17:1 Taⁿ Pó-lô kap Se-la̍h keng-kòe Ám-hui-pho-lī, A-pho-lô-nî, lâi-kàu Thia̍p-sat-lô-nî-ka, tī hia ū Iû-thài-lâng ê hōe-tn̂g.
17:2 Pó-lô
chiàu i ê si̍p-koàn ji̍p-khì hōe-tn̂g, liân-sòa saⁿ-ê An-hioh-ji̍t, ín-iōng
keng-chheh kap in piàn-lūn,
17:3 kái-soeh
koh chèng-bêng Ki-tok pit-su siū-hāi, koh án sí koh-oa̍h. Koh kóng:” Góa tùi
lín soan-káng ê chit-ūi Ia-so͘ chiū-sī Ki-tok.”
17:4
Tiong-kan ū lâng pī soat-ho̍k chiū kap Pó-lô hām Se-la̍h chò-tīn. Kî-tiong ū chi̍t
tōa-tīn kèng-khiân ê Hi-lī-nî-lâng, mā ū bē-chió hū-lú ê léng-siù.
17:5 M̄-ku
hia-ê bô pī soat-ho̍k ê Iû-thài-lâng, án chhài-chhī-á chio chi̍t-tīn chhit-thô-á
jiáu-loān choân-siâⁿ, chiū chông li̍p-khì Ia-sun ê chhù, beh lia̍h Pó-lô kap
Se-la̍h khì kau hō͘ kûn-chiòng.
17:6 Chhōe
bô in chiū kā i kap kúi-ê sìn-tô͘ thoa-khì koaⁿ-hú, tī hia hoah-hiu:” Hia-ê
jiáu-loān sè-kài ê, mā í-keng lâi chia ah,
17:7 Iâ-sun
kèng-jiân chiap-thāi in. Chiah-ê lâng lóng ûi-hoán Kai-sat ê hoat-tiâu, koh
kóng iáu-ū lēng-gōa chi̍t-ê ông.”
17:8 Chèng-lâng
kap koaⁿ-oân thiaⁿ-tio̍h chiah-ê ôe, chiū khí tio̍h-kiaⁿ.
17:9 In siu
liáu Iâ-sun kap kî-thaⁿ ê lâng ê pó-chèng-kim, chiū hō͘ in kau-pó pàng in
tńg-khì.
17:10 Hia-ê
sìn-tô͘ tī hít-àm sûi sàng Pó-lô hām Se-la̍h khì Pì-lí-a, in kàu tī hia mā khì
Iû-thài-lâng ê hōe-tn̂g.
17:11
Chia-ê lâng pí Thia̍p-sat-lô-nî-ka lâng khah khai-bêng, choân-hù cheng-sîn
chiap-siū chin-tō, ta̍k-ji̍t gián-kiú keng-chheh, khòaⁿ Pó-lô só͘ kóng ê, ū iáⁿ
bô.
17:12 Só͘-í,
ū chin-chē lâng lâi sìn, kî-tiong ū Hi-lī-nî lâng ê chun-kùi ê lú-sū kap
bē-chió ê lâm-sū.
17:13 M̄-ku
tī Thia̍p-sat-lô-nî-ka ê Iû-thài-lâng chai-iáⁿ Pó-lô mā tī Pì-lí-a thoân
Siōng-chú ê chin-tō, chiū khì-hia siàn-tōng in, ín-khí jiáu-loān.
17:14
Ha̍k-seng sūi sàng Pó-lô khì khah-hn̄g ê hái-piⁿ, lâu Se-la̍h kap Thê-mô͘-thài
tī hia.
17:15 M̄-ku
in chi̍t-lō͘ chhōa Pó-lô lâi-kàu Ngá-tián, tī tit-tio̍h Pó-lô ê kau-tāi, ài
Se-la̍h kap Thê-mô͘-thài kín-kín kòe-lâi, chiū sūi tńg-khì.
17:16 Pó-lô
tī Ngá-tián leh tán-thāi in ê sî-chūn, khòaⁿ-tio̍h kui-ē siâⁿ-chhī chhiong-móa
ngó͘-siōng, i ê lêng pī kek-tōng.
17:17 Só͘-í
i tī hōe-tn̂g kap Iû-thài-lâng í-kip kèng-khiân ê lâng piàn-lūn, ta̍k-ji̍t tī
chhài-chhī-á-kháu kap sio gū-tio̍h ê lâng, mā-sī ah-ne.
17:18 Ū
Í-pí-kó͘-lô kap Sū-to-a, nn̄g-ê ha̍k-phài ê ha̍k-chiá mā lâi kap i piàn-lūn. Ū
lâng kóng:” Chit-ê tōa-chi̍h koh hèng-thi̍h è, sī leh kóng siàⁿ?” Koh ū lâng
kóng:” I ná-chhiō͘ⁿ leh thoân gōa-kok ê kúi-sîn.” In-ūi Pó-lô kóng-khí Ia-so͘
kap I ê koh-oa̍h.
