Má-khó hok-im-su Tē gō͘ chioⁿ 馬可福音 第五章

Má-khó hok-im-su Tē gō͘ chioⁿ 

馬可福音　第五章

5:1 In lâi kàu ô͘ ê hit-pêng hōaⁿ, kiâⁿ ji̍p Kek-lah-sim lâng ê só͘ -chāi.

5:2 Ia-so͘ chi̍t-ē kiâⁿ loh chûn, sûi tú-tio̍h chi̍t-ê hō͘ pháiⁿ-mi̍h-á tîⁿ-tio̍h ê lâng, i tú-chiah tùi bōng-a-po͘  kiâⁿ chhut-lâi.

5:3 Chit-ê lâng tòa tī bōng-a-po͘  lāi, bô-lâng ē-tàng kā i pak-khí-lâi, liân ēng thih-liān iā bô-hoat-tō͘;

5:4 In-ūi Í-keng chin-chē pái bat ēng thih-liān kap kha-khàu kā pak-khí-lâi, tān-sī ta̍k-pái lóng hō͘ i chhoah-tn̄g, liân kha-khàu iā kòng kah chhùi-khì, bô-lâng thang chè-ap i.

5:5 I mê kap ji̍t lóng tòa-tī bōng-á-po͘  hām soaⁿ-lāi, tī hia tōa-siaⁿ âu-kiò, koh ēng chio̍h-thâu hám ka-tī.

5:6 Tng i tī hn̄g-hn̄g khòaⁿ-tio̍h Ia-so͘, chiū sûi cháu-lâi pài I,

5:7 Tōa-siaⁿ hoah :”Chì-koân Siōng-chú ê kiáⁿ Ia-so͘, góa kap Lí ū siáⁿ-mih koan-hē? Góa khò Siōng-chú ê sè kiû Li, mài hō͘ góa tú-tio̍h thàng-thiàⁿ! ”

5:8 In-ūi Ia-so͘ bat tùi i kóng:”Thái-ko-kúi, Tùi chit-ê-lâng ê sin-chio͘ⁿ lī-khui!”

5:9 Ia-so͘ mn̄g i:”Lí kiò chò siáⁿ-mih miâ?”I ìn:”Góa miâ chò「kûn」, in-ūi goán chin tōa-tīn.”

5:10 Iā chin khún-chhiat kiû Ia-so͘, mài hō͘ in lī-khui hit-ê só͘-chai.

5:11 Tī hia ê soaⁿ-phiâⁿ tú-hó ū chi̍t-tōa-tīn ê ti teh chia̍h mi̍h-kiāⁿ.

5:12 In chiū kiû Ia-so͘:”Kiû Li hō͘ goán kàu hiah-ê ti ê tiong-kan, li̍p-khì in ê lāi-bīn.”

5:13 Ia-so͘ tah-èng in, hit-tīn thái-ko-kúi chiū chhut-lâi li̍p-khì hia-ê ti ê lāi-bīn.Tùi án-ne hit-tīn ti chôaⁿ tùi soaⁿ-phiâⁿ-téng chông lo̍h-khì im-sí tī ô͘-nih, hia-ê ti iok-lio̍k ū nn̄g-chheng chiah.

5:14 Kò͘ ti ê lâng chiū khí-kha-lōng, cháu khì siâⁿ-lāi hām chng-kha, chi̍t-sì-kòe pò lâng chai-iáⁿ chit-hāng tāi-chì. Ta̍k-ke chiū cháu-lâi khòaⁿ sī hoat-seng siáⁿ-mih tāi-chì.

5:15 In lâi-kàu Ia-so͘ hia, khòaⁿ-tio̍h hit-ê hō͘ phái-mi̍h-á tîⁿ-tio̍h ê lâng, chiū-sī chìn-chêng khì hō͘ siâ-sîn hū-sin ê, taⁿ tī Ia-so͘ ê chiàⁿ-pêng chē tiāⁿ-tiāⁿ , mā-ū chhēng saⁿ, sim-sîn iā í-keng hoe-ho̍k chèng-siông, ta̍k-ke lóng khí tio̍h-kiaⁿ.

5:16 Hia-ê khòaⁿ-tio̍h chit-kiāⁿ sū ê lâng, chiū sì-kè thoân hō͘ siâ-sin hū-sin ê hit-ê lâng, tī i sin-siòng só͘  hoat-seng ê , kap hit-tīn ti-á ê tāi-chì;

5:17 Choân tē-hng ê lâng lóng kiû Ia-so͘ kín lī-khui in ê só͘-chai.

5:18 Ia-so͘ chiūⁿ-chûn ê sî, hit-ê bat hō͘ phái-mi̍h-á tîⁿ-tio̍h ê lâng, khún-kiû Ia-so͘ ún-chún i kap in chò-hóe khì.

5:19 M̄-ku Ia-so͘ bô tah-èng, hoán-tńg hoan-hù i:”Tńg-khì lín tau, ǹg lí-ê chhin-lâng soat-bêng Siōng-chú tī lí ê sin-chio͘ⁿ só͘ chò ê, sī hô-téng tōa ê tāi-chì, koh I cháiⁿ-iūⁿ lîn-bín lí.”

5:20 Hit-ê lâng chiū lī-khui, tī Tē-ka-po-lī khai-sí soan-thoân Ia-so͘ tī i sin-chio͘ⁿ só͘ chò ê tōa tāi-chì, chèng-lâng thiaⁿ liáu kám-kak chin hi-hán.

5:21 Tng Ia-so͘ koh chē-chûn kòe-khì hit-pêng hōaⁿ, sûi ū chi̍t tōa-tīn lâng chip óa-lâi I hia. I tú-hó khiā tī hōaⁿ-piⁿ.

