Mákhó Hokimsu Tē Káu Chio͘ⁿ

9:1 Iaso͘ koh tùi in kóng:” Góa si̍tchāi kā lín kóng, khiā tī chia ê, ū lâng tī iáubē tamtio̍h sí ê chubī íchêng, tekkhak ē khòaⁿtio̍h Siōngchú ê kok ēng I ê tōa khùila̍t hiánhiān.”

9:2 Kengkòe la̍kji̍t āu, Iaso͘ chio Pítek, Ngákok, Iokhān tiāmtiāmá khì pehchiō͘ⁿ chi̍tchō koânsoaⁿ. I khiā tī in ê bīnchêng, sûi ǹg in káipiàn I ê hêngchōng,

9:3 I ê saⁿ hoatchhut kng, koh ū kàu pe̍h, phiòpò͘ ê lâng mā bētàng phiò kah chiah pe̍h.

9:4 Hutjiân, ū Ílīa hām Mô͘se ǹg in hiánhiān, iā kap Iaso͘ kóngōe.

9:5 Pítek tùi Iaso͘ kóng :” Lāusu! Lán tī chia ūkáu hó! Goán lâi tah saⁿchō liâu’á, chi̍t chō hō͘ Lí, chi̍t chō hō͘ Mô͘se, koh chi̍t chō hō͘ Ílīa.”

9:6 Inūi i m̄chai tio̍h kóng siáⁿmih chiahhó, koh inūi ta̍kê lóng chin khiónghông.

9:7 Túhó ū hûnchhái lâikàu in tiongkan khàm khílâi, koh ū siaⁿim tùi hûnlāi chhutlâi, “Chitūi sī góa só͘ thiàⁿ ê kiáⁿ, lín tio̍hài thiaⁿ I ê ōe.”

9:8 Hutjiân, ha̍kseng chi̍tē khòaⁿ sìchiuûi, bô bat ê lâng, chíū Iaso͘ kap in tī hia.

9:9 Kiâⁿ loh soaⁿ ê lō͘tiong, Iaso͘ hoanhù in kóng:” Góa iáubē tùi sí kohoa̍h ê sî, lín bēsái chiong kináji̍t só͘ khòaⁿtio̍h ê sū kā lâng kóng.”

9:10 Ha̍kseng chiong chitkù ōe kì tī simlāi, khiok hō͘siong thólūn” Tùi sí kohoa̍h” sī siáⁿmih ìsù.

9:11 In chiū mn̄g I :” Kàusu ūisiáⁿmi̍h kóng Ílīa tio̍hài tāiseng lâi?”

9:12 Iaso͘ kóng:” Ílīa khaksi̍t ài tāiseng lâi hengkhí bānhāngsū; tānsī sèngkeng kámm̄sī ū kóngtio̍h beh ū chi̍tūi, I tio̍hài siū chinchē ê kankhó͘, koh hō͘ lâng khòaⁿkhin?

9:13 Góa kā lín kóng, Ílīa íkeng lâikòe à, lâng iā chhìnchhái khoánthāi I, tū chiàu kengchheh só͘ kìchāi koanhē I ê.”

9:14 Iaso͘ lâikàu ha̍kseng hia, khòaⁿtio̍h chēchē lâng ûi in, koh ū kàusu hām in piànlūn.

9:15 Ta̍kê chi̍tē khòaⁿtio̍h Iaso͘, lóng chin ìgōa, chiū cháulâi ǹg I chhéngan.

9:16 Iaso͘ mn̄g in kóng:” Lín leh hām in piànlūn siáⁿmih?”

9:17 Kûnchiòng ê tiongkan ū chi̍tē lâng ìn I kóng:” Lāusu à! Góa chhōa góa ê kiáⁿ lâi kàu Lí chia, i hō͘ siâsîn tîⁿtio̍h chôaⁿ bē kóngōe.

9:18 Bôlūn i tī tóūi, siâsîn lóng lêngtī I, chiong i siakloh thô͘kha, hō͘ i chhùikhíkin kā tiâutiâu, chhùi lâu pe̍hpo, kuisengkhu tēng kho̍kkho̍k. Góa íkeng chhiáⁿ kòe Lí ê ha̍kseng lâi chiong siâsîn kóaⁿ chhutkhì, m̄ku in khiok bô hoattō͘.”

9:19 Iaso͘ ìn :” Â--à! Lín chiahē m̄sìn ê lâng à, Góa ētàng tī línchia lōakú? Góa beh límnāi lín kàu tangsî leh ? Kín chhōa i lâi.”

9:20 In chiū chhōa i kòelâi. I chi̍tē khòaⁿtio̍h Iaso͘, siâsîn sûi hō͘ i ê sengkhu kiù khílâi, tó lo̍hkhì thô͘kha, tī hia pénglâi péngkhì, chhùi puh pe̍hpo.

9:21 Iaso͘ mn̄g i ê lāupē kóng:” I hoān chitê chèngthâu lōakú à?” Ìn :” Tùi sèhàn khaisí.

9:22 Siâsîn beh hāisí i, tiāⁿtiāⁿ chiong i chhialo̍h hóetui ásī saklo̍h chúinì. Taⁿ Lí nā ē, kiû Lí lînbín goán, pangcho͘ goán.”

9:23 Iaso͘ tùi i kóng :” Lí nā ē sìn, tùi sìn ê lâng lâi kóng, ta̍khāng tāichì lóng ē chiâⁿ.”

9:24 Chitê gíná ê lāupē sûi hoah (Ū ê pánpún ke siá” lâu ba̍ksái” tī chit jī ê thâuchêng):” Góa sìn, tānsī góa ê sìn putchiok, kiû Lí pangchō͘ góa.

