Má-khó hok-im-su Tē Cha̍p Chioⁿ 馬可福音 第十章

Má-khó hok-im-su   Tē Cha̍p Chioⁿ

馬可福音　第十章

10:1 Ia-so͘ tùi hia chhut-hoat, lâi-kàu Iû-thài ê pian-kài kap Io̍k-tàn hô gōa it-tài. Chi̍t tōa-tīn lâng chū-chi̍p tī I ê bīn-chêng, I koh chiàu-siông kóng-khí Siōng-chú ê ōe, kap in hun-hióng.

10:2 Ū Hoat-lī-sài-phài ê lâng lâi mn̄g I: " Chò tiong-hu ê kám ē-sái kap i ê bó͘ lī-hun?” In án-ne mn̄g ê ì-sù sī-beh chhì-thàm Ia-so͘.

10:3 Ia-so͘ ìn :”Mô͘-se sī án-chóaⁿ kau-tài lín è?”

10:4 “Mô͘-se iông-ún lâng siá chit-tiō͘ⁿ lî-hun-su, chiū ē-tàng lī-hun.” In án-ne hôe-tap.

10:5 Ia-so͘ kóng:“Mô͘-se sī in-ūi lín ê sim chin-ngē, só͘-í chiah ū siá chit-tiâu kui-tēng.”

10:6 M̄-ku tī goân-pún chhòng-chō ê sî, Siōng-chú chō lâng, ū lâm ū lú.

10:7 Só͘-í lâng tio̍h lī-khui I ê pē-bó, kap I ê bó͘ kiat-ha̍p, nn̄g-ê lâng chiâⁿ chò chit-thé.

10:8 Kì-jiân sī án-ne, hu-hū bô koh chài sī nn̄g-ê lâng, sī í-keng chiâⁿ-chò chit-thé à.

10:9 Só͘-í Siōng-chú phòe-ha̍p ê, lâng m̄-thang kā thiah lī-khui.”

10:10 Kàu in ji̍p-khì chhù-lāi, ha̍k-seng koh thê-khí chit-hāng sū mn̄g Ia-so͘.

10:11 I tùi in kóng:”Nā-ū-lâng kap I ê bó͘ lī-hun koh chhōa pat ê, chiū-sī hoān kan-îm , ko͘-hū I ê bó͘;

10:12 Chò bó͘ ê nā kap I ê ang lī-hun koh chài kè, iā-sī hoān kan-îm.

10:13 Ū lâng chhōa sè-hàn gín-á lâi-kàu Ia-so͘ bīn-chêng, chhiáⁿ I ēng-chhiú hōaⁿ tī in ê sin-chioⁿ lâi chiok-hok , soah hō͘ I ê ha̍k-seng chí-chek.

10:14 Ia-so͘ chi̍t-ē khòaⁿ-tio̍h án-ne chiū chin siū-khì, tūi hia-ê ha̍k-seng kóng:”Tio̍h ún-chún sè-kiáⁿ lâi Góa chia, m̄-thang cho͘-chí in, in-ūi tī Siōng-chú ê kok-tō͘ long sī  chit-khoán lâng.

10:15 Góa chin sīm-tiōng kā lín kóng, nā-ū-lâng beh niá-siū Siōng-chú ê kok-tō͘, nā-bô chin-chhiūⁿ gín-á, choa̍t-tùi bē-tàng ji̍p-khì.”

10:16 Chôaⁿ sûi khí phō gín-á tī I ê heng-chêng, ēng chhiú hōaⁿ in ê thâu-khak, chi̍t-ê chi̍t-ê kā in chiok-hok.

10:17 Tī Ia-so͘ chiah-beh chhut-gōa ê sî, ū chi̍t-ê lâng cháu lâi kūi tī I ê bīn-chêng, mn̄g I kóng:”Ū-kàu-hó ê Lāu-su, góa tio̍h-ài khì chò siáⁿ-mih tāi-chì chiah ē-tàng sêng-chiap éng-oán ê oa̍h-miā leh?

10:18 Ia-so͘ mn̄g i kóng:”lí sī-án-chóaⁿ kóng Góa ū-kàu-hó? Tû-liáu Siōng-chú í-gōa bô chi̍t-ê sī hó-ê.

10:19 Lán ê kài-bēng lí mā lóng chai, pau-koa: M̄-thang thâi-lâng、M̄-thang kan-îm、M̄-thang thau-the̍h、M̄-thang chò ké kiàn-chèng、M̄-thang phiàn lâng、Tio̍h hàu-kèng pē-bú”

10:20 I ìn:”Lāu-su, chiah-ê kài-bēng góa tùi sè-hàn it-ti̍t chun-siú kàu-taⁿ.”

