Sú-tô͘ hêng-toān Tē-chap-it chio͘ⁿ 使徒行傳 第十一章

 11 : 1 Sú-tô͘ hām tòa tī Iû-thài ê chèng hiaⁿ-tī thiaⁿ-tio̍h gōa-kok-lâng iā í-keng chiap-siū Siōng-chú ê chin-tō.

11 : 2 Tng Pí-tek chiō͘ⁿ-lâi Iâ-lō͘-sat-léng ê sî, hia-ê siū kat-lé ê Iû-thài-lâng phoe-phêng i :

11 : 3 “ Lí li̍p-khì bô siū kat-lé ê lâng ê chhù kap in chò-hóe chia̍h-pn̄g.”

11 : 4 Pí-tek chiū chiong só͘ hoat-seng ê tāi-chì chi̍t-hāng chi̍t-hāng ǹg in soat-bêng :

11 : 5 “ Góa tī Iok-phàⁿ-siâⁿ kî-tó ê sî, ū khòaⁿ-tio̍h īⁿ-siōng, ū chi̍t-ê chhin-chhiō͘ⁿ sì-kak-thâu pak-khí-lâi ê tōa-tè pò͘ án thiⁿ-téng lūi lo̍h-lâi tī góa ê kha-chêng.

11 : 6 Góa kā siông-sè khòaⁿ, lāi-bīn ū tē-siong ê cheng-seⁿ, iá-siù hām thâng-thōa kap khong-tiong ê poe-chiáu.

11 : 7 Koh thiaⁿ-tio̍h ū siaⁿ kā góa kóng:「Pí-tek, khí-lâi kā i thâi lâi chia̍h!」

11 : 8 Tān-sī góa ìn:「Chú à, chhian-bān m̄-thang! In-ūi góa m̄-bat chia̍h bô sèng-kiat koh a-cha ê mi̍h-kiāⁿ.」

11 : 9 M̄-ku, hit-ê siaⁿ tē-jī-pái koh án thiⁿ-téng kā góa kóng:「Siōng-chú só͘ sèng-hòa ê, lí m̄-thang jīn-ûi I sī bô chheng-khì ê.」

11 : 10 Chiū ah-ne liân-liân saⁿ-pái liáu-āu, hia-ê mi̍h-kiāⁿ chôaⁿ siu tńg-khì.

11 : 11 Tú tī hit-sî, sūi ū án Kai-sat-lī-a phài lâi beh chhōe góa ê saⁿ-ê lâng, khiā tī góa tòa ê chhù góa.

11 : 12 Sèng-sîn kā góa kóng, tio̍h kap in chò-hóe khì, m̄-thang tiû-tû. Kap góa chò-hóe khì ê iáu-ū la̍k-ê hiaⁿ-tī, goán lóng ji̍p-khì Ko-nî-liû ê chhù.

11 : 13 I chiū kā goán kóng, i án-chóaⁿ khòaⁿ-tio̍h thiⁿ-sài lâi khiā tī i ê bīn-chêng, tùi I kóng:「LÍ phài lâng khì Iok-phàⁿ, iau-chhiáⁿ hō-chò Pí-tek ê Se-bûn lâi chia,

11 : 14 I ū ōe beh kā lí kóng, thang hō͘ lí kap lí ê choân-ke tit-kiù.」

11 : 15 Góa kàu-ui tī iáu-teh kóng-ōe ê sî, Sèng-sîn sūi kàng-lo̍h tī in tiong-kan, chhin-chhiō͘ⁿ tng-sî kàng-lîm tī lán sin-chiō͘ⁿ siāng-khoán.

11 : 16 Góa chiū siō͘ⁿ-khí Chú só͘ kóng ê ōe:「Iok-hān sī ēng chúi kā lín kiâⁿ sé-lé, tān-sī lín ē niá-siū Sèng-sîn ê sé-lé.」

11 : 17 Siōng-chú kì-jiân sio͘ⁿ-sù lé-mi̍h hō͘ in, chhin-chhiō͘ⁿ lán sìn Chú Ia-so͘ Ki-tok ê sî só͘ sió͘ⁿ-sù hō͘ lán ê siāng-khoán, góa sī siáⁿ-lâng, ná ē-tàng chó͘-tòng Siōng-chú ê só͘ chò?”

