Má-khó hok-im-su Tē Cha̍p-sì Chio͘ⁿ 馬可福音 第十四章

Má-khó hok-im-su Tē Cha̍p-sì Chio͘ⁿ

馬可福音 第十四章

14:1 Koh nn̄g-ji̍t chiū-sī Pôaⁿ-kòe-cheh, mā-sī Tû-kàⁿ-cheh, Chè-si-thâu hām kàu-su leh chham-siông beh ēng siáⁿ-mih kúi-kè thang lia̍h Ia-so͘, lâi hāi sí I.

14:2 In long tông-ì:" Mài tī chiat-kî ê tiong-kan chìn-hêng, kiaⁿ bîn-chiòng ē loān khí-lâi.”

14:3 Hit-sî Ia-so͘ tī Pek-tāi-nî, khì bat hoān-tio̍h phôe-hu-pēⁿ ê Se-bûn in tau chia̍h-pn̄g ê îs, ū chi̍t-ê hū-lú kōaⁿ chi̍t-koàn ge̍k-pân, lāi-bīn té chin-kùi ê Ná-ta̍t cheng-iû kiâⁿ ji̍p-lâi, tī Ia-so͘ ê bīn-chêng khà-phòa ge̍k-pân, kā cheng-iû tó tī I ê thâu-khak téng.

14:4 Kî-tiong ū chi̍t-kóa lâng khòaⁿ-tio̍h chin bē-sóng-khoài, kóng:" Ūi-siáⁿ-mi̍h lōng-hùi chiah-ē cheng-iû?

14:5 Chit-koàn ē-tàng bē saⁿ-pah gōa ê gîn-á, thang pun hō͘ sàn-chhiah-lâng.” Só͘-í tùi I se̍h-se̍h-liām.

14:6 Ia-so͘ kóng:" Sûi chāi i khì chò! Lín sī án-chóaⁿ kā tòng? I só͘ chò tī Góa sin-chio͘ⁿ ê sī chi̍t-hāng hó-sū.

14:7 In-ūi tī lín ê chiu-ûi tiāⁿ-tiāⁿ ū sàn-chhiah-lâng, beh-khì kā tàu-kha-chhiú, sûi-sî long ē-tàng, m̄-ku Góa bô tiāⁿ-tiāⁿ tī lín tiong-kan.

14:8 I chò chia-ê sī í-keng chin i ê khùi-la̍t à, i sī ūi-tio̍h Góa sí-āu lo̍h-chòng, seng kā cheng-iû lâm tī Góa ê sin-chio͘ⁿ.

14:9 Góa chin khéng-tēng kā lín kóng:" Hok-im bô-lūn thoân kàu choân sè-kài ê tó-chi̍t kak-lo̍h, lóng ē thê-khí chit-ê hū-lú só͘ chò ê, lâi kì-liām i.”

14:10 Ia-so͘ ê cha̍p-jī ê ha̍k-seng tiong-kan, ū chi̍t-ê Ka-lio̍k lâng kiò-chò Iû-tāi, khì chhōe chè-si-tió͘ⁿ, kóng i beh kā Ia-so͘ kau hō͘ in.

14:11 In thiaⁿ-liáu put-chí hoaⁿ-hí, iā tah-èng kàu-sî ē hō͘ I chîⁿ; Iû-tāi chiū khì siòng khòaⁿ ū siáⁿ-mih tú-hó ê ki-hōe thang kā Ia-so͘ kau hō͘ in.

14:12 Tû-kàⁿ-cheh ê thâu chi̍t ji̍t, sī thâi Pôaⁿ-kòe-cheh ê iûⁿ-á-kiáⁿ ê ji̍t, ha̍k-seng mn̄g Ia-so͘:" Góan ài khì tó-ūi ūi Lí chún-pī chia̍h Pôaⁿ-kòe-cheh ê àm-tǹg?"

14:13 Ia-so͘ chiū phài nn̄g-ê ha̍k-seng, hoan-hù in:" Lín ji̍p-khì siâⁿ-lāi ê sî, ē hām chi̍t-ê kōaⁿ chi̍t-koàn chúi ê lâng sio tú-tio̍h, lín chiū tòe i kiâⁿ.

14:14 Bô-lūn i ji̍p-khì tó chi̍t-keng chhù, lín chiū tùi chhù ê chú-lâng kóng:「Lāu-su kóng: Góa ê kheh-thiaⁿ tī tó-ūi? Góa kap Góa ê ha̍k-seng beh tī tó-ūi chia̍h Pôaⁿ-kòe-cheh ê àm-tǹg?」

14:15 I ē pò lín khòaⁿ lâu-téng chi̍t-keng í-keng pò͘-tì hó-sè ê tōa-thiaⁿ, lín sûi tiàm hia chún-pī lán ê àm-tǹg.”