10:21 Ia-so͘ chù-ba̍k khòaⁿ i , iū thiàⁿ-sioh i, tùi i kóng:”Lí iau kiám chò chi̍t-hāng, chiū-sī bē-tiāu lí só͘-ū-ê, chiong tit-tio̍h ê chîⁿ, pun hō͘ sàn-hiong-lâng, án-ne lí tī thiⁿ-téng pit-tēng ū châi-pó; pēng-chhiáⁿ lâi tòe Góa.”

10:22 I thiaⁿ-tio̍h chia̍h-ê ōe, bīn-sek soah chin pháiⁿ khòaⁿ, thâu-khak lê-lê lī-khui, in-ūi I ê châi-sán chin-chē.

10:23 Ia-so͘ khòaⁿ-liáu i sì-ûi ê lâng , liân-āu tùi ha̍k-seng kóng:”Ū-chîⁿ-lâng beh ji̍p Siōng-chú ê kok-tō͘  chin-chiàⁿ bô kán-tan neh !”

10:24 Ha̍k-seng thiaⁿ-liáu chia̍h-ê ōe kiaⁿ-chi̍t-tiô. Ia-so͘ koh sòa-loh kóng:”Lín siông-sè thiaⁿ leh, nā-ū-lâng siō͘ⁿ beh khò i ê chîⁿ-châi ji̍p-khì Siōng-chú ê kok-tō͘, he-sī chin bô-khó-lêng ê tāi-chì!

10:25 Beh nǹg-kòe piⁿ-á-mn̂g ê lo̍k-tô, iau pí châi-chú beh ji̍p-khì Siōng-chú ê kok-tō͘  khah kín !”

10:26 Ha̍k-seng chiū chin put-an, tùi I kóng:"Nā-án-ne siáⁿ-mih-lâng ē tit-tio̍h kiù ah?”

10:27 Ia-so͘ chù-ba̍k khòaⁿ in, kóng:" Tùi lâng lâi khòaⁿ sī bô pān-hoat, m̄-ku tùi Siōng-chú khiok m̄-sī án-ne, in-ūi Siōng-chú tak-hāng tāi-chì long ē-hiáu.”

10:28 Pí-tek sûi tùi I kóng:" Lí khòaⁿ, goán í-keng hòng-khì só͘-ū-ê lâi tòe Lí ah!”

10:29 Ia-so͘ hôe-tap:" Góa chin sīm-tiōng kā lín kóng, nā-ū-lâng ūi-tio̍h Góa kap soan-thoân Siōng-chú ê hó-siau-sit, chôaⁿ hòng-khì ka-tī ê chhù-theh, á-sī hiaⁿ-tī、chí-mōe、pē-bú、chhân-hn̂g,

10:30 Tī I chi̍t-sì-lâng it-téng ē tit-tio̍h pah-pōe ê chhù-the̍h、hiaⁿ-tī、chí-mōe、lāu-bú、jî-lú、chhân-hn̂g, koh ē siū pek-hāi, tī chiông-lâi tit-tio̍h éng-oán ē sèⁿ-miā.

10:31 Chóng-sī chin-chē kiâⁿ tī thâu-chêng ê lâng, beh pìⁿ lō͘-bóe, tī lō͘-bóe ê beh chò thâu-chêng.”

10:32 In kiâⁿ ǹg Iâ-lō͘-sat-léng ê lō͘-tiōng, Ia-so͘ kiâⁿ tī thâu-chêng, ha̍k-seng kám-kak chin kî-koài, tòe tī āu-piah ê lâng mā chin kiaⁿ-hiâⁿ. Ia-so͘ kiò cha̍p-jī ê ha̍k-seng óa-lâi, chiong I só͘ teh-beh tú-tio̍h ê tāi-chì kā in kóng:”

10:33 "Khòaⁿ leh! Lán khì kàu Iâ-lō͘-sat-léng ê sî, Góa ē pī lâng lia̍h-khì kau hō͘ chè-si-tióⁿ hām kàu-su, in ē phòaⁿ Góa sí-hêng, chiong Góa sang khì gōa-kàu-lâng ê chhiú-tiong.

10:34 In ē hí-láng Góa, tùi Góa ê bin phùi chhùi-nōa, koh ēng piⁿ phah Góa, chiah thâi-sí Góa. M̄-ku saⁿ-ji̍t āu, Góa ē koh-oa̍h.”

