Lō͘ka Hokim su Te jī cho͘ⁿ 路加福音 第二章

2 : 1 Hit ê sî, Lômá hôngtè Akó͘sūtok hālēng, kiò choânkok ê jînbîn lóng tio̍h khì tengkì hō͘kháu.

2 : 2 Che sī Kulíliú chò Sūlīa chóngtok ê sî, tē it pàiⁿ pānlí hō͘kháu tengkì.

2 : 3 Só͘í ta̍kke lóng tńg khì katī ê kò͘hiong pānlí.

2 : 4 Ioksek mā tùi Kalīlī séng ê Násatle̍k siâⁿ tńg khì, kàu Tāipi̍t ê siâⁿ chiūsī Peklīhêng, inūi Ioksek goânpún chiū siok Tāipi̍t chit-pâng ê āutāi.

2 : 5 I mā beh kap i ê bīhun chhe Málīa chòhóe khì tengkì. Hitsîchūn, Málīa íkeng sī hoâiīn bóekî.

2 : 6 Tng in kàu ê sî, Málīa ê sánkî mā kàu à,

2 : 7 Chiū seⁿ thâu chi̍t thai the, sī chapo͘ è, ēng pò͘ kā pau khí lâi, khǹg tī béchô lāi, inūi lúkoán íkeng bô pangkeng thang tòa.

2 : 8 Hīt siâⁿgōa ū kò͘io͘ⁿ è tiàm soaⁿiá, tī àmsî lûnpan kò͘-siú.

2 : 9 U Chú ê thiⁿsài lâi khiā tī in ê piⁿá, Chú ê êngkng iā tùi sìbīn chiò in, kò͘io͘ⁿ è lóng tio̍h tōa kiaⁿ.

2 : 10 Thiⁿsài kā in kóng: ”M̄bián kiaⁿ! Góa sī lâi pò lín chit ê tōa hoaⁿhí ê hó siausit, sī hām choân jînlūi lóng ū koanhē ê,

2 : 11 Chiūsī kináji̍t tī Tāipi̍t ê siâⁿ, ū chi̍t ūi Kiùchú ūi lín lâi chhutsì, chiūsī Chú Kitok.

2 : 12 Lín ê khòaⁿtio̍h chi̍t ê eⁿá ēng pò͘ pau leh, tò tī béchô lāi, iōng ánne thang hō͘ lín jīn chhut lâi.”

2 : 13 Hutjiân ū chi̍t tōa tīn sió thiⁿsài lâi kap hit ê thiⁿsài chòhóe oló Siōngchú kóng:

2 : 14 “Goān êngkng kui hō͘ chìkoân ê Siōngchú, iā goān I sio͘ⁿsù pêngan hō͘ I só͘ hoaⁿhí ê lâng!”

2 : 15 Hia ê thiⁿsài lóng līkhui in chiō͘ⁿthiⁿ liáuāu. Kò͘iûⁿ è ta̍kê siochio, kóng: ”Lán lâi siâⁿlāi, khòaⁿ Chú só͘ oânsêng ê tāichì, chiūsī Chú só͘ chísī lán ê.”

2 : 16 In sūi kóaⁿkín cháu khì, chiū chhōetio̍h Málīa hām Ioksek, koh khòaⁿkìⁿ eⁿá tī béchô lâi teh khùn,

2 : 17 In íkeng khóaⁿliáu, chiū kā thiⁿsài tùi in só͘ kóng koanhē chit ê eⁿá ê sū, pò hō͘ chēchē lâng chaiiáⁿ.

2 : 18 Thiaⁿtio̍h ánne kóng ê lâng, lóng chin hoâigî in só͘ kóng ê ōe.

2 : 19 Málīa khiok kā chia ê ōe khǹg tī simlāi, puttoān leh siō͘ⁿ.

2 : 20 Kò͘iûⁿ è tńgkhì liáuāu, inūi ū thiaⁿtio̍h kap khòaⁿtio̍h só͘ū ê tāichì, tuhó sī chiàu thiⁿsài ǹg in só͘ kóng ê, chiū kā êngkng kui hō͘ Siōngchú, lâi oló I.

2 : 21 Kàu eⁿá chhutsì ê tē peh ji̍t, in chiū kā I kiâⁿ katlé, koh hō miâ kiòchò Iâso͘ ; sī chiàu thiⁿsài tī I iáubē lâikàu in mama paktó͘ lāi chìnchêng, só͘ hō ê.

2 : 22 Chiàu Mô͘se ê Lu̍thoat, kàu I chhengkhì ê ji̍tkî móa à, in chiū phō eⁿá khì Iâlō͘satléng, kā I hiàn hō͘ Siōngchú.

2 : 23 (Chesī chiàu Chú ê Lu̍thoat só͘ kì:「Thâuchi̍tê chapo͘  eⁿ, lóng tio̍h hunpia̍t chhut lâi hōnghiàn hō͘ Chú.」)

2 : 24 Koh chiàu Chú ê lu̍thoat só͘ tēng, tio̍h ài ēng chi̍t tùi pangkah, ásī nn̄g chiah húnchiáuá hiàn chò siochè.

2 : 25 Tī Iâlō͘satléng ū chi̍tê kiòchò Sebiān ê lâng, sī chi̍t ê konggī koh khiânsêng ê lâng, itti̍t leh ǹgbāng Íseklia̍t ê anùichiá lâilîm, Sèngsîn iā kap I tôngchāi.

2 : 26 I thongkòe Sèngsîn ê khésī, chaiiáⁿ tī i sí chìn chêng, ittēng ē khòaⁿtio̍h Chú só͘ siatli̍p ê Kitok.