14:16 In nn̄g-ê chiū chhut-khì, li̍p-khì siâⁿ-lāi, só͘ hoat-seng ê tāi-chì tú-hó chhin-chhiō͘ⁿ Ia-so͘ só͘ kā in kóng ê. In chiū tī hia kā Pôaⁿ-kòe-cheh ê àm-tǹg khoán hō͘ hó-sè.

14:17 Kàu tī àm-sî, Ia-so͘ hām cha̍p-jī ê ha̍k-seng kàu-ui.

14:18 In chē lo̍h-lâi leh chia̍h-pn̄g ê sî, Ia-so͘ kóng:" Góa si̍t-chāi kā lín kóng, tī lín kap Góa chò-hóe leh chia̍h-pn̄g ê lâng ê tiong-kan, ū chi̍t-ê lâng ē chhut-bē Góa.

14:19 In soah khí hoan-ló, chi̍t-ê chi̍t-ê mn̄g I kóng:" Kám-sī góa?”

14:20 Ia-so͘ ìn in:" Sī lín tiong-kan hit-ê hām Góa ún tī siang chi̍t-tè pôaⁿ-á lāi hit-ê.

14:21 Góa ē tú-hó chiàu keng-chheh só͘ kì-chài ê siū sí, m̄-ku chhut-bē Góa ê ē chin-chhám! I lēng-khó͘ bô lâi chhut-sì iau khah-hó.”

14:22 In iau teh chia̍h ê sî, Ia-so͘ theh piáⁿ khí-lâi, chiok-siā liáu chiū pé-khui, pun hō͘ in, kóng:" The̍h-khì chia̍h, che-sī Góa ê seng-khu.”

14:23 Koh phâng poe khí-lâi, chiok-siā-liáu, pun hō͘ ha̍k-seng, in mā lóng lim lo̍h-khì.

14:24 Ia-so͘ kóng:" Che-sī Góa li̍p-iok ê hoeh, ūi-tio̍h chē-chē lâng lâu chhut-lâi ê.

14:25 Góa chin khéng-tēng kā lín kóng, Góa bē koh lim chit-ê poe, ti̍t-kàu Góa tī Siōng-chú ê kok lim sin ê chiú hit ji̍t chiah ē.”

14:26 In gîm-si soah, chiū chhut-mn̂g, kiâⁿ-khì Kaⁿ-ná-soaⁿ.

14:27 Ia-so͘ kā in kóng:" Kàu-sî lín lóng ē tek-chōe tio̍h Góa, in-ūi keng-chheh ū án-ne siá: Góa beh kòng-tó kò͘-iô͘ⁿ-ê, I ê iô͘ⁿ chiū sì-sòaⁿ khì.

14:28 M̄-ku Góa koh-oa̍h í-āu, beh tāi-seng lín khì-kàu Ka-lī-lī.”

14:29 Pí-tek kóng:" In sui-jiân ē tek-chōe Lí, nā-sī góa it-tēng bē án-ne.”

14:30 Ia-so͘ tùi i kóng:" Góa chin khéng-tēng kā lí kóng, chiū sī kin-àm tī ke thî nn̄g-pai chìn-chêng, lí ē saⁿ-pái m̄ jīn Góa.”

14:31 Pí-tek ēng koh-khah kian-koat ê kháu-khì kóng:" Góa nā-sī tio̍h-ài kap Lí chò-hóe sí, iā it-tēng bē bô jīn Lí.” Chhun-ê ha̍k-seng mā lóng án-ne kóng.

14:32 In lâi-kàu chi̍t-ê hō-chò Khek-se-má-nî ê só͘-chāi. Ia-so͘ kā ha̍k-seng kóng:"Lín chē tiàm chia, tán Góa khì kî-tó.”

14:33 Chôaⁿ chhōa Pí-tek、Ngá-kok、Iok-hān chò-hóe kiâⁿ, chiū khai-sí kiaⁿ-hiâⁿ, chin kiông-lia̍t ê pi-siong tùi Ia-so͘ ê sim-thâu chhèng chhut-lâi,

14:34 Kā in kóng:" Góa ê sim-thâu pi-siong kah teh-beh sí ah; lín tiàm chia tán Góa.”

