Lō͘-ka hok-im-su Tē-chap-it chio͘ⁿ 路加福音 第十一章

 11 : 1 Ia-so͘ khì tī chi̍t-ê só͘-chāi kî-tó , tńg-lâi in tiong-kan ê sî , ū chi̍t-ê ha̍k-seng kā kóng : ” Chhiáⁿ lí kà goán án-chóaⁿ kî-tó , chhiō͘ⁿ Iok-hān kà i ê ha̍k-seng siāng-khoán .”

11 : 2 Ia-so͘ chiū kóng : ” Lín kî-tó ê sî , tio̍h ah-ne kóng , goán tī thiⁿ-ni̍h ê Pē , goān Lí ê miâ sèng , Lí ê kok lîm-kàu , Lí ê chí-ì tit chiâⁿ , tī tē-nih chhin-chhiō͘ⁿ tī thiⁿ-ni̍h .

11 : 3 Kiû Lí sù goán ta̍k-ji̍t só͘ su-iàu ê chia̍h-mi̍h .

11 : 4 Sià-bián goán tek-chōe Lí ê , in-ūi goán iā í-keng sià-bián hia-ê khui-khiàm goán ê lâng . M̄-thang hō͘ goán tú-tio̍h chhì-thàm , tio̍h kiù goán thoat-lī ok-chiá ê ui-hia̍p .”

11 : 5 Ia-so͘ koh kóng : ” Lín tiong-kan siáⁿ-mih-lâng ū chi̍t-ê chhù-piⁿ , pòaⁿ-mê lâi lín tau phah mn̂g , kóng : ”「Pháiⁿ-sè lah! Góa beh lâi chioh saⁿ-tè piáⁿ ,

11 : 6 In-ūi góa ū pêng-iú tùi hn̄g-lō͘ lâi chhōe góa , tú-hó lóng bô mi̍h-kiāⁿ thang chiau-thāi i .」

11 : 7 I án lāi-bīn kā ìn :「Mài chhá lah , Mn̂g góa í-keng koaiⁿ hó-sè ah , gín-á mā hām góa tī bîn-chhn̂g téng leh khùn , bē-tàng khí-lâi theh hō͘ lí .」

11 : 8 Góa kā lín kóng , i m̄-sī in-ūi pêⁿ-pêⁿ chò chhù-piⁿ chiah khí-lâi theh hō͘ i , sī in-ūi chi̍t-ê chhù-piⁿ it-ti̍t tī hia chin jia̍t-chhiat khún-kiû , chiah khí-lâi chiàu i só͘ su-iàu ê theh hō͘ i .

11 : 9 Góa koh kā lín kóng , Lín tio̍h kiû , chiu-ē tit-tio̍h hôe-èng ; chhiau-chhōe chiu-ē chhōe-tio̍h ; lín lâi kiò mn̂g , chiu-ē kā lín khui .

11 : 10 In-ūi jīm-hô chi̍t-ê kiû ê ē tit-tio̍h , chhōe ê ē chhōe-tio̍h , kiò mn̂g ê ē kā i khui .

11 : 11 Lín tiong-kan chò lâng ê lāu-pē ê , siáⁿ-lâng ē tī i ê kiáⁿ thó piáⁿ ê sî , hoán-tńg hō͘ i chio̍h-thâu? Thó hî , tian-tó hō͘ i chôa?

11 : 12 Thó ke-nn̄g , ē hō͘ i giat-á ?

11 : 13 Lín chò-lâng sui-jiân m̄-sī kài-hó , mā chai-iáⁿ tio̍h theh hó-mi̍h hō͘ lín ê jî-lú , hô-hóng lín tī thiⁿ-téng ê Thiⁿ-pē , I kám-bē koh-khah iōng Sèng-sîn hō͘ kiû I ê lâng mah ? ”

11 : 14 Ia-so͘ tùi chi̍t-ê bô kóng-ōe ê lêng-le̍k ê lâng , kóaⁿ chhut chi̍t-ê siâ-sîn , siâ-sîn lī-khui í-āu , hit-ê lâng khai-sí ū kóng-ōe ê lêng-le̍k , ta̍k-ke lóng kám-kak chin hi-kî .

