Má-khó hok-im-su Tē Cha̍p-la̍k chio͘n 馬可福音 第十六章

Má-khó hok-im-su Tē Cha̍p-la̍k chio͘n

馬可福音 第十六章

16:1 An-hioh-ji̍t í-keng kiat-sok, Boa̍t-tāi-lia̍p ê Má-lī-a kap Ngá-kok ê lāu-bó Má-lī-a hām Sat-lô-bí, chún-pī hó cheng-iû beh khì boah Iâ-so͘ ê ûi-thé.

16:2 Chiū-sī tī chhit-ji̍t ê thâu-chi̍t-ji̍t ê thàu-chá, ji̍t-thâu chiah-bē chhut-lâi ê sî, in lâi-kàu bōng-tē,

16:3 Na kiâⁿ na kóng:"Ū siáⁿ-lâng thang thè lán kā bōng-chio̍h sóa-khui leh ?”

16:4 In-ūi hit-tè chio̍h-thâu siong-tong tōa-tè, tng in kia̍h-thâu chi̍t-ē khòaⁿ, hit-tè chio̍h-thâu chá chiū sóa-khui ah.

16:5 In li̍p-khì bōng-chhù lāi ê sî, khòaⁿ-tio̍h chi̍t-ê chhēng pe̍h-saⁿ ê siàu-liân-lâng chē tī chiàⁿ-pêng, soah khì hō͘ chhòa chi̍t-tiô.

16:6 I tùi in kóng:" Bián-kiaⁿ! Lín beh chhōe ê hit-ūi hō͘ lâng téng si̍p-jī-kè ê Ná-sat-le̍k lâng Iâ-so͘, I í-keng koh-oa̍h ah, I í-keng bô tī chia. Lâi khòaⁿ khǹg I ê só͘-chāi.

16:7 Lín khì kā I ê ha̍k-seng kap Pí-tek kóng:「Iâ-so͘ ē pí lín khah-chá kàu Ka-lī-lī. Lín ē tī hia khòaⁿ-tio̍h I. Sī chiàu I chin-chêng só͘ hoan-hù ê.」

16:8 In kiâⁿ-chhut bōng-chhù, chiū kín-cháu lī-khui bōng-tē, kiaⁿ kah phih-phih-chhoah, m̄-káⁿ kap jīm-hô-lâng kóng ōe, chin-chiàⁿ khì hō͘ kiaⁿ-tio̍h.

16:9 Tī chhit-ji̍t ê thâu-chi̍t-ji̍t , ji̍t-thâu chiah beh chhut-lâi ê sî, Iâ-so͘ chiū koh-oa̍h, I seng ǹg Boa̍t-tāi-lia̍p ê Má-lī-a hián-hiān,「Iâ-so͘ bat kā I sin-siō͘n ê chhit-ê siâ-sîn kóaⁿ chhut-khì.」

16:10 I khì kā hia-ê sò͘-siông kap Iâ-so͘ chò-tīn ê lâng kóng, hit-sî in tn̄g-leh ai-siong thî-khàu.

16:11 In thiaⁿ-tio̍h Iâ-so͘ koh-oa̍h ah, khì hō͘ Má-lī-a khòaⁿ-tio̍h, khiok m̄-khéng sìn.

16:12 Sòa-lo̍h, ha̍k-seng ê tiong-kan ū nn̄g-ê khì chng-kha. Tī pòaⁿ-lō͘ ê sî, Iâ-so͘ piàn lēng-gōa chi̍t-khoán hêng-chōng, ǹg in hián-hiān.

16:13 In tn̄g-khì kā kî-thaⁿ ê ha̍k-seng kóng, hia-ê ha̍k-seng mā m̄ siong-sìn.

16:14 Chòe-āu, cha̍p-it ê ha̍k-seng chē chò-hóe chia̍h-pn̄g ê sî, Iâ-so͘ ǹg in hián-hiān, chek-pī in ê m̄-sìn, kap tiâu-ti̍t,  in-ūi in m̄-sìn hia-ê tī I koh-oa̍h í-āu, khòaⁿ-tio̍h I ê lâng só͘ kóng ê ōe.

16:15 I koh tùi in kóng:" Lín khì sè-kài ê ta̍k kak-lo̍h, thoân hó-siau-sit hō͘ móe-chi̍t-ê-lâng thiaⁿ,

16:16 Chiap-siū koh niá sé-lé ê, it-tēng tit-tio̍h kiù; m̄ chiap-siū ê it-tēng pī tēng-chōe.

16:17 Chiap-siu ê lâng it-tēng ū ē-bīn ê sìn-hō hián-lō͘ chhut-lâi, chiū-sī hōng Góa ê miâ kóaⁿ-kúi; kóng sin ê gú-giân;

16:18 Chhiú ē lia̍h-chôa; nā lim tio̍h siáⁿ-mih to̍k-mi̍h, mā bē siong-tio̍h; chhiú hōaⁿ pēⁿ-lâng kî-tó, it-tēng ē hoe-ho̍k oân-choân.”

16:19 Chú Iâ-so͘ kap in kóng chia-ê ōe í-āu, chiū pī chiap chiō͘n thiⁿ-téng, chē tī Siōng-chú ê chiàⁿ-pêng.

16:20 Ha̍k-seng khì ta̍k só͘-chāi thoân hó-siau-sit. Chú kap in tâng-kang, hián-chhut Siōng-chú ê chò-ûi, lâi ìn-chèng in só͘ thoân-káng ê . A-mén.