16 : 1 Ia-so͘ koh tùi ha̍k-seng kóng : ” Ū chi̍t-ê hó-gia̍h-lâng ê koán-ke , ū lâng khì ǹg i ê chú-lâng kiám-kí i lōng-hùi chú-lâng ê châi-bu̍t .
16 : 2
Chú-lâng chiū kiò chit-ê koán-ke lâi mn̄g :「Góa ū thiaⁿ lâng lâi kóng lí ê sū , sī án-chóaⁿ ? Kā góa só͘ hō͘ lí
chú-pān ê tāi-chì kau-tài hō͘ chheng-chhó , in-ūi bē-tàng koh hō͘ lí chò
koán-ke ah !」
16 : 3
Hit-ê koán-ke ka-tī siō͘ⁿ :「Chú-lâng beh kā góa sî thâu-lō͘ , bô beh hō͘ góa chò koán-ke , góa
chiông-lâi ē-tàng chò siàⁿ ? Khì ku̍t-thô͘ , sī bô khùi-la̍t ; khì kā lâng
pun-chîⁿ , sī kiaⁿ kiàn-siàu .
16 : 4 Taⁿ
góa chai-iáⁿ a-lóaⁿ chò chiah-hó , hō͘ góa tī bô chò koán-ke í-āu , ū lâng ē-thang hō͘ góa khì in tau .」
16 : 5
Chôaⁿ chiong khiàm in chú-lâng chè-bū ê lâng , chi̍t-ê chi̍t-ê kiò lâi mn̄g , i
mn̄g tē-it ê :「LÍ khiàm goán
thâu-ke lōa-chē ?」
16 : 6 I ìn
:「Chi̍t-pah láng
iû ( chi̍t láng tāi-iok 50 kin) .」Hit-ê koán-ke kóng :「LÍ ê siàu-toaⁿ the̍h-khì , kín chē-lo̍h-lâi , kā siá chò gō͘-cha̍p .」
16 : 7 Koh
mn̄g chi̍t-ê :「Lí khiàm
lōa-chē?」 I ìn :「Chi̍t-pah chia̍h be̍h .」 Koán-ke mā kóng :「Lí ê siàu-toaⁿ the̍h-khì , kā siá
chò peh-cha̍p .」
16 : 8 Chú-lâng
chiū o-ló chit-ê put-gī ê koán-ke , chin ē-hiáu piàn-khiàu ; in-ūi kin-á-ji̍t
siok chit sè-kan ê lâng , teh chhú-lí sū-bū , pí tiàm-tī kng-bêng ê lâng
koh-khah chai-iáⁿ piàn-thong .
16 : 9 Góa
koh kā lín kóng : “ Tio̍h-ài ēng hit-ê put-gī ê chîⁿ-châi kau-pôe pêng-iú , kàu
tī khiàm-ēng chîⁿ ê sî , in chiah-ē chiap lín khì in tau éng-oán tòa lo̍h-khì .
16 : 10
Lâng nā tī sè-hāng tāi-chì chin-tiong , tī tōa-hāng tāi-chì mā-ē chin-tiong ;
tī sè-hāng tāi-chì bô sìn-iōng , tī tōa-hāng tāi-chì mā siāng-khoán .
16 : 11
Só͘-í , lín nā tī sè-sio̍k ê chîⁿ-châi bô chin-tiong , siáⁿ-lâng ē chiong
chin-chiàⁿ ê châi-pó úi-thok lín ?
16 : 12 Lín
nā tùi bat-lâng ê mi̍h-kiāⁿ bô tiong-sim , siáⁿ-lâng ē chiong siok lín ê mih
hō͘ lín ?
16 : 13
Chit-ê po̍k-jîn bē-tàng ho̍k-sāi nn̄g-ê chú-lâng; nā m̄-sī thó-ià chit-ê kah-ì
hit-ê , chiū-sī chun-tiōng chit-ê khòaⁿ-khin hit-ê . Lín bē-tàng chi̍t-bīn
ho̍k-sāi Siōng-chú , siâng-sî iā ho̍k-sāi chîⁿ-châi . ”
16 : 14
Hia-ê tham-ài chîⁿ-châi ê Hoat-lī-sài-phài ê lâng , thiaⁿ-tio̍h Ia-so͘ kóng
chia-ê ōe lóng thí-chhiò I .
16 : 15
Ia-so͘ kā in kóng : ” Lín tī lâng ê bīn-chêng jīn-ûi ka-tī sī chèng-gī ê ,tān-sī
lín ê sim-su Siōng-chú lóng chai ; in-ūi lâng só͘ khòaⁿ-tāng ê , tùi Siōng-chú
lâi-kóng sī pùn-sò .
