Má-khó hok-im-su Tē-sì-chioⁿ 馬可福音 第四章

Má-khó hok-im-su Tē-sì-chioⁿ 

馬可福音 第四章

4:1 Ia-so͘ koh tī ô͘-piⁿ kàu-tō chèng-lâng. Ū chin-chē lâng chip óa-lâi tī I hia, I chôaⁿ khì chē phû tī ô͘-bīn ê chûn. Chèng-lâng long khiā-óa tī hōaⁿ-piⁿ.

4:2 Ia-so͘ ēng chin-chē phì-jū lâi kà in chai-iáⁿ chē-chē tì-sek. Tī kàu-tō ê tiong-kan, tùi in kóng:

4:3 “ Chhiáⁿ siông-sè thiaⁿ ! Ū chi̍t-ê chò-sit-lâng khì iā chéng-chí.

4:4 Iā ê sî, ū chi̍t-kóa iā tī lō͘-nih, chiáu-á poe lâi, chiū ka I chia̍h liáu-liáu.

4:5 Ū ê iā tī chhián-tô͘ ê chio̍h-thâu-á tē, tô͘-bah bô-kàu chhim, chin-kín chiū puh-gê,

4:6 Ji̍t-thâu chhut-lâi ê sī, pha̍k chi̍t-ē-á, in-ūi bô-kin chiū ta-khì;

4:7 Ū ê iā tī cha̍p-chháu tiong, hia-ê chháu-á hoat pí in khah kín, kā in kheh tiâu lè, in chiū bē-tàng kiat-liap;

4:8 Koh ū ê iā tī hó-tô͘  nih, puh-gê seⁿ-chò chin tōa-châng, kiat-lia̍p chē-chē, ū ê saⁿ-cha̍p pōe, ū ê la̍k-cha̍p pōe, iā-ū chi̍t-pah pōe ê”;

4:9 Koh kóng:”Ū hīⁿ-khang thang thiaⁿ ê, tio̍h chù-ì thiaⁿ!”

4:10 Tng chèng-lâng long sòaⁿ-khì ê sî, hia-ê tòe tī Ia-so͘ sin-piⁿ ê lâng kap cha̍p-jī ê ha̍k-seng mn̄g I koan-hē chit-ê phì-jū ê ì-sù.

4:11 I án-ne hôe-tap:” Siōng-tè-kok ê ò-pì, lín í-keng chai-iáⁿ, m̄-ku tùi kî-thaⁿ ê lâng chiū ēng pí-jū,

4:12 Che nā chin-chhiūⁿ Sèng-keng só͘ kì:”In leh khòaⁿ tō ū leh khòaⁿ, khiok bōe liáu-kái; thiaⁿ tō ú-leh thiaⁿ, khiok bōe chheng-chhó; kiaⁿ-liáu in ê sim-su kui-ǹg Siōng-chú, chiū tit-tio̍h sià-bián.”

4:13 Koh tùi in kóng:” Lín bōe liáu-kái chit-ê pí-jū sī-bô? Án-ne ná-ē bêng-pe̍k só͘-ū ê pí-jū?

4:14 Iā-chéng ê lâng só͘ iā ê chiū-sī Siōng-chú ê ōe.

4:15 Hit-ê iā tī lō͘-piⁿ ê ì-sù, chiū-sī tng lâng teh chiap-siū Siōng-chú ê ōe ê sî , sûi hō͘ Sat-tàn chhiúⁿ-khì.

4:16 Hia-ê iā-tī chio̍h-thâu-á tē ê, sī teh kóng ū ê lâng thiaⁿ tio̍h Siōng-chú ê ōe, chin hoaⁿ-hí má-siōng chiap-siū,

4:17 Tān-sī in ê kin téng bô chhim, oa̍h bô-kú. Tī tú-tio̍h hoān-lān a-sī pek-hāi, chiū hòng-khì Siōng-chú ê kà-sī.

4:18 Iáu-ū iā loh tī cha̍p-chháu lāi ê, sī teh kóng chia-ê lâng niá-siū liáu Siōng-chú ê ōe, 

4:19 I-āu tú-tio̍h sè-kan ê khòa-lū、chîⁿ-châi ê bê-hek kap kî-thaⁿ ê su-io̍k, chiong tùi Siōng-chú só͘ tit-tio̍h ê ōe pàng chi̍t-piⁿ, soah bē kiat-chí.

4:20 Hia-ê iā tī hó tô͘ ê, sī chí thiaⁿ-tio̍h Siōng-chú ê ōe koh chiap-siū ê, chiū kiat-liap, ū saⁿ-cha̍p pōe, ū la̍k-cha̍p pōe, chi̍t-pah pōe.”

