Má-khó hok-im-su Tē Cha̍p-saⁿ Cho͘ⁿ 馬可福音 第十三章

Má-khó hok-im-su Tē Cha̍p-saⁿ Cho͘ⁿ 

馬可福音 第十三章

13:1 Ia-so͘ tùi sèng-tiān chhut-lâi ê sî, ū chi̍t-ê ha̍k-seng tùi I kóng:" Lāu-su, Lí khòaⁿ-leh, chit-pān ê chio̍h-thâu, chit-pān ê kiàn-tiok-bu̍t, bô-tè-chhōe à! ”

13:2 Ia-so͘ ìn i kóng :" Lí khòaⁿ-tio̍h chi̍t-chō tōa kiàn-tiok-bu̍t sī-bô? Chiong-lâi chit só͘-chāi ē hō͘ lâng thiah kah lī—lī-lī, bô chi̍t-tè chio̍h-thâu ē sio-tha̍h chò-hóe.”

13:3 Ia-so͘ tī Kan-ná-soaⁿ téng, bīn tùi sèng-tiān chē leh, Pí-tek、Ngá-kok、Iok-hān hām An-tek-lia̍t sè-ka-siâⁿ-à mn̄g I kóng:

13:4 "Chhiáⁿ kā goán kóng, tang-sî ē hoat-seng chia-ê tāi-chì? Koh chia-ê tāi-chì beh hoat-seng ê sî, ē ū siáⁿ-mih chiân-tiāu?”

13:5 Ia-so͘ kóng:" Lín tio̍h kín-sīn, chiah-bē hō͘ lâng bê-hek khì.

13:6 Ē ū chin-chē lâng thau-ēng Góa ê miâ, kóng:「Góa sī Ki-tok」, koh iú-koáiⁿ chē-chē lâng.

13:7 Tng lín thiaⁿ-tio̍h chiàn-cheng kap chiàn-cheng ê hong-siaⁿ ê sî, m̄-bián kiaⁿ, chia̍h-ê tāi-chì sī it-tēng ē hoat-seng, m̄-ku boa̍t-ji̍t iáu-bē kàu.

13:8 Hit-sî cho̍k-kûn chi-kan á-sī kok-ka chi-kan ē hō͘-siong kong-kek; chin-chē só͘-chāi tē-tāng、ki-hng. Che long-sī khó͘-lān ê khai-sí.

13:9 Iáu-kú lín ka-tī ài kín-sīn, in-ūi lâng ē kā lín kau hō͘ gī-hōe, á-sī lín tī hōe-tn̂g ē hō͘ lâng phah, koh mā in-ūi Góa ê iân-kò͘ khiā-tī chin-chē tōa-koaⁿ kap ông ê bīn-chêng, ūi Góa ǹg in chò kiàn-chèng.  

13:10 Chóng-sī, hok-im tek-khak tio̍h tāi-seng thoân kàu ta̍k-lâng ê lāi-sim.

13:11 Tng lâng kā lín lia̍h-khì kau hō͘ hoat-īⁿ ê sî, m̄-bián seng hoan-ló sio͘ⁿ-beh kóng siáⁿ-mih; kàu-sî sù hō͘ lín siáⁿ-mih ōe, lín chiū kóng, in-ūi chiah-ē ōe m̄-sī lín ê, sī Sèng-sîn ê.

13:12 Hiaⁿ-tī ē chiong hiaⁿ-tī kau-khì chhú-sí, lāu-pē mā-ē án-ne tùi i ê kiáⁿ, jî-lú ē kap i ê pē-bú pìⁿ-chò siû-jîn, lâi hāi-sí in.

13:13 Lín iā ē in-ūi Góa ê miâ hō͘ chē-chē lâng oàn-hīn, chí-ū jím-nāi kàu té ê lâng, chiah-ē tit-tio̍h kiù.”

13:14 " Lín khòaⁿ-kìⁿ hit-ê khó͘-òⁿ ê chân-hāi-chiá, khiā tī bô èng-kai khiā ê só͘-chāi, (thak ê lâng tio̍h-ài hun-piān) ê sî, tio̍h kiò tī Iû-thài tē-khu ê lâng cháu-khì soaⁿ-nih;

13:15 Tī chhù-téng ê m̄-thang lo̍h-lâi, mā m̄-thang li̍p-khì chhù-lāi theh mi̍h-kiāⁿ,

13:16 Tī chhân-hn̂g nih ê, iā m̄-thang tńg-khì hiaⁿh-saⁿ.

13:17 Tī hiah-ê ji̍t-chí, tùi ū sin-īn kap hō͘ eⁿ-á chia̍h-ni ê, ē chin pháiⁿ-kòe!

