Má-khó hok-im-su Tē Káu Chio͘ⁿ 馬可福音 第九章

Má-khó hok-im-su Tē Káu Chio͘ⁿ

馬可福音　第九章

9:1 Ia-so͘ koh tùi in kóng:”Góa si̍t-chāi kā lín kóng, khiā tī chia ê, ū lâng tī iáu-bē tam-tio̍h sí ê chu-bī í-chêng, tek-khak ē khòaⁿ-tio̍h Siōng-chú ê kok ēng I ê tōa  khùi-la̍t hián-hiān.”

9:2 Keng-kòe la̍k-ji̍t āu, Ia-so͘ chio Pí-tek、Ngá-kok、Iok-hān tiām-tiām-á khì peh-chiō͘ⁿ chi̍t-chō koân-soaⁿ . I khiā tī in ê bīn-chêng, sûi ǹg in kái-piàn I ê hêng-chōng,

9:3 I ê saⁿ hoat-chhut kng, koh ū-kàu pe̍h, phiò-pò͘-ê mā bô-lâng ē-tàng phiò kah chiah pe̍h.

9:4 Hut-jiân, ū Í-lī-a hām Mô͘-se ǹg in hián-hiān, iā kap Ia-so͘ kóng-ōe.

9:5 Pí-tek tùi Ia-so͘ kóng :”Lāu-su! Lán tī chia ū-káu hó! Goán lâi tah saⁿ-chō pò͘-pêⁿ, chi̍t-chō hō͘ Lí, chi̍t-chō hō͘ Mô͘-se, koh chi̍t-chō hō͘ Í-lī-a.”

9:6 In-ūi I m̄-chai tio̍h kóng siáⁿ-mih chiah-hó, koh in-ūi ta̍k-ê long chin khióng-hông.

9:7 Tú-hó ū hûn-chhái lâi-kàu in tiong-kan khàm khí-lâi, koh ū siaⁿ-im tùi hûn-lāi chhut-lâi,“Chit-ūi sī Góa só͘ thiàⁿ ê kiáⁿ, lín tio̍h-ài thiaⁿ I ê ōe.”

9:8 Hut-jiân, ha̍k-seng chi̍t-ē khòaⁿ sì-chiu-ûi, bô bat ê lâng, chí-ū Ia-so͘ kap in tī hia

9:9 Kiâⁿ loh soaⁿ ê lō͘-tiong, Ia-so͘ hoan-hù in kóng:”Góa iáu-bē tùi sí koh-oa̍h ê sî, lín bē-sái chiong kin-á-ji̍t só͘ khòaⁿ-tio̍h ê sū kah lâng kóng.”

9:10 Ha̍k-seng chiong chit-kù ōe kì tī sim-lāi, khiok hō͘-siong thó-lūn”Tùi sí koh-oa̍h”sī siáⁿ-mih ì-sù.

9:11 In chiū mn̄g I :”Kàu-su ūi-siáⁿ-mi̍h kóng Í-lī-a tio̍h-ài tāi-seng lâi?”

9:12 Ia-so͘ kóng:”Í-lī-a khak-si̍t ài tāi-seng lâi heng-khí bān-hāng-sū; tān-sī sèng-keng kám-m̄-sī ū kóng-tio̍h beh ū chi̍t-ūi, I tio̍h-ài siū chin-chē ê kan-khó͘, koh hō͘ lâng khòaⁿ-bô-khí?

9:13 Góa kā lín kóng, Í-lī-a í-keng lâi-kòe à, lâng iā chhìn-chhái khoán-thāi I, tū chiàu sèng-keng só͘ kì-chāi koan-hē I ê.”

9:14 Ia-so͘ lâi-kàu ha̍k-seng hia, khòaⁿ-tio̍h chē-chē lâng ûi in, koh ū kàu-su hām in piàn-lūn.

9:15 Ta̍k-ê chi̍t-ē khòaⁿ-tio̍h Ia-so͘, long chin ì-gōa, chiū cháu-lâi ǹg I chhéng-an.

9:16 Ia-so͘ mn̄g in kóng:”Lín leh hām in piàn-lūn siáⁿ-mih?”

9:17 Kûn-chiòng ê tiong-kan ū chi̍t-ē lâng ìn I kóng:”Lāu-su à! Góa chhōa góa ê kiáⁿ lâi kàu Lí chia, I sī khì hō͘ siâ-sîn tîⁿ-tio̍h chôaⁿ bē kóng-ōe.

