Má-khó hok-im-su Tē La̍k Chioⁿ 馬可福音 第六章

Má-khó hok-im-su Tē La̍k Chioⁿ

馬可福音 第六章

6:1 Sòa-lo̍h Ia-so͘ lī-khui hia, lâi-kàu ka-tī tōa-hàn ê só͘-chāi, ha̍k-seng iā tòe I khì.

6:2 Kàu an-hioh-ji̍t, I ji̍p-khì hōe-tn̂g tī hia káng-kái Sèng-keng. Ta̍k-ke thiaⁿ-liáu long kám-kak chin sin-sián, kóng:”Chit-ê lâng sī tùi tó-ūi o̍h tio̍h chia-ê tì-sek? Koh só͘ sù hō͘ I ê tì-hūi īs siok tó chi̍t-khoán? I chhiú só͘ chò ê tōa tāi-chì it-poaⁿ lâng kam ē-hiáu ?

6:3 Chit-ê lâng kam m̄-sī ba̍k-chhiōⁿ? Má-lī-a ê kiáⁿ, Ngá-kok、Iok-se、Iû-tāi、Se-bûn ê tōa-hiaⁿ mah? I hia-ê sió-mōe kam-m̄-sī mā kap lán chò-hóe tī chia ?” In chiū in-ūi án-ne lâi thó-ià I, khòaⁿ I bô-khí.

6:4 Ia-so͘ chiū kā in kóng:”Chò sian-ti ê, tī pún-tē、pún-cho̍k、ka-tī ê ke í-gōa, bô-m̄-sī siū chun-tiōng ê.”

6:5 Ia-so͘ tī hia bē-tàng kiâⁿ sím-mi̍h tōa tāi-chì, kah-nā hōaⁿ-chhiú tī kúi-ê pēⁿ-lâng ê sin-chiō͘ⁿ, lâi i-hó in.

6:6 I mā ūi-tio̍h in ê m̄-sìn kám-kak chin ì-gōa, chiū khì hū-kīn ê chng-thâu soan-káng Siōng-chú ē ōe.

6:7 Ia-so͘ tiàu-chi̍p cha̍p-jī ê ha̍k-seng, phài in nn̄g-ê nn̄g-ê chhut-khì, iā hō͘ in koân-pèng thang chè-ho̍k siâ-sîn;

6:8 koh kau-tài in:”Lín tī lú-hêng ê sî, m-bián tòa lioⁿ-sit, mā m̄-bián tòa chîⁿ-tē-á, tû-liáu koáiⁿ-à í-gōa, siáⁿ-mih lóng bián ,

6:9 Ka-nā chhēng ê, iā m̄-bián chhēng lāi-saⁿ .”

6:10 Koh tùi in kóng:”Lín bô-lūn khì kàu tó-ūi, ji̍p-khì lâng ê chhù, chiū tòa tī hia, ti̍t-kàu lī-khui ê sî.

6:11 Bô-lūn tó-ūi ê lâng, bô chiap-thāi lín, á-sī m̄ thiaⁿ lín khoàn-kái ê ōe, tng lín lī-khui hia ê sî, tio̍h ēng nn̄g-ki kha chàm-chàm-leh, hō͘ kha-té ê thô͘ ka-la̍uh, kā in chò chèng.”

6:12 Ha̍k-seng chiū chhut-khì thoân hó-siau-sit, pò lâng lâ hóe-kái,

6:13 Koh kóaⁿ-chhut chē-chē siâ-sîn, iā ēng iû lâi boah chin-chē pēⁿ-lâng, i-hó in.

6:14 Ia-so͘ ê miâ-siaⁿ í-keng thoân chhut-khì. Hi-lu̍t-ông thiaⁿ-tio̍h, chiū kóng:”Kiâⁿ-sé-lé ê Iok-hān tùi sí-lâng tiong oa̍h khí-lâi à, só͘-í chia̍h-ê tōa tāi-chì chioh tio̍h i kiâⁿ chhut-lâi.”

6:15 M̄-ku ū pa̍t-ê-lâng kóng:”Sī Í-lī-a. Sī sian-ti, chhin-chhiō͘ⁿ sian-ti tiong ê chi̍t-ê.”

6:16 Tān-sī Hi-lu̍t thiaⁿ-liáu iáu-sī kóng:”Sī hō͘ góa thâi-sí ê Iok-hān, I oa̍h khí lâi à.”

6:17 Hi-lu̍t in-ūi chhim-chiàm i ê hiaⁿ-tī Hui-le̍k ê bó͘ Hi-lô-tí chò bó͘ ê goan-in, phài-lâng khì lia̍h Iok-hān, chiong I koaiⁿ loh kaⁿ-lô ka pak-khí-lâi.