17:19 In
chiū kā i lia̍h khí-lâi, tòa-khì A-lio̍k-soaⁿ, kóng:” Lí leh kóng ê hit-ê sin ha̍k-soat,
kam ē-thang pò goán chai?
17:20 In-ūi
lí só͘ kóng ê lōe-iông, goán thiaⁿ-liáu kám-kak koài-koài. Só͘-í goán ài-beh
chai-iáⁿ sī siáⁿ-mih ì-sù.”
17:21
Ngá-tián lâng hām tòa tī hia ê gōa-kok-lâng, lóng êng-êng bô tāi-chì chò, m̄-ku
chin-ài thiaⁿ mā ài thoân chi̍t-kóa sin-sián ê tāi-chì.
17:22 Pó-lô
khiā tī A-lio̍k-soaⁿ ê tiong-ng, tùi in kóng:” Kok-ūi Ngá-tián lâng ah, góa
hoat-kak lín tùi só͘-ū ê sū lóng chin kèng-ùi sîn-bêng.
17:23 In-ūi
góa leh se̍h-ke ê sî, khòaⁿ-tio̍h lín kèng-pài ê só͘-chāi, ū chi̍t-chō tôaⁿ,
téng-bīn siá ” M̄-bat ê sîn-bêng”. Lín só͘ leh kèng-pài chit-ūi lín m̄-bat ê
sîn-bêng, chit-má góa lâi pò lín chai.
17:24
Chit-ūi chhòng-chō ú-tiū kap tī i lāi-bīn só͘-ū ê mi̍h-kiāⁿ ê Siōng-chú, I sī
thiⁿ-tē ê Chú, bô tòa tī lâng ê chhiú só͘ khí ê kiong-biō.
17:25 M̄a
m̄-bián lâng hiàn mi̍h-kiāⁿ hō͘ I, ná-chhiō͘ⁿ I ū hia-ê su-iàu; hoán-tńg sī I
chiong I ka-tī ê oa̍h-miā kap khùi-sek hām só͘-ū ê it-chhè hō͘ lán.
17:26 I tùi
chi̍t-ê lâng chō-liáu ta̍k-kok ê lâng, tòa tī choân tē-bīn; koh tāi-seng kā in
tiāⁿ-tio̍h nî-hān kap tòa ê só͘-chāi ê kài-hān;
17:27 Hō͘
in thang lâi chhiau-chhōe Siōng-chú, ká-sú in ná jīn-chin chhōe chiu-ē
chhōe-tio̍h, kî-si̍t Siōng-chú lī lán móe chi̍t-ê lâng bô-hn̄g.
17:28 In-ūi
lán sī khò I leh seng-oa̍h, hêng-tōng kap chûn-chāi. Chhin-chhiō͘ⁿ lín
tiong-kan siá-si ê lâng bat kóng kòe:” In-ūi lán mā-sī I ê kiáⁿ-sun.”
17:29 Lán
kì-jiân sī Siōng-chú ê kiáⁿ-sun, chiū bē-sái kā I Sîn-sèng ê pún-chit khòaⁿ-chò
kap ēng lâng ê ki-gē só͘ tiau-khek ê kim, gîn, chio̍h-thâu téng ê ngó͘-siōng
siāng-khoán.
17:30 Kòe-khì
bû-ti ê sè-tāi, Siōng-chú bô-koh tui-kiù, taⁿ I hā-lēng ta̍k só͘-chāi ê lâng
lóng tio̍h hóe-kái,
17:31 In-ūi
I í-keng tiāⁿ-tio̍h kî-ji̍t, beh ēng I só͘ siat-li̍p ê lâng, chiàu kong-gī lâi
sím-phòaⁿ sè-kài. I hō͘ chit-ê lâng án sí koh-oa̍h, thang chò chèng-lâng lâi
sìn I ê pîn-kù.”
17:32 In
chi̍t-ē thiaⁿ-tio̍h sí-lâng koh-oa̍h ê ōe, ū-ê thí-chhiò i, mā ū-ê kóng:” Goán
beh-koh thiaⁿ lí kè-sio̍k kóng.”
17:33 Só͘-í Pó-lô
án in tiong-kan chhut-khì.
17:34 M̄-ku ū chi̍t-kóa lâng kap Pó-lô chò-tīn, chiâⁿ-chò sìn-tô͘. Kî-tiong ū A-lio̍k-soaⁿ ê hōe-oân Tiú-nî-siu, hām chi̍t-ê miâ-chò Tāi-má-lí ê hū-lú, iáu-koh ū kî-thaⁿ kúi-nā-ê lâng.
20190804
沒有留言:
張貼留言