Iok-hān Hok-im-su Tē-gō͘ chio͘ⁿ 約翰福音 第五章

 5:1 Tī chiah-ē tāi-chì liáu-āu, ū Iû-thài-lâng ê cheh-kî, Ia-so͘ chiū chiō͘ⁿ-khì Iâ-lō͘-sat-léng.

5:2 Tī Iâ-lō͘-sat-léng, óa-kīn Iô͘ⁿ-mn̂g ê só͘-chāi ū chi̍t-ê kong-iōng ê e̍k-tî, Hi-pek-lâi-ōe hō-chò Pi̍t-sū-tāi, ū gō͘-ê mn̂g-lông.

5:3 Tī hia ū chin-chē bô siāng-khoán pēⁿ-chèng ê lâng, ū ê chheⁿ-mê, ū ê pái-kha, mā ū piàn-sūi-è.

5:4 In lóng teh tán chúi tín-tāng. Ū-sî Chú ê thiⁿ-sài ē lo̍h-lâi tî-à-lāi kā chúi lā tín-tāng, chúi tín-tāng liáu-āu, tāi-seng lo̍h-khì ê lâng, bô-lūn siáⁿ-mih pēⁿ lóng-ē hó-khì.

5:5 Tī hia ū chi̍t-ê í-keng pēⁿ saⁿ-cha̍p-peh-nî ê lâng.

5:6 Tng Ia-so͘ khòaⁿ i tò tī thô͘-kha, chai-iáⁿ i phòa-pēⁿ chin-kú, chiū óa-khì kā i kóng:”

Lí ū siō͘ⁿ beh hó khí-lâi bô?”

5:7 Hit-ê pēⁿ-lâng ìn:” Sin-seⁿ à, tng chúi tín-tāng ê sî, bô-lâng kā góa hē-loh e̍k-tî-lāi, tng góa beh lo̍h-khì ê sî, í-keng ū lâng pí góa khah chá lo̍h-khì à.”

5:8 Ia-so͘ kā i kóng:” Khí-lâi, theh lí ê chhn̂g-à khí-lâi kiâⁿ.”

5:9 Hit-ê lâng sûi-sî hó-khì, chiū theh i ê chhn̂g-à lī-khui hia. Hit-ji̍t tú-hó sī an-hioh-ji̍t.

5:10 Só͘-í kúi-ā-ê Iû-thài-lâng chiū kā hit-ê tit-tio̍h i-tī ê lâng kóng:” Kin-á-ji̍t sī An-hioh-ji̍t, lí theh chhn̂g-à kiâⁿ sī ûi-kui.”

5:11 I ìn in kóng:” Hit-ê kā góa i-hó ê lâng kā góa kóng,「Theh lí ê chhn̂g-à khí-lâi kiâⁿ.」”

5:12 Hia-ê lâng chit-mn̄g i kóng:” I sī siáⁿ-lâng, kā lí kóng theh lí ê thn̂g-à khí-lâi kiâⁿ ê sī siáⁿ-mih-lâng?”

5:13 Sū-si̍t-siōng hit-ê tit-tio̍h i-hó ê lâng, mā m̄-chai kā i-hó ê sī siáⁿ-lâng. In-ūi hit só͘-chāi lâng chin-chē, Ia-so͘ í-keng lī-khui hia.

5:14 Āu-lâi Ia-so͘ tī sèng-tiān tú-tio̍h hit-ê lâng, chiū kā i kóng:” Khòaⁿ leh, lí ê pēⁿ í-keng hó koh kiān-khong à, m̄-thang koh hoān-chōe, chiah bē tú-tio̍h koh-khah chhám ê tāi-chì.”

5:15 Hit-ê lâng chiū lī-khui hia, khì kā Iû-thài-lâng kóng, kā i-hó ê lâng sī Ia-so͘.

5:16 In-ūi chi̍t-ê goân-in Iû-thài-lâng kap Ia-so͘ tùi-khòng, kóng I bô eng-kai tī An-hioh-ji̍t i-pēⁿ.

5:17 M̄-ku Ia-so͘ ìn in kóng:” Góa ê Pē kàu taⁿ iáu-teh chò khang-khòe, Góa mā sī teh chò.”

5:18 Só͘-í, Iû-thài-lâng koh-khah siō͘ⁿ-beh hāi-sí Ia-so͘, in-ūi I m̄-niā bô siú An-hioh-ji̍t, koh kóng Siōng-chú sī I ê lāu-pē, kā ka-tī hām Siōng-chú khòaⁿ chò pêng-téng.

5:19 Ia-so͘ kā in kóng:” Góa si̍t-chāi kā lín kóng, Kiáⁿ bē-tàng ka-tī chò jīm-hô tāi-chì, chí-ū khòaⁿ-tio̍h Pē só͘-chò ê, chiah-ē khì chò, Pē chò-kòe ê tāi-chì Kiáⁿ mā siāng-khoán khì chò.

5:20 In-ūi Pē thiàⁿ Kiáⁿ, só͘-í kā ka-tī só͘ chò ê tāi-chì hō͘ I khòaⁿ, iā beh kā pí chiah-ê koh-khah tōa ê tāi-chì hō͘ I khòaⁿ, tì-sú lín kám-kak chin hi-kî.

5:21 Chhin-chhiō͘ⁿ Pē hō͘ sí-lâng koh-oa̍h, Kiáⁿ mā ē kā oa̍h-miā sù hō͘ I só͘ ì-ài ê lâng.

