21:1 Tng goán lī-khui in liáu-āu, chiū khui-chûn ti̍t-ti̍t kàu Ko-sū. Kè-ji̍t kàu Lô-tí, tùi hia koh kàu Phàⁿ-tāi-lah.
21:2 Goán
tī hia tú-tio̍h chi̍t-chiah beh-khì Hui-nî-ki ê chûn, chiū chiō͘ⁿ-chûn
chhut-phâng.
21:3 Goán
lâi-kàu khòaⁿ ē-tio̍h Ki-pí-lō͘ ê sî, chiū tùi chiàⁿ-pêng sái-kòe. Khì-kàu
Sū-lī-a, tī Chhui-lô chiō͘ⁿ-hōaⁿ, in-ūi in tī hia lo̍h-hòe.
21:4 Tī hia
goán chhōe-tio̍h chi̍t-kóa sìn-tô͘, kap in tòa chhit-ji̍t. In chià-tio̍h
Sèng-sîn kā Pó-lô kóng, m̄-thang chiō͘ⁿ-khì Iâ-lō͘-sat-léng.
21:5
Chhit-ji̍t liáu-āu, goán khí-sin kè-sio̍k goán ê lō͘-thêng, in tāi-ke kap
bó͘-kiáⁿ sàng goán kàu siâⁿ-gōa, goán kūi tī hái-piⁿ chò-hóe kî-tó,
21:6
Saⁿ-kap sio-sî liáu-āu, goán chiū chiō͘ⁿ-chûn, in iā tńg-khì in tau.
21:7 Tng
goán án Chhui-lô khai-sí kiâⁿ chúi-lō͘ kàu kiat-sok, tī To-lī-mái kā hia-ê
sìn-tô͘ chhiáⁿ-an, kap in tòa chi̍t-ji̍t.
21:8
Kè-ji̍t goán lī-khui hia, lâi-kàu Kai-sat-lī-a, khì thoân-hok-im-è Hui-le̍k in
chhù kap i tòa chò-hóe, i sī Iâ-lō͘-sat-léng chhit-ê chip-sū chi it.
21:9 I ū
sì-ê cha-bó͘-kiáⁿ lóng bô chhut-kè, lóng ū kóng ū-giân ê un-sù.
21:10 Goán
tī hia tòa kúi-a-ji̍t, ū chi̍t-ê miâ-chò A-ka-pò͘ ê sian-ti, án Iû-thài loh-lâi.
21:11 I lâi
goán tiong-kan, theh Pó-lô ê io-tòa pa̍k ka-tī ê siang-kha kap siang-chhiú,
kóng:” Sèng-sîn ah-ne kóng: Iû-thài-lâng tī Iâ-lō͘-sat-léng beh ah-ne pa̍k
chit-tiâu io-tòa ê chú-lâng, kā i kau hō͘ gōa-kok-lâng ê chhiú.
21:12 Goán
thiaⁿ-tio̍h chiah-ê ōe, chiū kap tī hia ê chèng-lâng khún-kiû Pó-lô mài
chiō͘ⁿ-khì Iâ-lō͘-sat-léng.
21:13 Pó-lô
sūi kóng:” Lín sī án-chóaⁿ, háu kah hō͘ góa ê sim te̍h-beh chhùi-khì. Góa
ūi-tio̍h Chú Ia-so͘ ê miâ í-keng chún-pī hó, m̄-niā ē siū pa̍k-khì, sīm-chì
iā-ē sí tī Iâ-lō͘-sat-léng.
21:14 Tng i
bô pī goán soat-ho̍k, goán chiū tiām-khì. Chí-ū kóng:” Goān Chú ê chí-ì tit
chiâⁿ.”
21:15 Chiah-ê
ji̍t-chí kòe-liáu, goán kā hêng-lí khoán hō͘ hó-sè, chiū ǹg Iâ-lō͘-sat-léng
chhut-hoat,
21:16 Ū
kúi-ê án Kai-sat-lī-a lâi ê sìn-tô͘ kap goán chò-hóe khì, chhōa goán tòa tī chi̍t-ê
Ki-pí-lō͘-lâng, miâ-chò Ná-sun in tau, i-sī chá-kî ê sìn-tô͘.
21:17 Tng
goán kàu Iâ-lō͘-sat-léng, chèng sìn-tô͘ chin hoaⁿ-hí chiap-thāi goán.
21:18
Keh-ji̍t, Pó-lô kap goán chò-hóe khì hóng-būn Ngá-kok, chèng tió͘ⁿ-ló mā lóng
tī hia.
21:19 Pó-lô
seng ǹg tāi-ke chhiáⁿ-an liáu-āu, chiū chiong Siōng-chú thong-kòe i tī
gōa-kok-lâng ê tiong-kan só͘ chò ê sū-kang, chi̍t-hāng chi̍t-hāng ǹg in pò-kò.
21:20 In
thiaⁿ-liáu chiū sūi o-ló Siōng-chú. In tùi i kóng:” Hiaⁿ-tī, lí chai-iáⁿ tī
Iû-thài-lâng ê tiong-kan í-keng ū chiâⁿ bān lâng lâi sìn-chú, in lóng sī jia̍t-sim
chun-siú Lu̍t-hoat ê.
21:21 In
thiaⁿ-tio̍h koan-hē lí ê sū, kóng lí kàu-tō tòa tī gōa-kok ê Iû-thài-lâng
hòng-khì Mô͘-se ê Lu̍t-hoat, m̄-bián kā in ê gín-á kiâⁿ kat-lé, mā m̄-bián siú
Iû-thài-lâng ê kui-lē.
