21:1 Chiah ê tāi-chì í-āu, Ia-so͘ tī Thê-pí-lī-a ê hái-piⁿ, koh kā ka-tī hián-hiān hō͘ bûn-tô͘ khòaⁿ, I ê chhut-hiān kì tī ē-té:
21:2 Ū
Se-bûn Pí-tek, kiò-chò Siang-seⁿ-á ê To-má sī Ka-lī-lī-séng ê Ka-ná-lâng
Ná-tàn-gia̍p, Se-pí-thài ê nn̄g-ê kiáⁿ, iáu-ū nn̄g-ê bûn-tô͘ chò-hóe tī hia.
21:3 Se-bûn
Pí-tek kā in kóng:” Góa beh khì thó-hî.” In kā i kóng:” Goán mā beh kap lí
chò-hóe khì.” In chiū chhut-khì, chiō͘ⁿ-chûn, hit-mê lóng lia̍h bô hî.
21:4 Thiⁿ
phú-kng ê sî, Ia-so͘ khiā tī hōaⁿ-téng, m̄-ku bûn-tô͘ jīn bōe chhut I sī
Ia-so͘.
21:5 Ia-so͘
tùi in kóng:” Siàu-liân-è, lín lia̍h ū hî bô?” In ìn:” Bô pòaⁿ bóe.”
21:6 Ia-so͘
kā in kóng:” Kā bāng pha loh chûn ê chiàⁿ-pêng, chiū ē lia̍h tio̍h.” In chiū
pha lo̍h-khì, in-ūi pha tio̍h chin-chē hî, hî-bāng soah thoa bē khí-lâi.
21:7 Ia-so͘
só͘-hiàⁿ-ê hit-ê bûn-tô͘ kā Pí-tek kóng:” I sī Chú.” Se-bûn Pí-tek chi̍t-ē
thiaⁿ-tio̍h sī Chú, in-ūi thǹg-pak-theh, chiū kóaⁿ-kín theh gōa-saⁿ moa leh,
thiàu-lo̍h chúi ni̍h.
21:8
Kî-thaⁿ ê bûn-tô͘ lī hōaⁿ bô-lōa-hn̄g, tāi-iok ū chi̍t-pah-bí, chiū kó sè-chiah
chûn-á lâi kā kui-bāng ê hî thoa chiō͘ⁿ hōaⁿ.
21:9 In
chi̍t-ē chiō͘ⁿ-hōaⁿ khòaⁿ-tio̍h hia ū leh to̍h ê hóe-thòaⁿ, téng-bīn ū hî, koh ū
piáⁿ.
21:10 Ia-so͘
kā in kóng:” Kā tú-chiah pha-tio̍h ê hî, lia̍h kúi-bóe-á lâi.”
21:11
Se-bûn Pí-tek peh-khì-lih chûn-téng, thoa-bāng khí-lâi hōaⁿ-téng, kui-bāng lóng-sī
tōa-bóe hî, chóng-kiōng chi̍t-pah gō͘-cha̍p-saⁿ bóe, sui-jiân ū hiah-chē hî,
m̄-ku bāng mā bô li̍h-khui.
21:12
Ia-so͘ kā in kóng:” Lâi chia̍h chá-tǹg.” Bûn-tô͘ bô chi̍t-ê káⁿ mn̄g I, “Lí sī
sím-mih-lâng?” In-ūi in chai I sī Chú.
21:13
Ia-so͘ kiâⁿ óa—lâi, theh piáⁿ pun hō͘ in, hî mā chiàu ah-ne pun lo̍h-khì.
21:14 Taⁿ
Ia-so͘ tùi sí-lâng tiong koh-oa̍h í-āu, che-sī tē-saⁿ-pái ǹg i-ê bûn-tô͘
hián-hiān.
21:15 Tī in
chia̍h chá-tǹg liáu-āu, Ia-so͘ tùi Se-bûn Pí-tek kóng:” Iok-hān ê kiáⁿ Se-bûn,
Lí ū thiàⁿ Góa khah iâⁿ-kòe chiah ê bô?” I ìn:” Chú ah, lí chai góa thiàⁿ Lí.”
