Má-khó hok-im-su Tē Cha̍p-jī Chioⁿ 馬可福音 第十二章

Má-khó hok-im-su Tē Cha̍p-jī Chioⁿ  

馬可福音 第十二章

12:1 Ia-so͘ sûi ēng chi̍t-ê phí-jū tùi in kóng:" Ū chi̍t-ê lâng chéng chi̍t-khu phô-tô-hn̂g, ēng lî-pa ûi-khí-lâi, koh ó͘ chi̍t-ê khut-á, mā khí chi̍t-keng lâu-á-chhù, chiū chō͘  hō͘ lâng keng-choh, ka-tī chhut-gōa khì pat só͘-chāi.

12:2 Kàu phô-tô siu-sêng ê sî, i chiū phài kang-á khì tiān-lông hia, siu hn̂g-cho͘,

12:3 Tiān-lông kā i lia̍h khí-lâi phah, hō͘  i khang-chhiú tńg-khì.

12:4 Hn̂g-chú koh phài lēng-gōa chi̍t-ê kang-á khì hia. In hám i ê thâu-khak, koh bú-jio̍k i.

12:5 Hn̂g-chú sûi koh phài lâng khì, in soah kā I thâi-sí. Āu-lâi mā kè-sio̍k phài chē-chē po̍k-jîn chiân-óng, mā sī siāng-khoán ū ê pī phah, ū ê pī thâi.

12:6 Hn̂g-chú chòe-āu phài-chhut chi̍t-ūi, sī I só͘  thiàⁿ ê kiáⁿ, I phah-sǹg「In ē chun-tiōng Góa ê kiáⁿ.」

12:7 Chóng-sī bô phah-sǹg, hia-ê tiān-lông hō͘-siong chham-siông kóng:" Chit-ê sī hn̂g-chú ê kè-sêng-jîn. Lâi-khì, lán lâi kā I thâi hō͘ sí, hn̂g-chú ê châi-sán chiū lóng pìⁿ lán ê ah!”

12:8 In sûi kā I lia̍h khí-lâi thâi sí, koh tàn chhut-khì hn̂g-gōa.

12:9 Sòa-lo̍h-lâi, hn̂g-chú beh chhái-chhú siáⁿ-mih hêng-tōng? I beh ka-tī chhut-bīn siau-bia̍t hia-ê lâng, koh cho͘  hō͘ pa̍t-lâng.

12:10 Sèng-keng ū kì-chài:" Sai-hū bô-ài-ēng ê chio̍h-thâu, khiok chiâⁿ-chò khí-chhù siōng tiong-iàu ê chio̍h.

12:11 Che-sī Siōng-chú só͘ chò ê, lán ê ba̍k-chiu lia̍h i chò kî-koài. Chit-tōaⁿ keng-bûn lín kám-bô tha̍k-kòe?”

12:12 In thiaⁿ ē chhut chit-ê phí-jū sī te kóng in, chiū sio͘ⁿ beh lia̍h I, m̄-ku koh kiaⁿ kûn-chiòng, chôaⁿ lī-khui Ia-so͘.

12:13 Kòe bô-lōa-kú, in phài kúi-ê Hoat-lī-sài-phài ê lâng hām Hi-lu̍t-tóng ê lâng khì Ia-so͘ hia chò jiáu-pê-á, beh chhōe I ê ōe-pèⁿ thang hām-hāi I.

12:14 In khì kàu-ui, sûi mn̄g Ia-so͘ :" Lāu-su, goán chai-iáⁿ lí chò-lâng chiaⁿ si̍t-chāi, khòaⁿ-lâng bô-hun tōa-sè-hàn, in-ūi Lí bô khòaⁿ lâng ê gōa-piáu, kan-nā chiàu chin-lí kóng Siōng-chú ê ōe. Lí kā goán kóng, thang la̍p-sòe hō͘ Kai-sat bô?

12:15 Tio̍h la̍p a m̄-bián?” Ia-so͘ chai-iáⁿ in lâi ê tōng-ki, chôaⁿ tùi in kóng:" Lín sī án-chóaⁿ beh lâi chhì-thàm Góa? Theh chi̍t-ê gîn-á lâi hō͘ Góa khòaⁿ!”

