Má-khó Hok-im-su Tē 1 chioⁿ 馬可福音 第一章

1:1 Koan-hē Siōng-chú ê kiáⁿ Iâ-so͘ Ki-tok ê hó-siau-sit ê khai-sí sī ah-ne. 1:2 Chiū-sī i-kēng kì-chài tī sian-ti Í-sài-a ê chheh ê lāi-bīn:  “Khòaⁿ leh! Góa beh phài Góa ê sù-chiá kiâⁿ tī lí ê thâu-chêng, thè lí khui-lō͘.” 1:3 Koh ū lâng tī khòng-iá teh hoah: "Lâi chún-pī Chú ê lō͘, siu-ti̍t i ê sió-lō͘.” 1:4 Chiū ah-ne, Iok-hān chhut-hiān tī khòng-iá kā lâng kú-hêng sé-lé, iā soan-káng hóe-kái ê tō-lí, hō͘ lâng tùi chōe-ok-tiong tháu-pàng chhut-lâi. 1:5 Tòa tī Iû-thài choân-tē hām Iâ-lō͘-sat-léng ê lâng, lóng khì Iok-hān hia, sêng-jīn in ka-tī ê chōe, tī Io̍k-tàn-hô chiap-siū i ê sé-lé. 1:6 Iok-hān chhēng lo̍k-tô-mn̂g ê saⁿ, chia̍h chháu-me̍h kap iá-phang ê  bi̍t. 1:7 I kóng :" Ū chi̍t-ūi pí góa koh-khah ū lêng-le̍k ê, bô-lōa-kú beh kàu,  góa lián khû lo̍h-lâi kā I tháu ê-tòa to bô chu-keh. 1:8 Góa sī ēng chúi kā lín kiâⁿ sé-lé, I khiok beh ēng Sèng-sîn kā lín sé.” 1:9 Hit-sî Iâ-so͘ tùi Ka-lī-lī ê Ná-sat-le̍k lâi, chiū tī Io̍k-tàn-hô ni̍h, tùi Iok-hān niá-siū sé-lé. 1:10 Tng I tùi chúi tiong khí-lâi ê sî, siâng-sî khòaⁿ--kìⁿ thiⁿ li̍h-khui ,  Sèng-sîn chhin-chhiūⁿ hún-chiáu-á poe lo̍h-lâi hioh tī I ê sin-chio͘ⁿ. 1:11 Koh tùi thiⁿ-téng ū siaⁿ-im an-ne kóng : “ Lí sī Góa só͘ thiàⁿ ê, Góa chin thiàⁿ-sioh Lí.” 1:12 Sèng-sîn chiū chhui-pek Iâ-so͘ khì kàu khòng-iá. 1:13 I tī khòng-iá sì-cha̍p ji̍t kú, kap iá-siù tòa chò-hóe, iā chiap-siū  Sat-tàn ê chhì-thàm, koh ū thiⁿ-sài lâi pôe-phōaⁿ. 1:14 Iok-hān pī koaiⁿ loh kaⁿ-ga̍k í āu, Iâ-so͘ lâi kàu Ka-lī-lī soan-káng  koan-hē Siōng-chú ê hó-siau-sit. 1:15 Kóng:” Sî-kan í-keng kàu ah! Siōng-chú ê kok í-keng kūn lah,  lín tio̍h ài chhéⁿ kòe lâi, chiap-siū chit-ê hó-siau-sit. 1:16 Iâ-so͘ tī Ka-lī-lī ê ô͘-piⁿ te kiâⁿ ê sî, khòaⁿ-kìⁿ Se-bûn kap i ê hiaⁿ-tī An-tek-lia̍t te pha-bāng, in goân-pún chiū-sī lia̍h hî ê. 1:17 Iâ-so͘ kā in kóng:" Lâi tòe góa! Góa beh hō͘ lín tit-tio̍h lâng, nā chhin-chhiūⁿ hî ." 1:18 In thiaⁿ-liáu sûi chiong hî-bāng siu khí lâi, lâi tòe I. 1:19 Iâ-so͘ koh kè-sio̍k hiòng-chêng kiâⁿ , khòaⁿ-kìⁿ Se-pí-thài ê kiáⁿ  Ngá-kok kap Iok-hān, tī chûn-téng teh pó͘-bāng. 1:20 Chiū sûi chio in chò-hóe lâi khì, in chiū ǹg in lāu-pē kap tī chûn ni̍h ê kang-lâng kò-sî, khì tòe Iâ-so͘ . 