11 : 15 Ū chi̍t-kóa lâng sūi kóng : ” I sī khò kúi-ông Pia̍t-se-pok ê miâ kā kóaⁿ chhut-khì ê . ”

11 : 16 Koh ū lâng lâi chhì-thàm Ia-so͘ , tùi I kiû kiâⁿ hit-ê án thiⁿ-téng lâi ê sîn-jiah .

11 : 17 Ia-so͘ chai-iáⁿ in leh siō͘ⁿ-siáⁿ , chiū kā in kóng : ” Chi̍t-ê kok-ka ê lāi-pō͘ nā hun-lia̍t , ē pìⁿ-chò pùn-sò-tiô͘ⁿ ; chi̍t-ê ke-lāi nā sio-chhió͘ⁿ , it-tēng ê phòa-chhùi .

11 : 18 Sat-tàn nā ka-tī lāi-loān , i ê kok kam î-chhî ē lo̍h-khì ? In-ūi lín kóng Góa sī khò Pia̍t-se-pok lâi kóaⁿ-kúi .

11 : 19 Góa nā-sī khò Pia̍t-se-pok kóaⁿ chhut hia-ê siâ-sîn , lín ê chú-tē kóaⁿ kúi sī siáⁿ-lâng kā tàu-kha-chhiú ? In ka-tī ē phòaⁿ-toàn lín ê siō͘ⁿ-hoat .

11 : 20 Chóng-sī , Góa nā sī khò Siōng-chú ê khùi-la̍t chiong hia-ê siâ-sîn kóaⁿ chhut-khì , che chiū-sī Siōng-chú ê kok í-keng tī lín tiong-kan lah .

11 : 21 Choân-hù bú-chong ê lâm-sū chhî-siok leh kò͘-siú i ê chhù , i só͘-ū ê it-chhè lóng bē sit-lo̍h .

11 : 22 M̄-ku nā ū chi̍t-ê pí i khah ióng-chòng ê , lâi phah iâⁿ i , chiu-ē chiong i só͘ óa-khò ê chong-pī chhió͘ⁿ khì , iā pun só͘ chhió͘ⁿ-tio̍h ê mi̍h-kiāⁿ .

11 : 23 Bô kap Góa chò-tīn ê chiū-sī kap Góa tùi-li̍p ê , bô tàu-kha-chhiú chiong lâng chio chò-hóe ê , chiū-sī teh phah-sòaⁿ . ”

11 : 24 “Tng siâ-sîn lī-khui lâng ê sin-chiō͘ⁿ liáu-āu , khì ta-sò bô-bī ê tē-hng  cháu-thàu-thàu leh chhōe thang hio̍h-khùn ê só͘-chāi , kì-jiân chhōe-bô , chiū ka-tī siō͘ⁿ : ” Kui-khì tńg-lâi góa tu lī-khui ê hit-keng chhù . ”

11 : 25 Tńg-khì kàu-ui , khòaⁿ-tio̍h chhù-lāi khoán kah chin chheng-khì , koh bí-koan ,

11 : 26 Sūi chhut-khì chio chhit-ê pí i khah pháiⁿ ê kúi li̍p-khì tòa chò-hóe . Hit-ê lâng chòe-āu ê chêng-hêng pí chin-chêng koh-khah pi-chhám . ”

11 : 27 Tī Ia-so͘ tú-leh kóng chiah-ê ōe ê sî , hit tiong-kan chi̍t-ê hū-lú tōa-siaⁿ hoah : ” Hit-ê seⁿ LÍ koh chhī Lí tōa-hàn ê , chin ū hok-khì ah ! ”