6:18 In-ūi Iok-hān kong-khai hoán-tùi kóng:” LÍ chhōa lí-ê hiaⁿ-tī ê bó͘ sī bô ha̍p-hoat ê.”

6:19 Só͘-í Hi-lô-tí iā oàn-hīn i ,phah-sǹg beh thâi i, khiok in-ūi Hi-lu̍t bē-tàng hē-chhiú;

6:20 In-ūi Hi-lu̍t chai-iáⁿ Iok-hān sī chi̍t-ê chèng-ti̍t ê lâng, sī sèng-jîn, só͘-í kèng-ùi i pó-hō͘ i, iā chin-ài thiaⁿ i káng-lūn, sui-bóng ta̍k-pái thiaⁿ-liáu sim-lāi chin put-an.

6:21 Chin-hó ê ki-hōe lâi ā, chiū-sī tī Hi-lu̍t seⁿ-ji̍t hit-ji̍t, ū pān-toh chhiáⁿ bûn-bú pah-koaⁿ, hām Ka-lī-lī ê léng-siù.

6:22 Hi-lô-tí ê cha-bó͘-kiáⁿ ji̍p-lâi iân-sia̍h ê tiong-kan thiàu-bú, hō͘ Hi-lu̍t kap siang-toh ê lâng-kheh lóng chin hoaⁿ-hí. Ông chiū tùi i kóng：”Bô-lūn lí kā góa thó siáⁿ-mih, góa lóng tah-èng.”

6:23 Koh tùi I chiù-chōa :”Sûi-chāi lí kiû, chiū-sī liân góa kok-ka ê chi̍t-pòaⁿ, góa mā hō͘ lí.”

6:24 I chiū cháu chhut-khì mn̄g I ê ma-ma:” Góa ka thó siáⁿ-mih khah-hó?” “ Kiâⁿ sé-lé Iok-hān ê thâu”In ma-ma án-ne èng.

6:25 I sûi ji̍p-khì kìⁿ ông, kiû :”Chhiáⁿ lí chek-sî chiong kiâⁿ-sé-lé Iok-hān ê thâu-khak khǹg tī pôaⁿ-à-téng hō͘ góa.”

6:26 Ông in-ūi I só͘ chiù ê chōa, lāi-sim kan-khó͘ kah bē-hiáu kóng, koh in-ūi siàng-toh ê lâng-kheh ê iân-kò͘, chiū bô kā kū-choa̍t,

6:27 Sûi phài chi̍t-ê ōe-peng thoân-lēng khì theh Iok-hān ê thâu. Ōe-peng chiū khì kaⁿ-lô chām Iok-hān ê thâu.

6:28 Chiong thâu khǹg tī pôaⁿ-á-téng, phâng-lâi hō͘ cha-bó͘ gín-á, I chiū theh khì hō͘ in ma-ma.

6:29 Iok-hān ê ha̍k-seng thiaⁿ tio̍h siau-sit, chiū khì niá i ê sin-si, bâi-chòng tī bōng-nih.

6:30 Sú-tô͘ chū-chi̍p tī Ia-so͘ bīn-chêng, chiong it-chhè só͘ chò ê sū kap só͘ thoân ê tō-lí, long kā I pò-kò.

6:31 I chiū kóng:”Lín kap góa tiām-tiām-á lâi-khì khòng-iá hio̍h chi̍t-ē.” In-ūi tī hia lâi-óng ê lâng chin-chē, soah hō͘ in liân chia̍h-pn̄g ê sî-kan iā-bô.

6:32 In chiū chē-chûn tiām-tiām-á khì khòng-iá.

6:33 Chèng-lâng khòaⁿ-tio̍h in chhut-khì, ū chin-chē lâng bat in, chiū tùi ta̍k-siâⁿ kiâⁿ-chhut-lâi, chò-hóe cháu-khì in beh khì ê só͘ chai, jî-chhiáⁿ pí in kha chá kàu-ui.

6:34 Ia-so͘ chi̍t-ē kàu, khòaⁿ-kìⁿ chiah tōa-tīn ê lâng, chiū lîn-bín in, in-ūi in ná-chhiō͘ⁿ bô lâng chhī ê iûⁿ chi̍t-iō͘ⁿ, chiū khai-sí káng-kái Siōng-chú ê ōe-gú.

6:35 Kàu kah thiⁿ-sek àm à, ha̍k-seng kiâⁿ-óa-lâi kóng:”Chia sī khòng-iá, thiⁿ mah í-keng àm,

6:36 Thang hō͘ in lī-khui, khì hù-kīn ê chng-thâu, ka-tī bé mi̍h-kiāⁿ lâi chia̍h.”