1:21 In kàu Ka-pe̍k-lông, tī an-hioh-ji̍t ê sî, Iâ-so͘ li̍p-khì hōe-tn̂g lāi kap in thó-lūn Sèng-keng. 1:22 Ta̍k-ê thiaⁿ liáu I ê kàu-tō, lóng chin hi-kî, in-ūi I ê piáu-ta̍t chin ū koân-ui,  bô chhin-chhiūⁿ hia-ê kàu-su. 1:23 Tī hia tú-hó ū chi̍t-ê hō͘ siâ-sîn hū-sin ê lâng, tōa-siaⁿ hoah : 1:24 ” Ná-sat-le̍k ê Iâ-so͘, Goán kap Lí ū siáⁿ-mih koan-hē? Lí beh lâi siau-bia̍t goán sī bô? Góa chai-iáⁿ Lí sī siáⁿ-lâng, chiū-sī Siōng-chú só͘  hun-pia̍t chhut lâi ê. 1:25 Ia-so͘ chek-pī I kóng: “ Lí tiām-tiām, lī-khui chit-ê lâng!” 1:26 Siâ-sîn sûi hō͘ hit-ê lâng lia̍h-kông khí lâi, koh tōa-siaⁿ âu-kiò, chiah lī-khui i. 1:27 Ta̍k-ê khòaⁿ-tio̍h chit-ê chêng-hêng lóng chin tio̍h-kiaⁿ, hō͘-siong piān-lūn: ”Che sī siáⁿ-mih tāi-chì? Sī sin ê tō-lí nē!” I ēng koân-pèng bēng-lēng siâ-sîn,  liân siâ-sîn iā tio̍h ho̍k-chiông I . 1:28 Chiū án-ne Iâ-so͘ ê miâ-siaⁿ thoân kàu Ka-lī-lī ê tak só͘-chai. 1:29 In chi̍t-ē lī-khui hōe-tn̂g, chiū hām Ngá-kok、Iok-hān, khì-kàu Se-bûn、An-tek-lia̍t in tau. 1:30 Se-bûn ê tio͘ⁿ-ḿ tú-hó hoat-sio tó tī chhn̂g-téng. Ū lâng kā Iâ-so͘  kóng. 1:31 Iâ-so͘ chiū ji̍p khì khan i ê chhiú, hû i khí-lâi, i ê sio chiū thè, jî-chhiáⁿ khí-lâi chiau-thāi in. 1:32 Ji̍t-thâu beh àm ê sî, ū lâng chhōa só͘-ū phòa-pēⁿ ê、pī siâ-sîn hū-sin ê lâi-kàu Iâ-so͘ ê bīn-chêng. 1:33 Choân-siâⁿ ê lâng lóng chū-chi̍p tī mn̂g-kháu. 1:34 Iâ-so͘ i-hó hoān-tio̍h ta̍k-chiòng pēⁿ-thiàⁿ ê lâng, iā kóaⁿ-chhut chin-chē siâ-sîn,  m̄-chún hia-ê siâ-sîn kong ōe, in-ūi siâ-sîn bat I. 1:35 Kè-ji̍t chá-khí, thiⁿ iáu-be kng, Iâ-so͘ khí-chhn̂g, khì kàu khòng-iá, tī hia kî-tó. 1:36 Se-bûn kap kî-thaⁿ ê tâng-phōaⁿ cháu khì chhōe I, 1:37 Chhōe tio̍h chiū tùi I kóng:” Ta̍k ê long leh chhōe Lí.” 1:38 Iâ-so͘ ín kóng:” Lán lâi-khì pa̍t-ê chng-thâu, Góa thang tī hia thoân-tō,  in-ūi che sī Góa lâi ê bo̍k-te̍k. 1:39 Tùi an-ne I tī Ka-lī-lī, ji̍p khì hōe-tn̂g thoân-tō、kóaⁿ chhut siâ-sîn. 1:40 Ū chi̍t ê kui seng-khu tioh phôe-hu-pēⁿ ê, lâi kūi tī Iâ-so͘ ê kha chêng kiû I : ”Lí nā khéng, góa chiū ē oân-choân hó-khì.  1:41 Iâ-so͘ lîn-bín i, chiū chhun-chhiú bong I, kóng:” Góa khéng, lí thang oân-choân hoe-ho̍k!” 1:42 Hit ê lâng choân seng-khu ê phôe-hu-pēⁿ sûi-sî siau-sit. 1:43 Iâ-so͘ chin sīm-tiōng hoan-hù I liáu-āu, chiū kiò I lī-khui, 1:44 Tùi i an-ne kóng:” Lí ài sè-jī, tī lí sin-chio͘ⁿ só͘ hoat-seng ê tāi-chì,  long m̄ thang tùi lâng kóng, kan-taⁿ khì hō͘ chè-si kiám-cha tō hó, koh in-ūi lí ê phôe-hu- pēⁿ í-keng hó, tio̍h hōng-hiàn Mô͘-se só͘ hoan-hù ê lé-mi̍h, thang tit-tio̍h chèng-bêng. 1:45 Hit-ê lâng chhut-khì, hoán-tńg kóng chin-chē ōe, chiong chit-hāng sū thoân chhut khì,  sòa hō͘ Iâ-so͘ í-āu bē tàng kong-khai ji̍p-siâⁿ,  chí-hó tiàm-tī khòng-iá. Lâng chiū tùi ta̍k-ūi lâi chhōe I.