Lō͘-ka hok-im su Tē-cha̍p-jī chio͘ⁿ 路加福音 第十二章

12 : 1 Hit-sî , ū kúi-nā bān lâng chip chòe-hóe , tì-sú kàu hō͘-siong thún-ta̍h . Ia-so͘ tāi-seng kā ha̍k-seng kóng : ” Hoat-lī-sài-phài lâng ê kàⁿ , lín tio̍h hông leh , chiū-sī in ê giân-hêng bô it-tì .

12 : 2 Bô chi̍t-hāng am-khàm ê tāi-chì bē lō͘-hiān; bô chi̍t-hāng pì-bi̍t ê tāi-chì bē hō͘ lâng chai .

12 : 3 Só͘-í , lín tī o͘-àm tiong só͘ kóng ê ōe , ē tī kng-bêng tiong hō͘ lâng thiaⁿ-tio̍h ; tī pang-keng lāi tiàm hīⁿ-khang piⁿ só͘ kóng ê ōe , ē hō͘ lâng tī chhù-téng-bóe kong-khai soan-pò͘ . ”

12 : 4 “ Góa ê pêng-iú , Góa kā lí kóng , hiah-ê sat-hāi sin-thé í-āu , bē-koh tang chò siáⁿ-mih ê , m̄-bián kiaⁿ in .

12 : 5 Góa beh chí-sī lín tio̍h kèng-ùi siáⁿ-lâng , I sī ū koân-pèng tī lâng sí liáu-āu , hō͘ I khì-kàu tē-ga̍k ē . Góa sīm-tiōng kā lín kóng , lín tio̍h kiaⁿ I .

12 : 6 Gō͘ chiah chhek-chiáu-á kám m̄-sī bē nn̄g kak gîn ? Iáu-kú , tī Siōng-chú ê bīn-chêng in móe chi̍t-chiah lóng bô hō͘ i bē kì-tit ;

12 : 7 Chiū liân lín ê thâu-mn̂g mā lóng sǹg-kòe . Só͘-í , bián-kiaⁿ , lín sī pí chi̍t tōa-tīn chhek-chiáu-á koh-khah kùi-tiōng . ”

12 : 8 “ Góa koh kā lín kóng , bô-lūn siáⁿ-lâng tī chèng-lâng ê bīn-chêng , ūi Góa chò-chèng ê , Góa mā it-tēng tī Siōng-chú ê thiⁿ-sài ê bīn-chêng ūi i chò-chèng ;

12 : 9 Nā-sī ū lâng tī chèng-lâng bīn-chêng kóng m̄-bat Góa ê , Góa tī Siōng-chú ê thiⁿ-sài ê bīn-chêng mā-ē kóng m̄-bat i .

12 : 10 Bô-lūn siáⁿ-lâng kóng ōe tek-chōe Góa , iau ē-tàng tit-tio̍h sià-bián ; nā-sī tùi Sèng-sîn kóng se̍k-to̍k ê ōe , it-tēng bē-tàng sià-bián .

12 : 11 Lâng nā ah lín khì hōe-tn̂g , khiā tī koaⁿ-oân í-kip chiáng-koân chiá ê bīn-chêng , m̄-bián su-khó beh án-chóaⁿ ìn-ōe , á-sī án-chóaⁿ soat-bêng :  

12 : 12 In-ūi hit-sî Sèng-sîn ē hō͘ lín chin chheng-chhó tio̍h án-chóaⁿ kóng . ”

12 : 13 Hit tiong-kan ū lâng kā Ia-so͘ kóng : ” Lāu-su! Chhiáⁿ LÍ hā-lēng hō͘ góa ê hiaⁿ-tī kap góa pun chó͘-sán . ”

12 : 14 Ia-so͘ ìn i : ” Oeh! Siáⁿ-lâng kiò Góa chò phòaⁿ-koaⁿ , lâi kā lín pun ke-hóe ? ”

12 : 15 Chôaⁿ tùi ta̍k-ke kóng : ” Tio̍h kín-sīn lâi iok-sok ka-tī , pâi-tû só͘-ū tham-sim ê khì-tô͘ , in-ūi lâng ê oa̍h-miā m̄-sī ēng chē-chē mi̍h-kiāⁿ thia̍p khí-lâi ê .

