Sú-tô͘ hêng-toān Tē-cha̍p-saⁿ chio͘ⁿ 使徒行傳 第十三章

13 : 1 Tī An-thê-o kàu-hōe ū kúi-nā-ūi sian-ti kap kàu-su, chiū-sī Pa-ná-pa hām hō-chò Nî-kiat ê Se-bûn, Kó͘-lī-nāi-lâng Lō͘-kiû, kap hūn-hong ê ông Hi-lu̍t chò-hóe tōa-hàn ê Má-liām, í-kip Só-lô.

13 : 2 In teh kèng-pài Chú, kìm-chia̍h ê sî, Sèng-sîn kóng:” Tio̍h phài Pa-ná-pa hām Só-lô, khì chò Góa ho͘-tiàu in chò ê kang-chok.”

13 : 3 Só͘-í in kìm-chia̍h kî-tó kiat-sok, chiū kā in nn̄g-ê hōaⁿ-chhiú, phài in chhut-khì.

13 : 4 Pa-ná-pa kap Só-lô siū Sèng-sîn chhe-phài, chiū lo̍h-khì Se-liû-ki, án hia chē-chûn khì Ku-pí-lō͘-tó.

13 : 5 Tng in lâi-kàu Sat-lia̍p-bí, chiū khì Iû-thài-lâng ê hōe-tn̂g thoân Siōng-chú ê chin-tō, mā-ū hō-chò Má-khó ê Iok-hān kā in hia̍p-chō͘.

13 : 6 Tng in kiâⁿ tháng-kòe hit-ê tó, lâi-kàu Phàⁿ-hut, tī hia tú-tio̍h kiâⁿ siâ-su̍t ê lâng, ké-chò sian-ti ê Iû-thài-lâng, hō-chò Pa-ia-so͘.

13 : 7 I kap chóng-tok Sū-kiû Pó-lô ū kau-pôe.Chóng-tok sī chi̍t-ê hiân-bêng ê lâng, i chhiáⁿ Pa-ná-pa hām Só-lô lâi, ài-beh thiaⁿ in káng-lūn Siōng-chú ê chin-tō.

13 : 8 M̄-ku hit-ê kiâⁿ siâ-su̍t ê Í-lū-má, hoán-tùi in nn̄g-ê, beh chó͘-tòng chóng-tok chiap-siū in só͘ thoân ê sìn-gióng.

13 : 9 Só-lô iā hō-chò Pó-lô pī Sèng-sîn chhiong-móa, ba̍k-chiu it-ti̍t khòaⁿ i,

13 : 10 Kóng:” LÍ chit-ê Mô͘-kúi-á kiáⁿ, lí sī it-chhè kong-gī ê te̍k-jîn, chhiong-móa ta̍k-hāng ê kúi-kè kap siâ-ok, lí ná-ē iàu-bô beh thêng-chí oai-khiok Chú ê chin-tō?

13 : 11 Taⁿ lí khòaⁿ, Chú ê hêng-hoa̍t lâi-kàu lí ê sin-chiō͘ⁿ, lí ē chheⁿ-mê chiām-sî bô khòaⁿ-tio̍h ji̍t-thâu.” I ê ba̍k-chiu sûi-sî hō͘ o͘-bū tah leh, bong-lâi bong-khì chhōe lâng kā i khan-chhiú chhōa lō͘.

13 : 12 Chóng-tok khòaⁿ-tio̍h só͘ hoat-seng ê tāi-chì, iā thiaⁿ-tio̍h Chú ê chin-tō tōa siū kám-tōng chiū siong-sìn.

13 : 13 Pó-lô kap i ê tâng-phōaⁿ án Phàⁿ-hut khui-chûn, lâi-kàu Pông-hui-lī-a-séng ê Pia̍t-ka, hō-chò Má-khó ê Iok-hān chiū lī-khui in tńg-khì Iâ-lō͘-sat-léng.

13 : 14 In tùi Pia̍t-ka koh khì-kàu Pí-se-tí-a ê An-thê-o, tī an-hioh-ji̍t ji̍p-khì hōe-tn̂g chē.

13 : 15 Ū lâng tha̍k Mô͘-se ê Lu̍t-hoat kap Sian-ti-su liáu-āu, hōe-tn̂g ê chú-koán chhe lâng kā in kóng:” Hiaⁿ-tī à, lín nā-ū siáⁿ-mih khoàn-bián tāi-ke ê ōe, chhiáⁿ kóng.”

13 : 16 Pó-lô chiū khiā khí-lâi, pí chhiú-sè ài in tiām-tiām thiaⁿ, chiah kóng:” Í-sek-lia̍t lâng kap só͘-ū kèng-ùi Siōng-chú ê lâng, chhiáⁿ thiaⁿ.”