2 : 27 I pī Sèngsîn kámtōng chiū kiâⁿ li̍p khì sèngtiān, túhó khòaⁿtio̍h Iâso͘ ê pēbú iā phō I ji̍p lâi, beh chiàu Lu̍thoat ê kuitēng kúhêng légî.

2 : 28 Hit sî Sebiān ēng siangchhiú kā eⁿá chiap kòe lâi, oló Siōngchú kóng:

2 : 29 "Chú à! Hiānchāi thang chiàu Lí ê ōe, tháupàng Lí ê lô͘po̍k pêngan kòesin;

2 : 30 Inūi góa íkeng chhinba̍k khòaⁿkìⁿ Lí ê kiùun,

2 : 31 Chiūsī Lí tī bānlâng ê bīnchêng só͘ chúnpī ê,

2 : 32 I beh chò khésī gōapang lâng ê kng, iāsī Lí ê chúbîn Íseklia̍t ê êngkng."

2 : 33 Iâso͘ ê pēbú thiaⁿtio̍h chia ê ōe, kámkak chin ìgōa koh kîkoài.

2 : 34 Sebiān kā in chiokhok, koh tùi eⁿá ê lāubú Málīa kóng: ”Chit ê gíná siū siatli̍p, beh hō͘ Íseklia̍t tiong ū chin chē lâng sitsè, mā ū chin chē lâng siū koseng; ē chiâⁿchó lâng kongkek ê bo̍kphiau,

2 : 35 hō͘ hia ê lâng ê sim-su lò͘hiān chhut lâi, lí ê sim iā ē hō͘ to chhak kah hoeh sāisai.”

2 : 36 Koh ū chi̍t ê lāu kho̍kkho̍k ê lú sianti kiò chò Aná, sī siok Asiat kacho̍k Hoatlōele̍k ê chabó͘kiáⁿ, kiathun āu kap tiōnghu sengoa̍h chhit nî chiū chiúkóaⁿ,

2 : 37 íkeng chhîsiok pehcha̍p sì nî kú, m̄ bat līkhui sèngtiān, siôngsiông kímchia̍h ho̍ksāi Siōngchú.

2 : 38 Tī hit ê sî, túhó i mā kiâⁿ lâi kámsiā Siōngchú, iā tùi só͘ū gióngbōng Iâlō͘satléng tittio̍h Siōngchú chinkiù ê lâng, kóngkhí koanhē chit ê eⁿá ê tāichì.

2 : 39 Ioksek kap Málīa chiàu Chú ê Lu̍thoat pānlí ta̍khāng tāichì liáuāu, chiū tńg khì Kalīlī séng, kàu katī goânpún tòa ê Násatle̍k siâⁿ.

2 : 40 Chit ê gíná chiāmchiām tōahàn, thékeh ióngchōng, tìhūi chhiongchiok koh Siōngchú ê untián mā tī I ê sinchiō͘ⁿ.

2 : 41 Ta̍k nî ê pôaⁿkòecheh, I ê pēbú lóng ē khì Iâlō͘satléng.

2 : 42 Tī Iâso͘ cha̍pjī hòe ê sî, choânke mā khì hia, chiàu kuilē siú chit ê chehkî.

2 : 43 Chehkî kiatsok, in chiū tńgkhì, m̄ku chit ê siàuliânke Iâso͘ , iáukú lâu tī Iâlō͘satléng, I ê pēbú pēng m̄ chaiiáⁿ,

2 : 44 Lia̍h chò I mā ū chòhóe kiâⁿ tī beh tńg khì ê lō͘ ni̍h, íkeng kiâⁿ ū chi̍t ji̍t ê lō͘ , chiah siō͘ⁿ beh tī chhincho̍k kap se̍ksāi ê jînkûn tiong chhōe I,

2 : 45 Itti̍t chhōe, lóng bô khòaiⁿ, chôaⁿ kiâⁿ tńg khì Iâlō͘satléng chhōe I.

2 : 46 Kengkòe saⁿ ji̍t, chiah tī sèngtiān khòaⁿtio̍h I, chē tī hia ê kàusu ê tiongkan, jīnchin thiaⁿ mā siôngsè mn̄g.

2 : 47 Só͘ū thiaⁿtio̍h ê lâng, lóng tùi I ê chaibat kap hôeèng kámkak chin hihán.

2 : 48 I ê pēbú khòaⁿtio̍h I ánne mā chin ìgōa. I ê lāubú kā I kóng: ”Góa ê kiáⁿ, Lí ná ē ánne chò? Hō͘ góa kap lín pâ chhōe Lí chhōe kah simkông hóeto̍h? “

2 : 49 Iâso͘ ìn: ”Sī ánchóaⁿ leh chhōe Góa? Lín kám m̄ chai Góa tio̍h ài tiàm tī Góa ê Pē ê chhù mah?”

2 : 50 In si̍tchāi thiaⁿ bô I leh kóng siáⁿ!

2 : 51 Iâso͘ chiū hām in tńg khì Násatle̍k, iā chiàu in ê ìsù chò tāichì bô koh hō͘ in pēbú kòasim. I ê lāubú kā itchhè só͘ hoatseng tī Iâso͘ sinchiō͘ⁿ ê tāichì lóng kì tī simlāi.

2 : 52 Iâso͘ ê tìhūi kap nîhòe ná ke thiⁿ, Siōngchú hām chènglâng mā ná thiàⁿsioh I.  

 

  2019/01/09   2025.07.09. Siukái Lâmthâm