4:21 Ia-so͘ koh tùi in kóng:”Kám-ū lâng chiong teng-á-hóe khǹg tī nâ-á lāi, á-sī bîn-chhn̂g- kha, bô beh chhāi tī toh-téng ê?

4:22 In-ūi só͘-ū pī am-khám ê tāi-chì, it-tēng ê hō͘-lâng chai-iáⁿ; ún-môa ê sū iā bô m̄ pī hoat-hiān.

4:23 Ū hīⁿ-khang thang thiaⁿ ê, tio̍h chù-ì thiaⁿ!”

4:24 Koh kóng:”Lín só͘ thiaⁿ ê tio̍h khǹg tī sim-lāi. Lín ēng siáⁿ-mih phiau-chún tùi-thāi lâng, lâng iā-ē án-ne tùi-thāi lín, sīm-chì ke koh kha hó.

4:25 In-ūi bô-lūn siáⁿ-lâng nā jīn-ûi ka-tī sī ū, Siōng-chú beh koh ke-thiⁿ hō͘  i; nā ka-tī jīn-ûi bô, chiū ē chiong i só͘ ū ê mā siu-khì.”

4:26 Koh kóng:” Siōng-chú ê kok-tō͘ chin-chhio͘ⁿ lâng khì iā chéng-chí tī chhân-tē,

4:27 Kàu àm-mê i khì khùn, kè-ji̍t khí-lâi, iā ê chéng-chí puh-gê chiām-chiām tōa, hit-ê lâng khiok m̄-chai in sī án-chóaⁿ hoat-seng ê.

4:28 Thó͘-tē seng-sán ngó͘-kok sī chū-jiân ê hiān-siōng: Tāi-seng puh-gê, jiân-āu thiu sūi, tiū-sūi pá-tīⁿ chiū kiat liap;

4:29 Kàu i í-keng sek, chiū kiah liâm-le̍k-á khì siu-koah, in-ūi siu-sêng ê sî-chūn kàu ah.”

4:30 Ia-so͘ koh kóng:”Lán thang ēng siáⁿ-mih lâi kap Siōng-chú ê kok-tō͘ saⁿ-pí? Ē-sái ēng siáⁿ-mih phì-jū lâi soat-bêng?

4:31 I ná-chhiūⁿ chi̍t-lia̍p kòa-chhài-chí, chéng loh thô͘-ni̍h, sui-jiân pí só͘-ū ê chéng-chí kha sè-lia̍p,

4:32 Tān-sī chéng loh tô͘ í-āu, tōa-châng khí-lâi , pí kî-thaⁿ ê chhài koh kha tōa châng, mā-ū hoat oe, sīm-chì ē-tàng hō͘ chiáu-á chò-siū, hioh tī i-ê chhiū-ńg ē.”

4:33 Ia-so͘ ēng chin-chē lūi-sū chit-khoán ê pí-jū, chiàu in só͘ ē-thang liáu-kái ê, lâi ǹg in káng-tō.

4:34 Nā-bô ēng pí-jū, chiū bô kóng hō͘ in thiaⁿ, thàn tī bô-lâng ê sî, chiah chiong só͘-ū ê

chai-bat ǹg in káng-kái.

4:35 Chiū tī hit-ê àm-sî, Ia-so͘ tùi ha̍k-seng kóng:” Lán lâi-khì lēng-gōa hit-pêng hōaⁿ.”

4:36 Ha̍k-seng chiām-chiām lī-khui chèng-lâng, chiō͘ⁿ-lâi chûn-téng kap Ia-so͘ chò-hóe kòe-khì; mā-ū kúi-chiah sè-chiah chûn tòe in kiâⁿ.

4:37 Hut-jiân thàu-tōa-hong, hái-éng put-toān phoah li̍p chûn-lāi, hiān khòaⁿ chúi chiū teh-beh tīⁿ ah.

4:38 Ia-so͘ ka-tī tī chûn-bóe, tó-tī chím-thâu téng leh khùn. Ha̍k-seng kā kiò-chhéⁿ kóng:” Lāu-su! Goán teh-beh sí ah, Lí iau bô-iàu-bô-kín, sī-bô?

4:39 Ia-so͘ chi̍t-ē chhéⁿ-lâi, sûi chí-chek tng leh thàu ê hong, tùi hái kóng:”Ho-ah! Tiāⁿ-tiāⁿ!” Hong chiū tiām-khì, éng iā thè kah lī-í-lī.

4:40 Ia-so͘ tùi in kóng:”Lín sī-teh kiaⁿ siáⁿ-mih? Lín kiám iau-bô sìn-sim?”

4:41 In ta̍k-ke kiaⁿ kah phī-phī chhoah, hō͘-siong mn̄g :” I tau—teh sī siáⁿ-mih lâng, liân hong kap hái long koai-koai-a thiaⁿ I ê.”