Ia-so͘ kā i kóng:” Chhī Góa ê iô͘ⁿ-á-kiáⁿ.”
21:16
Ia-so͘ tē-jī-páiⁿ koh mn̄g i kóng:”Iok-hān ê kiáⁿ Se-bûn, lí ū thiàⁿ Góa bô?” I
ìn:” Chú LÍ chai góa ū thiàⁿ LÍ.” Ia-so͘ kā I kóng:” Bo̍k-ió͘ⁿ Góa ê iô͘ⁿ.”
21:17
Ia-so͘ tē-saⁿ-páiⁿ mn̄g i:” Iok-hān ê kiáⁿ Se-bûn, lí ū thiàⁿ Góa bô?” Pí-tek
in-ūi Ia-so͘ tē-saⁿ-páiⁿ mn̄g i, chiū chin iu-būn kā Ia-so͘ kóng:” Chú ah! Lí
ta̍k-hāng lóng-chai, LÍ chai góa ū thiàⁿ Lí.” Ia-so͘ chiū kā i kóng:” Ió͘ⁿ-chhī
Góa ê iô͘ⁿ.”
21:18 “Góa si̍t-si̍t
chāi-chāi kā lín kóng, tī lí siàu-liân ê sî ka-tī io-tòa hâ leh, chiū khì lí ài
khì ê só͘-chāi, m̄-ku kàu nî-lāu ê sî, lí ē chhun siang-chhiú hō͘ lâng hâ, hō͘
in chhōa lí kàu bô-ài khì ê só͘-chāi.”
21:19
Ia-so͘ kóng chiah ê ōe, sī chí Pí-tek ē án-chóaⁿ sí lâi êng-iāu Siōng-chú.
Kóng-soah, Ia-so͘ kā i kóng:” Lâi tòe Góa.”
21:20
Pí-tek oat-tńg-sin, khòaⁿ-tio̍h Ia-so͘ só͘ thiàⁿ ê hit-ê bûn-tô͘ tòe tī āu-bīn.
I chiū-sī chêng tī boán-chhan ê sî, thē-óa Ia-so͘ heng-chêng mn̄g:” Chú ah, sī
siáⁿ-lâng beh chhut bē Lí?” ê hit-ê bûn-tô͘.
21:21
Pí-tek chi̍t-ē khòaⁿ-tio̍h i, chiū mn̄g Ia-so͘:” Chú ah, chit-ê-lâng ē
án-chóaⁿ?”
21:22
Ia-so͘ ìn i:” Góa nā ài i oa̍h kàu Góa koh lâi ê sî, kap lí ū siáⁿ-mih koan-hē?
Lí lâi tòe Góa.”
21:23 Chiū
án-ne, chit-kù ōe tī bûn-tô͘ ê tiong-kan kóng:” Chit-ê bûn-tô͘ bē sí.” Kî-si̍t
Ia-so͘ m̄-sī kóng i bē sí, sī kóng:” Góa ná ài i oa̍h kàu Góa koh lâi, kap lí ū
siáⁿ-mih koan-hē?”
21:24
Chit-ê bûn-tô͘ chiū-sī ūi-tio̍h chiah ê tāi-chì chó-chèng, koh kā chiah ê
tāi-chì siá lo̍h-lâi ê lâng, lán chai i-ê kiàn-chèng sī chin-si̍t-chāi.
21:25
Ia-so͘ koh chò chin-chē tāi-chì, nā-beh kā chiah ê tāi-chì chi̍t-hāng
chi̍t-hāng siá lo̍h-lâi, só͘ siá ê chheh, góa siō͘ⁿ choân sè-kài mā té-bē-loh.
2021/02/12 Kū-le̍k Sin-chiaⁿ Siōng-ngó͘ 9 tiám 25 hun tī
Lâm-thâm, Kui-jîn, Tâi-lâm oân-kó.
沒有留言:
張貼留言