Sú-tô͘ hêng-toān Tē-jī chio͘ⁿ 使徒行傳 第二章

2 : 1 Gō͘-sûn-cheh chi̍t-ē kàu, sìn-tô͘ lóng lâi chū-chi̍p chò-hóe.

2 : 2 Hut-jiân ū siaⁿ chhin-chhiō͘ⁿ teh thàu tōa-hong, án thiⁿ-téng thoân-lâi, chhiong-móa in teh chē ê hit-keng chhù-lāi,

2 : 3 Chin-chē chhin-chhiō͘ⁿ hóe ê chi̍h chhut-hiān, hioh tī in ta̍k-lâng ê thâu-khak téng.

2 : 4 In chiū lóng hō͘ Sèng-sîn chhiong-móa, chiàu Sèng-sîn só͘ sió͘n-sù hō͘ in ê kháu-châi, khai-sí kóng gōa-kok-ōe.

2 : 5 Hit-sî, ū khiân-sêng ê Iû-thài-lâng, tùi sè-kài kok-kok tńg-lâi tòa tī Iâ-lō͘-sat-léng.

2 : 6 Tng in thiaⁿ-tio̍h chi̍t-ê siaⁿ, chiū lóng chip óa-khì, thiaⁿ-tio̍h in kóng ê ōe sī in ka-tī tē-hng ê gú-giân, ta̍k-ê lóng chôaⁿ gāng-khì,

2 : 7 Koh kám-kak chin kî-koài kóng: ”Éⁿ, chiah-ê leh kóng-ōe ê lâng, kám m̄-sī Ka-lī-lī lâng mah?

2 : 8 Lán móe chi̍t-ê lâng ná-ē lóng thiaⁿ-tio̍h in teh kóng lán ka-tī tòa ê só͘-chāi ê gú-giân?

2 : 9 Lán ū ê sī Phàⁿ-thê-a lâng, Bí-thài lâng, Í-lân lâng; hām tòa tī Bí-só͘-pho-tāi-bí, Iû-thài kap Ka-phàⁿ-to-ka, Pún-to, A-se-a,

2 : 10 Hut-lū-ka, Pông-hui-lī-a, Ai-ki̍p ê, kap kīn-óa Kó͘-lī-nāi Lū-bí-a tē-khu; í-kip Tùi Lô-má lâi ê lâng, bô-lūn sī Iû-thài-lâng ah-sī ka-ji̍p Iû-thài-kàu ê,

2 : 11 Kek-lí-tí lâng, A-lat-pek lâng, lóng thiaⁿ-tio̍h in ēng goán tē-hng ê gú-giân, kóng-khí Siōng-chú só͘ chò úi-tāi ê tāi-chì.

2 : 12 Tāi-ke lóng kám-kak chin hi-hán koh ioh-lâi ioh-khì, kóng: ”Che tàu-té sī siàⁿ tāi-chì?”

2 : 13 Mā-ū lâng kóng: ”In sī lim-tio̍h sin ê chiú teh chùi ah.”

2 : 14 M̄-ku Pí-tek hām cha̍p-it ê sù-tô͘ khiā-khí-lâi, tōa-siaⁿ kóng: ”Iû-thài-lâng hām só͘-ū tòa tī Iâ-lō͘-sat-léng ê lâng ah, lín tio̍h chai-iáⁿ chit-hāng tāi-chì, mā tio̍h siông-sè thiaⁿ góa só͘ beh kóng ê ōe.

2 : 15 Lín ioh chiah-ê lâng sī teh chiú-chùi, kî-si̍t m̄-sī ah-ne, in-ūi chit-má chiah tâⁿ-a chá-khí káu-tiám niâ.

2 : 16 Che tú-hó sī chiàu sian-ti Iok-jī só͘ kóng ê:

2 : 17 ”Siōng-chú kóng, Tī chòe-āu ê sî-kî, Góa beh ēng Góa ê Sèng-sîn ê khùi-la̍t chhiong-móa tī só͘-ū ê lâng. Lín ê jî-lú ē kóng ū-giân, lín ê siàu-liân-lâng ē khòaⁿ-tio̍h īⁿ-siōng, lín ê lāu-tōa-lâng ē chò chin-chē bang.