6:37 Tān-sī Ia-so͘ ìn:”Lín hō͘ in chia̍h.”Ha̍k-seng sûi kóng :”Hâⁿ? Lí sī ài goán ēng nn̄g-pah-lió͘ⁿ gîn khì bé tōa-piáⁿ lâi hō͘ in chia̍h sī bô?”

6:38 Ia-so͘ mn̄g in:”Lín ū lōa-chē piáⁿ? Khì khòaⁿ māi leh!”Tī in chai ê sî, chiū kóng:” Lóng-chóng ū gō͘ tè piáⁿ, nn̄g-bóe hî.”

6:39 Ia-so͘ kau-tài in, hō͘ só͘-ū ê lâng long chē tī chháu-po͘-à téng.

6:40 Ta̍k-ê chiū chi̍t-pâi chi̍t-pâi chē-lo̍h-lâi, ū-ê chi̍t-pah ê, ū ê gō͘-cha̍p ê.

6:41 Ia-so͘ chiū theh hit gō͘-tè piáⁿ kap nn̄g-bóe hî khí-lâi, ba̍k-chiu ǹg thiⁿ lâi kám-siā , jî-chhiáⁿ chiong piáⁿ peh-khui theh hō͘ ha̍k-seng, pun hō͘ ta̍k-ke, iā chiong hit nn̄g-bóe hî peh-khui pun hō͘ in.

6:42 Ta̍k-ke lóng ū thang chia̍h, koh chia̍h chin pá.

6:43 Ha̍k-seng chiū chiong hia-ê chia̍h chhun ê piáⁿ kap hî khioh-khí-lâi, tè bóaⁿ cha̍p-jī khā nâ-á.

6:44 Chò-hóe tī hia chia̍h piáⁿ ê cha-po͘-lâng long-chóng ū gō͘-chheng ê.

6:45 Ia-so͘ sûi chhui-pek ha̍k-seng chiō͘ⁿ chûn, seng khì tùi-bīn-hōaⁿ Pek-sài-tāi hia, I lâu lo̍h-lâi kiò chèng-lâng lī-khui.

6:46 Ia-so͘ hām chèng-lâng kò-sî liáu, chiū chiō͘ⁿ soaⁿ khì kî-tó.

6:47 Kàu thiⁿ í-keng àm ê sî, ha̍k-seng chē ê chûn, kò kàu ô͘ ê tiong-ng, tān-sī Ia-so͘ ka-tī iau tī hōaⁿ-piⁿ;

6:48 I chi̍t-ē khòaⁿ-tio̍h ha̍k-seng in-ūi tú-tio̍h tùi-bīn hong, chûn kò long bē kiâⁿ, iā kò ka chin sin-khó͘. Hit-sî í-keng thàu-mê chit-nn̄g-tiám, Ia-so͘ chiū kiâⁿ chiō͘ⁿ chúi-bīn ǹg in hia khì, beh tùi in piⁿ-á keng-kòe.

6:49 Ha̍k-seng chi̍t-ē khòaⁿ-tio̍h I tī chúi-bīn te kiâⁿ, lia̍h-chò sī kúi-hûn, chiū tōa-siaⁿ hoah chhut-lâi,

6:50 In-ūi in ta̍k-ke lóng ū khòaⁿ-kìⁿ I, koh kiaⁿ kah phī-phī-chhoah. Ia-so͘ sûi tùi in kóng:” An-là! Sī Góa, bián kiaⁿ.”

6:51 Chiū kiâⁿ ǹg in hia khì, chiō͘ⁿ liáu chûn, hong-éng iā tiāⁿ khì, in sim-lāi lóng kám-kak chin-kiaⁿ.

6:52 Che-sī in-ūi in iau bōe liáu-kái Ia-so͘ tī pun-piáⁿ ê sī só͘  hoat-seng ê sū, sim-khiàu iau bōe khui.

6:53 In kòe ô͘ liáu, chûn kiâⁿ kàu Kek-nî-sat-le̍k ê só͘-chāi, chiū chiō͘ⁿ-hōaⁿ,

6:54 Chi̍t-ē loh chûn, sì-ûi ê lâng jīn-chhut sī Ia-so͘,

6:55 In chiū tī hit só͘-chāi kiâⁿ tháu-thàu, thiaⁿ tio̍h I kiâⁿ kàu tó-ūi, chiū chiong ū pēⁿ ê lâng ēng chhn̂g-pho͘ kng khì hia.

6:56 Hoân-nā Ia-so͘ só͘ kàu ê só͘-chāi, bô-lūn sī chng-lāi, á-sī siâⁿ-nih, he̍k-sī chng-kha, in lóng chiong pēⁿ-lâng khǹg tī ke-lō͘ piⁿ, kiû Ia-so͘ hō͘ in bong I ê saⁿ-á-ku, hia-ê ū bong-tio̍h Ia-so͘ ê , in ê pēⁿ chiū hó-khì.