Lō͘-ka hok-im su Tē cha̍p-sì chiō͘ⁿ 路加福音 第十四章

  14 : 1 Tī chi̍t-ê An-hioh-ji̍t , Ia-so͘ khì Hoat-lī-sài-phài ê siú-léng tiong ê chi̍t-ūi in tau chia̍h-pn̄g , chi̍t-kóa Hoat-lī-sài-phài ê lâng iā tòe khì thau-khòaⁿ I .

14 : 2 Tú-hó tī I ê bīn-chêng ū chi̍t-ê hoān-tio̍h chúi-chéng-pēⁿ ê lâng .

14 : 3 Ia-so͘ mn̄g kàu-su kap Hoat-lī-sài-phài ê lâng : ” Tī An-hioh-ji̍t i-pēⁿ kám-ū ha̍p-hoat ? ”

14 : 4 In soah lóng tiām-tiām . Ia-so͘ chiū khan i kòe-lâi i-hó i , chiah hō͘ lī-khui ;

14 : 5 Ia-so͘ mn̄g in : ” Lín tiong-kan , siáⁿ-lâng ū gû á-sī lû-á tī An-hioh-ji̍t poa̍h-lo̍h chéⁿ-lāi , bē sûi khì kā thoa khí-lâi ah ? ”

14 : 6 In bô hoat-tō͘ hôe-tap chiah-ê ōe .

14 : 7 Tng Ia-so͘ chù-ì tio̍h hiah-ê siū iau-chhiáⁿ lâi ê lâng-kheh , lóng leh kéng siōng-hó ê ūi , chiū kā in kóng chi̍t-ê phí-jū : ”

14 : 8 Tī lín siū lâng iau-chhiáⁿ chham-ka kiat-hun ê hí-iàn ê sî , m̄-thang chē tiàm siōng-hó ê ūi , kiaⁿ-liáu ū pí lí koh-khah tiong-iàu ê lâng mā siū iau-chhiáⁿ lâi ;

14 : 9 Hit-ê chhiáⁿ lín lâi ê lâng , ē kā lí kóng :「Chhiáⁿ lí niō͘ⁿ hō͘ chit-ūi sin-seⁿ chē .」

Lí ē chin pháiⁿ-sè koh bān-bān-á sóa-khì chē tī siōng bóe-á ê ūi .

14 : 10 M̄-ku , lí nā siū chhiáⁿ khì ê sî , chiū chē tī siōng lō͘-bóe ê ūi , ah-ne chhiáⁿ lí lâi ê lâng ē lâi tùi lí kóng :「Pêng-iú , chhiáⁿ lí lâi chē siōng-hó ê ūi .」Hit-sî , li tī siāng-toh ê lâng ê bīn-chêng chiū chin ū bīn-chú lah .

14 : 11 In-ūi jīm-hô chi̍t-ê lâng nā ka-tī pûn-ke-kui , ē hō͘ lâng chhak phòa , ka-tī kò͘-khiam ê , ē thê-poa̍t hō͘ i ko-seng . ”

14 : 12 Ia-so͘ iā kā chhiáⁿ I ê lâng kóng : ” Lí chú ē-tàu-tǹg á-sī àm-tǹg m̄-bián chhiáⁿ lí ê pêng-iú、hiaⁿ-tī、chhin-chiâⁿ hām ū-chîⁿ ê chhù-piⁿ , chiah bē hō͘ in iā chhiáⁿ lí , ah-ne , lí tō siū lâng ê pò-tap ah .

14 : 13 LÍ nā-sī pān-toh , tian-tó chhiáⁿ hia-ê bô-chîⁿ ê、chân-chiòng ê、pái-kha ê、sit-bêng ê , lí chiū ū hok-khì ah !

14 : 14 In-ūi in bô siáⁿ-mih thang pò-tap lí . Tī gī-lâng koh-oa̍h ê sî , lí ē tit-tio̍h pò-tap . ”

14 : 15 Chē tī siàng chi̍t-toh ê chi̍t-ê lâng thiaⁿ-tio̍h chia-ê ōe , chiū tùi Ia-so͘ kóng : ” Ē-tàng tī Siōng-chú ê kok-tō͘ lim-chia̍h ê lâng chin ū hok-khì ! ”

14 : 16 Ia-so͘ kā I kóng : ” Ū bó͘ chi̍t-ê lâng pān chin-chē toh , chhiáⁿ chin-chē lâng lâi chia̍h àm-tǹg .