9:25 Iaso͘ khòaⁿkìⁿ chēchē lâng chòhóe cháu óalâi, chiū chíchek hitê siâsîn, kóng:” Lí chitê chhòngtī lâng bētàng kóngōe ê siâsîn, Góa bēnglēng lí tùi chitê gíná ê sinchioⁿ chhutlâi, bēsái koh ji̍pkhì.”

9:26 I chi̍tē tōasiaⁿ hoah, siâsîn kā chit ê gíná ê sengkhu kiú kah chin līhāi, chiah chhutkhì. Chitê gíná chi̍tsîchūn náchhiō͘ⁿ síkhì ê khóaⁿ, só͘í tōa pō͘hūn ê lâng kóng :” I síkhì à.”

9:27 M̄ku Iaso͘ khì khan i ê chhiú, hû I khílâi, i chiū khiā khílâi.

9:28 Tng Iaso͘ ji̍pkhì chhùlāi, ha̍kseng óalâi sèsiaⁿ mn̄g I:” Goán sī ánchóaⁿ bētàng chiong i kóaⁿchhutkhì?”

9:29 Iaso͘ ìn:” Nām̄sī ēng kîtó kap kìmchia̍h, chitkhoán siâsîn kóaⁿ bē chhutkhì.”

9:30 In līkhui hitê só͘chāi, kengkòe Kalīlī ê sî, Iaso͘ m̄ài hō͘ lâng chaiiáⁿ.

9:31 Inūi I beh kà I ê ha̍kseng, kóng :” Góa tehbeh hō͘ lâng kau hō͘ koaⁿhú, in beh thâisí Góa, m̄ku kengkòe saⁿji̍t āu, Góa ē kohoa̍h.”

9:32 Ha̍kseng thiaⁿbô I kóng ê ìsù, mā m̄káⁿ mn̄g I.

9:33 In lâikàu Kape̍klông. Iaso͘ tī chhùlāi mn̄g ha̍kseng :” Túchiah lín tī lō͘nih, sī le thólūn siáⁿmih?”

9:34 In lóng tiāmtiām bô ìnsiaⁿ, inūi in tī lō͘nih hō͘siong leh cheⁿ beh chò láutōa.

9:35 Iaso͘ chēlo̍hlâi, kiò cha̍pjī ê ha̍kseng óalâi, kā in kóng:” Nāū lâng goānì chò thâuè, i ittēng tio̍h chò ta̍kê ê bóeá, chò lâng ê po̍kjîn.”

9:36 Sûi chhōa chi̍tê gíná kòelâi, hō͘ i tī ha̍kseng ê tiongkan, koh kā i phō khílâi, tùi in kóng:

9:37 “ Hoânnāsī tī Góa ê miâ chiapthāi chhiō͘ⁿ chitê gíná, chiūsī chiapthāi Góa; kìⁿnā chiapthāi Góa ê, m̄sī chiapthāi Góa, sī chiapthāi hitūi chhe Góa lâi chia ê.”

9:38 Iokhān tùi Iaso͘ kóng:” Lāusu, goán khòaⁿtio̍h ū lâng hōng Lí ê miâ chiong siâsîn kóaⁿ chhutkhì, goán chiū kìmchí i, inūi i bô lâi tòe goán.”

9:39 Iaso͘ hôetap :” M̄bián kìmchí i, inūi bô chi̍tê hōng Góa ê miâ lâi kiâⁿ koânlêng ê, ē chhìnchhài húipòng Góa.

9:40 Bô kongkek lán ê, chiūsī leh pangchō͘ lán ê.

9:41 Nāūlâng inūi lín sī sio̍ktī Góa, chiū hō͘ lín chi̍tpoe chúi thang lim ê, Góa si̍tchāi kā lín kóng, i bētàng bô tittio̍h pòsio͘ⁿ.

9:42 Nāūlâng hō͘ sìn Góa ê lâng ê tiong-kan ū chi̍tê sèkiáⁿ līkhui Góa, lêngkhó ēng tōatè chio̍hbō pa̍k tī i ê āmkún, tìm lo̍hkhì háinih.

9:43 Kású lí ū chi̍tki chhiú hō͘ lí līkhui Góa, tio̍h ài sûi kā chámtn̄g,

9:44 suibóng lí ê sinthé bô kiānchoân, tānsī ētàng tittio̍h éngoán ê sèⁿmiā, sī pí ū nn̄gki chhiú lo̍hkàu tēga̍k, tiàmtī bē hoakhì ê hóeni̍h khahhó.

9:45 Kású lí ū chi̍tki kha hō͘ lí līkhui Góa, sûi kā chām khílâi.

9:46 Lêngkhó͘ kiám chi̍tki kha, thang tittio̍h éngoán ê sèⁿmiā, m̄thang nn̄gki kha hóhó pī tàn lo̍hkhì tēga̍k.

9:47 Kású ū chi̍tlúi ba̍kchiu hō͘ lí līkhui Góa, chiū kā i ó͘ khílâi, thang chhun chi̍tlúi ba̍kchiu ji̍p thiankok, che pí ū nn̄glúi hō͘ lâng tàn lo̍hkhì tēga̍k khahhō.

9:48 Hia ê thâng bē sí, hóe sī bē hoakhì ê.

9:49 Inūi beh ēng hóe tòngchò iâm kā sīⁿ khílâi. Só͘ū ê chèmi̍h lóng ài ēng iâm sīⁿ.

9:50 Iâm sī hó mi̍hkiāⁿ, m̄ku nāsī bô bī, ū siáⁿmi̍h pānhoat hō͘ i koh kiâm? Lín ê lāibīn tio̍h ài ū iâm, píchhú hôhó siongchhù.

       2025.10.18. Siukái tī Lâmthâm