Má-khó hok-im-su Tē Peh Chio͘ⁿ 馬可福音 第八章

Má-khó hok-im-su Tē Peh Chio͘ⁿ　

馬可福音　第八章

8:1 Tng hit kúi-ji̍t, koh ū chi̍t tōa-tīn lâng chū-chi̍p tī hia, iā bô siáⁿ-mih mi̍h-kiāⁿ thang chia̍h. I kiò ha̍k-seng lâi, ka in kóng:

8:2“ Góa chin m̄-kam chia̍h tōa-tīn ê lâng, in-ūi in kap Góa chò-hóe tī chia í-keng saⁿ-ji̍t, mā-bô chia̍h siáⁿ.

8:3 Góa nā hiān-chāi hō͘ in tńg-khì, in tī lō͘-tiong it-tēng ē chin phî-lô, in-ūi kî-tiong ū lâng sī tùi hn̄g-hn̄g ê só͘ chāi lâi è.

8:4 Ha̍k-seng ìn :”Tī chiah-ní phian-phiah ê só͘ chāi, beh khì tó-ūi theh piáⁿ, thang hō͘ chia̍h-ê lâng chia̍h-pá ? ”

8:5 Ia-so͘ mn̄g in:”Lín ū jōa-chē piáⁿ?”" Chhit tè.” In ìn。

8:6 I kiò ta̍k-ke chē lo̍h-lâi, chiū theh chit chhit tè piáⁿ lâi kî-tó, chiok-hok liáu peh-khui theh hō͘ ha̍k-seng, kà in pâi hō͘ hó-sè, in chiū chiong pé-khui ê piáⁿ pâi tī chèng-lâng ê bīn-chêng.

8:7 Iá-ū chi̍t-kóa sè-bóe hî, Ia-so͘ kî-tó liáu, iā kà in pâi tī chèng-lâng ê bīn-chêng.

8:8 Móe chi̍t-ê lâng long ū thang chia̍h, iā chia̍h kah chin pá, koh chia̍h ū chhun, siū-siu-leh iáu ū thang té chhit nâ.

8:9 Chò-hóe chia̍h piáⁿ ê lâng, chóng-kiōng ū sì-chheng ê. Ia-so͘ chiū hō͘ in tńg-khì,

8:10 Sûi kap ha̍k-seng chiō͘ⁿ chûn, kàu Tāi-má-lô-tāi ê só͘ chāi.

8:11 Hoat-lī-sài-phài ê lâng cháu lâi tiâu-cha Ia-so͘, kiò I pìⁿ chi̍t-ê tùi thiⁿ-ni̍h lâi ê sîn-jiah, ūi-tio̍h thang chhì-thàm I.

8:12 Ia-so͘ thó͘  chi̍t-ê tōa-khùi, kóng:”Chit-ê sè-tāi ūi-siáⁿ-mi̍h kiû sîn-jiah leh? Góa si̍t-chāi ka lín kóng, tī chit-ê sè-tāi it-tēng khòaⁿ bē-tio̍h sîn-jiah.”

8:13 I chiū lī-khui in, sûi chio͘ⁿ-chûn khì tùi-bīn hōaⁿ.

8:14 Ha̍k-seng bē-kì-tit tòa piáⁿ, chûn-téng kan-taⁿ ū chi̍t-tè piáⁿ, í-gōa long-bô mi̍h-kiāⁿ.

8:15 Ia-so͘ tùi in kóng:”Lín tio̍h kéng-séng, chù-ì Hoat-lī-sài-phài ê lâng ê éng-hióng-la̍t kap Hi-lu̍t ê sè-le̍k ê kan-siap.”

8:16 Ha̍k-seng hō͘-siong thó-lūn chhai-chhek:”Lāu-su sī-m̄-sī te kóng lán bô tòa piáⁿ chit-hāng sū!”

8:17 Ia-so͘ chai-iáⁿ in leh siō͘ⁿ siàⁿ, chiū kóng:” Lín ūi-siáⁿ-mi̍h te thó-lūn tòa piáⁿ ê sū? Lín kám iáu-bē léng-ngō, iáu-bē chheng-chhó mah? Kám kóng lín ê sim-khiàu iáu-bē khui mah?”

8:18 Lín ū ba̍k-chiu khiok khòaⁿ bô, ū hīⁿ-khang iā thiaⁿ bô, iā long bē-kì-tit mah?

8:19 Góa peh gō͘ tè piáⁿ pun hō͘ gō͘-chheng ê lâng, lín khioh chia̍h chhun ê, té jōa-chē láng?” In ìn:” Cha̍p-jī kha.”

8:20 “ Koh peh chhit tè piáⁿ hō͘ sì-chheng lâng chia̍h, lín khioh chia̍h chhun ê, té jōa-chē láng?” In kóng “Ū chhit láng.”