10:35 Se-pí-thài ê kiáⁿ Ngá-kok、Iok-hān kiâⁿ lâi Ia-so͘ ê bīn-chêng, kóng:" Lāu-su, Bô-lūn goán ǹg Lí kiû siáⁿ-mih, chhiáⁿ Lí hō͘ goán.”

10:36 Ia-so͘ ìn in:" Lín ài Góa ūi lín chò sím-mi̍h?”

10:37 In kóng:" Tng Lí tit-tio̍h êng-kng ê sî, chhiáⁿ Lí hō͘ goán chi̍t-ê chē tī Lí ê chiàⁿ-pêng, chi̍t-ê chē tī tò-pêng.”

10:38 Ia-so͘ kóng:" Lín m̄-chai lín só͘ kiû ê sī siáⁿ-mih, Góa só͘ beh lim ê poe, lín kam lim ē loh? Góa só͘ beh siū ê sé, lín kam siū ē khí ?”

10:39 In ìn :" Goán ē.” Ia-so͘ kóng:"Góa só͘ lim ê poe, lín iā beh lim, Góa só͘ siū ê sé, lín iā beh niá-siū;

10:40 M̄-ku beh chē tī Góa ê chiàⁿ-pêng a̍h-sī tò-pêng, m̄-sī Góa ē-tàng hō͘ lín ê, he-sī í-keng ūi siáⁿ-mih-lâng chún-pī, chiū beh hō͘ I è.”

10:41 Lēng-gōa cha̍p-ê ha̍k-seng thiaⁿ-tio̍h ê sî, chiū tùi Ngá-kok、Iok-hān khí tōa siū-khì.

10:42 Ia-so͘ kiò in óa-lâi, tùi in kóng:"Lín chai-iáⁿ, tī gōa-kok-lâng ê tiong-kan ū pī in jīm-tēng ê thóng-tī-chiá lâi tī-lí in, iā phài léng-siù koán-lí in.

10:43 Tān-sī tī lín tiong-kan m̄-sī án-ne. Tī lín tiong-kan nā-ū-lâng beh chò tōa ê, it-tēng ài chò lín ê po̍k-jîn;

10:44 Tī lín tiong-kan nā-ū-lâng beh chò thâu, it-tēng tio̍h chò ta̍k-ke ê sè-hàn-è.

10:45 In-ūi Góa lâi m̄-sī beh hō͘ lâng ho̍k-bū, tian-tó sī beh lâi ho̍k-bū lâng, koh beh pàng-sat Góa ê sèⁿ-miā, chiong chē-chē lâng ê miā bé tò-tńg-lâi.”

10:46 In kiâⁿ lâi kàu Iâ-lī-ko ê sî, Ia-so͘ hām ha̍k-seng kap chē-chē lâng beh lī-khui Iâ-lī-ko ê sî, khòaⁿ-tio̍h chi̍t-ê ba̍k-chiu sit-khì kong-lêng ê lâng chē tī lō͘-piⁿ tán-thāi lâng pun mi̍h-kiāⁿ hō͘ i, miâ chò Ba-ti-mái sī Ti-mái ê kiáⁿ.

10:47 I thiaⁿ-tio̍h sī Ná-sat-le̍k ê Ia-so͘ lâi ah, sûi tōa-siaⁿ hoah:" Tāi-pi̍t ê kiáⁿ-sun Ia-so͘ ah! Lîn-bín góa o͘h!”

10:48 Cho̍k-chē lâng chek-pī I, m̄-chún I chhut-siaⁿ. I hoán-tńg lú tōa-siaⁿ hoah:" Tāi-pi̍t ê kiáⁿ-sun ah, lîn-bín góa!”

10:49 Ia-so͘ sûi khiā tī hia kóng:" Kiò I kòe-lâi.” In chiū kā hit-ê ba̍k-chiu khòaⁿ-bô ê lâng kóng:" Lí taⁿ an-sim, khí-lâi, Ia-so͘ kiò lí kòe-khì.”

10:50 I chiū chiong gōa-saⁿ thǹg khí-lâi, sûi thiàu-khí-lâi, kiâⁿ khì Ia-so͘ hia.

10:51 Ia-so͘ mn̄g I kóng:” Lí ài Góa theh lí chò siáⁿ-mih?” I ìn:" Lāu-su, góa ài beh ē-tàng khòaⁿ-kìⁿ.”

10:52 Ia-so͘ kóng:" Lí ē-sái tńg-khì ah! In-ūi lí ê sìn, hō͘ lí tit-tio̍h oân-choân hó-khì.” I chi̍t sùn-kan chiū sûi ū khòaⁿ-tio̍h, tòe Ia-so͘ ê āu-bīn kiâⁿ