11 : 28 Ia-so͘ ìn i : ” Sī-ah , m̄-ku hia-ê thiaⁿ Siōng-chú ê ōe lâi chhî-siú ê lâng , koh-khah ū hok-khì . ”

11 : 29 Tng lâng ná chi̍p óa-lâi Ia-so͘ ê bīn-chêng , I kè-sio̍k kóng : ” Chit sè-tāi ê lâng ê  sim-su chiaⁿ bái . Ká-nā thó beh khòaⁿ-tio̍h sîn-jiah , m̄-ku , tû-liáu Iok-ná ê sîn-jiah í-gōa , bô koh-chài ū sîn-jiah hō͘ in .

11 : 30 Tu chin-chhiūⁿ Iok-ná chiâⁿ-chò Nî-nî-bî lâng ê sîn-jiah siāng-khoán , Góa mā ē chò chit sè-tāi ê lâng ê sîn-jiah .

11 : 31 Tī sìm-phòaⁿ ê sî , lâm-hong ê lú-ông beh khí-lâi tēng chit sè-tāi ê chōe; in-ūi I sī tùi tē-kek lâi ê , beh thiaⁿ Só͘-lô-bûn tì-hūi ê ōe . Hiān chit-má tī chia ū chi̍t-ê pí Só͘-lô-bûn koh-khah tōa ê .

11 : 32 Tī sìm-phòaⁿ ê ji̍t , Nî-nî-bî lâng beh lâi tēng chit sè-tāi ê lâng ê chōe , in-ūi Nî-nî-bî lâng thiaⁿ-tio̍h Iok-ná lâi thoân Siōng-chú ê ōe , chiū sūi hóe-kái ah , tī chia ū chi̍t-ê pí Iok-ná koh-khah úi-tāi ê . ”

11 : 33 Bô lâng kā teng tiám khí-lâi khǹg tī bô lâng khòaⁿ ē-tio̍h ê só͘ chāi , á-sī theh mi̍h-kiāⁿ kā khàm leh , it-tēng hē tī toh-téng thang hō͘ li̍p-lâi ê lâng khòaⁿ-tio̍h kng .

11 : 34 Lí ê ba̍k-chiu chiū-sī lí sin-chiō͘ⁿ ê teng . Lí ê ba̍k-chiu nā kim , kui seng-khu chiū kng-piàng-piàng; ba̍k-chiu nā hoe , choân seng-khu chiū àm-sô-sô .

11 : 35 Só͘-í , lí tio̍h sè-jī m̄-thang hō͘ lí lāi-bīn ê kng àm-khì .

11 : 36 LÍ kui seng-khu nā kng , bô chi̍t-tiám-á àm , chiū ē kng iàⁿ-iàⁿ , chhin-chhiūⁿ teng ê kng leh chiò lí . ”

11 : 37 Iau teh kóng ê sî , ū chi̍t-ê Hoat-lī-sài-phài ê lâng lâi chhiáⁿ Ia-so͘ kap i chò-hóe chia̍h-pn̄g , I chiū ji̍p-khì chē toh .

11 : 38 Chit-ê Hoat-lī-sài-phài ê lâng khòaⁿ Ia-so͘ tī chia̍h-pn̄g chêng bô sé-chhiú kám-kak chin kî-koài .

11 : 39 Chú kā i kóng : ” Taⁿ lín Hoat-lī-sài-phài ê lâng kā-nā kā óaⁿ-pôaⁿ ê gōa-bīn sé chheng-khì niâ , lín lāi-bīn chhiong-móa thau-the̍h hām siâ-ok .

11 : 40 Lín chiah-ê gong-lâng ah , chò gōa-bīn ê , kám bô siâng-sî chò lāi-bīn?

11 : 41 Nā-sī lín kā chiah-ê khì-khū lāi-bīn ê mi̍h-kiāⁿ pun hō͘ hia-ê bô ê lâng , ah-ne , lín só͘-ū ê mi̍h-kiāⁿ chiū lóng chheng-khì ah .

