10 : 1 Chiah-ê tāi-chì liáu-āu , Chú koh kéng-soán chhit-cha̍p ê lâng , phài in nn̄g-ê nn̄g-ê chò I ê thâu-chêng , khì I só͘ beh khì ê ta̍k-ê siâⁿ-chhī ê tak só͘-chāi .
10 : 2 Chiū
tùi in kóng : ” Hn̂g-lāi tán beh siu-koah ê be̍h-á chin-chē , m̄-ku kang-lâng
chin-chió . Só͘-í lín tio̍h khún-kiû hn̂g-á ê chú-lâng , phài koh khah-chē lâng
lâi siu-koah i ê sit-thâu .
10 : 3 Lín
tio̍h khì! Góa phài lín chhut-khì , ná chin-chhiō͘ iô͘ⁿ-á ji̍p-khì chi̍t-tīn
chhâi-lông ê tiong-kan .
10 : 4
M̄-bián chah chîⁿ-tē-á , m̄-bián phāiⁿ hêng-lí , liân ê-á mā m̄-bián tòa ; kiâⁿ
tī lō͘-tiong mā bián hām lâng kóng-ōe .
10 : 5
Bô-lūn ji̍p-khì tó-chi̍t-ê ka-têng , tio̍h seng kóng chiok-hok ê ōe : ” Goān
Siōng-chú ê pêng-an kap lín tông-chāi . ”
10 : 6 Tī
hia nā ū chi̍t-ūi beh tit-tio̍h pêng-an ê lâng , lí só͘ kiû ê pêng-an chiū lîm-kàu
hit-ê ka-têng , nā-bô , hit-ê pêng-an chiū kui hō͘ lín .
10 : 7 Lín
nā tiàm tī hit-ê lí só͘ chiok-hok ê ka-têng , tio̍h kè-sio̍k tòa lo̍h-khì ,
sú-iōng in só͘ kiong-èng ê it-chhè , in-ūi chò-kang ê lâng tit-tio̍h kang-chîⁿ
sī eng-kai ê ; m̄-thang poaⁿ lī-khui chit-ê ka-têng .
10 : 8
Bô-lūn khì-kàu jīm-hô só͘-chāi , nā ū lâng chiap-thāi lín , chhiáⁿ lín chia̍h
siáⁿ-mih chiū theh lâi chia̍h .
10 : 9
Tio̍h i-tī hia-ê ū pēⁿ ê lâng , koh kā in kóng : ” Siōng-chú lâi kàu lín
tiong-kan ah .”
10 : 10
Bô-lūn khì-kàu tó-chi̍t-ê siâⁿ-chhī , nā bô lâng chiap-thāi lín , lín tio̍h khì
ke-lō͘ na-kiâⁿ na soan-pò͘ ,
10 : 11
Kóng : ” Liân lín chia-ê liâm tī góa ê-á-téng ê thó͘-hún , mā tī lín ê bīn-chêng
pōaⁿ lo̍h-lâi hêng lín ; sui-jiân sī ah-ne , lín tio̍h chai Siōng-chú ê kok-tō͘
í-keng kīn ah . ”
10 : 12 Góa
kā lín kóng , tī sìm-phòaⁿ hit-ji̍t , Só͘-to-má pí hiah-ê siâⁿ só͘ siū ê
hêng-hoa̍t ē khah khin!”
10 : 13 “
Ko-lia̍p-sìn ah , lí hāi ah! Pek-sài-tāi ah , taⁿ lí chhám ah! In-ūi in tī lín
tiong-kan só͘ kiâⁿ chiah-ê koân-lêng , nā chò tī Chhui-lô kap Se-tùn , in chá
toh moa môa-saⁿ koh chē tī hóe-hu téng jīn-chōe hóe-kái .
10 : 14 M̄-ku
tī sìm-phòaⁿ hit-ji̍t , Chhui-lô kap Se-tùn tio̍h siū ê hêng-hoa̍t iau pí lín
khah khin!