9:18 Bô-lūn I tī tó-ūi, siâ-sîn long lêng-tī I, chiong I siak-loh thô͘-kha, hō͘ I chhùi-khí-kin kā tiâu-tiâu, chhùi lâu pe̍h-po, kui-seng-khu tēng kho̍k-kho̍k. Góa í-keng chhiáⁿ kòe Lí ê ha̍k-seng lâi chiong siâ-sîn kóaⁿ chhut-khì, m̄-ku in khiok bô hoat-tō͘.”

9:19 Ia-so͘ ìn :”Â-à! Lín chiah-ē m̄-sìn ê lâng à, Góa ē-tàng tī lín-chia lōa-kú? Góa beh lím-nāi lín kàu tang-sî leh ? Kín chhōa I lâi.”

9:20 In chiū chhōa I kòe-lâi. I chi̍t-ē khòaⁿ-tio̍h Ia-so͘, siâ-sîn sûi hō͘ I ê seng-khu kiù  khí-lâi, tó-lo̍h-khì thô͘-kha, tī hia péng-lâi-péng-khì, chhùi phùi pe̍h-po.

9:21 Ia-so͘ mn̄g I ê lāu-pē kóng:”I hoān chit-ê pēⁿ lōa-kú à?”Ìn :”Tùi sè-hàn khai-sí.

9:22 Siâ-sîn beh hāi-sí I, tiāⁿ-tiāⁿ chiong I chhia-lo̍h hóe-tui á-sī sak-lo̍h chúi-nì. Taⁿ Lí nā ē, kiû Lí lîn-bín goán, pang-cho͘ goán.”

9:23 Ia-so͘ tùi I kóng :”Lí nā beh sìn, tùi beh sìn ê lâng lâi kóng, ta̍k-hāng tāi-chì long ē ta̍t-sêng.”

9:24 Chit-ê gín-á ê lāu-pē sûi hoah (Ū ê pán-pún ke siá”lâu ba̍k-sái”tī chit jī ê thâu-chêng):” Góa beh, tān-sī góa ê sìn put-chiok, kiû Lí pang-chō͘ góa."

9:25 Ia-so͘ khòaⁿ-kìⁿ chē-chē lâng chò-hóe cháu óa-lâi, chiū chí-chek hit-ê siâ-sîn, kóng:”Lí chit-ê chhòng-tī lâng bē-tàng kóng-ōe ê siâ-sîn, Góa bēng-lēng lí tùi chit-ê gín-á ê seng-chiō͘ⁿ chhut-lâi, bē-sái koh ji̍p-khì.”

9:26 I chi̍t-ē tōa-siaⁿ hoah, hit-ê siâ-sîn hō͘ gín-á ê seng-khu kiú ka chin siong-tiōng, chiah chhut-khì. Chit-ê gín-á chi̍t-sî-chūn ná-chhin-chhiō͘ⁿ sí-khì ê khóaⁿ, só͘-í tōa pō͘-hūn ê lâng kóng :”I sí-khì ah.”

9:27 M̄-ku Ia-so͘ khì khan I ê chhiú, hû I khí-lâi, I chiū khiā khí-lâi.

9:28 Tng Ia-so͘ ji̍p-khì chhù-lāi, ha̍k-seng óa-lâi sè-siaⁿ mn̄g I:”Goán sī án-chóaⁿ bē-tàng chiong I kóaⁿ-chhut-khì?”

9:29 Ia-so͘ ìn:”Nā-m̄-sī ēng kî-tó kap kìm-chia̍h, chit-khoán siâ-sîn kóaⁿ bē chhut-khì.”

9:30 In lī-khui hit-ê só͘-chāi, keng-kòe Ka-lī-lī ê sî, Ia-so͘ m̄-ài hō͘ lâng chai-iáⁿ.

9:31 In-ūi I beh kà I ê ha̍k-seng, kóng :”Góa teh-beh hō͘ lâng kau hō͘ koaⁿ-hú, in beh thâi-sí Góa, m̄-ku keng-kòe saⁿ-ji̍t āu, Góa ē koh-oa̍h.”

9:32 Ha̍k-seng thiaⁿ-bô I kóng ê ì-sù, mā m̄-káⁿ mn̄g I.

