23:1 Pó-lô chù-ba̍k khòaⁿ móe chi̍t-ê gī-oân kóng:” Kok-ūi hiaⁿ-tī, góa it-hiòng tī Siōng-chú ê bīn-chêng, oân-choân chiàu chheng-khì ê liông-sim leh seng-oa̍h, ti̍t-kàu kin-á-ji̍t.
23:2
Tōa-chè-si A-ná-nî-a bēng-lēng tī i sin-piⁿ leh khiā ê lâng, siàn i ê
chhùi-phóe.
23:3 Pó-lô
chiū tùi Tōa-chè-si kóng:” Lí chit-ê chhat kah pe̍h-siak-siak ê chhiông,
Siōng-chú ē phah lí kàu thiám-thiám! LÍ chē tī hia kám-m̄-sī tio̍h chiàu-hoat
sím-mn̄g, lí kèng-jiân ûi-hoat, kiò lâng phah góa.”
23:4 Khiā
tī i piⁿ-á ê lâng kóng:” Lí káⁿ mē Siōng-chú ê Tōa-chè-si?”
23:5 Pó-lô
kóng:” Hiaⁿ-tī ah, góa m̄-chai-iáⁿ i sī Tōa-chè-si. In-ūi keng-chheh ū kì-chài:
M̄-thang mē tī-lí peh-sèⁿ ê léng-tō-chiá.
23:6 M̄-ku,
tī Pó-lô chai-iáⁿ hiān-tiô͘ⁿ ū chi̍t-pō͘-hūn sī Sat-to͘-kai lâng, lēng-gōa sī
Hoat-lī-sài-phài ê lâng, chiū tī gī-hōe tiong tōa-siaⁿ hoah:” Kok-ūi hiaⁿ-tī,
góa sī Hoat-lī-sài-phài ê lâng, mā-sī Hoat-lī-sài-phài lâng ê kiáⁿ. Góa siū sím-mn̄g
sī in-ūi góa ǹg-bāng sí-lâng ē koh-oa̍h.”
23:7 Pó-lô
kóng-liáu chiah-ê ōe, Hoat-lī-sài-phài ê lâng kap Sat-to͘-kai lâng, soah khí
cheng-lūn, gī-hōe chôaⁿ hun-lia̍t.
23:8 In-ūi
Sat-to͘-kai phài ê lâng chú-tio͘ⁿ: bô koh-oa̍h、bô thiⁿ-sài、mā-bô lêng-thé,
m̄-ku Hoat-lī-sài-phài ê lâng khiok jīn-ûi chiah-ê lóng ū.
23:9 Tùi ah-ne
sán-seng chin-tōa ê cheng-chip. Kúi-ā-ê Hoat-lī-sài-phài ê kàu-su khiā khí-lâi piān-hō͘,
kóng:” Goán khòaⁿ bē-chhut chit-ê lâng ū chò siáⁿ-mih pháiⁿ-tāi. Kám-kóng
chin-chiàⁿ ū Sèng-sîn á-sī thiⁿ-sài tùi i kóng-ōe?”
23:10 TĪ
cheng-lūn kah chin kek-lia̍t ê sî, Iâⁿ-tió͘ⁿ kiaⁿ Pó-lô hō͘ in thiah-chhùi,
chiū hā-lēng peng-á lo̍h-khì in tiong-kan, kā Pó-lô chhióⁿ chhut-lâi, chhōa
tńg-khì iâⁿ-pâng.
23:11 Hit-mê,
Chú khiā tī Pó-lô ê piⁿ-ah, kóng:” Tio̍h ióng-kám! Lí bat tī Iâ-lō͘-sat-léng ūi
Góa chò kiàn-chèng, só͘-í tī Lô-má iā it-tēng ē ah-ne.
23:12
Thiⁿ-kng ê sî, kúi-ê Iû-thài-lâng kiat chò-hóe chiù-chōa kóng: Nā-bô kā Pó-lô
thâi-sí, in it-tēng m̄-chia̍h iā m̄-lim.”
23:13
Chò-hóe kè-bô͘ ê, ū sì-cha̍p gōa ê lâng.
23:14 In
lâi kìⁿ chè-si-tió͘ⁿ hām tió͘ⁿ-ló, kóng:” Goán í-keng chiù tang-chōa, ná bô
thâi-sí Pó-lô, m̄ kha̍p pòaⁿ-hāng mi̍h-kiāⁿ.
23:15 Taⁿ
lín kap gī-hōe khì thong-ti iâⁿ-tió͘ⁿ, chhiáⁿ i bêng-á-chài chhōa Pó-lô lâi lín
ê bīn-chêng, ké-chò lín beh koh siông-sè cha-mn̄g i ê àn-kiâⁿ. Goán í-keng
chún-pī hó, tī i lâi-kàu chia chin-chêng thâi-sí i .
23:16 Pó-lô
ê gōe-seng-á thiaⁿ-tio̍h in ê bâi-ho̍k, sūi khì iâⁿ-pâng kā Pó-lô kóng.
