20 : 1 Tī hit-tōaⁿ sî-kan, ū chi̍t-ji̍t, Ia-so͘ siāng-khoán tī sèng-tiān kàu-tō bîn-chiòng,kóng kàu Siōng-chú ê hó-siau-sit ê sî, chè-si-tiō͘ⁿ hām kàu-su kap tió͘ⁿ-ló lâi I hia,
20 : 2 Mn̄g
Ia-so͘ kóng: ”Lí kā goán kóng, lí sī khò siáⁿ-mih koân-pèng lâi chò chiah-ê
tāi-chì? Hō͘ lí chit-ê koân-pèng sī siáⁿ-lâng?”
20 : 3
Ia-so͘ ìn in: ”Góa mā beh mn̄g lín chi̍t-ê būn-tê, chhiáⁿ lín hôe-tap.
20 : 4
Iok-hān ê sé-lé sī án thiⁿ-téng lâi ê? A̍h-sī tùi lâng lâi ê?”
20 : 5 In
hō͘-siong chham-siông kóng: ”Lán nā kóng「Án thiⁿ-téng lâi ê.」, I it-tēng ē kóng:「Lín
ná-ē bô beh sìn i leh?」
20 : 6 Nā
kóng「Án lâng lâi ê」, bîn-chiòng ê iōng chio̍h-thâu tìm
lán, in-ūi in lóng siong-sìn Iok-hān sī sian-ti.”
20 : 7
Chôaⁿ ìn: ”Goán m̄ m̄-chai sī án tó-ūi lâi ê.”
20 : 8
Ia-so͘ kóng: “ Góa mā m̄ kā lín kóng, Góa sī khò siáⁿ-mih koân-pèng lâi chò
chiah-ê tāi-chì.”
20 : 9 Ia-so͘
tūi bîn-chiòng kóng chi̍t-ê phí-lū: ”Ū chi̍t-ê lâng chò chi̍t-khu phô-tô-hn̂g, chō͘
hō͘ kúi-ê lâng, chiū khì tòa tī gōa-kok chi̍t-tōaⁿ chin-tn̂g ê sî-kan.
20 : 10 Kàu
siu-sêng ê sî, i phài chi̍t-ê po̍k-jîn khì ǹg hia-ê lâng siu in tio̍h la̍p ê cho͘-kim,
in hoán-tńg phah i, hō͘ i khang-chhiú tńg-khì.
20 : 11 Koh
phài lēng-gōa chi̍t-ê po̍k-jîn khì, in siāng-khoán phah i, iā bú-jio̍k i, chiah
hō͘ i khang-chhiú tńg-khì.
20 : 12 I
phài tē-saⁿ ê khì, in kā phah hō͘ tio̍h-siong, chiah kā kóaⁿ chhut-khì.
20 : 13
Hn̂g-chú ka-tī siō͘ⁿ:「Che beh án-chóaⁿ
pān chiah hó? Hó, góa beh phài góa só͘ thiàⁿ ê kiáⁿ khì siu, khó-lêng in ē
chun-tiōng I.
20 : 14 Bô
phah-sǹg, in chi̍t-ē khòaⁿ-tio̍h I khì, chiū hō͘-siong chham-siông kóng: 「Chit-ê sī beh kè-sêng hn̂g-chú ê
châi-sán ê, lán kā thâi-sí, chiah ê phô-tô-hn̂g chiū siok tī lán ê ah!」
20 : 15
Chôaⁿ kā i phiaⁿ chhut-khì gōa-bīn thâi hō͘ sí . Ah-ne hn̂g-chú beh án-chóaⁿ
lâi chhú-lí chit-hāng tāi-chì?
20 : 16 I ē
chiong hia-ê chō͘ hn̂g-á ê lâng, lóng-chóng thâi-sí, kā hn̂g-á chō͘ hō͘
bat-lâng.” Thiaⁿ-tio̍h chi̍t-ê phí-lū ê lâng kóng: ”Chhian-bān m̄-thang ah-ne.”
20 : 17
Ia-so͘ chù-ba̍k khòaⁿ in kóng: ”Keng-chheh ū ah-ne siá:「Khí-chhù ê sai-hū tàn thó-ka̍k ê
chio̍h-thâu í-keng chiâⁿ-chò chhù-kak ê tē-it tè chio̍h .」Che-sī siáⁿ-mih ì-sù?”
20 : 18
”Móe chi̍t-ê poa̍h-loh tī hit-tè chio̍h-thâu-téng ê, it-tēng ê chhùi-kut
hun-si; hō͘ hit-tè chio̍h-thâu teh-tio̍h ê lâng lóng ē chhùi-kô͘-kô͘ .”
20 : 19 Hit-sî
hia-ê kàu-su hām chè-si-tió͘ⁿ chai-iáⁿ chi̍t-ē phí-lū sī leh kóng in, tong-tiô͘ⁿ
chiū siō͘ⁿ beh lia̍h I, m̄-ku koh kiaⁿ hia-ê kûn-chiòng.
20 : 20 In
chôaⁿ kàm-sī Ia-so͘ , phài lâng chò bi̍t-thàm, thang chhōe tio̍h I ê ōe-pèⁿ, kā
kau hō͘ koán-lí tong-kio̍k.