21:22 In
it-tēng ē thiaⁿ-tio̍h lí lâi tī chia, in ē lâi chhōe lí, beh chóaⁿ-iō͘ⁿ pān-lí
chiah-hó?
21:23 Lí
chiū chiàu goán kā lí kóng ê khì chò. Goán chia ū sì-ê ū hē-goān ê lâng.
21:24 Lí
chhōa in chò-hóe khì chham-ka kiat-chēng-lé, chhut só͘-hūi hō͘ in thì-thâu. Ah-ne
chèng-lâng chiū ē chai, in só͘ thiaⁿ-tio̍h koan-hē lí ê tāi-chì pēng-m̄-sī
sū-si̍t, thang hō͘ in chai, lí mā-sī leh siú Mô͘-se ê Lu̍t-hoat.
21:25
Lûn-kàu í-keng sìn-Chú ê gōa-kok-lâng, goán ū chiong só͘ gī-koat ê sū siá
lo̍h-lâi hō͘ in thang chun-siú, chiū-sī m̄-thang chia̍h pài-kòe ngó͘-siōng ê
mih, í-kip hoeh kap chhui-sí ê cheng-seⁿ, mā m̄-thang îm-loān.
21:26 Keh-ji̍t,
Pó-lô chhōa hit sì-ê lâng, khì chham-ka kiat-chēng-lé, jiân-āu khì sèng-tiān
pò-kò kiat-chēng-lé móa ê ji̍t-kî, thang ūi in ta̍k-lâng hiàn chè-mi̍h.
21:27 Hit
chhit-ji̍t teh-beh móa ê sî, án A-se-a lâi ê Iû-thài-lâng khòaⁿ-tio̍h Pó-lô tī
sèng-tiān, chiū siàn-tōng chèng-lâng khì lia̍h i.
21:28
Tōa-siaⁿ hoah:” Í-sek-lia̍t-lâng ah, lâi tàu-kha-chhiú, chiū-sī chi̍t-ê lâng tī
tak só͘-chāi kàu-tō chèng-lâng hoán-khòng lán kap Lu̍t-hoat, mā hoán-tùi
chi̍t-chō sèng-tiān ê! I sīm-chì chhōa Hi-liap lâng ji̍p-lâi sèng-tiān, ù-òe
chit-ê sîn-sèng ê só͘-chāi.
21:29 In ah-ne
kóng, sī in-ūi ū khòaⁿ-tio̍h Í-hu̍t-só͘ lâng Te̍k-lô-hui-mô͘ hām Pó-lô tī siâⁿ-lāi,
lia̍h-chò Pó-lô ū chhōa i li̍p-khì sèng-tiān.
21:30 Tùi ah-ne
choân-siâⁿ ê lâng pī siàn-tōng, chèng-lâng lóng cháu-lâi lia̍h Pó-lô, kā i án
sèng-tiān thoa chhut-khì. Sèng-tiān ê mn̂g sūi koaiⁿ khí-lâi.
21:31 Tī in
teh-beh thâi i ê sî, ū siau-sit thoân kàu Lô-má-kun ê iâⁿ-tió͘ⁿ, kóng:Choân
Iâ-lō͘-sat-léng leh khí po̍k-tōng.
21:32
Iâⁿ-tió͘ⁿ sūi chhōa kúi-ê peng kap liân-tió͘ⁿ cháu-khì kûn-chiòng hia. In
chi̍t-ē khòaⁿ-tio̍h Iâⁿ-tió͘ⁿ chhōa peng-á lâi, chiū thêng-chí bô-koh phah
Pó-lô.
21:33
Iâⁿ-tió͘ⁿ chôaⁿ óa-khì lia̍h Pó-lô, hā-lēng ēng nn̄g-tiâu liān-á kā i liān
khí-lâi. Mn̄g i sī siáⁿ-mih lâng, chò siáⁿ-mih tāi-chì.
21:34
Kûn-chiòng ê tiong-kan chi̍t-lâng hoah chi̍t-khoán, in-ūi chiaⁿ-loān iâⁿ-tió͘ⁿ
bô hoat-tō͘ chhâ-chhut si̍t-chêng, chiū hā-lēng chhōa Pó-lô li̍p-khì iâⁿ-khu.
21:35 Beh
kiâⁿ loh khám-á ê sî, in-ūi kûn-chiòng lóng chin kek-tōng, hia-ê peng-á chôaⁿ
kā Pó-lô kng khí-lâi,
21:36
Kûn-chiòng tòe tī āu-bīn, tōa-siaⁿ hoah:” Hō͘ i sí！”
21:37 Pó-lô
hō͘ in ah-khì, teh-beh kàu iâⁿ-khu chin-chêng, i mn̄g iâⁿ-tió͘ⁿ :” Kam ē-sái
hām lí kóng kúi-kù ōe?” Lí ē-hiáu Hi-liap-ōe o͘h！
21:38 LÍ
kám-m̄-sī hit-ê , kúi-ji̍t-chêng chhōa sì-chheng ê sat-chhiú khì tī khòng-iá
beh chok-loān ê Ai-ki̍p-lâng mah？”
21:39 Pó-lô
ìn:” Góa sī Iû-thài-lâng, tī Ki-lī-ka ê Tāi-sò͘ chhut-sì, pēng-m̄-sī bô
chhut-miâ ê siâⁿ-chhī ê kong-bîn. Kiû lí chún góa ǹg kûn-chiòng kóng-ōe.
21:40
Iâⁿ-tió͘ⁿ chún i, Pó-lô chiū kiâⁿ khí-lih khám-á-téng, tùi kûn-chiòng
ia̍t-chhiú, tī in lóng tiām-lo̍h-lâi ê sî , i ēng Hi-pek-lâi-ōe ǹg in kóng.
20190821
沒有留言:
張貼留言