11 : 18 Tng ta̍k-ê thiaⁿ-liáu chiah-ê ōe, chiū chēng-chēng, kui êng-kng hō͘ Siōng-chú, kóng:” Ah-ne khòaⁿ-lâi, Siōng-chú mā sió͘ⁿ-sù gōa-kok-lâng hóe-kái ê ki-hōe, thang tit-tio̍h oa̍h-miā.”

11 : 19 Hia-ê in-ūi Su-thê-hoán sū-kiāⁿ siū pek-hāi chôaⁿ sì-sòaⁿ ê bûn-tô͘, tô-cháu khì Hui-nî-ki hām Ku-pí-lō͘ í-kip An-thê-o, in bô ǹg gōa-kok-lâng kóng Hok-im, chí-ū tùi Iû-thài-lâng niā-niā.

11 : 20 M̄-ku, kî-tiong ū chi̍t-kóa Ki-pí-lō͘ kap Kó͘-lī-nāi ê bûn-tô͘, tī An-thê-o ǹg Hi-liap lâng Thoân Ia-so͘ Ki-tok ê hok-im.

11 : 21 Chú ê khùi-la̍t kap in tông-chāi, chiū ū chin-chē lâng sìn, kui-ǹg Chú.

11 : 22 Chit-ê siau-sit thoân-kàu Iâ-lō͘-sat-léng ê bó-hōe, chiū phài Pa-ná-pa chiân-óng An-thê-o.

11 : 23 I chi̍t-ē kàu, khòaⁿ-tio̍h Siōng-chú ê un-hūi chiū chin hoaⁿ-hí, pēng kó͘-lē tāi-ke tio̍h li̍p-chì choan-sim sìn-khò Chú.

11 : 24 In-ūi Pa-ná-pa sī hō-lâng, koh ū Sèng-sîn chhiong-móa tōa ū sìn-sim, só͘-í lâi sìn-chú ê lâng ke-thiⁿ chin-chē.

11 : 25 Āu-lâi i khì Tāi-sò͘ chhōe Só-lô,

11 : 26 Chhōe tio̍h i liáu-āu chiū chhōa i khì An-thê-o. Chiok-chiok ū chi̍t-nî kú, in tī hia-ê kàu-hōe chū-hōe, iā kàu-tō chin-chē lâng. Bûn-tô͘ hō͘ lâng chheng-chò Ki-tok-tô͘ sī án An-thê-o kàu-hōe khai-sí ê.

11 : 27 Tī hit-tōaⁿ kî-kan, ū kúi-ê sian-ti, án Iâ-lō͘-sat-léng lâi An-thê-o.

11 : 28 Kî-tiong ū chi̍t-ê hō-chò A-ka-pò͘, siū Sèng-sîn ê khé-sī, khiā khí-lâi ū-giân kóng : Choân sè-kài teh-beh ū tōa ki-hng.(Tī Kek-ló-tiu chò hông-tè ê sî-tāi, chin-chiàⁿ hoat-seng.)

11 : 29 Bûn-tô͘ chiū koat-tēng, ta̍k-lâng chiàu ka-tī ê le̍k-liōng hōng-hiàn, thang kià kiù-chè-phín khì oân-chō͘ tòa tī Iû-thài-séng ê sìn-tô͘.

11 : 30 In chiū chiàu ah-ne chò, chiong in só͘ koan-hiàn ê, kau-hō͘ Pa-ná-pa hām Só-lô the̍h-khì hō͘ Iâ-lō͘-sat-léng ê tió͘-ló.

  　　　　　　　　　　　　　　　　　　　　　　　　　　　20190713