24 : 1 M̄-ku tī chhit-ji̍t ê thâu-chi̍t-ji̍t, thiⁿ beh kng ê sî, in kap chi̍t-kóa lâng chiū tòa só͘ chún-pī ê phang-liāu khì Ia-so͘ ê bōng chêng,
24 : 2 In khòaⁿ-tio̍h chio̍h-mn̂g í-keng kō-khui,
24 : 3 In chi̍t-ē ji̍p-khì, soah bô khòaⁿ-tio̍h Ia-so͘ ê
sin-si.
24 : 4 Tng in iau teh siō͘ⁿ bē-hiáu ê sî, hut-jiân ū
nn̄g-ê lâng, chhēng kng phiâng-phiâng ê saⁿ lâi khiā tī in ê piⁿ-á.
24 : 5 In chhòa chi̍t-tiô, lóng kā bīn phak-lo̍h
thô͘-kha. Hit nn̄g-ê chiū kā in kóng:”Lín sī án-chóaⁿ tī si-lâng ê tiong-kan teh
chhōe oa̍h-lâng?
24 : 6 I bô tī chia, I í-keng koh-oa̍h. Tio̍h ài ē
kì-tit I iau tī Ka-lī-lī-séng ê sî, sī án-chóaⁿ kā lín kóng ê,
24 : 7「Góa it-tēng ē hō͘ lâng kau tī chōe-lâng ê chhiú, pī in
tèng tī si̍p-jī-kè téng, koh tē-saⁿ-ji̍t ē koh-oa̍h.」"
24 : 8 Hiah-ê hū-lú chiū siō͘ⁿ-khí Ia-so͘ só͘ kóng ê
ōe,
24 : 9 chôaⁿ lî-khui bōng-chhù tńg-khì, kā chiah-ê
tāi-chì lóng túi cha̍p-it ê ha̍k-seng kap kî-thaⁿ ê lâng kóng.
24 : 10 Kā ha̍k-seng kóng chiah-ê tāi-chì ê hū-lú
chiū-sī Boa̍t-tāi-lia̍p ê Má-lī-a hām Iok-a-ná, í-kip Ngá-kok ê lāu-bú Má-lī-a,
iáu-ū kap in chò-tīn ê kúi-ê hū-lú.
24 : 11 In só͘ kóng ê ōe, ha̍k-seng bô kā i tòng-chò
chi̍t-hôe-sū, mā-m̄ siong-sìn.
24 : 12 M̄-ku, Pí-tek peh khí-lâi, cháu-kàu bōng-chêng,
thâu-khak àⁿ lo̍h-khì khòaⁿ lāi-bīn, ká-nā khòaⁿ-tio̍h iù-tē-pò͘ khǹg tī
chit-pêng nā-tiāⁿ, i chiū tńg-khì in tau, tùi só͘ hoat-seng ê tāi-chì siō͘ⁿ bē
bêng-pe̍k.
24 : 13 Siāng tī hit-ji̍t, ha̍k-seng tiong-kan ê
nn̄g-ê teh-beh khì chi̍t-ê kiò-chò Í-má-ngo͘ ê chng-thâu, kū-lî Iâ-lō͘-sat-léng
tāi-khài ū cha̍p-it kong-lí.
24 : 14 In ná kiâⁿ ná teh tâm-lūn só͘ hoat-seng ê
tāi-chì.
24 : 15 In tu leh tâm-lūn ê sî, Ia-so͘ chhin-sin
óa-lâi kap in chò-hóe kiâⁿ;
24 : 16 M̄-ku, in ê ba̍k-chiu kah-nā ū mi̍h-kiāⁿ cha̍h
leh, soah jīn bē-chhut Ia-so͘.
24 : 17 Ia-so͘ mn̄g in: ”Lín ná kiâⁿ ná teh tâm-lūn
siáⁿ-mih, koh sī teh ai-siong siàⁿ?”
24 : 18 In kî-tiong chi̍t-ê miâ-chò Kek-liû-pa, ìn I
kóng: ”Tòa tī Iâ-lō͘-sat-léng ê lâng, kan-taⁿ lí chi̍t-ê m̄-chai-iáⁿ chit
kúi-ji̍t tī hia só͘ hoat-seng ê tāi-chì ê khoán?”