16 : 16
Lu̍t-hoat kap sian-ti kàu Iok-hān ûi-chí , tùi chit-sî Siōng-chú kok-tō͘ ê
hó-siau-sit í-keng thoân chhut-khì , ta̍k-lâng lóng tio̍h phah-piàⁿ ji̍p-khì .
16 : 17
Thiⁿ kap tē ē siau-bô , pí beh kā lu̍t-hoat tiong ê chi̍t-tiám chi̍t-oe̍h chhat-siau
koh-khah kán-tan .
16 : 18 Nā
ū lâng kap i ê bó͘ lī-hun koh-chài chhōa chiū-sī hoān-tio̍h kan-îm ê chōe ;
liân chhōa pī lī-hun ê mā-sī hoān-tio̍h kan-îm ê chōe .”
16 : 19 “ Ū
chi̍t-ê chhēng chí-sek ê gōa-phâu hām iù-nńg ê saⁿ ê hó-gia̍h lâng , ta̍k-ji̍t kòe
kah chin chhia-hoa .
16 : 20 Koh
ū chi̍t-ê khit-chia̍h , miâ-kiò Lia̍p-sat-lō͘ , kui-seng-khu seⁿ liap-á , hō͘
lâng kā khǹg tī hit-ê hó-gia̍h-lâng ê mn̂g-kháu ,
16 : 21
Ǹg-bāng ē-tàng khiòh i án toh-téng lak tī thô͘-kha ê lâi chí-iau , koh mā-ū káu-á
lâi chīⁿ i ê liap-á .
16 : 22
Āu-lâi , chi̍t-ê khit-chia̍h sí-khì , hō͘ thiⁿ-sài chhōa khì khǹg tī A-pek-lah-hán
ê heng-chêng . Hit-ê hó-gia̍h lâng mā sí ah , kā tâi khí-lâi .
16 : 23
Hit-ê hó-gia̍h lâng loh tī im-kan siū-khó͘ , hn̄g-hn̄g khòaⁿ-tio̍h A-pek-lah-hán
, mā khòaⁿ-tio̍h Lia̍p-sat-lō͘ hō͘ i phō tī heng-chêng ,
16 : 24
Chôaⁿ tōa-siaⁿ hoah :「Góa ê chó͘-kong
A-pek-lah-hán ah! Chhiáⁿ lí khó-liân góa ! Kiû lí kiò Lia̍p-sat-lō͘ ēng
chéng-thâu-á-bóe ún tiám-á chúi hō͘ góa ê chhùi-chi̍h sio liâng chi̍t eh ; in-ūi
góa tī hóe-iām tiong siū khó͘-hêng .」
16 : 25
A-pek-lah-hán kā I kóng :「Kiáⁿ ah , lí eng-kai ē kì-tit lí chāi-seⁿ ê sî , í-keng hióng-siū kòe ah
, koh Lia̍p-sat-lō͘ mā siū khó͘ kòe , hiān-kim i tī chia tit-tio̍h an-ùi , a lí
siū khó͘-hêng .
16 : 26
M̄-niā ah-ne , koh tī lí kap góa ê tiong-kan , ū chhim-ian keh-khui , tì-kàu bô
lâng ē-tàng án chit-pêng khì lín hit-pêng , beh tùi lín hit-pêng lâi goán chia
mā bē-tàng .」
16 : 27
Hit-ê hó-gia̍h lâng ìn :「Nā-sī ah-ne , Góa ê chó͘-kong , kiû lí kiò Lia̍p-sat-lō͘ khì-kàu goán
lāu-pē in tau ,
16 : 28
In-ūi góa iáu-ū gō͘ ê hiaⁿ-tī , kā in chò-chèng , bián-tit in chiông-lâi iā lâi
chia siū-khó͘ .」
16 : 29
A-pek-lah-hán kóng :「In ū Mô͘-se hām
sian-ti ê chheh thang thak , thang chun-siú .」
16 : 30 I
ìn :「Góa ê chó͘-kong
A-pek-lah-hán ah , ah-ne iau bô-kàu , nā ū chi̍t-ê tùi sí koh-oa̍h ê lâng , khì
in hia , in it-tēng ē hóe-kái .」
16 : 31
A-pek-lah-hán kóng :「Nā m̄ thiaⁿ
Mô͘-se hām sian-ti ê ōe , chiū-sī ū chi̍t-ê tùi sí koh-oa̍h ê , in mā-sī bē
thiaⁿ lâng khó͘-khǹg .」
2019/02/27 --03/01
沒有留言:
張貼留言