23:17 Pó-lô
kiò chi̍t-ê liân-tió͘ⁿ lâi, kóng:” Chhiáⁿ lí chhōa chit-ê siàu-liân-lâng khì
kìⁿ iô͘ⁿ-tió͘ⁿ, in-ūi i ū tāi-chì beh ǹg i pò-kò.”
23:18 Liân-tió͘ⁿ
chiū chhōa i khì kìⁿ iâⁿ-tió͘ⁿ kóng:” Hit-ê siū-hêng-jîn Pó-lô kiò góa khì i hia,
kiû góa chhōa chit-ê siàu-liân-lâng lâi kìⁿ lí, i ū tāi-chì beh ǹg lí pò-kò.”
23:19
Iâⁿ-tió͘ⁿ khan i ê chhiú, khì piⁿ-á kò-pia̍t mn̄g i kóng:” LÍ ū siáⁿ-mih
tāi-chì beh pò góa chai?”
23:20 I ìn:”
Iû-thài-lâng í-keng kóng-hó, ké-chò beh koh siông-sè cha-mn̄g Pó-lô ê àn-kiâⁿ,
ē kiû lí bîn-á-chài chhōa Pó-lô khì gī-hōe.
23:21 Só͘-í,
kiû lí m̄-thang thiaⁿ in ê ōe, in-ūi in ū sì-cha̍p gōa ê lâng bâi-ho̍k, beh
tn̄g i. In í-keng chiù-chōa, nā-bô thâi-sí Pó-lô, m-chia̍h mā m̄-lim. Taⁿ in
chún-pī hó-sè, chiū tán lí ê ún-chún.”
23:22
Iâⁿ-tió͘ⁿ kiò i tńg-khì koh hoan-hù:” M̄-thang kā lâng kóng, lí ū kā chiah-ê
tāi-chì pò góa chai-iáⁿ.”
23:23
Iâⁿ-tió͘ⁿ ka-tī sūi chhōe nn̄g-ê liân-tió͘ⁿ kā in kóng:” E-àm káu-tiám, chún-pī
nn̄g-pah ê pō͘-peng, bé-peng chhit-cha̍p-ê, kia̍h-chhiuⁿ-è nn̄g-pah-ê,
chhut-hoat khì Kai-sat-lī-a.
23:24 Koh
chún-pī bé hō͘ Pó-lô khiâ, hō͘-sàng i an-choân kàu chóng-tok Hui-le̍k-sū hia.
23:25
Iâⁿ-tió͘ⁿ siá chi̍t-tiō͘ⁿ phoe, tāi-iok sī ah-ne:
23:26 “ Kek-ló-tiu
Lū-se-a ǹg chóng-tok Hui-le̍k-sū tāi-jîn chhiáⁿ-an.
23:27
Chit-ê hō͘ Iû-thài-lâng lia̍h-tio̍h ê , tī i teh-beh hō͘ in thâi-sí ê sî, góa
chi̍t-ē chai-iáⁿ i sī Lô-má kong-bîn, chiū chhōa pō͘-tūi khì kā kiù chhut-lâi.
23:28 Góa
siō͘ⁿ beh liáu-kái in kò i ê lí-iû, chiū sàng i khì in ê gī-hōe.
23:29 Góa
cha-chhut i hō͘ in kò, sī iú-koan in ê hoat-lu̍t ê gî-būn, pēng bô hoān-tio̍h
chhú-sí á-sī kā koaiⁿ-kaⁿ ê chōe.
23:30 Tng ū
lâng lâi kā góa pò-kò, kóng Iû-thài-lâng leh kè-bô͘ hām-hāi chit-ê lâng, góa
sūi kā i sang khì lí hia, koh bēng-lēng hia-ê kò i ê lâng, mā tio̍h tī lí ê
bīn-chêng khòng-kò i. Chài-hōe.”
23:31 Chiū ah-ne,
pō͘-tūi chip-hêng bēng-lēng, thàu-mê kā Pó-lô ah-khì kau hō An-thê-phàⁿ-tí.
23:32 Keh-ji̍t,
in hō͘ bé-peng ah Pó-lô chiân-óng, chiū tńg-khì iâⁿ-khu.
23:33 Hia-ê
bé-peng kàu Kai-sat-lī-a, chiong phoe kau-hō͘ chóng-tok, mā kā Pó-lô kau hō͘ i.
23:34 Chóng-tok
khòaⁿ hit-tio͘ⁿ phoe liáu-āu, mn̄g Pó-lô sī tó chi̍t séng ê lâng, chai-iáⁿ i sī
KI-lī-ka
23:35 Chiū
kóng:” Tán kò lí ê lâng kàu-ui, góa ē siông-sè thiaⁿ lí ê tāi-chì. Chóng-tok
chiū hā-lēng kā Pó-lô kò͘-siú tī Hi-lu̍t ê ông-tiān.
沒有留言:
張貼留言