Sú-tô͘ hêng-toān Tē-saⁿ chio͘ⁿ 使徒行傳 第三章

3 : 1 Ū chi̍t-ji̍t ê ē-po͘ saⁿ-tiám, chiū-sī ta̍k-ke kî-tó ê sî-kan, Pí-tek kap Iok-hān teh-beh kiâⁿ chiōⁿ-khì chin-li̍p sèng-tiān.

3 : 2 Ū chi̍t-ê lâng sī tùi chhut-sì chiū nńg-kha, ta̍k-ji̍t hō͘ lâng kng lâi chē tī sèng-tiān ê mn̂g-gōa, hit-ê mn̂g hō-chò“ Súi ê mn̂g”, lâi ǹg kiâⁿ li̍p sèng-tiān ê lâng thó mi̍h-kiāⁿ.

3 : 3 Tng i chi̍t-ē khòaⁿ-tio̍h Pí-tek kap Iok-hān mā teh-beh kiâⁿ li̍p sèng-tiān, chiū ǹg in kiû-thó thang tit-tio̍h.

3 : 4 Pí-tek hām Iok-hān chôaⁿ chù-ba̍k khòaⁿ i, Pí-tek kā i kóng: ”Lí khòaⁿ goán!”

3 : 5 I chiū lia̍h in kim-kim siòng, ǹg-bāng ē-tàng tùi in tit-tio̍h siáⁿ-mih.

3 : 6 Pí-tek kóng: ”Kim hām gîn góa lóng bô, tān-sī góa beh chiong góa só͘-ū ê hō͘ lí, góa hōng Ná-sat-le̍k lâng Ia-so͘ Ki-tok ê miâ, hō͘ lí peh-khí-lâi, koh ē-tàng kiâⁿ.”

3 : 7 Pí-tek chiū khì khan i ê chiàⁿ-chhiú, hō͘ i khiā khí-lâi; i ê kha hām kha-ba̍k sûi-sî ū la̍t-thâu,

3 : 8 Thiàu khí-lâi khiā leh, mā khai-sí kiâⁿ-lō͘, kap in chò-hóe ji̍p-khì sèng-tiān, ná kiâⁿ ná thiàu iā ná o-ló Siōng-chú.

3 : 9 Chèng-lâng khòaⁿ-tio̍h i teh kiâⁿ, teh gîm-si o-ló,

3 : 10 Jīn chhut-lâi i chiū-sī hit-ê tiāⁿ-tiāⁿ chē tī Súi-mn̂g piⁿ leh ǹg lâng thó-chîⁿ ê, chiū ūi-tio̍h i só͘ keng-giām tio̍h ê tāi-chì, kám-kak chin sîn-kî, mā siō͘ⁿ bô tàu-té sī án-chóaⁿ.

3 : 11 Tng hit-ê tit-tio̍h i-hó ê lâng, tī hō-chò Só͘-lô-bûn ê cháu-lông, iau kā Pí-tek hām Iok-hān tòe tiâu-tiâu ê sî, chèng-lâng kám-kak chin kî-koài, lóng cháu óa-lâi in hia.

3 : 12 Pí-tek khòaⁿ-tio̍h ah-ne, chiū tùi hia-ê lâng kóng: ”Í-sek-lia̍t lâng ah, lín ūi-siáⁿ-mi̍h kā chit-hāng tāi-chì khòaⁿ-chò chin kî-koài? Sī án-chóaⁿ it-ti̍t leh khòaⁿ goán? Lín kam siō͘ⁿ kóng goán sī khò ka-tī ê khùi-la̍t a̍h-sī kèng-khiân, hō͘ chit-ê lâng peh khí-lâi kiâⁿ sī-bô?

