Má-khó hok-im-su Tē cha̍p-gō͘ chio͘n 馬可福音 第十五章

Má-khó hok-im-su Tē cha̍p-gō͘ chio͘n

馬可福音 第十五章

15:1 Kàu thiⁿ-kng, chè-si-tió͘ⁿ kap tió͘ⁿ-ló、kàu-su kah choân gī-hōe ê lâng, ta̍k-ke má-siōng gī-koat, kā Ia-so͘ pak-khí-lâi, ah khì hō͘ Pí-lia̍p-to.

15:2 Pí-lia̍p-to mn̄g I kóng:" Lí sī Iû-thài-lâng ê ông sī-bô?” Iâ-so͘ ìn:" Lí kóng ê chiū-sī.”

15:3 Tōa-chè-si khòng-kò Iâ-so͘ chin-chē hang sū.

15:4 Pí-lia̍p-to koh mn̄g I kóng:" Lí khòaⁿ, in khóng-kò Lí ê sū-hāng chiah-chē tiâu, Lí kám-bô beh hôe-èng?”

15:5 Ia-so͘ iû-goân tiām-tiām, hō͘ Pí-lia̍p-to kám-kak chin siō͘ⁿ bē-hiáu.

15:6 Ta̍k-nî ê Pôaⁿ-kòe-cheh, chóng-tok long ē sūn chèng-lâng ê iàu-kiû, pang chi̍t-ê in só͘ boeh ê hoān-lâng.

15:7 Hit-sî ū chi̍t-ê kiò-chò Pa-lia̍p-pa ê, pī lia̍h kap chok-loān ê húi-tô͘ pa̍k chò-hóe. In ū hoān kòe sat-jîn àn-kiâⁿ.

15:8 Ta̍k-ke tōa-siaⁿ iàu-kiû chóng-tok chiàu óng-lē pān-lí.

15:9 Pí-lia̍p-to kóng :" Lín ài góa pang Iû-thài-lâng ê ông hō͘ lín sī-bô?”

15:10 I pún-lâi chiū chai, Tōa-chè-si sī in-ūi chi̍t-tò͘ Iâ-so͘, chiah kā I ah lâi.

15:11 M̄-ku hia-ê chè-si-tió͘n sái-lōng chèng-lâng, lēng-kó ōaⁿ-chò pang Pa-lia̍p-pa hō͘ in.

15:12 Pí-lia̍p-to ìn in:" Nā án-ne, lín kiò chò Iû-thài-lâng ê ông, góa tio̍h án-chóaⁿ pān I ?”

15:13 In tōa siaⁿ hoah:" Kā I tèng tiàm si̍p-jī-kè!”

15:14 Pí-lia̍p-to mn̄g:" Sī án-chóaⁿ? I ū hoān siáⁿ-mih chōe?” In koh-khah tōa-siaⁿ hoah-hiu:” Kā téng si̍p-jī-kè.”

15:15 Pí-lia̍p-to ūi-tio̍h beh hō͘ chèng-lâng hoaⁿ-hí, chiū kā Pa-liap-pa pang chhut khì hō͘ in, i ēng piⁿ phah Iâ-so͘ liáu, kā I kau hō͘ lâng téng  tī si̍p-jī-kè téng.

15:16 Ōe-peng kā Iâ-so͘ ah ji̍p-khì chóng-tok-hú ê īⁿ-lāi, koh chi̍p-ha̍p choân-tūi ê jîn-oân.

15:17 In kā I ōaⁿ chhēng chi̍t-niá chí-sek ê tn̂g-phàu, koh ēng chhì-phòe piⁿ chit-téng bián-liû ngē tì tī I ê thâu-khak-téng,

15:18 Jiân-āu khai-sí ǹg I kiâⁿ-lé kóng :" Kiong-hí ò͘, Iû-thài-lâng ê ông!”

15:19 Koh kiah chi̍t-ki lô͘-tek sut I ê thâu-khak, ǹg I ê bīn phùi-nōa, koh kūi lo̍h-khì pài I.

15:20 Án-ne kā hí-láng liáu, chiū kā hit-niá chí-phàu thǹg khí-lâi, kā I chhēng I goân-pún ê saⁿ. In chiū ah I chhut-khì, beh kā téng si̍p-jī-kè.

15:21 Ū chi̍t-ê Kó͘-lī-nāi lâng ê Se-bûn, I sī A-le̍k-san-tāi hām Ló-hu ê lāu-pē, tùi chng-kha lâi tú-hó beh keng-kòe hia, soah hō͘ in kiông-pek kap in chò-hóe kiâⁿ, thang tàu giâ Iâ-so͘ ê si̍p-jī-kè.

15:22 In ah Iâ-so͘ kàu tī kiò-chò Kok-kok-thaⁿ ê só͘ chāi,「Kok-kok-thaⁿ ê ì-sù sī thâu-khak óaⁿ ê só͘ chāi」

15:23 Phâng chi̍t-au chhām bu̍t-io̍h ê chiú hō͘ I lim, I m̄ lim.

15:24 Sūi kā I tèng tī si̍p-jī-kè téng , tī hia liu-khau pun I ê i-ho̍k, khòaⁿ siáⁿ-lâng ē tit-tio̍h siáⁿ-mih.

15:25 Iâ-so͘ pī in tèng tī si̍p-jī-kè ê sî, sī chá-khí káu-tiám.

15:26 Hit téng-koân ū kòa I ê chōe-chn̄g, siá「Iû-thài-lâng ê ông」.