14 : 17 Kàu beh khui-toh ê sî , i phài po̍k-jîn khí kā só͘ chhiáⁿ ê lâng-kheh kóng : 「Chhiáⁿ lín lâi ! Ta̍k-hāng lóng chhoân hó ah .」

14 : 18 In sûi-ê sûi-ê lóng siāng-khoán kā the-sî . Tē-it ê kóng :「Góa bé chi̍t-tè thó͘-tē , it-tēng ài khì khòaⁿ hō͘ hó-sè . Chhiáⁿ lí liōng-kái .」

14 : 19 Lēng-gōa chi̍t-ê kóng :「Góa bé gō͘-tùi gû , tio̍h-ài khì sái khòaⁿ leh . Chin phái-sè .」

14 : 20 Tē-saⁿ ê kóng :「Góa tâⁿa chhōa-bó͘ , só͘-í bē-tàng khì .」

14 : 21 Hit-ê po̍k-jîn tńg-lâi , chiong chia-ê tāi-chì it-it ǹg i ê chú-lâng pò-kò . Chú-lâng chiok siū-khì kiò i :「Kín khì siâⁿ-nih ê tōa-ke sió-hāng , chhōa hia-ê bô-chîⁿ ê、chân-chiòng ê、pái-kha ê、sit-bêng ê lâi .」

14 : 22 Hit-ê po̍k-jîn lâi ǹg chú-lâng pò-kò :「Thâu-ke , lí só͘ kau-tāi ê í-keng chiàu-pān , m̄-ku iau chiok chē khang-ūi .」

14 : 23 Chú-lâng tùi I kóng :「Lí koh chhut-khì , khì lō͘-nih á-sī chhiô͘ⁿ-á piⁿ bián-kióng lâng lâi , thang kā góa ê chhù-lāi chē hō͘ tīⁿ .」

14 : 24 Góa kā lín kóng , hia-ê chín-chêng góa só͘ iau-chhiáⁿ ê lâng , bô chi̍t-ê ē-tàng tām-tio̍h góa só͘ chún-pī hiah phong-phài ê àm-tǹg . ”

14 : 25 Ū chi̍t tōa-tīn lâng lâi hām Ia-so͘ chò-hóe kiâⁿ . Ia-so͘ oa̍t kòe-khì kā in kóng :

14 : 26 “ Jīm-hô beh tòe Góa ê lâng , nā-bô lī-khui ka-tī ê lāu-pē、lāu-bú、bó͘、kiáⁿ、hiaⁿ-tī、chí-bōe sīm-chì sèⁿ-miā , chiū bē-tàng chò Góa ê ha̍k-seng .

14 : 27 Bô-lūn toh-chi̍t-ê , bô giâ ka-tī ê si̍p-jī-kè lâi tòe Góa ê , iā bē-tàng chò Góa ê ha̍k-seng .

14 : 28 Lín tó-chi̍t-ê beh khí chi̍t-keng kiàn-tiok-bu̍t , bē seng chē-lo̍h-lâi sǹg-khòaⁿ ài lōa-chē keng-hùi , chiah khí ê khí-lâi ? ”

14 : 29 Nā m̄-sī ah-ne , chiū an tē-ki lo̍h-khì , kiat-kó khí bô-sêng , hō͘ khòaⁿ-tio̍h ê lâng chhiò i , kóng :

14 : 30「Chit-ê lâng ū khai-kang , soah bē oân-kang .」

14 : 31 Á-sī ū chi̍t-ê ông beh khì hām pa̍t-ê ông sio-thâi , i kám-bô seng chē-lo̍h-lâi thui-sǹg , kám ē-tàng ēng chi̍t-bān ê peng khì tùi-khòng chhōa nn̄g-bān ê peng lâi kong-kek i ê ông mah ?

14 : 32 Nā bē , chiū thàn tùi-te̍k iau tī hn̄g-hn̄g ê sî , phài sú-chiá khì chhéng-kiû hô-kái ê tiâu-kiāⁿ .

14 : 33 Ah-ne , lín bô-lūn siáⁿ-lâng , nā-bô hòng-khì ka-tī só͘-ū ê it-chhè , tō bē-tàng chò Góa ê ha̍k-seng . ”

14 : 34 “ Iâm sī chin tiong-iàu , m̄-ku nā bē kiâm , kam ē-tàng ēng siáⁿ-mih hō͘ i koh kiâm ?

14 : 35 Kā khǹg tī hn̂g-nih á-sī the̍h-khì tui-pûi mā bô ha̍h , chí-hó kā i hiat tī gōa-bīn . Ū hīⁿ-khang thang thiaⁿ ê , tio̍h thiaⁿ ! ”

                                   2019/02/21- 24