Má-khó hok-im-su Tē saⁿ chioⁿ 馬可福音 第三章

Má-khó hok-im-su Tē saⁿ chioⁿ
馬可福音 第三章

3:1 Ia-so͘ koh ji̍p-khì hōe-tn̂g, tī hia ū chi̍t-ê chhiú khôe-khì ê lâng.

3:2 Chē-chē lâng bih leh thau-khòaⁿ Ia-so͘ sī-m̄-sī tī an-hioh-ji̍t ē kā lâng i-peⁿ, thang khì kò I.

3:3 Ia-so͘ tùi khôe-chhiú ê lâng kóng:”Khí-lâi, lâi khiā tī tiong-ng.”

3:4 Sòa-lo̍h mn̄g chèng-lâng :”Tī an-hioh-ji̍t kiâⁿ-hó、kiâⁿ-pháiⁿ, kiù-lâng、hāi-lâng, toh-chi̍t-hāng ē-sái chò?”Ta̍k-ke long bô chhut-siaⁿ.

3:5 I ēng chin siū-khì ê gán-sîn khòaⁿ in móe chi̍t-ê lâng, iā ūi-tio̍h in ê ngē-sim kám-kak chin iu-siong, chiū tùi hit-ê-lâng kóng:”Kā lí ê chhiú chhun-chhut-lâi!”I sûi-sî chhun-chhut-lâi, chhiú chiū ho̍k-goân.

3:6 Hoat-lī-sài-lâng lī-khui hōe-tn̂g, khì hām Hi-lu̍t-tóng ê lâng thó-lūn, beh cháiⁿ-iō͘ⁿ chiah ē-tàng hāi-sí Ia-so͘.

3:7 Ia-so͘ kap ha̍k-seng thè-khì Ka-lī-lī ô͘-piⁿ, ū chin-chē Ka-lī-lī lâng lâi toè I.

3:8 Koh ū chi̍t tōa-tīn lâng thiaⁿ-tio̍h I só͘ chò ê tāi-chì, chiū tùi Iû-thài、Iâ-lō͘-sat-léng、I-thó͘-mái、Io̍k-tàn-hô tang-pêng、í-kip Thài-ní hām Se-tùn ê chiu-ûi lâi chhōe I.

3:9 In-ūi lâng chin-chē, Ia-so͘ kau-tāi ha̍k-seng chún-pī chi̍t-chiah chûn-á hō͘ I chē, chiah bē hō͘ lâng kheh-tio̍h.

3:10 In-ūi I í-keng ū i-hó chin-chē pēⁿ-lâng, só͘-í só͘ ū ê pēⁿ-lâng long kheh óa-lâi beh bong Ia-so͘.

3:11 Hiah-ê siâ-sîn bô-lūn tī siáⁿ-mih sî-chūn khòaⁿ tio̍h Ia-so͘, chiū phak tī I ê bīn-chêng, tōa-siaⁿ hoah :”Lí-sī Siōng-chú ê kiáⁿ.”

3:12 Ia-so͘ chin giâm-lē kéng-kò in, m̄-thang chiong I pò hō͘ lâng chai.

3:13 I chiō͘ⁿ-soaⁿ ê sî, iā chhōe I khòaⁿ-chò sek-ha̍p ê lâng lâi, in chiū óa-lâi.

3:14 Chiū chí-tēng cha̍p-jī ūi, thang siông-siông kap I chò-hóe, iā thang phài in chhut-khì thoân-tō.

3:15 Koh hō͘ in ū koân-pèng kóaⁿ-kúi.

3:16 Só͘ chí-tēng ê lâng, ū Se-bûn iā hō͘ Ia-so͘ hō-chò Pí-tek、

3:17 Se-pí-thài ê kiáⁿ, Ngá-kok kap Iok-hān、 Ia-so͘ iā kā in hō-chò Pòaⁿ-nî-kî, sī Lûi-kong-á kiáⁿ ê ì-sù,

3:18 Koh ū An-tek-lia̍t、 Hui-le̍k、Pa-to-lô-mái、Má-thài、To-má、A-le̍k-hui ê kiáⁿ Ngá-kok hām Tat-thài、chek-ke̍k hoán Lô-má chèng-koân ê Se-bûn,

3:19 I-kip chhut-bē Ia-so͘ ê Iû-tāi.

3:20 Ia-so͘ ji̍p-khì chhù-lāi, koh ū chi̍t tōa-tīn lâng óa-lâi, soah hō͘ in liân pn̄g iā bē kò͘-tit chia̍h.

3:21 I ê chhin-lâng chai-iáⁿ án-ne, chiū chhut-lâi tòng Ia-so͘, in-ūi in kóng I bô-sáⁿ chèng-siông.

3:22 Tùi Iâ-lō͘-sat-léng lâi ê kàu-su kóng :”I sī khì hō͘ Pia̍t-se-pok hū-sin.”Koh kóng:”I sī khò kúi-ông kóaⁿ-kúi.”

3:23 Ia-so͘ ka in tiàu óa—lâi, ēng phì-jū tùi in kóng:” Sat-tàn ná-ē kóaⁿ Sat-tàn?

3:24 Chi̍t-ê kok-ka nā lāi-pō͘ saⁿ tùi-khòng, hit-ê ko̍k-ka chiū ē hun-lia̍t;

3:25 Nā ū ka-têng ê lāi-pō͘ saⁿ tàu-cheng, hit-ê ka-têng chiū ē sòaⁿ-khì.

3:26 Sat-tàn nā khí-lâi kong-kek ka-tī, i chiū bē-tàng seng-chûn, tek-khak ē siau-bia̍t.

3:27 Bô-lâng ē-tàng ji̍p-khì ióng-sū ê chhù lāi, chhió͘ⁿ in tau ê mi̍h-kiāⁿ; tio̍h ài seng ka i pak-khí-lâi, chiah ē-tàng.

3:28 Góa si̍t-chāi ka lín kóng, lâng bô-lūn hoān sím-mi̍h chōe, kóng sím-mi̍h pòng-to̍k ê ōe, long ē-tàng tit-tio̍h sià-bián;

3:29 M̄-ku bô-lūn sím-mih lâng siat-to̍k Sèng-sîn, éng-oán bē tit-tio̍h sià-bián, tio̍h tam-tng éng-oán ê chōe.”

3:30 Ia-so͘ kóng chiah ê ōe sī in-ūi in kóng:”I hō͘ siâ-sîn tîⁿ-tio̍h.”

3:31 Hit-sî-chūn, I ê lāu-bú kap I ê hiaⁿ-tī lâi tī gōa-bīn, kà lâng khì kiò I.

3:32 Ū chi̍t tōa-tīn lâng chē tī Ia-so͘ ê sì-ûi, ū lâng kā I kóng:” LÍ ê lāu-bó hām Lí ê sió-tī sió-mōe tī gōa-bīn lâi chhōe Lí.”

3:33 I ìn:”Siàⁿ-lâng sī Góa ê lāu-bó, Góa ê hiaⁿ-tī?”

3:34 Jiân-āu chiū khòaⁿ chē tī I chiu ûi ê móe chi̍t-ê lâng, kóng:”Khòaⁿ ah! Chiah-ê lâng chiū-sī Góa ê lāu-bó, Góa ê hiaⁿ-tī !

3:35 Chiàu Siōng-chú ê chí-ì khì kiâⁿ ê lâng, chiū sī Góa ê hiaⁿ-tī chí-bōe, Góa ê lāu-bó.”