11 : 42 “ Lín Hoat-lī-sài-phài ê lâng chhám ah! In-ūi lín kà lâng chiong po̍k-hô、 hôe-hiang-à kap ta̍k-hāng chhài-se ê cha̍p-hun chi-it hiàn hō͘ Siōng-chú , hia-ê kiâⁿ kong-gī thiàⁿ Siōng-chú ê sū hoán-tńg bô chù-tiōng . Chiah-ê goân-pún sī lín ài khì chò ê , koh hōng-hiàn ê tāi-chì mā bē-sái bián chò .

11 : 43 Lín Hoat-lī-sài-phài ê lâng ē hāi ō͘ ! In-ūi lín chin ài chē tī hōe-tn̂g lāi ê tōa-ūi , koh tī chhài-chhī-à hō͘ lâng chhéng-an mn̄g-hó .

11 : 44 Lín ē siū chiù-chhàm ō͘ ! In-ūi lín ná-chhiō͘ⁿ bô-lâng khòaⁿ ē chhut-lâi ê bōng , bô lâng chai-iáⁿ kiâⁿ kòe hit téng-bīn .

11 : 45 Hia-ê lu̍t-hoat ê kàu-su ê tiong-kan , ū chi̍t-ê hôe-èng Ia-so͘ kóng : ” Lāu-su! LÍ kóng chia-ê ōe mā kā goán bú-jio̍k chham—lo̍h . ”

11 : 46 Ia-so͘ chiū ìn i : ” Lín chia-ê kàu-su mā ē hāi ! In-ūi lín hō͘ lâng teh tī chin-chē kui-tiâu ê ē-bīn bē tín-tāng , lín ka-tī m̄-khéng chhut chi̍t-ki chéng-thâu-á kā póe khui . ”

11 : 47 Lín mā ū kàu chhám ! In-ūi lín khí-chō pī lín ê chó͘-sian só͘ sat-hāi ê sian-ti ê bōng .

11 : 48 Tùi ah-ne chai-iáⁿ lín m̄-niā jīm-tēng in só͘ chò ê , koh mā chàn-tông ; in-ūi , in sat-hāi liáu sian-ti , lín lâi ūi in chò bōng .

11 : 49 Só͘-í Siōng-chú ê sù-chiá bat kóng : 「Góa beh phài sian-ti hām sù-tô͘ khì in hia , ū-ê ē hō͘ in thâi-sí , ū-ê ē siū chin-chē khok-hêng .」

11 : 50 Án sè-kài ê siōng khí-thâu kàu-taⁿ , lâu chèng sian-ti ê hoeh ê hêng-hoa̍t beh lîm-kàu lín ,

11 : 51 Chiū-sī tùi A-pek khai-sí kàu Sat-ka-lī-a , I pī thâi tī chè-tôaⁿ hām sèng-tiān ê tiong-kan só͘ lâu ê hoeh ûi-chí . Góa kā lín kóng , hia-ê só͘-ū ê hêng-hoa̍t long ē lîm-kàu lín .

11 : 52 Lín chiah-ê kàu-su ē siū chiù-chhàm ! In-ūi lín kā beh li̍p-khì chai-bat ê mn̂g ê só-sî poeh-khì , ka-tī m̄ li̍p-khì , liân tú-beh li̍p-khì ê lâng lín mā kā tòng-tiâu leh . ”

11 : 53 Ia-so͘ í-keng án hia lī-khui , kàu-su hām Hoat-lī-sài-phài ê lâng khì-phut-phut cháu-khì kā ûi leh , chit-mn̄g I koh-khah chē tāi-chì ,

11 : 54 Siâng-sî leh siòng tú-hó ê ki-hōe , thang lia̍h I ê ōe-pèⁿ .

                                                 2019/02/12