kàu Sī-kiàm, chòng tī A-pek-lah-hán ēng gîn-à án Hap-boa̍t ê āu-tāi bé lâi ê bōng-tē.

7 : 17「Tī Siōng-chú èng-ún A-pek-lah-hán ê tāi-chì, hit-ê kî teh-beh kàu ê sî, tòa tī Ai-ki̍p ê Í-sek-lia̍t lâng jú-lâi jú-chē,

7 : 18 Ti̍t-kàu m̄-bat Iok-sek ê ông chē-ūi liáu-āu.

7 : 19 I ēng kúi-kè sat-hāi lán ê bîn-cho̍k, ge̍k-thāi lán ê chó͘-sian, kiông-pek in chiong âng-eⁿ-á tàn chhut-khì gōa-bīn, hō͘ in sí.

7 : 20 Hit-sî, Mô͘-se tú-hó chhut-sì, seⁿ-chò ū kàu súi, tī lāu-pē ê chhù chiah io saⁿ-goe̍h ji̍t.

7 : 21 I pī tàn chhut-khì ê sî, khì hō͘ Hoat-ló ê cha-bó͘-kiáⁿ khioh-khí lâi, tòng-chò ka-tī ê kiáⁿ ió͘ⁿ-chhī.

7 : 22 Mô͘-se ha̍k-sip Ai-ki̍p-lâng só͘-ū ê ha̍k-būn, kóng-ōe á-sī pān-sū lóng chin ū lêng-le̍k.

7 : 23 Kàu tī i sì-cha̍p hòe ê sî, siō͘ⁿ beh khì thàm-hóng i ê Í-sek-lia̍t tông-pau.

7 : 24 Kàu in tiong-kan khòaⁿ-tio̍h chi̍t-ê hiaⁿ-tī hō͘ Ai-ki̍p lâng khi-hū, chiū pó-hō͘ i, phah-sí hit-ê Ai-ki̍p lâng, thè pī khi-hū ê pò-siû.

7 : 25 I phah-sǹg ka-tī ê hiaⁿ-tī ē liáu-kái Siōng-chú ēng i ê chhiú lâi kiù in : tān-sī in bē-tàng liáu-kái.

7 : 26 Kòe chi̍t-ji̍t, i khòaⁿ-tio̍h nn̄g-ê Í-sek-lia̍t lâng teh sio-phah, siō͘ⁿ-beh kā in tiau-kái, kóng:“ Lín sī tông-pau, ná ē leh hō͘-siong piàⁿ seⁿ-sí ?”

7 : 27 M̄-ku hit-ê leh khi-hū lâng ê, kā Mô͘-se sak-khui kóng:” Siáⁿ-mih-lâng jīm-bēng lí chò goán ê phòaⁿ-koaⁿ?

7 : 28 Lí kám-beh chhin-chhiūⁿ cha-hng phah-sí hit-ê Ai-ki̍p lâng ah-ne, lâi phah-sí góa sī bô?

7 : 29 Mô͘-se thiaⁿ-tio̍h chit-kù ōe, chiū tô-cháu khì tòa tī Bí-tiân ê só͘-chāi, tī hia seⁿ nn̄g-ê kiáⁿ.

7 : 30 “ Sì-cha̍p-nî āu, tī Se-nāi ê khòng-iá, ū thiⁿ-sài tī teh to̍h-hóe ê chhì-phè tiong, ǹg i hián-hiān.

7 : 31 Mô͘-se khòaⁿ-tio̍h chit-ê kéng-siōng, kám-kak chin kî-koài, tú-beh kiâⁿ óa—khì khòaⁿ ê sî, sûi thiaⁿ-tio̍h Chú ê siaⁿ kóng:”

7 : 32「Góa sī lín chó͘-sian ê Siōng-chú, sī A-pek-lah-hán, Í-sat, Ngá-kok ê Siōng-chú. Mô͘-se kiaⁿ kah phi̍h-phi̍h-chhoah m̄-káⁿ koh khòaⁿ.」

7 : 33 Chú kā i kóng:「Kā lí ê kha só͘ chhēng ê ê, thǹg khí-lâi, in-ūi lí khiā ê só͘-chāi sī sèng-tē.