8:21 Ia-so͘ mn̄g in:”Án-ne lín bêng-pe̍k á-bē?”

8:22 In kiâⁿ lâi-kàu Pek-sài-tài, ū lâng chhōa chi̍t-ê ba̍k-chiu bô khòaⁿ-kìⁿ ê, lâi kiû Ia-so͘ bōng i.

8:23 Ia-so͘ chiū khan hit-ê lâng ê chhiú, chhōa I khì chng-gōa, chiū phùi-nōa tī I ê nn̄g-lúi ba̍k-chiu, koh hōaⁿ-chhiú tī I ê sin-chiō͘ⁿ, mn̄g I kóng:”Lí khòaⁿ tio̍h siáⁿ-mih?”

8:24 I sûi kia̍h thâu khí-lâi, kóng:”Góa khòaⁿ-tio̍h lâng, in ná-chhiō͘ⁿ chhiū-á, teh kiâⁿ lō͘.”

8:25 Sòa-lo̍h Ia-so͘ hōaⁿ-chhiú tī I ê ba̍k-chiu, I chi̍t-ē thí-khui koh siông-sè khòaⁿ, chiū oân-choân hoe-ho̍k, ta̍k-hāng mi̍h-kiāⁿ long khòaⁿ-kah chin chheng-chhó.

8:26 Ia-so͘ chiū kiò I tńg-khì in-tau, koh kóng:” Liân ji̍p-khì chit-ê chng-thâu mā m̄-thang.”

8:27 Ia-so͘ kap ha̍k-seng kè-sio̍k khí-kiâⁿ, ǹg Kai-sat-lī-a Hui-li̍p-pí hia-ê chng-thâu khì, le kiâⁿ ê sî mn̄g ha̍k-seng :”Lín ū thiaⁿ lâng teh kóng Góa sī siáⁿ-mih lâng bô?”

8:28 In kóng:”Ū lâng kóng Lí sī kiâⁿ sé-lé ê Iok-hān; mā-ū lâng kóng sī Í-lī-a; koh ū lâng kóng Lí sī sian-ti tiong ê chi̍t-ê.”

8:29 I koh mn̄g in kóng:”Nā-sī lín leh! Lín kóng Góa sī siⁿ-mih lâng?”Pí-tek ìn I :”Lí sī Ki-tok.”

8:30 Ia-so͘ chiū chin sīm-tiōng thê-chhéⁿ in, m̄-thang kā pa̍t-lâng kóng.

8:31 Iā khai-sí tùi in kóng bêng:”Góa tek-khak ē siū chin-chē thòng-khó͘, hō͘ tió͘ⁿ-lo、chè-si hām kàu-su khì-sak, koh pī chhú sí-hêng, keng-kòe saⁿ-ji̍t āu ē koh-oa̍h.”

8:32 Ia-so͘ chiong chiah-ē ōe kóng kah chiāⁿ pe̍h, Pí-tek khiok kiú I, lâi chí-chek I.

8:33 M̄-ku Ia-so͘ oat-kòe-khì ǹg hia-ê ha̍k-seng, lâi chí-chek Pí-tek kóng:”Sat-tàn! Thè-khì  Góa ê āu-bīn! In-ūi lí ê sio͘ⁿ-hoat m̄-sī Siōng-chú ê, sī lâng ê.”

8:34 Sûi kiò chèng-lâng kap ha̍k-seng óa-lâi, tùi in kóng:”Nā ū lâng beh lâi tòe Góa, tio̍h-ài seng chiong ka-tī ê sio͘ⁿ-hoat khǹg chi̍t-piⁿ, sêng-tam i ka-tī èng-ū ê chek-jīm lâi tòe Góa.

8:35 In-ūi nā-sī sio͘ⁿ beh pó-chûn ka-tī ê sèⁿ-miā ê, tek-khak ē sit-khì, m̄-ku hia-ê ūi-tio̍h Góa kap Siōng-chú ê hó-siau-sit lâi hòng-khì ê, pó-chèng ē tit-tio̍h pó-chûn.

8:36 Lâng nā-sī thán-tio̍h choân sè-kài, lâi sit-lo̍h i ê sèⁿ-miā, ū siáⁿ-mih lī-ek?”

8:37 Lâng iau ē-thang ēng siáⁿ-mih chiong sèⁿ-miā ōaⁿ tò-tńg-lâi leh?

8:38 Tī chit-ê hoān kan-îm kap siâ-ok ê sè-tāi, nā-ū lâng ūi-tio̍h sìn Góa kap Góa ê ōe lâi kám-kak kiàn-siàu ê, tng Góa tī Pē ê êng-kng kap chèng sèng ê thiⁿ-sài lâi ê sî, iā-beh lia̍h hit-ê lâng chò kiàn-siàu.”