Má-khó hok-im-su Te Chhit Chio͘ⁿ 馬可福音第七章

Má-khó hok-im-su Te Chhit Chio͘ⁿ 

馬可福音第七章

7:1 Ū kúi-ê Hoat-lī-sài phài ê lâng kap kúi-ê kàu-su chò-hóe tùi Iâ-lō͘-sat-léng, lâi kàu Ia-so͘ hia.

7:2 In bat khòaⁿ-kìⁿ I ê ha̍k-seng ū ê ēng bō chheng-khì ê chhiú, chiū-sī bô sé-chhiú te chia̍h-pn̄g.

7:3 In-ūi Hoat-lī-sài phài ê lâng hām Iû-thài-lâng long ē siú kó͘-chá-lâng ê si̍p-koàn, chhiú nā sé bô chheng-khì chiū bô chia̍h-pn̄g;

7:4 Khì chhài-chhī-á tńg-lâi, nā-bô sé-seng-khu mā-bô chia̍h-pn̄g, iáu-ū chē-chē kî-thaⁿ ê kui-kí, long-sī chi̍t-tâi chi̍t-tāi chiàu-lē chun-siú, liân sé poe-á, koàn-á, tang-khì téng mi̍h-kiāⁿ iā-sī án-ne.

7:5 Hoat-lī-sài phài ê lâng kap kàu-su mn̄g I kóng:”Lí ê ha̍k-seng sī án-chóaⁿ bô chiàu kó͘-chá-lâng ê si̍p-koàn, ēng bô chheng-khì ê chhiú chia̍h-pn̄g?”

7:6 Ia-so͘ ìn: “ Í-sài-a-su chí tioh lín chia ê ké-mō͘-ûi-siān ê lâng só͘ kóng ê , kóng kah chin-hó. Hit-pún chheh án-ne kóng:”Chia-ê peh-sèⁿ ēng chhùi chun-kèng Góa, sim kio̍k lī Góa hn̄g-hn̄g.

7:7 In ēng lâng ê kui-kí tòng-chò chin-tō lâi kàu-tō lâng, só͘-í kèng-pài Góa iā-sī khang-khang.

7:8 In-ūi lín í-keng khì-sak Siōng-chú ê kài-bēng, kan-ta siú lâng só͘ hoan-hù ê,

7:9 Koh kóng:”Lín sī chin-chiàⁿ khì-sak Siōng-chú ê kài-bēng, kan-ta beh siú lâu hō͘ lín ê si̍p-siok.

7:10 Mô͘-se kóng:「Tio̍h iú-hàu pē-bó」; koh kóng「Chiù-chhàm pē-bó ê , tio̍h chiong I chhú-sí-hêng.」

7:11 Lín tian-tó-kóng:「Lâng nā tùi ka-tī ê pē-bó kóng: Góa só͘ eng-kai hō͘ lín ê ióng-ló-kim, í-keng hōng-hiàn hō͘ Siōng-chú à,」

7:12 Án-ne lín chiū m̄-chún i hû-ióng i ê pē-bó.

7:13 Che chiū-sī lín siú si̍p-siok, khì-sak Siōng-chú ê tō-lí ê chèng-kù. Lín iau chò chē-chē lūi-sū ê tāi-chì.”

7:14 Ia-so͘ koh oat-kòe-lâi ǹg bîn-chiòng, kā in kóng:”Lín tio̍h chù-ì thiaⁿ Góa só͘ kóng ê ōe, koh tio̍h-ài liáu-kái.

7:15 Hoân-nā tùi lâng ê gōa-bīn ji̍p-khì ê, bē hō͘ hit-ê lâng a-cha, chí-ū tùi lāi-bīn chhut-lâi ê chiah-ē.

7:16 Ū hīⁿ-khang thang thiaⁿ ê, tio̍h chù-ì thiaⁿ.”

7:17 Ia-so͘ lī-khui in, ji̍p-khì chhù-lāi, ha̍k-seng lâi mn̄g I tú-chiah só͘ kóng ê ì-sù sī siáⁿ-mih.

7:18 Ia-so͘ sûi ìn in:”Liân lín iā chiah-ní bô tì-hūi? Chin-chiàⁿ bē liáu-kái hoân-nā tùi lâng gōa-bīn ji̍p-khì ê bē hō͘ lâng a-cha ò͘?

7:19 In-ūi m̄-sī ji̍p-khì tī I ê sim, sī ji̍p-khì tī pak-tó͘, chòe-āu pàng tī bé-tháng.”I án-ne kóng sī chí só͘ ū chia̍h ji̍p-khì ê mi̍h-kiāⁿ long sī í-keng chheng-khì ê.