12: 16 In sûi the̍h lâi. Ia-so͘ mn̄g in:" Chit-ê ang-á kap jī, sī siáⁿ-lâng ê?" " Sī Kai-sat ê.” In án-ne ìn。

12:17 Ia-so͘ chôaⁿ kóng :" Kai-sat ê mi̍h-kiāⁿ tio̍h kui hō͘ Kai-sat, Siōng-chú ê mi̍h-kiāⁿ tio̍h kui hō͘ Siōng-chú." In thiaⁿ liáu kám-kak chin sio͘ⁿ bē-hiáu.

12:18 Sat-to͘-kai lâng chú-tio͘ⁿ lâng sí-liáu bē koh-oa̍h. In khì mn̄g Ia-so͘:

12:19 " Lāu-su, Mô͘-se ū siá lo̍h-lâi hō͘ goán ê kà-sī, án-ne kì-chài:「Nā-ū lâng ê tōa-hiaⁿ sí-khì, pàng i ê bó͘ ko͘-toaⁿ chi̍t-ê, sió-tī tio̍h ài chhōa i chò bó͘, theh in ê tōa-hiaⁿ seⁿ hāu-seⁿ thang thoân hioⁿ-hóe.」

12:20 Bat ū chi̍t-kháu-chàu, chhit ê hiaⁿ-tî-á, tōa-ê chhōa bó͘ bô seⁿ-kiáⁿ chiū sí,

12:21 Tē-jī-è chhōa in hiaⁿ-só, mā-sī bô seⁿ chiū sí-khì, tē-saⁿ-è iā-sī án-ne.

12:22 In chhit ê hiaⁿ-tî-á lóng bô seⁿ kah pòaⁿ ê, kàu lō͘-bóe chit-ê hū-lú mā sí ah.

12:23 Tī koh-oa̍h ê sî, chit-ê hū-lú sī tó-chi̍t-ūi ê bó͘? In-ūi in chhit-ê lâng lóng ū chhōa kòe i.”

12:24 Ia-so͘ kóng:" Lín só͘-í gō͘-kái, kám-m̄-sī leh hián-lō͘ lín m̄-bat Sèng-keng á-sī Siōng-chú ê koân-lêng mah?

12:25 In-ūi lâng tùi sí koh-oa̍h liáu-āu, in bô kè-chhōa mah bô ū hun-in koan-hē, sī kap thiⁿ-téng ê thiⁿ-sài siāng-khoán.

12:26 Lūn-kàu si-lâng koh-oa̍h, lín kám-bô tha̍k-kòe Mô͘-se ê chheh, kì-tī Chhì-phòe-phiⁿ só͘ siá ê mah? Siōng-chú tùi Mô͘-se kóng:「Góa sī A-pek-lah-hán ê Siōng-chú, Í-sat ê Siōng-chú, Ngá-kok ê Siōng-chú.」

12:27 Siōng-chú m̄-sī si-lâng ê Siōng-chú, sī oa̍h-lâng ê Siōng-chú. Lín gō͘-kái kah chin giâm-tiōng.”

12:28 Ū-chi̍t-ê kàu-su mā lâi tī hia, thiaⁿ-tio̍h in ê piàn-lūn, chai-iáⁿ Ia-so͘ ìn-tap liáu chin-tio̍h,  chiū mn̄g I :" Chhiáⁿ-mn̄g só͘-ū ê kài-bēng tiong-kan, tó chit-tiâu tē-it tiong-iàu ?”

12:29 Ia-so͘ kóng:" Tē-it tiong-iàu ê chiū sī:「Í-sek-lia̍t à, Lí tio̍h chù-ì thiaⁿ, Chú lán ê Siōng-chú sī to̍k-it ê Sîn.

12:30 Lí tio̍h chin-sim、chīn-sèng、chīn-ì、chīn-la̍t thiàⁿ Chú lí ê Siōng-chú;」

12:31 Tē-jī tiâu sī「Tio̍h thiàⁿ-lâng chhin-chhiō͘ⁿ ka-tī.」Kî-thaⁿ ê kài-bēng long bē pí chit-nn̄g-tiâu kài-bēng koh khah tiong-iàu.”