10 : 15
Ka-pek-lông ah , lí phah-sǹg ka-tī ē-tàng pī-thê chiō͘ⁿ-thiⁿ , kàu-sî ē pī sak
lo̍h-khì im-kan . ”
10 : 16 Koh
tùi ha̍k-seng kóng : ” Thiaⁿ lín ê ōe ê lâng , chiū-sī thiaⁿ Góa ê; koh
kū-choa̍t lín ê lâng , chiū-sī kū-choa̍t Góa ; kū-choa̍t Góa ê lâng , chiū-sī kū-choa̍t
phài Góa lâi ê .
10 : 17 Hit
chhit-cha̍p ê ha̍k-seng hoaⁿ-thâu-hí-bīn tńg-lâi , kóng : ” Chú ah! Goán hōng
Lí ê miâ , liân siâ-sîn mā sūn-ho̍k . ”
10 : 18
Ia-so͘ kā in kóng : ” Góa ū khòaⁿ-tio̍h Sat-tàn àn thiⁿ-téng poa̍h-lo̍h-lâi ,
chhin-chhiō͘ⁿ siám-tiān .
10 : 19 Góa
í-keng sù hō͘ lín lêng-le̍k thang ta̍h chôa kap giat-á , koh ē-tàng iâⁿ-kòe
tùi-te̍k só͘-ū ê khùi-la̍t , choa̍t-tùi bô chi̍t-hāng ē siong-tio̍h lín .
10 : 20
Mā-koh , m̄-thang in-ūi siâ-sîn sūn-ho̍k lín lâi hoaⁿ-hí , ài in-ūi lín ê miâ
pī kì tī thiⁿ-téng lâi hoaⁿ-hí . ”
10 : 21 Tī
hit-sî Ia-so͘ pī Sèng-sîn chhiong-móa kah chin hí-lo̍k , chiū kóng : ” Pē ah ,
Thiⁿ-tē ê Chú! Góa o-ló Lí , In-ūi Lí chiong chiah-ê tāi-chì ǹg chhong-bêng
láu-liān ê lâng chhàng khí-lâi , hoán-tńg ǹg gín-á hián-lō͘ . Thiⁿ-pē , sī-lah!
Che-sī Lí khòaⁿ-chò kah-ì ê .
10 : 22 Góa
só͘-ū ê it-chhè lóng sī Thiⁿ-pē kau hō͘ Góa ê ; Tû-liáu Thiⁿ-pē í-gōa , bô
chi̍t-ê bat Kiáⁿ sī siáⁿ-lâng ; koh tû-liáu Kiáⁿ hām Kiáⁿ só͘ goān-ì chí-sī ê
lâng í-gōa , bô lâng bat Thiⁿ-pē sī siáⁿ-lâng . ”
10 : 23
Ia-so͘ oat tńg-sin sè-siaⁿ kā ha̍k-seng kóng : ” Khòaⁿ ē tio̍h lín só͘ khòaⁿ ê
, hit-tùi ba̍k-chiu ē chin hoaⁿ-hí .
10 : 24 Góa
kā lín kóng , kó͘-chá chin-chē sian-ti hām kok-ông siō͘ⁿ beh khòaⁿ lín só͘
khòaⁿ-tio̍h ê , khiok khòaⁿ bē tio̍h , ài-beh thiaⁿ lín só͘ thiaⁿ-tio̍h ê , m̄
bē-tàng . ”
10 : 25 Ū
bó͘ chi̍t-ê kà lu̍t-hoat ê lāu-su lâi chhì-thàm Ia-so͘ , kóng : ” Lāu-su! Góa
eng-kai tio̍h chò siáⁿ-mih tāi-chì , chiah ē-thang tit-tio̍h éng-oán ê sèⁿ-miā ?