12 : 16 Sòa-lo̍h I ēng chi̍t-ê phí-jū : ” Ū chi̍t-ê chin ū chîⁿ ê lâng , siu-sêng chin-chē ,

12 : 17 Sim-lāi ka-tī leh phah-sǹg :「Siu kah chiah chē khǹg bô-lō͘ , beh án-chóaⁿ sī-hó ?」

12 : 18 I siō͘ⁿ liáu koat-tēng :「Góa beh ah-ne chin-hêng , kā chhng-khò͘ thiah-tiāu , khí khah tōa keng ê , thang kā góa só͘ siu-sêng ê , kap mi̍h-kiāⁿ lóng khǹg tī hit lāi-bīn ,

12 : 19 Liáu-āu , góa beh tùi góa ê lêng-hûn kóng , Lí ō͘! Lí ê chhng-khò͘ lāi í-keng tún chin-chē mi̍h-kiāⁿ , ū-kàu thang ēng kúi-á-tang , hó-hó-á hio̍h-khùn , hòng-sim chia̍h-chhēng lo̍k-thiòng lâi kòe ji̍t .」

12 : 20 Siōng-chú khiok lâi tùi I kóng :「Gōng-lâng ah! Góa kin-á-ji̍t àm-mê chiū beh siù-hoe lí ê lêng-hûn , lí so͘ chún-pī ê sī beh lâu hō͘ siáⁿ-lâng?」

12 : 21 Ūi-tio̍h ka-tī chek-chū châi-pó ê lâng , tī Siōng-chú ê bīn-chêng pēng m̄-sī hù-chiok ê , mā-sī ah-ne .”

12 : 22 Ia-so͘ koh tùi ha̍k-seng kóng : ” Só͘-í Góa kā lín kóng , M̄-bián hoan-ló lín ê sèⁿ-miā beh chia̍h siáⁿ-mih , á-sī beh chhēng siáⁿ-mih ;

12 : 23 In-ūi sèⁿ-miā pí chia̍h-mi̍h khah tiōng-iàu .

12 : 24 LÍ khòaⁿ o͘-a , in bô chèng-choh , bô siu-sêng , mā bô chhek-chhng , bô chhng-khò͘ , sī Siōng-chú teh ió͘ⁿ-chhī . Lín kám-bô pí hia-ê chhek-chiáu-á khah kùi-tiōng ?

12 : 25 Lín tó-chi̍t-ê ē-tàng ēng khòa-lū hō͘ ka-tī ê sèⁿ-miā ke oa̍h chi̍t-khek kú ?

12 : 26 Chiah-līn sió-khóa ê tāi-chì , lín to chò bē-kàu , ná-tio̍h khì hoan-ló kî-thaⁿ ê tāi-chì ?

12 : 27 Lí khòaⁿ pek-ha̍p-hoe sī án-chóaⁿ tōa-châng è , i bô lô-khó͘ , mā-bô pháng-se . M̄-ku Góa kā lín kóng , Tio̍h kóng sī Só͘-lô-bûn ông siōng êng-hôa hù-kùi ê sî ê chhēng-chhah , iau khah su in kî-tiong ê chi̍t lúi !

12 : 28 Iá-gōa ê chháu , kin-á-ji̍t iau oa̍h leh , mîn-á-chài to̍h hō͘ lâng hiat lo̍h-khì hóe-lô͘ , Siōng-chú iáu-kú hō͘ in chng kah chia̍h-súi , hô-hóng sī lín , I kám-bē koh-khah khòaⁿ-kò͘ lín ?

