Lō͘ka hokim su Tē saⁿ chio͘ⁿ 路加福音 第三章

3 : 1 Thêpìliû Kaisat chò Lômá hôngtè ê tē cha̍pgō͘ nî , Púntiu Pília̍pto chò Iûthài ê chóngtok , Hilu̍t chò Kalīlī ê séngtió͘ⁿ , i ê hiaⁿtī Huile̍k chò Íthó͘līa kap Teklia̍pkhónî tēhng ê ông , Lūsatlia̍p chò Apílīnî ittài ê ông .

3 : 2 Aná hām Kaiahoat chò tōachèsi . Hitsî Satkalīa ê kiáⁿ Iokhān tòa tī khòngiá , niásiū Siōngchú tùi i kóng ê ōe .

3 : 3 I chiū khì kàu Io̍ktàn hô ittài ê só͘chāi , thoânkáng hóekái ê sélé , hō͘ lâng lâi tittio̍h Siōngchú ê siàchōe .

3 : 4 Tu chhinchhiō͘ⁿ sianti Ísàia ê chheh só͘ siá ê : ” Tī khòngiá ū lâng leh hoah :「Tio̍h chúnpī Chú ê lō͘ , siuti̍t I ê siólō͘ !」

3 : 5 Só͘û ê soaⁿkok lóng tio̍h thūn hō͘ tīⁿ , itchhè ê tōasió soaⁿthâu lóng ài kut hō͘ kē ! Oanoan oatoat ê só͘chāi tio̍h siu hō͘ ti̍t , koânkoân kēkē ê lō͘ tio̍h phêⁿ hō͘ pêⁿ !

3 : 6 Só͘ū ê lâng lóng beh khòaⁿtio̍h Siōngchú ê kiùun!”

3 : 7 Iokhān kā hia ê beh lâi i hia niásiū sélé ê lâng kóng : ” Lín chia ê to̍kchôa ê āutāi , sī siáⁿlâng kéngkò lín tùi bīlâi ê hênghoa̍t tôthoat chhut lâi ?

3 : 8 Lín tio̍h tī sengoa̍h tiong kiâⁿ chhut tio̍h ê hêngûi , lâi piáubêng hóekái ê simchì ; m̄ thang katī lia̍h chò「Góa sī Apeklia̍phán ê āutāi」, Góa kā lín kóng , Siōngchú ē tùi chia ê chio̍hthâu tui seⁿ chhut Apeklia̍phán ê kiáⁿsun .

3 : 9 Chitmá pó͘thâu íkeng chúnpī hósè , nā bô kiat hó kóechí ê , chiū tùi chhiūthâu kā phut lo̍h lâi , hiat lo̍h hóelô͘ . ”

3 : 10 Hia ê lâng mn̄g I kóng : ” Ánne , Goán tio̍h ài ánchóaⁿ chò ? ”

3 : 11 Iokhān ìn : ” Ū nn̄g niá saⁿ ê , tio̍h pun chi̍t niá hō͘ bô saⁿ ê lâng ; ū mi̍hkiāⁿ thang chia̍h ê iā tio̍h ánne chò . ”

3 : 12 Koh ū siusòe ê koaⁿoân iā beh lâi niá sélé , mn̄g Iokhān : ” Lāusu, Goán tio̍h ài ánchóaⁿ chò ? ”

3 : 13 I ìn : ” I hoat pānlí , m̄ thang ke siu ígōa ê kimchîⁿ . ”

3 : 14 Mā ū kunjîn óa lâi mn̄g I : ” Á goán leh , Tio̍h ài chò siáⁿ ? ” Iokhān kóng : ” M̄ thang ngē ài lâng ê châibu̍t , iā m̄ thang bûkò lâng , tio̍h lia̍h íkeng ū thang chia̍h chhēng lâi boánchiok . ”

3 : 15 Tngsî hia ê teh kîthāi Kitok lîmkàu ê lâng , lóng ē ioh Iokhān chin khólêng chiūsī Kitok .

3 : 16 M̄ku Iokhān kóng : ” Goa khaksit ēng chúi kā lín kiâⁿ sélé , m̄ku ū chi̍t ūi pí góa kohkhah ū lêngle̍k ê tehbeh lâi , góa liân kā I tháu êtòa mā bô kàu keh . I ē ēng hóe kap Sèngsîn kā lín kiâⁿ sélé .

3 : 17 Pòaki tī I ê chhiú , beh pòa chhengkhì be̍htiô͘ⁿ ê be̍há , thang siu li̍p khì chhngkhò͘ , ēng bē hoa ê hóe kā be̍hkhak sio khì . ”

3 : 18 Iokhān iā ēng chēchē ōe khó͘khǹg chèng lâng , mā ǹg in kángtō .

3 : 19 Kānā Hilu̍t ông inūi chhió͘ⁿ in siótī ê bó͘ Hilôtí hām só͘ chò ê pháiⁿtāi , hō͘ Iokhān chí-chek ,

3 : 20 Lēnggōa koh ke chi̍t hāng , chiū sī kā Iokhān koaiⁿ loh kaⁿga̍k .