15:27 In mā kā nn̄g-ê kiông-tō kap I chò-hóe tèng tī hia, chi̍t-ê chhāi tī chiàⁿ-pêng, chi̍t-ê chhāi tī tò-pêng.「Chá-chêng ê pán-pún ke chit-kù:

15:28 Án-ne chiū sêng-choân liáu keng-chheh só͘ kì-chài ê : I hō͘ lâng lia̍h-chò chōe-hoān ê chi̍t-ê.」

15:29 Tùi hia keng-kòe ê lâng phí-siò͘n I, hàiⁿ-thâu kóng:" Hó͘! LÍ chit-ê kóng beh thiah-tû Sèng-tiān, saⁿ-ji̍t āu beh koh kā khí-khí-lâi ê,

15:30 Taⁿ seng kiù ka-kī, chiū tùi si̍p-jī-kè téng lo̍h-lâi ā!”

15:31 Khiā tī hia ê chè-si-tió͘n hām kàu-su iā chhin-chhiō͘n án-ne siau-khián I, hō͘-siong kóng sńg-chhiò :" I kiù kòe bat-lâng, soah bē-tàng kiù ka-tī.

15:32 Í-sek-lia̍t ê ông Ki-tok, hiān-chāi Lí hō͘ goán khòaⁿ Lí tùi si̍p-jī-kè téng lo̍h-lâi, goán sūi sìn LÍ.” Liân tèng tī piⁿ-á ê kiông-tō mā án-ne thí-chhiò I.

15:33 Tùi tiong-tàu kàu ē-po͘ saⁿ-tiám , kui-ē o͘-thiⁿ-àm-tē.

15:34 Tī saⁿ-tiám ê sî,Iâ-so͘ chhut tōa-siaⁿ âu-kiò:" Í-lô-I! Í-lô-i! La̍h-má-sat-pak-tāi-nî?”「Ì-sù-sī: Góa ê Siōng-chú! Góa ê Siōng-chú! Ūi-siáⁿ-mi̍h pang-sat Góa?」

15:35 Khiā tī piⁿ-á, ū thiaⁿ tio̍h I teh âu-kiò ê, kóng:" Lín khòaⁿ, I teh kiò Í-lī-a!”

15:36 Ū chi̍t-ê lâng khì theh chi̍t-tè hái-mî ún chò͘, ēng lô-tek pa̍k leh, tu-khì hō͘ I suh, kóng:" Koh tán-chi̍t-ē, khòaⁿ Í-lī-a ē lâi kiù I á-bē.

15:37 Iâ-so͘ chhám kiò chi̍t-siaⁿ, chiū tn̄g-khùi.

15:38 Sèng-tiān ê tiùⁿ-lî tùi téng-thâu li̍h lo̍h-lâi kàu ē-kha, pìⁿ-chò nn̄g-pêng.

15:39 Hit-sî khiā tī Iâ-so͘ chiàⁿ tùi-bīn ê liân-tio͘n, khòaⁿ-tio̍h I tn̄g-khùi ê chêng-kéng, án-ne kóng:" Chit-ê lâng chin-chiàⁿ sī Siōng-chú ê Kiáⁿ!”

15:40 Iáu-ū chi̍t-kóa khiā tī hn̄g-hn̄g teh khòaⁿ ê hū-lú, hit tiong-kan ū Boa̍t-tāi-lia̍p ê Má-lī-a、koh-ū Sió-ngá-kok kap Iok-se ê lāu-bó Má-lī-a, hām Sat-lô-bí,

15:41 In long-sī Iâ-so͘ tī Ka-lī-lī ê sî-kî, leh ho̍k-sāi I, kun-tòe I ê ha̍k-seng, mā-ū chin-chē hām Iâ-so͘ chò-hóe khì Iâ-lō͘-sat-léng ê hū-lú tī hia khòaⁿ.

15:42 Kàu ji̍t-lo̍h ê sî, in-ūi tio̍h ūi bîn-á-chài ê Pôaⁿ-kòe-cheh, iā-sī An-hioh-ji̍t ê chêng chi̍t-ji̍t chò chún-pī,

15:43 Ū chi̍t-ūi A-lī-má-thài ê Iok-sek sī siū chun-kèng ê gī-oân, mā-sī him-bō͘  Siōng-chú ê kok-tō͘. I ióng-kám khì kìⁿ Pí-lia̍p-to, chún i khì siu Iâ-so͘ ê sin-si;

15:44 Pí-lia̍p-to bô-siáⁿ siong-sìn Iâ-so͘ í-keng sí ah, sūi kiò liân-tió͘n lâi mn̄g Iâ-so͘ sí lōa-kú ah.

15:45 Tng I tùi liân-tió͘n chai-iáⁿ sū-si̍t ê keng-kòe, chiū kā Iâ-so͘ ê sin-si hō͘ Iok-sek.

15:46 Iok-sek chún-pī chi̍t-tè siōng-hó ê pò͘, kā Iâ-so͘ ê sin-si khǹg tī téng-bīn kā pau hó-sè, khǹg li̍p-khì giâm-chio̍h só͘ ó͘ ê bōng-chhù lāi, koh kō chi̍t-tè tōa-chio̍h-thâu tòng tī bōng-chhù ê mn̂g-kháu.

15:47 Boa̍t-tāi-lia̍p ê Má-lī-a kap Iok-se ê lāu-bó Má-lī-a ū khòaⁿ-tio̍h bâi-chòng Iâ-so͘ ê só͘-chāi.