12:32 I tùi Ia-so͘ kóng :" Tú-chiah Lāu-su kóng liáu bô m̄-tio̍h, Siōng-chú khak-si̍t sī To̍k-it ê, tû-liáu I í-gōa, bô-koh-ū pa̍t-ê sîn,

12:33 Koh ēng-chin sim-su、ēng-chīn tì-sek、ēng-chīn khùi-la̍t lâi thiàⁿ I hām thiàⁿ lâng chhin-chhiūⁿ ka-tī, án-ne chò sī pí hiàn kui-chiah cheng-seⁿ ê sio-chè kap ta̍k-chióng ê chè-mi̍h khah iàu-kín. ”

12:34 Ia-so͘ khòaⁿ i ìn liáu chin ū tì-hūi, chiū tùi I kóng :" lí lī Siōng-chú ê kok bô hn̄g à." Tùi hit-sî-chūn liáu-āu, bô-lâng koh káⁿ lâi chit-mn̄g I.

12:35 Ia-so͘ tī sèng-tiān leh kàu-tō ê sî, mn̄g in :" Kàu-su ná-ē kóng Ki-tok sī Tāi-pi̍t ê kiáⁿ-sun leh?”

12:36 Tāi-pi̍t hō͘ Sèng-sîn kám-tōng, án-ne kóng:「Siōng-chú tùi góa ê Chú kóng, lí lâi chē tī Góa ê chiàⁿ-pêng, tán Góa ēng lí ê siû-te̍k hō͘ Lí chò kha-ta̍h-í. 」

12:37 Chhiáⁿ-mn̄g, Tāi-pi̍t kì-jiân ka-tī chheng-ho͘ I chò chú, sī án-chóaⁿ I koh chò Tāi-pi̍t ê kiáⁿ-sun leh?" Ta̍k-ke lóng chin ài thiaⁿ I khai-káng.

12:38 Ia-so͘ tī leh kóng chia-ê ōe ê sî, mā kóng-tio̍h:" Tio̍h ài thê-hông hia-ê kàu-su, in chin ài chhēng tn̂g-phàu tī ke-thâu hang-bóe kiâⁿ-lâi kiâⁿ-khì, mā chin ài tī chhài-chhī-á kháu, hō͘ lâng chhéng-an mn̄g-hó,

12:39 Koh ài chē hōe-tn̂g lāi ê koân-ūi, tī iàn-hōe tiong ê tōa-ūi;

12:40 In chhim-chiàm kóaⁿ-hū ê châi-sán, tiau-kang kî-tó kah lò-lò-tn̂g. Chia-ê lâng it-tēng ài siū koh-khah tang ê hêng-hoa̍t.”

12:41 Ia-so͘ chē tī sèng-tiān ê hiàn-kim-sio͘ⁿ ê tùi-bīn, khòaⁿ lâng leh án-chóaⁿ chiong chîⁿ hiàn lo̍h-khì. Ū kúi-ā-ê châi-chú tàn bē-chió chîⁿ lo̍h-khì sio͘ⁿ-á-lāi.

12:42 Sòa-loh ū chi̍t-ê bô-sáⁿ chîⁿ ê kóaⁿ-hū, lâi hiàn nn̄g-ê sè-ê chîⁿ-à, tùi i kóng lâi, he sī chit-tiâu tōa sò͘-bo̍k.

12:43 Ia-so͘ kiò ha̍k-seng lóng óa-lâi, tùi in kóng:" Góa si̍t-chāi kā lín kóng, chit-ê hō͘ lâng khòaⁿ bô-khí ê kóaⁿ-hū só͘ hiàn ê, pí só͘-ū ê lâng koh-khah chē.

12:44 In-ūi, in lóng sī theh ka-tī só͘ chhun ê chi̍t-pō͘-hūn lâi hiàn tī chia; m̄-ku chit-ê kóaⁿ-hū ka-tī tō bô-kàu ēng, khiok chiong i só͘-ū-ê hām seng-oa̍h-hùi lóng hiàn lo̍h-khì.”