13:18 Lín tio̍h kî-tó Siōng-chú, m̄-thang hō͘ lín tī tang-thiⁿ tú-tio̍h chia̍h-ê tāi-chì chiah-hó.

13:19 In-ūi tī hiah-ê ji̍t-chí tek-khak ū tōa chai-lān, sī tùi Siōng-chú chhòng-chō bān-mi̍h khai-sí í-lâi, kàu-taⁿ m̄-bat ū ê, í-āu iā bē hoat-seng.

13:20 Koh nā m̄-sī Siōng-chú sok-té hiah-ê ji̍t-chí, it-tēng bô chi̍t-ê lâng thang tit-kiù, m̄-ku ūi-tio̍h Siōng-chú ê soán-bîn ê iân-kò͘, I í-keng ū sok-té hiah-ê ji̍t-chí à.

13:21 Hit-sî nā ū-lâng kā lín kóng:「Lâi ò͘ ! Ki-tok tī chia.」, á-sī kóng「Tī hia.」 Chhian-bān m̄-thang khì sìn!

13:22 In-ūi ū Ké-Ki-tok、Ké-sian-ti ē chhut-hiān, in ē kiâⁿ chi̍t-kóa sîn-jiah kî-sū, chhōe ki-hōe lâi bê-hek soán-bîn.

13:23 Lín tio̍h sè-jī. Khòaⁿ lèh! Só͘-ū ê tāi-chì Góa long tāi-seng kā kóng à.”

13:24 "Tī hia-ê chai-lān ê ji̍t-chí í-āu, ji̍t-thâu ē pìⁿ àm-khì, ge̍h-niô͘ⁿ bē koh hoat-kng,

13:25 Chin-chē chheⁿ ē tùi thiⁿ-téng lak lo̍h-lâi, koh khong-tiong ê ok-sè-le̍k ē pī jiáu-tōng.

13:26 Hit-sî chèng lâng tek-khak khòaⁿ-kìⁿ Góa tòa-tio̍h tōa ê lêng-le̍k kap êng-kng tī hûn-tiong lâi-lîm.

13:27 Koh Góa tek-khak chhe-phài thiⁿ-sài, tùi sì-bīn, tùi tē-kek kàu thiⁿ-piⁿ, tiàu-chi̍p Góa ê soán-bîn.”

13:28 " Lín tio̍h tùi bû-hoa-kó-chhiū chit-ê phí-jū lâi chai-iáⁿ: Tī chhiū-ki puh-íⁿ hoat-hio̍h ê sî, lín chiū chai-iáⁿ joa̍h-thiⁿ teh-beh kàu à.

13:29 Siang-khoán án-ne, tng lín khòaⁿ-kìⁿ chia-ê tāi-chì hoat-seng liáu, iā eng-kai bêng-pe̍k Góa lâi à, koh í-keng khiā tī mn̂g-kháu ah!

13:30 Góa chin sīm-tiōng kā lín kóng, chi̍t-tāi iáu-bē kiat-sok, chiah-ē tāi-chì long ē oân-sêng.

13:31 Thiⁿ kap tē beh bô-khì, Góa ê ōe bē bô-khì.”

13:32 " Koan-hē hit-ê sî kap ji̍t, bô-lâng chai, liân thiⁿ-téng ê thiⁿ-sài mā m̄-chai, Kiáⁿ mā m̄-chai, ká-nā Pē chai nā-niāⁿ.

13:33 Lín tio̍h ài sè-jī, choan-sim kî-tó, in-ūi lín m̄-chai hit-ê sî-ji̍t tī-sî ē kàu.

13:34 Chit-hāng sū tú-hó chhin-chhio͘ⁿ chi̍t-ê lâng lī-khui kò͘-hiong, î-bîn khì gōa-kok, siū-koân hō͘ i ê po̍k-jîn, iā hun-phài kang-chok hō͘ in móe chi̍t-ê lâng, iā kau-tāi kò͘-mn̂g-ê tio̍h kò͘ hō͘ hó-sè.

13:35 Só͘-í, lín tio̍h tio͘ⁿ-tî, in-ūi lín m̄-chai chú-lâng tī-sî tńg-lâi, sī tī àm-sî, á-sī pòaⁿ-mê、á-sī ke leh-thî ê sî、á-sī chá-khí-sî,

13:36 Kiaⁿ-liáu i hiông-hiông tńg-lâi, khòaⁿ-tio̍h lín teh khùn,

13:37 Góa só͘ kā lín kóng ê ōe, mā ū kā chèng-lâng kóng , tio̍h tio͘ⁿ-tî !”