7:20 Koh kóng:”Tùi lâng lāi-bīn chhut-lâi ê chiah-ē hō͘ lâng a-cha,

7:21 In-ūi lāi-bīn chiū-sī tùi lâng ê lāi-sim hoat chhut-lâi ê pháiⁿ liām-thâu、su-thong、

7:22 Thau-the̍h、thâi-lâng、kan-îm、tham-chîⁿ、siâ-ok、chà-khi、hó͘ⁿ-sek、chi̍t-tò͘、húi-pòng、kiau-ngō͘、cháu-hóe ji̍p-mô͘.

7:23 Chia̍h só͘-ū ê pháiⁿ long-sī tùi lāi-bīn chhut-lâi ê, chiah-ē hō͘ lâng a-cha khì.”

7:24 Ia-so͘ tùi hia khí-kiâⁿ, ǹg Thài-ní、Se-tùn ê só͘-chāi khì, ji̍p-khì tòa tī chhù-lāi, bô ài hō͘ lâng chai-iáⁿ, khiok am-khám bōe-tiâu.

7:25 Tú-hó ū chi̍t-ê cha-bó͘-lâng, I ê sè-hàn cha-bó͘-kiáⁿ hō͘ pháiⁿ-mi̍h-á tîⁿ tio̍h, chai-iáⁿ Ia-so͘, chiū lâi kūi tī I ê kha-chêng.

7:26 Chit-ê cha-bó͘-lâng sī Hi-liap lâng, siok Sū-lī-hui-nî-ki ê cho̍k; I kiû Ia-so͘ chiong pháiⁿ-mi̍h-á kóaⁿ lī-khui in châ-kiáⁿ.

7:27 Ia-so͘ tùi i kóng:”Tio̍h ài hō͘ jî-lú seng chia̍h-pá, theh jî-lú ê piáⁿ hiat hō͘ káu-á chia̍h sī m̄-tio̍h.”

7:28 Cha-bó͘-lâng ìn I:”Chú à! Bô-m̄-tio̍h, khak-si̍t sī án-ne; m̄-ku káu-á mā ē-tàng tī toh-à-kha chia̍h hia-ê gín-á lak-lo̍h-lâi ê piáⁿ-iù.”

7:29 Ia-so͘ chiū tùi I kóng:”In-ūi chit-kù ōe, lí thang tńg-khì; thái-ko kúi í-keng lī-khui lín cha-bó͘-kiáⁿ à.”

7:30 I tńg-khì chhù, khòaⁿ-tio̍h gín-á tó-tī bîn-chhn̂g téng, thái-ko kúi í-keng lī-khui à.

7:31 Ia-so͘ koh lī-khui Thài-ní, keng-kòe Se-tùn, ān Te-ka-pho-lī ê tiong-ng lâi kàu Ka-lī-lī ô͘.

7:32 Ū lâng chhōa chi̍t-ê hīⁿ-khang kap nâ-âu long sit-khì kong-lêng ê lâng lâi chhōe Ia-so͘, kiû I ēng chhiú hōaⁿ tī chit-ê lâng sin-chiō͘ⁿ lâi kî-tó.

7:33 Ia-so͘ khan i lī-khui chèng-lâng, khì lēng-gōa chi̍t-piⁿ, ēng chéng-thâu-á chhi̍h i nn̄g-pêng ê hīⁿ-khang, koh ēng ka-tī ê chéng-thâu-á ún chhùi-nōa boah tī i chhùi-chi̍h ê thâu-chêng,

7:34 Kia̍h-thâu ǹg thiⁿ suh chi̍t-ê tōa-khùi, liân-āu tùi I kóng: ”Í-hoat-tāi! ”Ì-sù chiū-sī“khui khí-lâi! ”

7:35 Hit-ê lâng ê hīⁿ-khang sûi khui-khì, chhùi-chi̍h mā lēng-khì, ōe iā kóng kah chin chheng-chhó.

7:36 Ia-so͘ kau-tāi in mài tùi lâng kóng-khí chit-hāng sū, tān-sī I jū kau-tài, in jū sì-kòe khì kóng hō͘ lâng chai.

7:37 Thiaⁿ-tio̍h ê lâng long kám-kak chin hi-hán, kóng : ”I só͘ chò ê sū lóng sī hó, liân hīⁿ-khang pháiⁿ-khì ê iā ē thiaⁿ kìⁿ, bē kóng-ōe ê iā ē kóng. ”