Má-khó hok-im-su Tē Cha̍p-it Chio͘ⁿ 馬可福音 第十一章

Má-khó hok-im-su Tē Cha̍p-it Chio͘ⁿ

馬可福音　第十一章

11:1 Ia-so͘ hām ha̍k-seng teh-beh kiâⁿ kàu Iâ-lō͘-sat-léng ê sî, tī Kan-ná-soaⁿ-kha ê Pek-hoat-kî kap Pek-tāi-nî hia, I kiò nn̄g ê ha̍k-seng lâi,

11:2 Kā in kóng:" lín khì thâu-chêng ê chng-thâu, tu ji̍p-khì ê sî, sûi ē khòaⁿ-tio̍h chi̍t-chiah lû-á pa̍k tī hia, sī iáu m̄-bat hō͘ lâng khiâ-kòe ê, lín kā tháu-khui khan-lâi chia.

11:3 Nā ū lâng mn̄g lín:「Sī án-chóaⁿ beh án-ne chò?」Lín chiū ìn:「Chú beh ēng i. I ē koh khan tńg-lâi chia.」”

11:4 In nn̄g-ê chiū khì, kó-jiân khòaⁿ-tio̍h chi̍t-chiah lû-á pa̍k tī mn̂g-gōa hō͘ lâng khòaⁿ-hiān-hiān, sûi khì kā tháu khui.

11:5 Ū kúi-ê-lâng khiā tī hia, mn̄g in kóng:" Lín sī án-chóaⁿ leh tháu hit-chiah lû-á?”

11:6 Ha̍k-seng chiàu Ia-so͘ só͘ hoan-hù ê hôe-tap, hia ê lâng chiū hō͘ in khan khì.

11:7 In chiong lû-á khan lâi Ia-so͘ hia, sûi thǹg ka-tī ê saⁿ phoa̍h tī lû-á-téng, hû Ia-so͘  khí-lih khiâ.

11:8 Ū cho̍k-chē-lâng khòaⁿ-tio̍h án-ne, chiū ēng ka-tī ê gōa-saⁿ pho͘ tī lō͘-nih, iā ū lâng khì hn̂g-á chhó chhiū-ki lâi pho͘ .

11:9 Chi̍t tōa-tīn lâng tòe-chêng tòe-āu, na-kiâⁿ na-hoah "Hô-sat-ná, hōng Chú ê miâ lâi ê eng-kai siū chèng-lâng ê o-ló !”

11:10 Lán ê chó͘ Tāi-pi̍t ê kok teh-beh lâi ah, sī eng-kai siū o-ló ê! Tī siōng-koân ê só͘-chāi mā hoah hô-sat-ná.

11:11 Ia-so͘ lâi kàu Iâ-lō͘-sat-léng, kiâⁿ ji̍p-khì sèng-tiān, chi̍t-sì-kè khòaⁿ hia-ê ta̍k-hāng mi̍h-kiāⁿ. Thiⁿ iā í-keng àm ah, I chiū hām cha̍p-jī ê ha̍k-seng lī-khui hit-ê siâⁿ, khì Pek-tāi-nî.

11:12 Keh ji̍t, in tùi Pek-tāi-nî chhut-lâi, Ia-so͘ pak-tó͘ leh iau.

11:13 In tùi hn̄g-hn̄g khòaⁿ-tio̍h chi̍t-châng chin-chē hio̍h-á ê bû-hoa-kó chhiū, chiū óa-khì chhōe khòaⁿ ū siáⁿ-mih thang chia̍h bô, tī hia chhōe chi̍t-po͘ kan-na ū hio̍h-á , bô khòaⁿ pòaⁿ-hāng thang chia̍h-ê, in-ūi bû-hoa-kó siu-sêng ê sî iáu-bōe kàu.

11:14 Ia-so͘ chiū tùi hit-châng chhiū kóng:" Tùi hiān-chāi khai-sí, í-āu éng-oán bô-lâng beh chia̍h lí ê kóe-chí." I ê ha̍k-seng mā long ū thiaⁿ-kìⁿ chit-kù ōe.