3 : 21 Ta̍kke lóng niá sélé liáu , Iâso͘ mā ū . Tu leh kîtó ê sî, Thiⁿ chiū khui ,

3 : 22 Sèngsîn kànglîm tī I ê sinchiō͘ⁿ , hêngchōng chhinchhiō͘ⁿ húnchiáu ; koh ū siaⁿim tùi thiⁿténg thoân lâi : ” Lí sī Góa só͘ thiàⁿ ê kiáⁿ , Góa chin ài Lí . ”

3 : 23 Iâso͘ chhut lâi thoântō ê sî , tāiiok sī saⁿcha̍p hòe . Tùi lâng lâi kóng , I sī Ioksek ê kiáⁿ ; Ioksek sī Hilí ê kiáⁿ ;

3 : 24 Hilí sī Máthap ê kiáⁿ ; Máthap sī Lībī ê kiáⁿ ; Lībī sī Be̍kki ê kiáⁿ ; Be̍kki sī Ngáná ê kiáⁿ ; Ngáná sī Ioksek ê kiáⁿ ;

3 : 25 Ioksek sī Mátāithêa ê kiáⁿ ; Mátāithêa sī Amô͘sū ê kiáⁿ ; Amô͘sū sī Náhông ê kiáⁿ ; Náhông sī Ísūlí ê kiáⁿ; Ísūlí sī Nákai ê kiáⁿ ;

3 : 26 Nákai sī Máap ê kiáⁿ ; Máap sī Mátāithêa ê kiáⁿ ; Mátāithêa sī Sebí ê kiáⁿ ; Sebí sī Ioksek ê kiáⁿ ; Ioksek sī Iûtāi ê kiáⁿ ; Iûtāi sī Iokaná ê kiáⁿ ;

3 : 27 Iokaná sī Līsat ê kiáⁿ ; Līsat sī Só͘lôpapek ê kiáⁿ ; Só͘lôpapek sī Satlia̍pthiat ê káiⁿ ; Satlia̍pthiat sī Nîlī ê kiáⁿ ; Nîlī sī Be̍kki ê kiáⁿ ;

3 : 28 Be̍kki sī Atí ê kiáⁿ ; Atí sī Kosong ê kiáⁿ ; Kosong sī Ímô͘tông ê kiáⁿ ; Ímô͘tông sī Jíⁿ ê kiáⁿ ; Jíⁿ sī Ioksè ê kiáⁿ ;

3 : 29 Ioksè sī Ília̍tsat ê kiáⁿ ; Ília̍tsat sī Ioklēng ê kiáⁿ ; Ioklēng sī Máthap ê kiáⁿ ; Máthap sī Lībī ê kiáⁿ ;

3 : 30 Lībī sī Sebiān ê kiáⁿ ; Sebiān sī Iûtāi ê kiáⁿ ; Iûtāi sī Ioksek ê kiáⁿ ; Ioksek sī Ioklâm ê kiáⁿ ; Ioklâm sī Ílīakim ê kiáⁿ ;

3 : 31 Ílīakim sī Bílīa ê kiáⁿ ; Bílīa sī Máilâm ê kiáⁿ ; Máilâm sī Máta̍tthaⁿ ê kiáⁿ ; Máta̍tthaⁿ sī Nátan ê kiáⁿ ; Nátan sī Tāipi̍t ê kiáⁿ;

3 : 32 Tāipi̍t sī Iâse ê kiáⁿ; Iâse sī Opek ê kiáⁿ ; Opek sī Phoasū ê kiáⁿ ; Phoasū sī Satbûn ê kiáⁿ ; Satbûn sī Násūn ê kiáⁿ ;

3 : 33 Násūn sī Abínáta̍t ê kiáⁿ ; Abínáta̍t sī Alân ê kiáⁿ ; Alân sī Ísūlûn ê kiáⁿ ; Ísūlûn sī Hoatle̍ksū ê kiáⁿ ; Hoatle̍ksū sī Iûtāi ê kiáⁿ ;

3 : 34 Iûtāi sī Ngákok ê kiáⁿ ; Ngákok sī Ísat ê kiáⁿ ; Ísat sī Apeklahhán ê kiáⁿ ; Apeklahhán sī Thaⁿla̍h ê kiáⁿ ; Thaⁿla̍h sī Náho̍k ê kiáⁿ ;

3 : 35 Náho̍k sī Satlo̍k ê kiáⁿ ; Satlo̍k sī  Lia̍pkó͘ ê kiáⁿ ; Lia̍pkó͘ sī  Hoatle̍k ê kiáⁿ ; Hoatle̍k sī  Hipek ê kiáⁿ ; Hipek sī Satlia̍p ê kiáⁿ ;

3 : 36 Satlia̍p sī Kailâm ê kiáⁿ ; Kailâm sī Ahoatsat ê kiáⁿ ; Ahoat-sat sī Siám ê kiáⁿ ;  Siám sī Naa ê kiáⁿ ; Naa sī La̍hbe̍k ê kiáⁿ ;

3 : 37 La̍hbe̍k sī Máthó͘satla̍h ê kiáⁿ ; Máthó͘satla̍h sī Ílo̍k ê kiáⁿ ; Ílo̍k sī Ngália̍t ê kiáⁿ ; Ngália̍t sī Mále̍klia̍t ê kiáⁿ ; Mále̍klia̍t sī Kailâm ê kiáⁿ ; Kailâm sī Ínásū ê kiáⁿ ;

3 : 38 Ínásū sī Siat ê kiáⁿ ; Siat sī Atong ê kiáⁿ ; Atong sī Siōngchú ê kiáⁿ .

  2019/01/11   2025.07.10. Siukái    Lâmthâm