2 : 18 Tī hia-ê ji̍t Góa ē chiong Góa ê Sèng-sîn kàng-lo̍h tī Góa ê po̍k-jîn hām lú-pī ê sin-chiō͘ⁿ, in ē kóng Góa só͘ kau-tài ê ōe.

2 : 19 Tī thiⁿ-téng Góa ē hián-chhut kî-sū, tī tē-chiō͘ⁿ Góa ê hián-chhut sîn-jiah, ū hoeh, hóe kap hûn-bū.

2 : 20 Ji̍t-thâu ē pìⁿ-chò o͘-àm, goe̍h-niô͘ⁿ ē chin-chhio͘ⁿ hoeh hiah-nī âng, tī Chú úi-tāi êng-iāu lâi-lîm ê ji̍t-chí í-chêng ē ah-ne.

2 : 21 Kàu hit-ê sî-chūn, hoân-nā kiû-kiò Chú ê miâ ê lâng, chiu-ē tit-tio̍h kiù.

2 : 22 “Í-sek-lia̍t lâng ah, chhiáⁿ thiaⁿ góa kóng ê ōe, chiàu lín só͘ chai ê, Siōng-chú thong-kòe Ná-sat-le̍k lâng Ia-so͘, tī lín tiong-kan hián-sī I ê koân-lêng, kî-sū kap sîn-jiah, lâi ǹg lín chèng-bêng.

2 : 23 Siōng-chú chiàu I tiāⁿ-tio̍h ê chí-ì kap ū-tēng ē kè-ōe, kā I kau hō͘ lín, lín soah chioh-tioh put-hoat ê lâng ê chhiú, kā I tèng si̍p-jī-kè chhú-sí.

2 : 24 M̄-ku Siōng-chú chiong I án sí ê thòng-khó͘ tiong tháu-pàng chhut-lâi, hō͘ I koh-oa̍h, in-ūi I bē hō͘ sí-bông só͘ khòng-chè.

2 : 25 Koan-hē Ia-so͘ ê tāi-chì Tāi-pi̍t ū kóng kòe: ”Góa khòaⁿ-tio̍h Chú tiāⁿ-tiāⁿ tī góa ê bīn-chêng. In-ūi I tī góa ê chiàⁿ-pêng, góa chiū it-tēng bē pī sóa-khui.

2 : 26 Só͘-í góa ê sim hoaⁿ-hí, góa ê lêng hí-lo̍k, góa ê jio̍k-thé mā ē tī ǹg-bāng tiong an-jiân kòe-ji̍t.

2 : 27 In-ūi Lí it-tēng bē chiong góa ê lêng-hûn pàng-hē tī im-kan, iā bē hō͘ Lí kèng-khiân ê po̍k-jîn nōa-khì.

2 : 28 LÍ í-keng ū chiong chin-chē oa̍h-miā ê lō͘ chí-sī góa. Hō͘ góa tī Lí ê bīn-chêng chhiong-móa hí-lo̍k.”

2 : 29 “Hiaⁿ-tī chí-bōe à! Koan-hē sian-chó͘ Tāi-pi̍t ê tāi-chì, kóng khah pe̍h leh, i í-keng sí mā bâi-chòng à, koh i ê bōng kàu taⁿ iau tī lán chia.

2 : 30 Só͘-í, i chò chi̍t-ê sian-ti, iā chai-iáⁿ Siōng-chú pat ǹg i chiù-chōa, èng-ún beh tùi i ê kiáⁿ-sun ê tiong-kan, siat-li̍p chi̍t-ūi siū boah-iû ê, chē tī i ê pó-chō.

2 : 31 Tāi-pi̍t seng khòaⁿ-chhut koan-hē Ki-tok koh-oa̍h chit-hāng sū, kóng: I ê lêng-hûn bô pī pàng-hē tī im-kan, jio̍k-thé mā bô nōa-khì.