7 : 34 Góa khak-si̍t ū khòaⁿ-tio̍h Góa ê chú-bîn tī Ai-ki̍p só͘ siū ê khó͘, mā-ū thiaⁿ-tio̍h in teh kiò-khó͘ ê siaⁿ, Góa í-keng lo̍h-lâi beh chin-kiù in. Taⁿ lí lâi, Góa beh chhe-phài lí khì Ai-ki̍p.」

7 : 35 Chit-ê Mô͘-se chiū-sī hō͘ Í-sek-lia̍t lâng só͘ kū-choa̍t ê. In kóng「Siáⁿ-mih-lâng jīm-bēng lí chò goán ê thâu-lâng, goán ê sím-phòaⁿ-koaⁿ?」 Siōng-chú khiok thong-kòe tī leh to̍h-hóe ê chhì-phè tiong ê thiⁿ-sài ǹg i hián-hiān, chhe-phài i chò léng-siù, chò chin-kiù-chiá.

7 : 36 I chhōa in chhut Ai-ki̍p, tī Ai-ki̍p, tī Âng-hái, tī khòng-iá kiâⁿ chē-chē sîn-jiah kî-sū.

7 : 37 Chit-ê Mô͘-se bat tùi Í-sek-lia̍t ê kiáⁿ-sun kóng:” Siōng-chú beh án lín hiaⁿ-tī tiong-kan, kā lín siat-li̍p chi̍t-ūi Siōng-chú ê tāi-giân-jîn chhin-chhio͘ⁿ góa ah-ne.

7 : 38 I chiū-sī hit-ūi bat tī khòng-iá ê chū-hōe tiong, khì tī Se-nāi soaⁿ-téng kap thiⁿ-sài kóng-ōe, iā kap lán ê chó͘-sian chòe-hóe, chiong só͘ niá-siū tio̍h ê oa̍h-miā ê chin-tō thoân hō͘ lán.

7 : 39 Lán è chó͘-sian m̄-niāⁿ m̄-khéng ho̍k-chiông, koh kū-choa̍t i, siō͘ⁿ beh tńg-khì Ai-ki̍p.

7 : 40 In kā A-lûn kóng:「LÍ lâi kā goán chō chi̍t-kóa sîn-bêng, chò thâu-chêng chhōa-lō͘, in-ūi hit-ê chhōa goán chhut Ai-ki̍p ê Mô͘-se, goán m̄-chai i hoat-seng siáⁿ-mih tāi-chì.」

7 : 41 Hit-sî, in chiū chō chi̍t-ê gû-á-kiáⁿ ê siōng, iā ēng seng-lé lâi pài i, in chin kah-ì ka-tī chhin-chhiú só͘ chō ê siōng.

7 : 42 M̄-ku Siōng-chú chiū m̄ chhap in, chhut-chāi in khì kèng-pài ji̍t-goa̍t chheⁿ-sîn, tú chhin-chhiō͘ⁿ Sian-ti-su só͘ kì ê:「Í-sek-lia̍t ê chú-bîn ah! Lín tī khòng-iá sì-cha̍p nî kú, kam bat hiàn seng-lé a̍h-sī chè-mi̍h hō͘ Góa?

7 : 43 Lín kng Mô͘-lo̍k ê pò͘-pêⁿ kap Lí-hoan sîn ê chheⁿ, chiū-sī lín só͘ chò lâi pài ê ngó͘-siōng. Só͘-í, Góa beh kā lín chhian-sóa khì Pa-pí-lûn hit pêng.」

7 : 44 Lán ê chó͘-sian tī khòng-iá ū thang chò kiàn-chèng ê tió͘ⁿ-bō͘, chiū-sī Siōng-chú hoan-hù Mô͘-se, kiò i chiàu i só͘ khòaⁿ-tio̍h ê iō͘ⁿ-sek khí chō ê.

