Má-khó hok-im-su Tē jī chioⁿ 馬可福音 第二章

Má-khó hok-im-su Tē jī chioⁿ  
馬可福音 第二章

2:1 Kòe kúi-ji̍t, Iâ-so͘ koh khì Ka-pe̍k-lông.

2:2 Chèng-lâng thiaⁿ-kìⁿ I tī chhù-lāi, chiū chi̍p-óa-lâi, lâng chē kah liân mn̂g lóng that tiâu leh, Iâ-so͘ chiū tùi in káng-tō.

2:3 Ū lâng chhōa chi̍t-ê tiòng-hong-ê lâi chhōe Iâ-so͘, i sī hō͘ sì-ê lâng kā kng lâi.

2:4 In-ūi lâng chin-chē, kng bē kàu thâu-chêng, chiū khì thiah chhù-téng, chiong chit-ê lâng kap chhn̂g-pho͘ chò-hóe lūi lo̍h tī Iâ-so͘ ê bīn-chêng.

2:5 Iâ-so͘ khòaⁿ-tio̍h in chiah-ní ū sìn-sim, chiū tùi i kóng:” Siàu-liân eh, Lí ê chōe tit-tio̍h sià-bián lah!”

2:6 Ū kúi-ê kàu-su mā chē tī hia, tī in ê sim-lāi teh sio͘ⁿ:”

2:7 Chit-ê lâng ná-ē án-ne kóng, I án-ne sī í-keng tek-chōe Siōng-chú ah.Tû-liáu Siōng-chú í-gōa, siáⁿ-mih lâng ē-tàng sià-bián lâng ê chōe?”

2:8 Ia-so͘ sim-lāi mā chai-iáⁿ in te sio͘ⁿ siaⁿ-mi̍h, chiū kóng:” Lín sī án-chóaⁿ tìam sim-lāi te cheng-piān chit-ê sū?

2:9 Sī tùi chit-ê lâng kóng「Lí ê chōe í-keng tit sià-bián ah!」á-sī 「Khí-lâi! Theh lí ê chhn̂g-pho͘ lâi kiâⁿ」, tó chi̍t-hāng khah kán-tan?

2:10 Che sī beh hō͘ lín chai-iáⁿ Góa tī tē-siong ū sià-chōe ê koân-pèng.” Chiū kā tiòng-hong-ê kóng:”

2:11 Góa kā lí kóng, khí-lâi! Thang theh lí ê chhn̂g-pho͘ tńg-khì lín tau.”

2:12 I sûi khí-lâi koh kā chhn̂g-pho͘ theh khí-lâi, tùi ta̍k-ke ê bīn-chêng kiâⁿ chhut-khì, só͘-í chèng-lâng lóng chin tio̍h-kiaⁿ, iā kui êng-kng hō͘ Siōng-chú kóng:” Goán chiông-lâi m̄-bat khòaⁿ-kòe chit-chióng tāi-chì”

2:13 Iâ-so͘ koh kiâⁿ-khì ô͘-piⁿ, ta̍k-ke lóng khì I hia, I chiū kàu-tō in.

2:14 I leh kiâⁿ ê sî, khòaⁿ-tioh A-le̍k-hui ê kiáⁿ Lī-bī chē tī siu-sòe ê só͘-chāi , chiū tùi i kóng:” Lí lâi tòe Góa” I chiū khí-lâi tòe Iâ-so͘.

2:15 Iâ-so͘ tī Lī-bī ê chhù chē-toh ê sî, ū chin-chē siu-sòe ê lâng kap ū chōe ê lâng lâi hām Iâ-so͘ kap i ê ha̍k-seng chē siang-toh, in-ūi chit-khoán lâng chin-chē, in lâi tòe Iâ-so͘.

2:16 Hoat-lī-sài-lâng hām kāu-su khòaⁿ-kìⁿ Ia-so͘ kap ū chōe ê lâng hām siu-sòe ê lâng chò-hóe chia̍h-pn̄g, chiū mn̄g I ê ha̍k-seng kóng:”I hām siu-sòe ê lâng kap ū chōe ê lâng chò-hóe chia̍h-pn̄g ò͘?”

2:17 Ia-so͘ thiaⁿ-kìⁿ chiū tùi in kóng:”Kiān-khong ê lâng bô su-iàu i-seng, chí-ū pēⁿ-lâng chiah su-iàu. Góa lâi sī beh chio ū chōe ê lâng, m̄-sī beh chhōe gī-lâng.

2:18 Tng Iok-hān ê ha̍k-seng kap Hoat-lī-sài-lâng tú—leh kìm-chia̍h ê sî, in lâi mn̄g Ia-so͘:”Iok-hān ê ha̍k-seng kap Hoat-lī-sài-lâng leh kìm-chia̍h, Lí ê ha̍k-seng ná-ē bô, che-sī cháiⁿ-iō͘ⁿ?

2:19 Ia-so͘ ìn in kóng:" Sin-lông kap phōaⁿ-chhōa-ê chò-hóe ê sî, phōaⁿ-chhōa-ê kám-ē kìm-chia̍h? Sin-lông iau hām phōaⁿ-chhōa-ê tàu-tīn ê sî in bē kìm-chia̍h.

2:20 Tān-sī ji̍t-chí nā kàu, sin-lông ē tùi in tiong-kan pī chhōa-cháu, hit-sî in chiū ē kìm-chia̍h.

2:21 Bô-lâng theh iáu-bōe kiu-chúi ê sin-pò͘ lâi pó͘ kū-saⁿ, nā-ū, sin-pò͘ ē kiù óa-lâi koh khiú phòa kū-ê, ē hō͘ i phòa kah chin lī-hāi.

2:22 Koh mā bô-lâng chiong sin ê chiú té-tì kū phôe-tē-á, nā-ū, sin-chiú ē chiong hit-khā tē-á piak-li̍h, chiū chiú hām tē-á lóng khí-liáu-liáu; sin-chiú chí-ū ē-tàng té-tì sin phôe-tē-á.”

2:23 Ia-so͘ tī an-hioh-ji̍t kiâⁿ-kòe be̍h-á-hn̂g ê sî, I ê ha̍k-seng sūn-chhiú khì tiah be̍h-sūi, soah hō͘ Hoat-lī-sài-lâng khòaⁿ tioh.

2:24 In tùi Ia-so͘ kóng:” Lí khòaⁿ leh! Lí ê ha̍k-seng sī án-chóaⁿ chò an-hioh-ji̍t só͘ kui-tēng bē-sái chò ê tāi-chì ah?”

2:25 Ia-so͘ ìn in:”Tāi-pi̍t-ông kap I ê pō͘-sio̍k leh tô-bông , tī iau kah bô thang chia̍h ê sî, só͘ chò ê sū, lín kám-bô tha̍k-kòe?

2:26 Hit-chūn sī A-pí-a-tha chò chè-si-tió͘ⁿ ê sî, I cháiⁿ-iō͘ⁿ li̍p-khì Siōng-chú ê chhù, theh pâi-lia̍t tī chè-tôaⁿ téng ê piáⁿ lâi chia̍h, iā theh hō͘ i ê pō͘-sio̍k. Chit-chióng piáⁿ chí-ū chè-si chiah ē-tàng chia̍h nā-niā.”

2:27 Koh kā in kóng:”An-hioh-ji̍t īs ūi-tio̍h lâng lâi siat ê, lâng m̄-sī ūi-tio̍h an-hioh-ji̍t lâi siat eh.

2:28 Só͘-í, Góa iā-sī an-hioh-ji̍t ê chú.”