20 : 21
Hia-ê bi̍t-thàm mn̄g Ia-so͘: ”Lāu-su, goán chai-iáⁿ Lí só͘ thoân só͘ kóng ê
lóng chin-tio̍h, tùi lâng mā bē phian-sim, chiong Siōng-chú ê ōe chiàu-si̍t
kàu-tō .
20 : 22 Lán
kám-thang kiáu-sòe hō͘ Lô-má hông-tè?”
20 : 23
Ia-so͘ chai-iáⁿ in ê kè-bô͘, chiū ìn in:
20 : 24 “The̍h
chi̍t-ê gîn-á hō͘ Góa khòaⁿ. Chit-ê siōng kap chi̍t-ê jī-hō sī siáⁿ-lâng?” In
kóng: ”Sī Lô-má hông-tè ê.”
20 : 25
Ia-so͘ kóng: ”Ah-ne, lín kā hông-tè ê mi̍h-kiāⁿ kiáu hō͘ i, Chiong Siōng-chú ê
mi̍h-kiāⁿ hō͘ Siōng-chú.”
20 : 26 In
tng chèng-lâng ê bīn-chêng, tit bô tio̍h ōe-pèⁿ, tùi I ê hôe-tap mā chin ì-gōa,
chôaⁿ tiām-khì.
20 : 27 Chi̍t-kóa
Sat-to-kai phài ê lâng, in bô sêng-jīn lâng ē koh-oa̍h, lâi mn̄g Ia-so͘:
20 : 28 “Lāu-su!
Mô͘-se kā goán kóng:「Lâng nā sí khiok
bô lâu kiáⁿ hō͘ i ê bó͘, i ê hiaⁿ-tī tio̍h chhōa i, ūi i ê hiaⁿ-tī lâu āu-tāi.」
20 : 29 Ah-ne,
ū chhit-ê hiaⁿ-tī ê lâng, tōa—ê chhōa liáu bô seⁿ kiáⁿ chiū sí;
20 : 30 Tē-jī、Tē-saⁿ iā chhōa kòe i;
20 : 31 In
chhit-ê lóng chhōa kòe i, lóng bô seⁿ kiáⁿ chiū sí .
20 : 32
Í-āu, chit-ê lú-jîn mā sí.
20 : 33 Ah-ne,
tī koh-oa̍h ê sî, i sī siáⁿ-lâng ê bó͘? In-ūi in chhit-ê lóng chhōa kòe i chò
bó͘.”
20 : 34 Ia-so͘
kóng: ”Chit sè-kan ê lâng, ū kè ū chhōa;
20 : 35
M̄-ku, ē kham-tit chin-ji̍p lâi-sè ê, kap án sí koh-oa̍h ê lâng, in lóng bô kè
iā bô chhōa;
20 : 36
In-ūi in kap thiⁿ-sài siāng-khoán bē koh sí; kì-jiân sī koh-oa̍h ê lâng, chiū chiâⁿ-chò
Siōng-chú ê kiáⁿ.
20 : 37 Nā
kóng-tio̍h si-lâng koh-oa̍h ê sū, Mô͘-se tī Chhì-phè-phian ū siá tio̍h,
Siōng-chú sī A-pek-lah-hán ê Sîn, Í-sat ê Sîn, Ngá-kok ê Sîn, bêng-pe̍k kóng
chit-hāng sū ah.
20 : 38
Siōng-chú m̄-sī si-lâng ê Sîn, hoán-tńg sī oa̍h-lâng ê Sîn; in-ūi in lóng ǹg
Siōng-chú lâi oa̍h.”
20 : 39 Ū
kúi-ê kàu-su kóng: ”Lāu-su! Lí kóng liáu chin-hó.”
20 : 40 In
chiū m̄-káⁿ koh mn̄g jīm-hô būn-tê.
20 : 41
Ia-so͘ kā in kóng: ”Chèng-lâng sī án-chóaⁿ kóng Ki-tok sī Tāi-pi̍t ê kiáⁿ-sun?
20 : 42
In-ūi tī Si-phian Tāi-pi̍t ka-tī kóng:「Siōng-chú tùi góa Chú kóng:『LÍ lâi chē tī Góa ê chiàⁿ-pêng,
20 : 43 Tán
Góa hō͘ LÍ ê tùi-te̍k chò LÍ ê kha-ta̍h-í.』
20 : 44
Tāi-pi̍t kì-jiân chheng Ki-tok chò Chú, I ná-ē koh chò Tāi-pi̍t ê kiáⁿ-sun?”
20 : 45 Tng
chèng-lâng iau leh thiaⁿ ê sî , Ia-so͘ kā ha̍k-seng kóng:
20 : 46 Lín
tio̍h thê-hông kàu-su. In ài chhēng tn̂g-saⁿ sì-kòe kiâⁿ, hām tī chhài-chhī-á
kháu hō͘ lâng mn̄g hó, mā ài tī hōe-tn̂g lāi chē koân ê ūi, tī iàn-se̍k chē
tōa-ūi.
20 : 47 In
chhim-chiàm kóaⁿ-hū ê ke-gia̍p, tiau-kang chò chin tn̂g ê kî-tó. Chit-khóaⁿ lâng
ē siū koh-khah tang ê hêng-hoa̍t.
2019/03/13
沒有留言:
張貼留言