Sú-tô͘ hêng-toān Tē jī-cha̍p-gō͘ chio͘ⁿ 使徒行傳 第二十五章

 25:1 Húi-sū-to͘ chiō͘ⁿ-jīm saⁿ-ji̍t, chiū án Kai-sat-lī-a chiō͘ⁿ-khì Iâ-lō͘-sat-léng.

25:2 Tōa-chè-si hām Iû-thài-lâng ê tāi-piáu ǹg i khòng-kò Pó-lô.

25:3 Iā chhéng-kiû i kā Pó-lô sàng lâi Iâ-lō͘-sat-léng. In kè-bô͘ tī pòaⁿ-lō͘ bâi-ho̍k thang thâi-sí Pó-lô.

25:4 M̄-ku Húi-sū-to͘ ìn:” Pó-lô tio̍h pī-siu ah tī Kai-sat-lī-a, koh góa chin-kín chiū tńg-khì hia,

25:5 lín tiong-kan ū koân-sè ê lâng, kap góa chò-hóe lo̍h-khì. Hit-ê lâng ná-ū siáⁿ-mih m̄-tio̍h, in thang kò i.”

25:6 Húi-sū-to͘ tòa tī hia chiâⁿ cha̍p-ji̍t, chiū lo̍h-khì Kai-sat-lī-a, keh-ji̍t khui-têng, hā-lēng chhōa Pó-lô lâi.

25:7 Pó-lô chi̍t-ē kàu-ui, hia-ê án Iâ-lō͘-sat-léng lâi ê lâng ûi óa-lâi, khiā tī i ê chiu-ûi, ēng chin giâm-tiōng ê chōe-miâ kò i, m̄-ku theh bē-chhut chèng-kù.

25:8 Pó-lô ūi ka-tī piān-hō͘ kóng:” Góa bô hoān-tio̍h Iû-thài-lâng ê Lu̍t-hoat, mā-bô chhim-hoān sèng-tiān, mā bô tek-chōe Lô-má Hông-tè.”

25:9 M̄-ku Húi-sū-to͘ beh hō͘ Iû-thài-lâng hoaⁿ-hí, chiū ìn i:” LÍ kám goān-ì chiō͘ⁿ-khì Iâ-lō͘-sat-léng, tī hia chiap-siū góa tùi lí ê àn-kiâⁿ ê sím-phòaⁿ?”

25:10 Pó-lô ìn:” Góa chit-má khiā tī Kai-sat ê hoat-têng, kai-jiân tī chia siū-sím; lÍ mā chin chheng-chhó, góa túi Iû-thài-lâng pèng-bô chò m̄-tio̍h siáⁿ-mih tāi-chì.

25:11 Góa ná ū chò m̄-tio̍h, á-sī hoān-tio̍h kai-sí ê chōe, góa bē siám-phiah; m̄-ku, nā in khòng-kò góa ê, bô chi̍t-hāng sī sū-si̍t ê ōe, chiū bô lâng ē-tàng kā góa kau hō͘ in. Góa beh ǹg Kai-sat siōng-sò͘.”

25:12 Tng Húi-sū-to͘ hām gī-hōe chham-siông āu, chiū kóng:” LÍ í-keng ǹg Kai-sat siōng-sò͘, chiū khí Kai-sat hia.”

25:13 Kòe kúi-ji̍t āu, A-ki-phàⁿ ông hām Pek-nî-ki lâi Sat-ka-lī-a, mā ǹg Húi-sū-to͘ chhéng-an.

25:14 In tòa tī hia kúi-ji̍t liáu-āu, Húi-sū-to͘ ǹg A-ki-phàⁿ ông pò-kò iú-koan Pó-lô ê àn-kiâⁿ, kóng:” Chia ū chit-ê Hui-le̍k-sū khu-liû tī kaⁿ-nih ê lâng,

25:15 góa khì Iâ-lō͘-sat-léng ê sî, hia-ê chè-si-tió͘ⁿ kap Iû-thài-lâng ê tió͘ⁿ-ló , lâi khòng-kò i, iàu-kiû góa kā i tēng-chōe.