24 : 19 Ia-so͘ ìn: ”Sī siáⁿ-mih tāi-chì?” In kóng:”Chiū-sī
koan-hē Ná-sat-le̍k lâng Ia-so͘ ê tāi-chì, I sī chi̍t-ê sian-ti, tī Siōng-chú
hām chèng-lâng ê bīn-chêng, só͘ kóng só͘ chò ê lóng chin ū koân-lêng.
24 : 20 Goán hia-ê chè-si-tió͘ⁿ kap thâu-lâng kā
ah-khì phòaⁿ sí-hêng, tèng tī si̍p-jī-kè.
24 : 21 Goán it-hiòng só͘ kî-thāi ê hit-ūi beh lâi
chin-kiù goán Í-sek-lia̍t-lâng ê, chiū-sī I! M̄-niā ah-ne, chú-chiông chiah-ê
tāi-chì hoat-seng liáu-āu, kàu-taⁿ í-keng saⁿ-ji̍t ah!”
24 : 22 Iáu-koh ū, tī goán tiong-kan kúi-ê hū-lú hō͘
goán chin ì-gōa, in thàu-chá chiū khì Ia-so͘ ê bōng,
24 : 23 Khòaⁿ bô I ê seng-khu tī hit lāi-bīn, chiū
tńg-lâi kā goán kóng, in khòaⁿ-tio̍h thiⁿ-sài ǹg in hián-hiān, kā in kóng
Ia-so͘ í-keng koh-oa̍h!
24 : 24 Goán tiong-kan mā ū kúi-ê khì bōng-chhù, só͘
khòaⁿ-tio̍h ê tāi-chì hām hia-ê hū-lú só͘ kóng ê siāng-khoán, m̄-ku in bô
khòaⁿ-tio̍h Ia-so͘.”
24 : 25 Ia-so͘ kā in kóng: ”Hó͘, lín ê sim ū kàu tūn
neh! Bē-tàng siong-sìn sian-ti só͘ kóng it-chhè ê ōe.
24 : 26 Ki-tok kám m̄-sī tio̍h seng keng-kòe chiah-ê
khó͘-lān, chiah chin-ji̍p I ê êng-kng?”
24 : 27 Ia-so͘ chiū chiong Sèng-keng só͘ kì-chài
koan-hē I ê tāi-chì kā in soat-bêng, án Mô͘-se hām chèng sian-ti khai-sí
kóng-khí.
24 : 28 In teh-beh kàu in beh khì ê chng-thâu ê sî,
Ia-so͘ ná-chhiō͘ⁿ beh kè-sio̍k it-ti̍t kiâⁿ,
24 : 29 Chiū bián-kióng Ia-so͘ lâu leh, kóng: ”Chhiáⁿ
Lí hām goán chò-hóe tòa chia, in-ūi ji̍t í-keng àm, ji̍t-thâu mā lo̍h-soaⁿ ah!”
Ia-so͘ chiū ji̍p chng, kap in chò-hóe.
24 : 30 Ia-so͘ kap in chē toh ê sî, the̍h piáⁿ
chiok-siā, jiân-āu peh-khui pun hō͘ in.
24 : 31 In ê ba̍k-chiu chiah pī thí-khui, jīn-chhut I
sī Ia-so͘. M̄-ku sûi bô khòaⁿ-tio̍h I.
24 : 32 In chiū hō͘-siong kóng: ”Tng I hām láng kiâⁿ
tī lō͘-nih kap lán kóng ōe, koh soat-bêng Sèng-keng ê sî, lán ê sim-lāi kám-bô
chhin-chhiō͘ⁿ hóe leh to̍h?”
24 : 33 In sûi-sî khí-lâi, tńg-khì Iâ-lō͘-sat-léng,
chhōe-tio̍h cha̍p-it ê ha̍k-seng chiū kap in chò-hóe tī hia,
24 : 34 Kóng: ”Chú chin-chiàⁿ koh-oa̍h ah. I í-keng ǹg
Se-bûn hián-hiān à!”