9:33 In lâi-kàu Ka-pe̍k-lông. Ia-so͘ tī chhù-lāi mn̄g ha̍k-seng :”Tú-chiah lín tī lō͘-nih, sī leh thó-lūn siáⁿ-mih?”

9:34 In long tiām-tiām bô èng-siaⁿ, in-ūi in tī lō͘-nih hō͘-siong te cheⁿ beh chò láu-tōa.

9:35 Ia-so͘ chē-lo̍h-lâi, kiò cha̍p-jī ê ha̍k-seng óa-lâi, kā in kóng:”Nā-ū lâng goān-ì chò thâu-è, i it-tēng tio̍h chò ta̍k-ke ê chhe-ēng, chò lâng ê po̍k-jîn.”

9:36 Sûi chhōa chi̍t-ê gín-á kòe-lâi, hō͘ I tī ha̍k-seng ê tiong-kan, koh kā i phō khí-lâi, tùi in kóng:

9:37“ Hoân-nā-sī tī Góa ê miâ chiap-thāi chhiō͘ⁿ chi̍t-ê gín-á, chiū-sī chiap-thāi Góa; kìⁿ-nā chiap-thāi Góa ê, m̄-sī chiap-thāi Góa, sī chiap-thāi hit-ūi chhe Góa lâi chia ê.”

9:38 Iok-hān tùi Ia-so͘ kóng:”Lāu-su, goán khòaⁿ-tio̍h ū lâng hōng Lí ê miâ chiong siâ-sîn kóaⁿ chhut-khì, goán chiū kìm-chí i, in-ūi i bô lâi tòe goán.”

9:39 Ia-so͘ hôe-tap :”M̄-bián kìm-chí i, in-ūi bô chi̍t-ê hōng Góa ê miâ lâi kiâⁿ koân-lêng ê, ē chhìn-chhài húi-pòng Góa.

9:40 Bô kong-kek lán ê, chiū-sī teh pang-chō͘ lán ê.

9:41 Nā-ū-lâng in-ūi lín sī sio̍k-tī Góa, chiū hō͘ lín chi̍t-poe chúi thang lim ê, Góa si̍t-chāi kā lín kóng, i bē-tàng bô tit-tio̍h pò-sio͘ⁿ.

9:42 Nā-ū-lâng hō͘ sìn Góa ê lâng ê tiong-kan, ū chi̍t-ê bî-sè-ê lī-khui Góa,  lêng-khó ēng tōa-tè chio̍h-bō pa̍k tī i ê ām-kún, tìm lo̍h-khì hái-nih.

9:43 Ká-sú lí ū chi̍t-ki chhiú hō͘ lí lī-khui Góa, tio̍h ài sûi kā chám-tn̄g,

9:44 Sui-bóng lí ê sin-thé bô kiān-choân, tān-sī ē-tàng tit-tio̍h éng-oán ê sèⁿ-miā, sī pí ū nn̄g-ki chhiú lo̍h-kàu tē-ga̍k, tiàm-tī bē hoa-khì ê hóe ni̍h khah-hó.

9:45 Ká-sú lí ū chi̍t-ki kha hō͘ lí lī-khui Góa, sûi kā chām khí-lâi.

9:46 Lêng-khó͘ kiám chi̍t-ki kha, thang tit-tio̍h éng-oán ê sèⁿ-miā, m̄-thang nn̄g-ki kha hó-hó pī tàn lo̍h-khì tē-ga̍k.

9:47 Ká-sú ū chi̍t-lúi ba̍k-chiu hō͘ lí lī-khui Góa, chiū kā I ó͘-khí-lâi, thang chhun chi̍t-lúi ba̍k-chiu ji̍p thian-kok, che pí ū nn̄g-lúi hō͘ lâng tàn lo̍h-khì tē-ga̍k kha-hō.

9:48 Hia ê thâng bē sí, hóe sī bē hoa-khì ê.

9:49 In-ūi beh ēng hóe tòng-chò iâm kā sīⁿ khí-lâi. Só͘-ū ê chè-mi̍h long ài ēng iâm sīⁿ.

9:50 Iâm sī hó mi̍h-kiāⁿ, m̄-ku nā-sī bô bī, ē-tàng ū sím-mi̍h pān-hoat hō͘ I koh kiâm? Lín ê lāi-bīn tio̍h ài ū iâm, pí-chhú hô-hó siong-chhù.