13 : 17 Chit-ūi Í-sek-lia̍t-lâng ê Siōng-chú kéng-soán lán ê chó͘-sian, sī tī in iau tòa tī Ai-ki̍p chò chhut-gōa-lâng ê sî chiū khòaⁿ-tāng in, ēng I tōa-lêng ê chhiú-kut chhōa in chhut Ai-ki̍p;

13 : 18 Koh tī khòng-iá khoan-iông in, tāi-iok sì-cha̍p nî kú.

13 : 19 Tng Siōng-chú húi-bia̍t Ka-lâm-tē ê chhit-ê bîn-cho̍k, chiū chiong hia-ê thó͘-tē hō͘ in chò sán-gia̍p;

13 : 20 Chiah-ê tāi-chì liáu-āu, Siōng-chú ūi in siat-li̍p sū-su lâi léng-tō in, tāi-iok ū sì-pah gō͘-cha̍p nî, it-ti̍t kàu Sat-bú-ní chò sian-ti ê sî.

13 : 21 Āu-lâi in kiû-thó hō in chi̍t-ê ông, Siōng-chú chiū chiong Piān-ngá-bín chi-phài tiong, Ki-sū ê kiáⁿ Só-lô hō͘ in, siat-li̍p i chò ông sì-cha̍p nî kú.

13 : 22 Tng Siōng-chú hō͘ Só-lô lo̍h-tâi, chiū siat-li̍p Tāi-pi̍t chò in ê ông, koh ū I chò-chèng kóng:「Góa chhōe tio̍h Iâ-se ê kiáⁿ Tāi-pi̍t, i sī sūn-thàn Góa ì-sù ê lâng, i ē chun-chiàu Góa ê chí-sī chò ta̍k-hāng tāi-chì.」

13 : 23 Siōng-chú chiàu I só͘ èng-ún ê, án Tāi-pi̍t ê kiáⁿ-sun kā Í-sek-lia̍t-lâng siat-li̍p chi̍t-ūi Kiù-chú, chiū-sī Ia-so͘.

13 : 24 Tī I iáu-bē chhut-hiān chin-chêng, Iok-hān seng tùi Í-sek-lia̍t-lâng thoân-tō, kiò in tio̍h hóe-kái lâi niá sé-lé.

13 : 25 Iok-hān tī i teh-beh oân-sêng sù-bēng ê sî, tùi chèng-lâng kóng:「Lín siō͘ⁿ góa sí siáⁿ-mih lâng? Góa m̄-sī Ki-tok. Tān-sī, ū chi̍t-ūi tī góa āu-bīn lâi ê, góa liân kā I tháu ê-tòa mā bô chu-keh.」

13 : 26「Kok-ūi hiaⁿ-ché, A-pek-lah-hán ê kiáⁿ-sun kap lín tiong-kan kèng-ùi Siōng-chú ê lâng ah! Chit-ê kiù-sio̍k ê chin-tō í-keng thoân hō͘ lín à.

13 : 27 In-ūi tòa tī Iâ-lō͘-sat-léng ê lâng hām in ê tī-lí-chiá, m̄-bat Ki-tok iā bô liáu-kái ta̍k-pái tī An-hioh-ji̍t só͘ thak ê Sian-ti-su, chôaⁿ kā I tēng-chōe, tú-hó èng-giām Sian-ti só͘ ū-giân ê;

13 : 28 Sui-jiân in chhâ bô kā I tēng sí-chōe ê lí-iû, mā iàu-kiû Pí-lia̍p-to kā I chhú-sí;

13 : 29 Tng in oân-sêng keng-chheh só͘ kì-chài koan-hē Ia-so͘ ê sū í-āu, chiū tùi si̍p-jī-kè téng kā I lūi lo̍h-lâi, khǹg tī bōng-lāi.

13 : 30 M̄-ku Siōng-chú hō͘ I tùi sí-lâng tiong koh-oa̍h.

13 : 31 I tī kúi-nā-ji̍t kan, hō͘ hia-ê kap I tùi Ka-lī-lī-séng khì Iâ-lō͘-sat-léng ê lâng khòaⁿ-tio̍h, taⁿ chiah-ê lâng tī chèng-lâng ê bīn-chêng chò Ia-so͘ ê kiàn-chèng-jîn.

13 : 32 Goán iā chiong Siōng-chú èng-ún lán chó͘-sian ê hó-siau-sit pò hō͘ lín chai,

13 : 33 Taⁿ Siōng-chú hō͘ Ia-so͘ koh-oa̍h, lâi kā lán chiah-ê chò in kiáⁿ-sun ê oân-sêng à. Tu chin-chhiō͘ⁿ Si-phian tē-jī phiⁿ só͘ kì:” LÍ sī Góa ê kiáⁿ, Góa kin-á-ji̍t seⁿ Lí.”

13 : 34 Lûn-kàu Siōng-chú hō͘ I koh-oa̍h, bē-koh hiú-nōa, chiū ah-ne kóng:” Góa beh chiong tùi Tāi-pi̍t só͘ èng-ún hit ê sèng-kiat koh si̍t-chāi ê un-tián sù hō͘ lín.”