2 : 32 Chit-ūi Ia-so͘, Siōng-chú í-keng hō͘ I koh-oa̍h, goán lóng-sī chit-hāng tāi-chì ê kiàn-chèng-jîn.

2 : 33 I kì-jiân pī ko-seng kàu Siōng-chú ê chiàⁿ-pêng, koh án Thiⁿ-pē niá-siū só͘ èng-ún ê Sèng-sîn, chiū phài Sèng-sîn lâi chhiong-móa goán, chiū-sī lín hiān-chāi só͘ khòaⁿ-tio̍h, só͘ thiaⁿ-tio̍h ê.

2 : 34 Tāi-pi̍t pèng-bô khì-kàu thiⁿ-téng, m̄-ku ka-tī kóng: Siōng-chú tùi góa ê Chú kóng: LÍ lâi chē tī Góa ê chiàⁿ-pêng,

2 : 35 Tán Góa hō͘ lí ê te̍k-jîn chò lí ê kha-ta̍h-í.

2 : 36 Tùi ah-ne, só͘-ū ê Í-sek-lia̍t lâng tio̍h khak-si̍t chai-iáⁿ, chi̍t-ūi hō͘ lín kā tèng tī  si̍p-jī-kè ê Ia-so͘, Siōng-chú í-keng siat-li̍p I chò Chú, chò Ki-tok ah.”

2 : 37 Chèng-lâng thiaⁿ-tio̍h chiah-ê ōe, lāi-sim ná-chhiō͘ⁿ hō͘ to koah tio̍h, chiū tùi Pí-tek kap kî-thaⁿ ê sù-tô͘ kóng: ”Ah-ne goán tio̍h án-chóaⁿ chò?”

2 : 38 Pí-tek kóng: ”Lín tio̍h hóe-kái, móe chi̍t-ê lâng lóng tio̍h hōng Ia-so͘ Ki-tok ê miâ siū-sé, hō͘ lín ê chōe tit-tio̍h sià-bián, koh ē-tàng niá-siū Sèng-sîn ê lé-mi̍h.

2 : 39 In-ūi chit-ê èng-ún beh hō͘ lín kap lín ê jî-lú, í-kip só͘-ū tī hn̄g-hn̄g ê lâng, chiū-sī lán ê Siōng-chú só͘ chio lâi ê.”

2 : 40 Pí-tek iáu-koh lēng-gōa ēng chē-chē ōe chò kiàn-chèng, lâi kó͘-lē in, kóng: ”Lín tio̍h kiù ka-tī thoat-lī chit-ê siâ-ok ê sè-tāi.”

2 : 41 Tùi ah-ne chiap-siū i ê ōe ē lâng, lóng siū-sé. Hit-ji̍t bûn-tô͘ iok-lio̍k cheng-ka saⁿ-chheng lâng,

2 : 42 In lóng chhî-siok chun-siú sù-tô͘ ê kà-sī, iā ka-li̍p sìn-tô͘ ê seng-oa̍h, chò-hóe peh-piáⁿ, kî-tó.

2 : 43 Chèng sù-tô͘ kiâⁿ chin-chē kî-sū kap sîn-jiah, hō͘ tāi-ke lóng kèng-ùi in.

2 : 44 Sìn-tô͘ lóng chū-chi̍p chò-hóe seng-oa̍h, kong-ke ēng só͘-ū ê mi̍h-kiāⁿ,

2 : 45 Koh bē in ka-tī ê chhân-hn̂g kap ke-gia̍p, chiàu ta̍k-lâng ê su-iàu pun hō͘ in.

2 : 46 In ta̍k-ji̍t tang-sim ha̍p-ì khì tī sèng-tiān, koh chò-hóe tī chhù-lāi peh-piáⁿ, ēng hoaⁿ-hí kap sêng-si̍t ê sim chia̍h-pn̄g, o-ló Siōng-chú,

2 : 47 Iā tit-tio̍h chèng-lâng ê chheng-chàn. Hia-ê Chú só͘ beh chin-kiù ê lâng, ta̍k-ji̍t cheng-ka tī in ê tiong-kan.