Sú-tô͘ hêng-toān Tē-sì chio͘ⁿ 使徒行傳 第四章

4 : 1 Tng sù-tô͘ teh kap bîn-chiòng kóng-ōe ê sî, hia-ê chè-si hām sèng-tiān ê siú-ūi-tió͘ⁿ í-kip Sat-to͘-kai phài ê lâng lóng lâi-kàu in hia.

4 : 2 In lóng chin siū-khì, in-ūi Pí-tek kap Iok-hān kun-kù Ia-so͘ án sí koh-oa̍h chit-hāng tāi-chì lâi ǹg bîn-chiòng soan-káng kap kàu-tō.

4 : 3 Só͘-í chiū hē-chhiú kā in lia̍h khí-lâi, in-ūi thiⁿ í-keng àm ah, chiū kā in khàu-liû kàu tē-jī-ji̍t.

4 : 4 M̄-ku tī hia leh thiaⁿ ê bîn-chiòng, ū chē-chē lâng siong-sìn, lâm-sū iok-lio̍k ū gō͘-chheng lâng.

4 : 5 Kè-ji̍t chá-khí, in ê koaⁿ-oân, tio͘ⁿ-ló kap kàu-su tī Iâ-lō͘-sat-léng chū-chi̍p,

4 : 6 Koh ū Tōa chè-si A-ná hām Kai-a-hoat, Iok-hān, A-le̍k-san-tāi, í-kip tōa-chè-si ê chhin-cho̍k lóng chāi tiô͘ⁿ,

4 : 7 Tng nn̄g-ūi sù-tô͘ lâi khiā tī in tiong-ng ê sî, chiū mn̄g in kóng:” Lín sī ēng siáⁿ-mih koân, á-sī chioh siáⁿ-mih lâng ê miâ, chò chit-hāng tāi-chì?”

4 : 8 Hit-sî, Pí-tek pī Sèng-sîn chhiong-móa, tùi in kóng:”

4 : 9 Goán kin-á-ji̍t nā-sī in-ūi chò chit-hāng i-hó chit-ê pái-kha-ê ê hó-sū siū sím-mn̄g, i sī án-chóaⁿ tit-tio̍h i-hó ê,

4 : 10 Lín ta̍k-ke kap só͘-ū ê Í-sek-lia̍t chèng-lâng tio̍h ài chai-iáⁿ, khiā tī lín bīn-chêng tit-tio̍h oân-choân i-hó ê lâng, sī chià-tio̍h hō͘ lín tèng si̍p-jī-kè ê Ná-sat-le̍k Ia-so͘ ê miâ, Siōng-chú hō͘ I tùi sí koh-oa̍h ê.

4 : 11 I chiū-sī keng-chheh só͘ kì ê, lín chiah-ê sai-hū tàn-tiāu ê chio̍h-thâu, soah pìⁿ-chò khí-chhù ê tē-it-teh chio̍h-thâu.

4 : 12 Chí-ū tùi I chiah-ē tit-tio̍h chin-kiù, in-ūi tī thiⁿ-ē jîn-kan Siōng-chú bô sió͘ⁿ-sù pa̍t-ê miâ hō͘ lâng thang khò I ê miâ lâi tit-kiù.”

4 : 13 Tng chèng-lâng khòaⁿ-tio̍h Pí-tek kap Iok-hān hiah-lìn ū tám-sek, mā chai-iáⁿ in sī bô tha̍k-kòe siáⁿ-mih chheh ê phó͘-thong lâng, chiū lóng chin tio̍h-kiaⁿ, iā jīn chhut-lâi in pat kun-tòe Ia-so͘ kòe;

4 : 14 Koh khòaⁿ-tio̍h hit-ê hō͘ in i-hó ê lâng hām in khiā chò-hóe, chôaⁿ bô ōe thang ìn.

4 : 15 In chiū kiò Pí-tek kap Iok-hān lī-khui hōe-gī-thiaⁿ, hō͘-siong chham-siông:”

4 : 16 Lán tio̍h án-chóaⁿ chhú-lí chit nn̄g-ê lâng chiah-hó? In-ūi tòa tī Iâ-lō͘-sat-léng ê lâng lóng chai-iáⁿ in si̍t-chāi chò-liáu chi̍t-hāng sîn-jiah, sī lán bē-tàng hó͘ⁿ-jīm ê.

4 : 17 Kiaⁿ-liáu chit-ê tāi-chì tī chèng-lâng ê tiong-kan koh chài thoân-iông, lán tio̍h kéng-kò in bē-sái koh hōng Ia-so͘ ê miâ lâi ǹg lâng kóng tō-lí.”

4 : 18 Chiū kiò sù-tô͘ lâi, kìm-chí in koh hōng Ia-so͘ ê miâ ǹg lâng káng-lūn iā-sī kàu-tō.