14:35 I chiū ǹg thâu-chêng kiâⁿ, phak tī thô͘-kha, kî-kiû hō͘ I ē-sái m̄-bián tú-tio̍h hit-tōaⁿ sî-kan.

14:36 Ia-so͘ kî-tó kóng:" A-pa! Pē ah! Lí bān-hāng sū lóng ē, kiû Lí kā chit-ê poe sóa-khui, m̄-ku, m̄-sī chiàu Góa ê ì-sù, sī chiàu Lí ê an-pâi.”

14:37 Ia-so͘ kòe-lâi ha̍k-seng hia, khòaⁿ in lóng leh khùn, chiū kā Pí-tek kóng :" Se-bûn, lí leh khùn ò͘ ? Kám bē-tàng chheng-chhéⁿ sió-khóa sî-kan ?

14:38 Lín tio̍h kéng-séng kî-tó, chiah bē tú-tio̍h chhì-thàm. Lín ê sim-sîn sui-jiân goān-ì khì-chò, m̄-ku jio̍k-thé khiok nńg-chiáⁿ. ”

14:39 Ia-so͘ koh khì kî-tó, tùi Siōng-chú kóng ê ōe, hām tú-chiah siāng-khoán,

14:40 I koh kòe-lâi, khòaⁿ in siāng-khoán leh khùn, in-ūi in ba̍k-chiu sng-siap, in mā m̄-chai beh án-chóaⁿ ìn.

14:41 I tē-saⁿ pái kòe-lâi, kā in kóng :" Chit-má lín iáu-teh khùn, iáu-teh hioh o͘h? Hó ah, sî-kan kàu ah! Khòaⁿ leh! Góa hō͘ lâng chhut-bē kàu tī chōe-jîn ê chhiú-thâu.

14:42 Kín khí-lâi! Lán lī-khui chia. Lín khòaⁿ, hit-ê pōe-phoān Góa ê kiâⁿ óa lâi ah!”

14:43 Ia-so͘ iáu-teh kóng ê sî, cha̍p-jī ê ha̍k-seng tiong-kan ê Iû-tāi hut-jiân chhut-hiān, koh-ū tùi Chè-si-thâu、kàu-su、hām tió͘ⁿ-lo phài-lâi ê chi̍t tōa-tīn lâng, kiah to hām  kùn-á tòe i lâi.

14:44 Hit-ê bē Ia-so͘ ê lâng bat hō͘ in chi̍t-ê àm-hō, sī:" Góa kap siáⁿ-lâng chim-chhùi, hit-ê chiū-sī I. Lín sûi kā lia̍h khí-lâi, sè-jī chhōa khì-khui.”

14:45 Iû-tāi kiâⁿ kàu-ui, chhōe tio̍h Ia-so͘, sûi kiò chi̍t-siaⁿ :" Lāu-su!” Chiū chim I.

14:46 Hit tīn lâng chiū chhut-chhiú kā I lia̍h khí-lâi.

14:47 Khiā tī hia ê lâng, ū chi̍t-ê poeh to chhut-lâi, phut tio̍h Tōa-chè-si ê po̍k-jîn, kā i ê hīⁿ-á siah lo̍h-lâi.

14:48 Ia-so͘ tùi in kóng :"Lín chah-to kiah kùn-á lâi lia̍h Góa, ná-chhiō͘ⁿ leh lia̍h kiông-tō leh?

14:49 Góa chit-kúi-ji̍t kap lín tī sèng-tiān lāi, mā leh kàu-tō lâng, lín m̄ lâi lia̍h Góa. Chit-má án-ne sī leh èng-giām keng-chheh só͘ kì-chài ê.”

14:50 Hit-sî só͘-ū ê ha̍k-seng lóng siám-khui, sûi-lâng sì-sòaⁿ.

14:51 Tú-hó ū chi̍t-ê siàu-liân-lâng bô chhēng-saⁿ, ka-nā moaⁿ chi̍t-tè iù-tē pò͘ tòe tī  Ia-so͘ āu-bīn, in chiū beh lia̍h i.

14:52 I chôaⁿ kā iù-tē pò͘ pàng khì, lóng bô chhēng-saⁿ tô-cháu.

14:53 Ia-so͘ pī in lia̍h kàu Tōa-chè-si hia ê sî, só͘-ū ê chè-si tió͘ⁿ、tió͘ⁿ-ló hām kàu-su iā í-keng chū-chi̍p chò-hóe.

14:54 Siâng-sī Pí-tek iā thau-thau-á tòe Ia-so͘, chôaⁿ kiâⁿ ji̍p-khì tī Tōa-chè-si ê tiâⁿ-nih, kap hia-ê lâng chē tī hóe-piⁿ leh hang-hóe.