11:15 In lâi-kàu Iâ-lō͘-sat-léng. Ia-so͘ ji̍p-khì sèng-tiān, chiong tī hia teh chò seng-lí ê lâng kóaⁿ chhut-khì, iā chiong leh ōaⁿ-chîⁿ ê toh-á hām bē hún-chiáu-á ê lâng ê í-à long péng hō͘ tó,

11:16 Iā put-chún lâng theh mi̍h-kiāⁿ tùi sèng-tiān-lāi kiâⁿ-chhut kiâⁿ-ji̍p,

11:17 Tī hia tùi chèng-lâng kóng-khí Siōng-chú ê ōe,"Sèng-keng kám-m̄-sī ū kì-chài, Góa ê chhù sī kiò-chò bān-kok chèng-lâng kî-tó ê tiān mā? Lín soah tian-tó hō͘ i pìⁿ-chò chha̍t-siū.”

11:18 Chè-si-tióⁿ kap kàu-su thiaⁿ-tio̍h chia-ê ōe, chiū khai-sí siō͘ⁿ beh án-chóaⁿ hāi-sí Ia-so͘ ê pān-hoat, m̄-ku in kiaⁿ Ia-so͘, in-ūi chèng-lâng tùi I ê kàu-tō long kám-kak chin sin-sian.

11:19 Hit àm Ia-so͘ kap ha̍k-seng tùi siâⁿ lī-khui.

11:20 Kè-ji̍t chá-khí in beh koh ji̍p siâⁿ, khòaⁿ-tio̍h hit châng bû-hoa-kó chhiū, liân kin long ta-khì.

11:21 Pí-tek sio͘ⁿ khí Ia-so͘ cha-hng só͘ kóng ê ōe, chiū tùi I kóng:" Lāu-su, chhiáⁿ khòaⁿ! Lí só͘ chiù-chò͘ ê bû-hoa-kó-chhiū í-keng ta-khì ah!”

11:22 Ia-so͘ ìn kóng:" Lín tio̍h sìn Siōng-chú.

11:23 Góa chin si̍t-chāi kā lín kóng:" Bô-lūn siáⁿ-mih lâng tùi chi̍t-chō soaⁿ kóng:「Lí tùi chia sóa-khui, thiām lo̍h hái-nih!」I ê sim nā bô hoâi-gî, jî-chhiáⁿ khak-sìn i só͘ kóng ê, it-tēng ê si̍t-hiān, chiū ē hō͘ i si̍t-hiān.

11:24 Só͘-í Góa kā lín kóng, hoân-nā lín tī kî-tó tiong só͘ kiû ê, bô-lūn sī siáⁿ-mih, tio̍h sìn í-keng tit-tio̍h ah, chiū tek-khak tit-tio̍h.

11:25 Lín khiā leh kî-tó ê sî, nā sio͘ⁿ-khí ū lâng tek-chōe lín, chiū tio̍h sià-bián i, án-ne lín tī thiⁿ-téng ê Pē mā ē sià-bián lín ê kòe-sit.

11:26 Lín nā m̄ goān-ì sià-bián lâng, lín tī thiⁿ-téng ê Pē iā bē sià-bián lín ê kòe-sit.

11:27 In koh kiâⁿ ji̍p-khì Iâ-lō͘-sat-léng. Ia-so͘ tī sèng-tiān-lāi leh kiâⁿ ê sî, chè-si-tio͘ⁿ kap kàu-su kiâⁿ lâi I ê bīn-chêng,

11:28 Mn̄g I kóng:" Lí sī khò siáⁿ-mih koân-pèng chò chia-ê tāi-chì, a̍h-sī siáⁿ-mih lâng hō͘ lí ū chit-ê koân leh?”

11:29 Ia-so͘ ìn in kóng:" Chin-hó, lín nā seng hôe-tap Góa ê būn-tê, Góa chiah kā lín kóng, Góa sī chià-tio̍h siáⁿ-mih koân-pèng chò chia-ê tāi-chì.

11:30 Chhiáⁿ mn̄g, Iok-hān kiâⁿ sé-lé chit-hāng-sū, sī tùi thiⁿ-nih, á-sī tùi sè-kan lâi ē?”

11:31 In hō͘-siong chham-siông án-ne kóng:” Lán nā kóng「Sī tùi thiⁿ-ni̍h」,I it-tēng kóng「Án-ne, Lín ūi-siáⁿ-mi̍h m̄-khéng sìn i?」

11:32 Nā-chún kóng「Sī an sè-kan lâi è」, koh kiaⁿ kûn-chiòng ē put-ho̍k, in-ūi chèng-lâng long jīn-ûi Iok-hān sī sian-ti.”

11:33 Tùi án-ne chiū ìn Ia-so͘ kóng:" Goán m̄-chai.” Ia-so͘ kóng:" Góa mā bô-beh kā lín kóng Góa sī hōng siáⁿ-mih lâng ê koân-pèng chò chia-ê tāi-chì.”