12 : 29 M̄-bián kòe-thâu khòa-lū beh chia̍h siáⁿ-mih , beh lim siáⁿ-mih ,

12 : 30 Chia-ê lóng-sī it-poaⁿ lâng leh chhiâu-chhōe ê . Lín so͘ su-iàu ê mi̍h-kiāⁿ , lín ê Thiⁿ-pē lóng chai .

12 : 31 Lín nā chiong Siōng-chú ê kok , khǹg tī tē-it koan-sim ê , chiah-ê mi̍h-kiāⁿ lóng ē sió͘ⁿ-sù lín .

12 : 32 Góa só͘ thiàⁿ ê , M̄-bián kiaⁿ , in-ūi lín ê Thiⁿ-pē chin hoaⁿ-hí chiong I ê kok sió͘ⁿ-sù hō͘ lín , .

12 : 33 Lín tio̍h bē tiāu lí só͘-ū ê it-chhè , chiong hia-ê chîⁿ pun hō͘ bô chîⁿ ê lâng , ūi ka-tī chún-pī ēng bē pháiⁿ ê chîⁿ-tē-á , só͘-ū ê châi-pó tio̍h khiām tī thiⁿ-ni̍h ē hō͘ lí ēng bē-liáu , tī hia bô chhat lâi thau-the̍h , mā bô thâng kā chiù hāi khì .

12 : 34 In-ūi lín ê châi-pó tī tó-ūi , lín ê sim iā chiū tī hia .”

12 : 35 “ Tio̍h táⁿ-chhah hō hó-sè thang chhut-hoat , lín ê teng iā tio̍h tiám hō͘ to̍h ,

12 : 36 Ka-tī ná-chhiō͘ⁿ po̍k-jîn teh tán-hāu án iàn-hōe tńg-lâi ê chú-lâng . Tng chú-lâng chi̍t-ē kàu-chhù , phah-mn̂g , chiū sûi khì khui-mn̂g .

12 : 37 Chú-lâng tńg-lâi , khòaⁿ-tio̍h po̍k-jîn kéng-séng teh tán , in chiū ū hok-khì . Góa chin khéng-tēng kā lín kóng , chú-lâng ē kiò in chē-toh , ka-tī ê io hā-khí-lâi , óa—lâi su-hāu in .

12 : 38 Khó-lêng sī àm-sî chiâⁿ cha̍p-tiám , á-sī pòaⁿ-mê chiah tńg-lâi , khòaⁿ-tio̍h in , hia-ê po̍k-jîn chiū ū hok-khì ah .

12 : 39 Che-sī thang khéng-tēng ê , ká-sú nā-ū chhù ê chú-lâng chai-iáⁿ chha̍t-á tang-sî ê lâi , it-tēng ē thê-hông chún-pī , bē-tàng hō͘ chha̍t-á lâi phò-hoāi i ê chhù .

12 : 40 Só͘-í lín mā-tio̍h chún-pī hó-sè , in-ūi Góa lâi ê sî , m̄-sī tī lín ê ì-liāu tiong . ”

12 : 41 Pí-tek mn̄g : ” Chú ah! Chit-ê phí-jū sī chí-ū tūi goán kóng , á-sī tùi chèng-lâng kóng ? ”

12 : 42 Chú kóng : ” Siáⁿ-lâng sī chīn-tiong koh ū tì-sek ê koán-ke , chú-lâng kau-tāi i koán-lí chhù-lāi ê lâng , chiàu-sî pun chia̍h-mih hō͘ in ?

12 : 43 Chú-lâng lâi ê sî , khòaⁿ-tio̍h i ah-ne chò , i chiū ū hok-khì .

12 : 44 Góa si̍t-chāi kā lín kóng , chú-lâng ē chiong it-chhè ê sán-gia̍p lóng hō͘ i koán-lí .