14:55 Hiān-tiô͘ⁿ ê chè-si-tió͘ⁿ kap gī-oân lóng teh chhōe khòng-kò Ia-so͘ ê chèng-kù, thang hāi-sí I, m̄-ku chhōe bô pòaⁿ hang.

14:56 Sui-jiân chin-chē lâng thê-chhut chèng-kù, in-ūi lóng sī ké ê, soah tàu bē óa-lâi.

14:57 Soah-loh koh ū kúi-ā-ê khiā khí-lâi chò ké-kiàn-chèng khòng-kò Ia-so͘ kóng:

14:58 "Goán ū thiaⁿ-tio̍h I kóng :"「Góa beh thiah-húi chit-keng ēng lâng ê chhiú só͘ khí ê tiān, saⁿ-ji̍t lāi koh lēng-gōa khí chi̍t-chō m̄-sī ēng lâng ê chhiú só͘ khí ê.」”

14:59 In ê chèng-sû sui-jiân kóng kah án-ne, mā-bô it-tì chàn-tông.

14:60 Tōa-chè-si khiā khí-lâi khì tī chèng-lâng kap Ia-so͘ ê tiong-kan, mn̄g Ia-so͘ kóng :" Lí lóng m̄ chhut-siaⁿ sī-bô? Chia-ê chí-khòng Lí ê chèng-sû sī siáⁿ-mih ?”

14:61 I tiām-tiām bô ìn, liân chi̍t-kū mā bô. Tōa-chè-si koh mn̄g I :" Lí chū-chheng sī  hit-ūi eng-kai siū siòng-chàn ê ê kiáⁿ, sī Kiù-sè-chú sī bô?”

14:62 Ia-so͘ ìn :" Góa chiū sī. Lín beh khòaⁿ-kìⁿ Góa chē tī Koân-lêng-chiá ê chiàⁿ-pêng, hō͘ thiⁿ-téng ê hûn chái lâi lín tiong-kan.”

14:63 Tōa-chè-si sûi thiah-li̍h i só͘ chhēng ê gōa-saⁿ, kóng :" Lán kám koh su-iàu siáⁿ-mih chèng-jîn?”

14:64 Lín í-keng thiaⁿ-tio̍h I kóng-chhut siat-to̍k Siōng-chú ê ōe ah. Lín ū siáⁿ-mih ì-kiàn ?”In lóng gī-koat eng-kai kā I chhú-sí.

14:65 Sūi ū lâng tùi I ê bīn phùi-nōa, koh ng I ê bīn, sòa-lo̍h ēng kûn-thâu-bó cheng I, chhòng-tī I kóng:" Lâi ioh siáⁿ-lâng cheng LÍ !” Chi̍t-kóa siú-ūi mā óa-lâi, ēng chhiú siàn I.

14:66 Pí-tek iau tī tiâⁿ-gōa ê sî, ū chi̍t-ê Tōa-chè-si ê lú-pī kiâⁿ-lâi,

14:67 Khòaⁿ-tio̍h Pí-tek leh hang-hóe, chiū it-ti̍t siòng i, chôaⁿ kóng :" Lí it-hiòng mā-sī kap Ná-sat-le̍k lâng Ia-so͘ chò-tīn ê.”

14:68 Pí-tek sūi hó͘ⁿ-jīn kóng:" Gôa m̄-chai, mā thiaⁿ-bô lí leh kóng siàⁿ.” Sūi lī-khui hia, kiâⁿ-kàu chêng-tiâⁿ ê sî, ke chiū thî ah.

14:69 Hit-ê lú-pī khòaⁿ-tio̍h i, koh kā khiā tī piⁿ-á ê lâng kóng:" Chit-ê mā-sī kap in siāng tóng ê.”

14:70 Pí-tek koh hó͘ⁿ-jīn. Kòe bô-lōa-kú, khiā tī piⁿ-á ê lâng koh chí Pí-tek kóng:"Lí sī kap in siang-tong ê bô-m̄-tio̍h! in-ūi lí sī Ka-lī-lī lâng.”

14:71 Pí-tek soah chiù-chōa kóng:" Lín leh kóng ê chit-ê lâng, góa m̄-bat I.”

14:72 Ke sūi thî, che-sī tē-jī-pái. Pí-tek siō͘ⁿ-khí Ia-so͘ kā i kóng ê :" Ke thî nn̄g-pái chìn-chêng, Lí ē saⁿ-pái m̄ jīn Góa.” Chiū háu chhut-lâi.