”
10 : 26
Ia-so͘ ìn : ” Lu̍t-hoat chheh sī siá siàⁿ ? Lí tha̍k-liáu án-chóaⁿ ? ”
10 : 27 I
hôe-tap : ” Lí tio̍h chin-sim、chin-sèng、chīn-ì thiàⁿ
Chú , chiū-sī lí ê Siōng-chú ; koh tio̍h-ài thiàⁿ chhù-piⁿ chin-chhiūⁿ ka-tī . ”
10 : 28 Ia-so͘
kóng : ” Lí kóng liáu chin tio̍h , lí chiàu ah-ne khì-chò , chiū ē tit-tio̍h . ”
10 : 29
M̄-ku , chit-ê lâng siō͘ⁿ beh tián ka-tī chin tio̍h , chiū mn̄g Ia-so͘ : ”
Siáⁿ-mih-lâng sī góa ê chhù-piⁿ ? ”
10 : 30 Ia-so͘
kóng : ” Ū bó͘ chi̍t-ê lâng án Iâ-lō͘-sat-léng khì Iâ-lī-ko siâⁿ , tú-tio̍h
thó͘-húi , in chhió͘ⁿ i ê i-ho̍k , koh kā phah kah hiám-sí , chiū chò in
lī-khui .
10 : 31
Tú-hó ū chi̍t-ê chè-si tùi hit-tiâu lō͘ kiâⁿ lâi , khòaⁿ-tio̍h hit-ê lâng ,
chiū siám tùi lēng-gōa chi̍t-pêng kiâⁿ-kòe .
10 : 32 Koh
mā-ū chi̍t-ê Lī-bī-lâng , siāng-khoán tùi chit-tiâu lō͘ lâi , khòaⁿ-tio̍h i ,
mā siāng-khoán án hit-pêng kòe-khì .
10 : 33
M̄-ku ū chi̍t-ê Sat-má-lī-a lâng kiâⁿ lâi kàu hia , khòaⁿ-tio̍h I , chiū
khó-liân i ,
10 : 34
Kiâⁿ óa—khì iōng ka-tī ê chiú kap iû tó tī i ê siong-kháu , iōng pò͘ kā pau hō͘
hó-sè , koh hû i khiâ chiō͘ⁿ ka-tī ê lû-á , chhōa i khì lú-koán chiàu-kò͘ .
10 : 35 Keh
ji̍t , chit-ê Sat-má-lī-a lâng theh nng-tè gîn-á hō͘ tiàm-thâu-ke , kóng : ”
Chhiáⁿ lí chiàu-kò͘ i , chîⁿ nā bô kàu , góa tò-tńg-lâi it-tēng hêng lí . “
10 : 36
Chāi lí khòaⁿ , chit saⁿ-ê lâng tó-chi̍t-ūi sī hit-ê hō͘ lâng chhió͘ⁿ ê
chhù-piⁿ ? ”
10 : 37 I
ìn : ” Sī hit-ê lîn-bín i ê . ” Ia-so͘ kā kóng : ” Lí chiū chiàu ah-ne khì-chò !
”
10 : 38 Ia-so͘
kap ha̍k-seng kè-sio̍k in ê hêng-thêng ê sî , I li̍p-khì bó͘ chi̍t-ê chng-thâu
. Ū chi̍t-ê hū-lú miâ-kiò Má-tāi , lâi chhōa I khì in tau hio̍h-khùn .
10 : 39
Má-tāi ū chi̍t-ê sió-mōe hō-chò Má-lī-a , khiok chē tī Ia-so͘ ê kha-chêng , choan-sim
thiaⁿ I só͘ kóng ê ōe .
10 : 40 Má-tāi
in-ūi bô-êng teh khoán beh chiau-thāi Ia-so͘ , chò kah sim-kông-hóe-to̍h chiū
cháu-lâi kā Ia-so͘ kóng : ” Chú ah! Goán sió-mōe páng góa chi̍t-ê leh bô-êng ,
Lí kam bô khòaⁿ-tio̍h ? Chhiáⁿ Lí kiò i lâi kā góa tàu-kha-chhiú . ”
10 : 41
M̄-ku Ia-so͘ kā ìn : ” Má-tāi! Má-tāi! Lí ūi-tio̍h chò bē-khì ê tāi-chì leh
hoan-ló ,
10 : 42 M̄-koh
chin-chiàⁿ su-iàu ê kan-taⁿ chi̍t-hāng ; Má-lī-a í-keng kéng-tio̍h siōng-hó ê
hit hūn , sī bô lâng chhió͘ⁿ ē khì ê .”
2019/02/06---08
沒有留言:
張貼留言