25:16 Góa kā in kóng, chiàu Lô-má-lâng ê koàn-lē, pī-kò kap goân-kò iáu-bē tùi-chí, mā iáu-bē ū ki-hōe ūi ka-tī piān-hō͘ chin-chêng, bē-tàng kā i tēng-chōe,

25:17 Só͘-í tng in lóng lâi kàu-chia, góa bô iân-tî, sūi tī keh-ji̍t khui-têng, hā-lēng ah hit-ê lâng chhut-têng.

25:18 Só͘-ū ê goân-kò lóng khiā khí-lâi khòng-kò i, in só͘ the̍h-chhut ê, pèng-bô góa só͘ siō͘ⁿ ê chōe-hêng.

25:19 M̄-ku, in kap i leh cheng-lūn ê, sī hām in ê chong-kàu iú-koan, í-kip chi̍t-ê hō-chò Ia-so͘ ê sū, i í-keng sí, Pó-lô jīn-ûi I iau oa̍h leh.

25:20 Chiah-ê tāi-chì góa cha bē-chhut thâu-sū, chūi mn̄g Pó-lô, kam goān-ì khì Iâ-lō͘-sat-léng chiap-siū sím-mn̄g.

25:21 M̄-ku i kiû góa hō͘ i lâu tī chia, thèng-hāu Kai-sat ê chhâi-koat, só͘-í góa hā-lēng kā i khu-liû kàu kau hō͘ Kai-sat.”

25:22 A-ki-phàⁿ tùi Hui-sū to͘ kóng:” Góa ka-tī mā chin-ài thiaⁿ chit-ê lâng kóng khòaⁿ-māi leh.” Hui-sū-to͘ ìn:” Bîn-á-chài lí tio̍h thiaⁿ ē-tio̍h.”

25:23 Keh-ji̍t, A-ki-phàⁿ hām Pek-nî-ki chi̍t-tīn lâng lāu-lia̍t kún-kún, kap iâⁿ-tió͘ⁿ hām siâⁿ-lāi ê tiong-iàu jîn-sū ji̍p-khì hōe-gī-thiaⁿ, Hui-sū-to͘ hā-lēng, Pó-lô chiū hō͘ lâng ah kàu-ui.

25:24 Hui-sū-to͘ kóng:” A-ki-pháⁿ ông kap chāi-chō ê kok-ūi, lín khòaⁿ chit-ê lâng, i chiū-sī tī Iâ-lō͘-sat-léng kap chit só͘-chai só͘-ū ê Iû-thài-lâng tùi góa chhiáⁿ-kiû, tōa-siaⁿ hoah: m̄-thang hō͘ i koh oa̍h leh! ê hit-ê lâng.

25:25 M̄-ku, góa chhâ-bô i ū hoān-tio̍h eng-kai phòaⁿ sí-hêng ê chōe, koh i í-keng ǹg Kai-sat siōng-sò͘, só͘-í góa koat-tēng sàng i khì Lô-má.

25:26 Koan-hē chit-ê lâng , góa bô khak-si̍t ê àn-chêng thang ǹg Hông-tè pò-kò. Só͘-í, góa chhōa i lâi lín bīn-chêng, tek-pia̍t sī tī A-ki-pháⁿ ông ê bīn-chêng, nā chhâ-chhut liáu-āu, chiah-ū àn-chêng thang siōng-chàu.

25:27 In-ūi góa jīn-ûi, beh koaiⁿ-ah hoān-lâng, nā bô chí-bêng i ê chōe-chn̄g sī bô ha̍p-lí.

　　　　　　　　　　　　　　　　　　　　　　　　　　　　　　　　　　2019/09/02