5:22 Pē bô-beh sím-phòaⁿ jīm-hô lâng, I kā sím-phòaⁿ ê chhâi-koat-koân kau hō͘ Kiáⁿ.

5:23 Án-ne lâng-lâng lóng lâi chun-kèng Kiáⁿ, ná chin-chhiō͘ⁿ chun-kèng Pē. Bô chun-kèng Kiáⁿ ê, chiū-sī bô chun-kèng phài I lâi ê Pē.

5:24 Góa si̍t-si̍t chāi-chāi kā lín kóng, thiaⁿ Góa ê ōe, mā sìn hit-ūi phài Góa lâi ê lâng, chiū ū éng-oán ê oa̍h-miā, i bē pī sím-phòaⁿ, sī í-keng chhut-sí ji̍p-seⁿ.

5:25 Góa si̍t-si̍t chāi-chāi kā lín kóng, sî-kan chiām-chiām kīn à, hiān-chāi chiū-sī, sí-lâng beh thiaⁿ-tio̍h Siōng-chú ê Kiáⁿ ê siaⁿ, hia-ê thiaⁿ-tio̍h ê lâng chiu-ē oa̍h khí-lâi.

5:26 In-ūi Pē I ka-tī ū oa̍h-miā, só͘-í I mā án-ne hō͘ Kiáⁿ ê lāi-bīn ū oa̍h-miā.

5:27 Koh in-ūi I sī Jîn-chú, Pē hō͘ I ū koân thang sím-phòaⁿ.

5:28 M̄-bián kám-kak kî-koài, in-ūi sî-kan chiām-chiām kīn ah, tng hia-ê tī bōng-lāi-ê thiaⁿ-tio̍h I ê siaⁿ ê, lóng beh kiâⁿ chhut-lâi.

5:29 Kiâⁿ-hó-ê ē tit-tio̍h sin-sèⁿ-miā, chò-pháiⁿ-ê ē siū sím-phòaⁿ.

5:30 Góa ka-tī bē-tàng chò jīm-hô tāi-chì, sī chiàu só͘ thiaⁿ-tio̍h ê lâi chhâi-koat, koh Góa ê chhâi-koat sī chèng-khak ê, in-ūi Góa m̄-sī chiàu ka-tī ê só͘-ài, sī chí-ū chiàu phài Góa lâi ê ê só͘ ài.

5:31 Góa ná ūi ka-tī chò-chèng, só͘ chò ê chiū bô chin.

5:32 Ū lēng-gōa chi̍t-ūi thè Góa chò-chèng ê, Góa chai-iáⁿ I só͘ chò ê sī chin.

5:33 Lín bat phài lâng khì chhōe Iok-hān, I ū ūi chin-lí chò-chèng.

5:34 Kî-si̍t Góa bô su-iàu lâng ê kiàn-chèng, Góa kóng chiah-ê tāi-chì chí-sī beh hō͘ lín tit-tio̍h kiù-un.

5:35 Iok-hān sī chi̍t-ki tiám-to̍h leh chiò-kng ê teng, lín hoaⁿ-hí chiām-sî ū i ê kng.

5:36 M̄-ku, Góa ū pí Iok-hān koh-khah ū la̍t ê kiàn-chèng, in-ūi Pē kau-tài Góa lâi oân-sêng ê tāi-chì, chiàⁿ-sī Góa tú-leh chò ê, ē-tàng kiàn-chèng Góa sī Pē só͘ phài-lâi ê.

5:37 Koh phài Góa lâi ê Pē, I ka-tī ūi Góa chò-chèng. Lín bô chi̍t-ê lâng bat thiaⁿ-kòe I ê siaⁿ, mā m̄-bat khòaⁿ kòe I.

5:38 Lín pèng-bô kā I ê ōe khǹg tī lín ê lāi-sim, in-ūi lín m̄ sìn I só͘ phài lâi ê hit-ūi.

5:39 Lín gián-kiú chiah-ê keng-tián, sī in-ūi lín siong-sìn tī hit lāi-bīn ē-tàng tit-tio̍h éng-oán ê oa̍h-miā. Hia-ê keng-tián sī leh ūi Góa chò-chèng.

5:40 Lín iáu-kú bô siō͘ⁿ beh lâi Góa chia tit-tio̍h oa̍h-miā.

5:41 Góa bô beh siū lâng chun-chông.

5:42 Góa chhim-chhim chai-iáⁿ lín bô thiàⁿ Siōng-chú ê sim.

5:43 Góa hōng Pē ê miâ lâi, lín pèng-bô chiap-thāi Góa; nà ū pat-lâng hōng ka-tī ê miâ lâi, lín tian-tó chiap-thāi i.

5:44 Lín hō͘-siong siū chun-chông, bô siō͘ⁿ beh tùi to̍k-it ê Siōng-chú lâi ê chun-chông, ná ū khó-lêng sìn Góa?

5:45 Kā hit-chióng Góa ē ǹg Pē kò lín ê siō͘ⁿ-hoat tàn-tiāu; tú-leh kò lín ê sī lín só͘ óa-khò ê Mô͘-se.

5:46 Lín ná ū sìn Mô͘-se, mā ē sìn Góa, in-ūi i ê chheh ū kì-chài Góa ê tāi-chì.

5:47 Lín nà m̄ sìn i ê chheh só͘ siá ê, ná ē sìn Góa só͘ kóng ê ?”

20191016