4 : 19 Pí-tek hām Iok-hān ìn:” Tī Siōng-chú ê gán-tiong, thiaⁿ lín ê, á-sī thiaⁿ Siōng-chú ê khah-tio̍h, lín ka-tī siō͘ⁿ khòaⁿ-māi leh!”

4 : 20 In-ūi goán só͘ khòaⁿ-tio̍h, só͘ thiaⁿ-tio̍h ê, bē-tàng bô kóng.”

4 : 21 Hia-ê koaⁿ-oân in-ūi bîn-chiòng ê iân-kò͘, soah chhōe-bô hong-hoat thang pān in, chôaⁿ koh-chi̍t-pái kéng-kò in liáu, chiah pàng in chhut-khì. In móe chi̍t-ê lâng lóng leh o-ló Siōng-chú só͘ chò kî-biāu ê sū.

4 : 22 In-ūi án chi̍t-ê sîn-jiah tit-tio̍h i-hó ê lâng, í-keng sì-cha̍p gōa hòe.

4 : 23 Pí-tek kap Iok-hān pī sek-hòng liáu, chiū tńg-khì in ê tang-phōaⁿ hia, chiong chè-si-tió͘ⁿ hām tió͘ⁿ-ló só͘ kóng ê ōe, lóng ǹg in pò-kò.

4 : 24 In ta̍k-ê thiaⁿ-liáu, chiū tang-sim chhut tōa-siaⁿ kî-tó Siōng-chú kóng:” Chú ah! Lí-sī chhòng-chō thiⁿ, tē, hái kap kî-tiong bān-mi̍h ê Siōng-chú,

4 : 25 Lí pat thong-kòe Sèng-sîn, ēng Lí ê po̍k-jîn, chiū-sī goán ê chó͘-sian Tāi-pit ê chhùi, kóng: Bān-kok ūi-siáⁿ-mi̍h tōa siū-khì? Bān-bîn sī án-chóaⁿ kè-ōe bô hāu-kó ê tāi-chì?

4 : 26 Tē-chiō͘ⁿ ê chèng kun-ông lóng chún-pī hó-sè, só͘-ū ê léng-siù mā chū-chi̍p chham-siông, beh kong-kek Siōng-chú, í-kip I ê Ki-tok.

4 : 27 Hi-lu̍t hām Pún-tiu Pí-lia̍p-to, kap gōa-kok-lâng, Í-sek-lia̍t lâng, kó-jiân chū-chi̍p tī chit-ê siâⁿ-lāi, lâi kong-kek Lí só͘ siat-li̍p ê sèng-kiat ê po̍k-jîn Ia-so͘,

4 : 28 Lâi chò LÍ ê chhiú hām só͘ tiāⁿ-tio̍h it-chhè ê tāi-chì.

4 : 29 Chú ah, taⁿ kiû LÍ kàm-chhat in ê khióng-hat, koh sió͘ⁿ-sù LÍ ê po̍k-jîn hó-táⁿ soan-iông LÍ ê tō-lí,

4 : 30 Siâng-sî iā chhun-chhut Lí ê chhiú lâi i-pēⁿ, mā thong-kòe Lí só͘ sèng-hòa ê po̍k-jîn Ia-so͘ ê miâ kiâⁿ chē-chē ê sîn-jiah.

4 : 31 Tī in kî-tó liáu-āu, chū-hōe ê só͘-chāi chiū iô-tāng, in lóng pī Sèng-sîn chhiong-móa, koh ū ióng-khì lâi soan-káng Siōng-chú ê ōe-gú.

4 : 32 Chèng sìn-tô͘ lóng tang-sim ha̍p-ì, bô lâng kóng i ê châi-bu̍t sī siok i kò-jîn ê, ta̍k-ke lóng chiong só͘-ū ê theh-lâi kong-ke ēng.

4 : 33 Sú-tô͘ ēng tōa koân-lêng lâi kiàn-chèng Chú Ia-so͘ ê koh-oa̍h, bîn-chiòng mā tit-tio̍h tōa un-hūi.

4 : 34 In tiong-kan bô chi̍t-ê lâng ū khiàm-khoeh, in-ūi ū chhân-hn̂g, chhù-the̍h ê lóng bē-tiāu, chiong só͘ tit-tio̍h ê chîⁿ kau hō͘ Sú-tô͘;

4 : 35 Chiàu ta̍k-lâng ê su-iàu pun hō͘ in.

4 : 36 Ū chi̍t-ê tī Ku-pí-lō͘ chhut-sì ê Lī-bī-cho̍k ê lâng, miâ-chò Iok-sek, Sú-tô͘ kiò i chò Pa-ná-pa(Ì-sù sī an-ùi-chiá).

4 : 37 I iā bē ka-tī ê chhân-hn̂g, chiong chîⁿ the̍h-lâi kau hō͘ sù-tô͘.