5:22 Ū chi̍t-ê koán-lí hōe-tn̂g ê chú-jīm, miâ-chò Kai-ló͘, chi̍t-ē chhōe-tio̍h Ia-so͘, sûi phak tī I ê kha-chêng,

5:23 It-chài kiû Ia-so͘ :”Góa ê sè-hàn cha-bó͘ gín-á teh-beh sí ah, kiû Lí lâi-khì ūi i hōaⁿ-chhiú kî-tó, hō͘ i oân-choân hó khí-lâi, koh oa̍h thiàu-thiàu.”

5:24 Ia-so͘ chek-sî hām i tńg-khì. Koh kui tōa-tīn lâng mā sio-e-kheh lâi tòe I.

5:25 Koh ū chi̍t-ê hū-lú,hoān-tio̍h hū-lú-pēⁿ tiāⁿ-tiāⁿ chhut-hoeh, í-keng ū cha̍p-jī nî kú,

5:26 Keng-kòe chin-chē i-seng ê tī-liâu, siū chiâⁿ-chē ê thàng-thiàⁿ, ke-hóe iā khai-liáu-liáu, pēⁿ-chêng m̄-niāⁿ bô kha-hō, tian-tò lú siong-tiōng.

5:27 I ū thiaⁿ tio̍h koan-hē Ia-so͘ ê sū, chiū tùi chèng-lâng ê āu-bīn kiâⁿ óa Ia-so͘, khì bong I ê saⁿ-á-ku,

5:28 I sio͘ⁿ kóng:”Góa nā bong-tio̍h I ê saⁿ-á-ku, pēⁿ chiu-ē oân-choân hó-khì.”

5:29 Tùi án-ne i chhut-hòe ê só͘-chāi sûi thêng-chí, siâng-sî iā kám-kak sin-thé ê pēⁿ hó-khì à.

5:30 Hit-ê sùn-kan Ia-so͘ kám-kak ū lêng-le̍k tùi I ê sin-chio͘ⁿ chhut-khì, sûi oa̍t-tńg-sin mn̄g ûi tī sin-piⁿ ê kûn-chiòng kóng:”Siáⁿ-lâng bong Góa ê saⁿ?”

5:31 Ha̍k-seng ìn:”Chiah chē lâng e-lâi-e-khì, Lí iau teh mn̄g「Siáⁿ-lâng bong Góa」ò͘ ?”

5:32 Ia-so͘ chin siông-sè chi̍t-ê chi̍t-ê khòaⁿ, ài-beh chhōe-chhut chò chit-hāng sū ê lâng.

5:33 Chóng-sī hit-ê hū-lú kiaⁿ kah sih-sih-chùn , in-ūi i ka-tī chai-iáⁿ tī i sin-chio͘ⁿ só͘ chò-chiâⁿ ê tāi-chì, chiū lâi phak tī Ia-so͘ ê kha-chêng, chiong tāi-chì khak-si̍t hoat-seng ê keng-kòe kóng chhut-lâi.

5:34 Ia-so͘ tùi i kóng:”Góa ê châ-kiáⁿ, lí ê sìn-sim hō͘ lí tit-tio̍h oân-choân hoe-ho̍k, pêng-pêng an-an tńg-khì! Lí ê pēⁿ í-keng hó-khì à.”

5:35 I iáu-teh kóng ōe ê sî, ū lâng tùi koán-hōe-tn̂g ê chú-jīm in-tau cháu-lâi kóng:”Lín châ-kiáⁿ sí-khì à, nā-toh-koh lô-hoân sin-seⁿ?”

5:36 Ia-so͘ chi̍t-ē thiaⁿ tio̍h chiah-ê ōe, sûi tùi koán-hōe-tn̂g ê chú-jīm kóng:”Bián kiaⁿ, sìn chiū hó !”

5:37 I sûi chhōa Pí-tek、Ngá-kok、kap Ngá-kok ê hiaⁿ-tī Iok-hān chò-hóe khì, m̄-chún kî-thaⁿ ê lâng tòe-lō͘.

5:38 In chi̍t-ē lâi-kàu koán-hōe-tn̂g ê chú-jīm in-tau, Ia-so͘ khòaⁿ-kìⁿ hia ū lâng hoah-lâi hoah-khì, mā-ū lâng khàu kah chin tōa-siaⁿ,

5:39 I chi̍t-ē li̍p-khì chhù-lāi, sûi tùi in kóng:” lín sī án-chóaⁿ háu kah chiah chhi-chhám leh? Chit-ê gín-á m̄-sī sí-khì, sī teh khùn.”

5:40 In long tùi I léng-chhiò. Ia-so͘ sûi chiong in kóaⁿ chhut-khì, kan-ta chhōa gín-á ê pē-bú kap saⁿ-ê ha̍k-seng, li̍p-khì gín-á ê pâng-keng.

5:41 Chiong gín-á ê chhiú khan leh, tùi i kóng:”Tāi-lī-tāi, kó͘-bí!(Ì-sù sī : Châ-bó͘ gín-á, Góa bēng-lēng lí khí-lâi! )”

5:42 Hit-ê cha-bó͘ gín-á sûi pè khí-lâi kiâⁿ. Ta̍k-ke khòaⁿ chi̍t-ē, long kiaⁿ chi̍t tiô;  chit-ê châ-bó͘ gín-á í-keng cha̍p-jī hòe à.

5:43 Ia-so͘ chin sīm-tiōng kau-tāi in, mài hō͘ lâng chai-iáⁿ chit-hāng tāi-chì, koh hoan-hù theh mi̍h-kiāⁿ hō͘ cha-bó͘ gín-á chia̍h.