12 : 45 Hit-ê po̍k-jîn nā ka-tī siō͘ⁿ :「Góa ê chú-lâng bē hiah kín tńg-lâi .」chiū phah kî-thaⁿ ê po̍k-jîn hām lú-pī , koh ka-tī chia̍h kah chùi-bâng-bâng ;

12 : 46 Hit-ê po̍k-jîn ê chú-lâng tī i bô phah-sǹg kap chún-pī ê sî-ji̍t tńg-lâi , ē tāng-tāng hêng-hoa̍t i , hō͘ i hām hiah-ê bō tiong-si̍t ê lâng siū siāng-khoán ê chhú-hoa̍t .

12 : 47 Po̍k-jîn bêng-chai chú-lâng ê siō͘ⁿ-hoat , khiok m̄ chún-pī , iā bô chiàu i ê ì-sù khì chò , it-tēng ē siū koh-khah tāng ê chhú-hoa̍t ;

12 : 48 Nā-sī m̄-chai lâi chò m̄-tio̍h , ē siū siō͘ⁿ khin ê chhú-hoa̍t ; Hit-ê tit-tio̍h khah chē ê lâng , chú-lâng ē iàu-kiû i hù-chhut khah chē ; úi-thok i khah chē ê , mā siāng-khoán beh siu-hôe khah chē . ”

12 : 49 “ Góa lâi sī beh ēng hóe tàn tī tē-siō͘ⁿ , hiān-chāi chin khó-lêng í-keng to̍h khí-lâi ?

12 : 50 Góa eng-kai niá-siū ê sé-lé iáu-bē oân-sêng , Góa sī lōa-ní-á kî-thāi ?

12 : 51 Lín lia̍h-chò Góa lâi , sī beh hō͘ tē-siō͘ⁿ hô-pêng ? Góa kā lín kóng , m̄-sī , tian-tó sī beh hō͘ i hun-lia̍t .

12 : 52 Tùi taⁿ í-āu , nā ū gō͘ ê lâng ê ka-têng ē hō͘-siong tùi-li̍p , nā m̄-sī saⁿ-ê hām nn̄g-ê oan-ke , chiū-sī nn̄g-ê hām saⁿ-ê tàu-cheng ;

12 : 53 Lāu-pē hām kiáⁿ , kiáⁿ hām lāu-pē ; lāu-bú hām cha-bó͘ kiáⁿ , cha-bó͘ kiáⁿ hām lāu-bú ; ta-ke kap sin-pū , sin-pū kap ta-ke hō͘-siong sio-cheⁿ .”

12 : 54 Ia-so͘ koh tùi chèng-lâng kóng : ” Lín khòaⁿ-tio̍h sai-pêng chhut-hiān hûn-chhái , chiū chai-iáⁿ :「Teh-beh lo̍h-hō͘ ah .」, kó-jiân hō͘ chiū kàu .

12 : 55 Lâm-hong nā chhoe lâi , lín chiū ē kóng「Thiⁿ-khì teh-beh sio-loa̍h ah .」 , kó-jiân chin-chiàⁿ sī ah-ne .

12 : 56 Lín chia-ê ké-hó ê lâng ah , lín lóng chheng-chhó thiⁿ-kap-tē ê piàn-hòa , ná-ē bē liáu-kái chit ê sî-kî ? ”

12 : 57 “ Lín ná-ē bô ka-tī tàm sim-lāi siông-sè siō͘ⁿ khòaⁿ-māi leh ?

12 : 58 Nā ū lâng khì hoat-īⁿ kò lí , tio̍h-ài tī iáu-bē kàu hoat-koaⁿ ê bīn-chêng , siō͘ⁿ pān-hoat chīn-liōng kap i hô-kái , nā-bô chin ū khó-lêng in giú lí khì hoat-koaⁿ ê bīn-chêng , hoat-koaⁿ chiū chiong lí káu hō͘ hoat-kéng , in chiū chiong lí koaiⁿ loh kaⁿ-ga̍k .

12 : 59 Góa kā lí kóng , lí nā bô chiong hoa̍t-khóaⁿ hêng hō͘ it-chheng jī-chhó , choa̍t-tùi bē-tàng chhut-kaⁿ .”                        2019/02/13 - 18