13 : 35 Lēng-gōa chi̍t-phiⁿ mā-ū kóng:” LÍ bē hō͘ LÍ ê Sèng-chiá hiú-nōa khì.”

13 : 36 Tāi-pi̍t chāi-seⁿ ê sî, ū chun-chiàu Siōng-chú ê chí-ì, i sí liáu-āu pī bâi-chòng tī i chó͘-sian ê piⁿ-á, mā í-keng hiú-nōa ah.

13 : 37 Tān-sī Siōng-chú só͘ hō͘ I koh-oa̍h ê hit-ūi, bē hiú-nōa.

13 : 38 Só͘-í, kok-ūi hiaⁿ-ché, lín tio̍h siông-sè chai, sià-chōe ê tō-lí sī tùi chit-ūi Ia-so͘ thoân hō͘ lín ê.

13 : 39 Tī lín khò Mô͘-se ê lu̍t-hoat, bē-tàng chheng chò gī ê sū; lâi sìn-khò Ia-so͘ chiū lóng ē tit-tio̍h sià-bián.

13 : 40 Só͘-í lín tio̍h sè-jī, chiah bē hō͘ sian-ti ê ū-giân hoat-seng tī lín ê sin-chiō͘ⁿ.

13 : 41 Chú kóng:” Khòaⁿ leh, lín chiah-ê biáu-sī lâng è, ē kiaⁿ-tio̍h, ē bia̍t-bông; in-ūi tī lín ê sî-tāi, Góa chò chi̍t-hāng tāi-chì, sui-jiân ū lâng kā lín kóng-bêng, lín iā m̄ sìn.”

13 : 42 Tng hia-ê Iû-thài-lâng lī-khui hōe-tn̂g ê sî, gōa-cho̍k ê sìn-tô͘ chhiáⁿ Pó-lô hām Pa-ná-pa tī koh-lâi ê An-hioh-ji̍t, koh kóng chiah-ê tō-lí hō͘ in thiaⁿ.

13 : 43 Sòaⁿ-hōe liáu-āu, Iû-thài-lâng kap kái-chong ji̍p Iû-thài-kàu ê khiân-sêng ê lâng, chin-chē lâi tòe Pó-lô hām Pa-ná-pa chhut-khì. In nn̄g lâng kap chèng-lâng tâm-ōe, khoàn-bián in tio̍h kè-sio̍k khò Siōng-chú ê un-tián lâi seng-oa̍h.

13 : 44 An-hioh-ji̍t koh kàu ah, chha-put-to kui-siâⁿ ê lâng lóng chi̍p-óa-lâi, beh thiaⁿ Siōng-chú ê ōe.

13 : 45 M̄-ku Iû-thài-lâng khòaⁿ-tio̍h chiah-chē lâng, chiū chin oàn-tò͘, it-chài hoán-pok Pó-lô só͘ kóng ê ōe, mā húi-pòng i.

13 : 46 Pó-lô hām Pa-ná-pa chiū chòng-táⁿ kóng:” Siōng-chú ê chin-tō tāi-seng thoân hō͘ lín īs eng-kai ê, kì-jiân lín kū-choa̍t, siō͘ⁿ-chò lín ka-tī bē-kham-tit niá-siū éng-oán ê oa̍h-miā, khòaⁿ leh, goán chiū choán-ǹg thoân hō͘ gōa-kok-lâng.

13 : 47 In-ūi Chú bat bēng-lēng goán, kóng:” Góa í-keng siat-li̍p lí chò gōa-kok-lâng ê kng, thang hō͘ lí chiong Góa ê kiù-un tòa kàu thiⁿ-piⁿ-hái-kak.

13 : 48 Tng hia-ê gōa-kok-lâng thiaⁿ-liáu, lóng chin hoaⁿ-hí, o-ló Chú ê chin-tō; chē-chē siū kéng-soán tit-tio̍h éng-oán oa̍h-miā ê lâng, lóng chiâⁿ-chò sìn-tô͘.

13 : 49 Só͘-í, Chú ê chin-tō thoân-kàu hit-ê tē-khu ê tak só͘-chāi.

13 : 50 M̄-ku Iû-thài-lâng lâi siàn-tōng kèng-khiân ê kùi-hū-jîn hām siâⁿ-lāi ū bêng-bōng ê lâng, pek-hāi Pó-lô, Pa-ná-pa, kā in kóaⁿ-chhut in ê só͘-chāi.

13 : 51 In nn̄g-ūi chiū tī chèng-lâng ê bīn-chêng, pōaⁿ kha-té ê thó͘-hún, piáu-sī kap in bô khan-liân, chiū khì Í-ko-liām.

13 : 52 Bûn-tô͘ móa-sim hoaⁿ-hí, koh hō͘ Sèng-sîn chhiong-móa.

　　　　　　　　　　　　　　　　　　　　　　　　　　　　20190717