7 : 45 Āu-lâi lán ê chó͘-sian kè-sêng chit-ê tiò͘ⁿ-bō͘. Siōng-chú chiū tùi in ê bīn-chêng kā gōa-cho̍k kóaⁿ-cháu khì, tī in kap Iok-su-a chìn-ji̍p hia-ê thó͘-tē ê sî, iā-ū tòa tiò͘ⁿ-bō͘ khì, it-ti̍t kàu Tāi-pi̍t ê sî-tāi.

7 : 46 Tāi-pi̍t tit-tio̍h Siōng-chú ê un-hūi, kiû Siōng-chú ún-chún i ūi Ngá-kok ê Siōng-chú chhōe chi̍t-ê tòa ê só͘-chāi.

7 : 47 M̄-ku sī Só͘-lô-bûn ūi Siōng-chú khí sèng-tiān.

7 : 48 Sū-si̍t-siōng, Chì-koân ê Siōng-chú bô tòa tī lâng ê chhiú só͘ khí ê chhù, chhin-chhiō͘ⁿ sian-ti só͘ kóng ê:

7 : 49 ” Chú kóng, thiⁿ sī Góa ê pó-chō, tē sī Góa ê kha-ta̍h-í; Lín beh kā Góa khí siáⁿ-mih khoán ê chhù? Góa hio̍h-khùn ê só͘-chāi tī tó-ūi?

7 : 50 Só͘ ū ê it-chhè kám m̄-sī Góa chhin-chhiú chhòng-chō ê ?

7 : 51「Lín ê ām-kún, sim-koaⁿ ná ē chiah ngē! Hīⁿ-khang iā bô-beh thiaⁿ, tú hām lín ê chó͘-sain siāng-khoán, tiāⁿ-tiāⁿ pōe-ge̍k Sèng-sîn.

7 : 52 Tó chi̍t-ê sian-ti bô siū-tio̍h lín ê chó͘-sian ê pek-hāi? Hiah-ê ū-giân hit-ūi Kong-gī-ê teh-beh lâi ê lâng, lóng hō͘ lín hāi-sí. Taⁿ lín chiâⁿ-chò chhut-bē koh thâi-sí chit-ê lô͘-po̍k ê lâng.

7 : 53 Lín tùi thiⁿ-sài niá-siū liáu Siōng-chú ê lu̍t-hoat, kèng-jiân bô leh chun-siú!」

7 : 54 In thiaⁿ-tio̍h Su-thê-hoán kóng chiah-ê tāi-chì, in ê lāi-sim ná-chhiō͘ⁿ hō͘ to liô-tio̍h, siū-khì-kah ǹg i kā-gê chhiat-khí.

7 : 55 M̄-ku, Su-thê-hoán hō͘ Sèng-sîn chhiong-móa, gia̍h-ba̍k chù-sîn khòaⁿ thiⁿ-téng, i khòaⁿ-tio̍h Siōng-chú ê êng-kng, koh khòaⁿ-tio̍h Ia-so͘ khiā tī Siōng-chú ê chiàⁿ-pêng,

7 : 56 I chiū kóng:” Lín khòaⁿ leh! Góa khòaⁿ-tio̍h thiⁿ-téng khui ah, Jîn-chú khiā tī Siōng-chú ê chiàⁿ-pêng.」

7 : 57 Tān-sī chèng-lâng tōa-siaⁿ hoah-hiu, hīⁿ-khang ng-leh, chò-hóe khé óa-khì i hia,

7 : 58 Kā i thoa chhut siâⁿ-gōa, thè chio̍h-thâu tìm i. Hia-ê chò kiàn-chèng ê, chiong ka-tī ê gōa-saⁿ khǹg tī chi̍t-ê miâ-chò Só-lô ê siàu-liân-lâng ê kha chêng.

7 : 59 In leh ēng chio̍h-thâu tìm Su-thê-hoán ê sî, Su-thê-hoán kiû-kiò Chú kóng:” Chú Ia-so͘ kiû Lí chiap-siū góa ê lêng-hûn!”

7 : 60 I kūi lo̍h-khì hoah kah chin tōa-siaⁿ kóng:” Chú ah, m̄-thang kā chit-ê chōe sǹg-chò in ê!” Chit-kù ōe kóng-liáu, chiū khùn-khì. Só-lô iā hoaⁿ-hí i pī chhú-sí.