24 : 35 In nn̄g-ê chiū chiong tī pòaⁿ-lō͘ só͘ tú-tio̍h
ê tāi-chì, hām Ia-so͘ peh-piáⁿ ê sî hō͘ in jīn chhut-lâi ê keng-kòe, lóng kóng
hō͘ in thiaⁿ.
24 : 36 In nn̄g-ê iáu-teh kóng chiah-ê tāi-chì ê sî,
Ia-so͘ chhin-sin khiā tī in ê tiong-kan, kóng: ”Goān lín pêng-an!”
24 : 37 In soah lóng chin kiaⁿ-hiâⁿ, lia̍h-chò sī khòaⁿ-tio̍h
kúi.
24 : 38 “Lín sī án-chóaⁿ leh put-an? Sim-lāi leh
giâu-gî?
24 : 39 Lín khòaⁿ Góa ê chhiú hām kha, si̍t-chāi sī
Góa pún-lâng, lín bong khòaⁿ-māi leh, in-ūi kúi bô-kut bô-bah, m̄-ku Góa lóng ū.”
24 : 40 I kóng soah, chiū kā chhiú hām kha hō͘ in
khòaⁿ.
24 : 41 Ha̍k-seng iáu-teh hoaⁿ-hí kah m̄-káⁿ siong-sìn
ê sî, Ia-so͘ kóng: ”Lín ū siáⁿ-mih mi̍h-kiāⁿ thang chia̍h bô?”
24 : 42 In chiū the̍h chi̍t-tè hang-hó ê hî hō͘ I .
24 : 43 I chiap kòe-lâi, sūi tī in ê bīn-chêng chia̍h
hō͘ in khòaⁿ.
24 : 44 Ia-so͘ chiū kā in kóng: ”Che chiū-sī Góa iau
kap ín chò-hóe ê sî kā lín só͘ kóng kòe ê, Mô͘-se ê lu̍t-hoat, kap sian-ti ê
chheh, Si-phian só͘ kì-chài koan-hē Góa ê tāi-chì lóng it-tēng ê èng-giām.”
24 : 45 Tùi ah-ne, I khui in ê sim-khiàu, hō͘ in ē
bêng-pe̍k Sèng-keng,
24 : 46 Koh kā in kóng: ”Sèng-keng ū ah-ne kì-chài,
só͘-í Ki-tok pit-su siū-khó͘, koh tī te- saⁿ-ji̍t tùi si-lâng tiong koh-oa̍h,
24 : 47 Só͘-í án Iâ-lō͘-sat-léng khai-sí, lín tio̍h
hōng I ê miâ thoân hóe-kái kap sià-chōe ê tō-lí kàu choân sè-kài.
24 : 48 Lín chiū-sī chiah-ê tāi-chì ê kiàn-chèng-jîn.
24 : 49 Góa beh phài Góa ê Pē só͘ èng-ún ê kàu tī lín
ê sin-chiō͘ⁿ, m̄-ku lín tio̍h-ài tòa chi̍t-ê siâⁿ-lāi thèng-hāu, ti̍t-kàu lín
niá-siū tio̍h án téng-koân lâi ê koân-lêng.”
24 : 50 Ia-so͘ chhōa in chhut-khì kàu Pek-tāi-nî, chiū
giah chhiú kā in chiok-hok.
24 : 51 Leh kā in chiok-hok ê sî, chiū lī-khui in, hō͘
Siōng-chú kā I thê-seng chiō͘ⁿ-khì thiⁿ-téng.
24 : 52 In chiū phak lo̍h-khì pài I, chiah hoaⁿ-hoaⁿ-hí-hí
tńg-khì Iâ-lō͘-sat-léng,
24 : 53 Kè-siok ta̍k-ji̍t tī sèng-tiān lāi o-ló
Siōng-chú .
2019/04/13 Koh-oa̍h-cheh ê chêng chi̍t lé-pài
siōng-ngó͘ 09 : 01 oân-sêng chho͘-kó.
沒有留言:
張貼留言