3 : 13 A-pek-lah-hán、Í-sat、Ngá-kok ê Siōng-chú, chiū-sī lán chó͘-sian ê Siōng-chú, í-keng hō͘ I ê po̍k-jîn Ia-so͘ tit-tio̍h êng-iāu ah, lín hoán-tńg kā I kau-hō͘ Pí-lia̍p-to; Pí-lia̍p-to koat-tēng beh sek-hòng I, tān-sī lín tong-tiô͘ⁿ kū-choa̍t.

3 : 14 Lín kū-choa̍t hit-ūi sèng-kiat koh kong-gī ê, tian-tó kiû Pí-lia̍p-to pang chi̍t-ê sat-jîn-hoān hō͘ lín.

3 : 15 Lín hāi-sí oa̍h-miā ê “Thian-chú”(天子), m̄-ku Siōng-chú hō͘ I tùi si-lâng tiong koh-oa̍h lah. Goán lóng-sī chit-hāng tāi-chì ê kiàn-chèng-jîn.

3 : 16 Goán in-ūi sìn I ê miâ, I ê miâ chiū hō͘ chi̍t-ê lín só͘ khòaⁿ-tio̍h só͘ pat ê pái-kha-ê, tit-tio̍h ióng-chōng; che chiū-sī I só͘ sió͘ⁿ-sù ê sìn-sim, hō͘ chit-ê lâng tī lín tāi-ke ê bīn-chêng oân-choân hoe-ho̍k.

3 : 17 Hiaⁿ-tī ah, taⁿ góa chai-iáⁿ lín kap lín ê léng-tō-chiá ah-ne chò, sī in-ūi lín m̄-chai.

3 : 18 M̄-ku chia-ê tāi-chì Siōng-chú ū chiah-tio̍h I ê chèng tāi-giân-jîn ê chhùi soan-pò͘ Ki-tok ē siū-hāi, chit-ê tāi-chì chiū ah-ne èng-giām.

3 : 19 Só͘-í, lín tio̍h hóe-kái, koh chi̍t-pái lâi kui-ǹg Siōng-chú, thang hō͘ lín ê chōe tit-tio̍h boah-siau,

3 : 20 Koh chhe-phài I só͘ tiāⁿ-tio̍h ê Ki-tok lâi-kàu lín tiong-kan.

3 : 21 Ia-so͘ tio̍h lâu tī thiⁿ-téng, tán-hāu bān-mi̍h lóng ōaⁿ-sin ê sî, che-sī chiàu Siōng-chú àn kó͘-chá chioh chèng sian-ti ê chhùi só͘ soan-pò͘ ê.

3 : 22 Mô͘-se bat kóng: ”Chú , lín ê Siōng-chú ē tùi lín hiaⁿ-tī ê tiong-kan, kā lín siat-li̍p chi̍t-ūi chhin-chhiō͘ⁿ góa, sī Siōng-chú ê tāi-giân-jîn ah-ne, I só͘ kā lín kóng ê, lín lóng tio̍h thiaⁿ.

3 : 23 Nā bô thiaⁿ hit-ūi tāi-giân-jîn ê lâng, it-tēng ē túi chú-bîn ê tiong-kan pī siau-bia̍t.」

3 : 24 Bô-m̄-tio̍h, koh chū Sat-bú-ní í-lâi, só͘-ū ê sian-ti ê ū-giân, mā lóng ū kóng-khí chiah-ê ji̍t-chí.

3 : 25 Lín sī chèng sian-ti ê kiáⁿ-sun, iā sêng-chiap Siōng-chú kap lín ê chó͘-sian só͘ li̍p ê iok, chiū-sī tùi A-pek-lah-hán só͘ kóng:「Tē-chiō͘ⁿ bān-cho̍k lóng ē tùi lí ê kiáⁿ-sun tì-tio̍h hok-khì.」

3 : 26 Siōng-chú í-keng siat-li̍p I ê po̍k-jîn, chiū tāi-seng phài I lâi-kàu lín chia, kā lín chiok-hok, hō͘ lín ta̍k-lâng thang án chōe-ok tiong lī-khui.」