Iok-hān Hok-im-su Tē-sì chio͘ⁿ 約翰福音 第四章

4:1 Chú chai-iáⁿ Hoat-lī-sài-phài ê lâng thiaⁿ-tio̍h I chio ê bûn-tô͘ hām hō͘ I sé-lé ê jîn-sò͘ pí Iok-hān khah-chē.

4:2 Kî-si̍t m̄-sī Ia-so͘ chin-chū kiâⁿ sé-lé, sī I ê ha̍k-seng chò ê.

4:3 I chiū lī-khui Iû-thài-séng beh khì Ka-lī-lī-séng.

4:4 I pit-su keng-kòe Sat-má-lī-a.

4:5 Tùi án-ne ji̍p-khì Sat-má-lī-a chi̍t-ê hō-chò Sū-ka ê siâⁿ, sī tī Ngá-kok hō͘ i ê kiáⁿ Iok-sek ê tē ê hù-kīn, hia ū Ngá-kok ê chúi-chéⁿ.

4:6 Ia-so͘ in-ūi kiâⁿ kah chin-thiám, chiū chē tī chéⁿ-piⁿ, hit-chūn teh-beh óa tiong-tàu.

4:7 Ū chi̍t-ê Sat-má-lī-a ê hū-lú lâi chhiō͘ⁿ-chúi. Ia-so͘ kā i kóng:” Chúi pun chi̍t-kóa hō͘ Góa lim!”

4:8 Hit-sî in-ūi I ê ha̍k-seng í-keng lī-khui I, ji̍p-khì siâⁿ-lāi bé mi̍h-kiāⁿ.

4:9 Sat-má-lī-a ê hū-lú ǹg I kóng:” Lí chit-ê Iû-thài-lâng, ná ē-sái ǹg góa, chi̍t-ê Sat-má-lī-a ê hū-lú thó beh lim-chúi?” (In-ūi Iû-thài-lâng hām Sat-má-lī-a-lâng bô kau-chhap.)

4:10 Ia-so͘ ìn i kóng:” Lí ná chai-iáⁿ Siōng-chú ê un-sù, iā bat-tio̍h tùi lí kóng:「Chúi pun chi̍t-kóa hō͘ Góa lim!」ê sī siáⁿ-lâng, lí it-tēng ē kiû I, I iā ē chiong oa̍h-chúi hō͘ lí.”

4:11 I mn̄g kóng:” Sin-seⁿ, Lí liân chhiō͘ⁿ-chúi ê mi̍h-kiāⁿ to-bô, chéⁿ koh chhim. LÍ sī beh àn tó-ūi tit-tio̍h oa̍h-chúi?

4:12 Goán ê chó͘ Ngá-kok lâu chit-kháu chéⁿ hō͘ goán, i pún-lâng hām i ê kiáⁿ-sun kap i ê cheng-seⁿ lóng lim chi̍t-kháu chéⁿ ê chúi, kám-kóng Lí pí i khah úi-tāi?”

4:13 Ia-so͘ kóng:” Móe chi̍t-ê lim chit-kháu chéⁿ ê chúi ê lâng, lóng ē koh chhùi-ta,

4:14 m̄-ku ná ū lâng lim Góa só͘ hō͘ i ê chúi, chiū éng-oán bē koh chhùi-ta. In-ūi Góa so͘ beh hō͘ i ê chúi, tī i ê lāi-bīn ē pìⁿ-chò chúi-chôaⁿ, it-ti̍t chhèng lâi tit-tio̍h éng-oán ê oa̍h-miā.

4:15 Chit-ūi hū-lú kā Ia-so͘ kóng:” Sin-seⁿ, chhiáⁿ hō͘ góa chit-khoán chúi, án-ne góa chiū bē koh chhùi-ta, iā m̄-bián koh tiāⁿ-tiāⁿ lâi chia chhiō͘ⁿ-chúi.”

4:16 Ia-so͘ kóng:” Khì kiò lí ê tīong-hu, iā lâi chia!”

4:17 I ìn:” Góa bô tīong-hu.” Ia-so͘ kóng:” Lí kóng liáu bô m̄-tio̍h, lí sī bô tīong-hu.

4:18 In-ūi lí bat ū gō͘-ê tīong-hu, hiān-chāi kap lí chò-hóe ê m̄-sī lí ê tīong-hu. LÍ kóng ê bô m̄-tio̍h.”

4:19 I kā Ia-so͘ kóng:” Góa khòaⁿ-chhut Lí sī sian-ti.

4:20 Goán ê chó͘-sian tī chit-ê soaⁿ-téng kèng-pài, m̄-ku lín Iû-thài-lâng kóng Iâ-lō͘-sat-léng chiah-sī kèng-pài ê só͘-chāi.”

4:21 Ia-so͘ kóng:” Chí-mōe, lí tio̍h sìn Góa, sî beh kàu à. Tng lín kèng-pài Siōng-chú ê sî, bô koh-chài tī chit-ê soaⁿ-téng, mā bô tī Iâ-lō͘-sat-léng.

4:22 Lín m̄-chai lín leh kèng-pài siáⁿ-mih. Goán chai-iáⁿ goán só͘ kèng-pài ê. In-ūi kiù-un sī àn Iû-thài-lâng chhut-lâi ê.

4:23 M̄-ku sî beh kàu à, hiān-chāi chiū-sī. Hit-sî chin-chiàⁿ kèng-pài ê ē ēng sim-sîn kap chin-lí kèng-pài Siōng-chú. In-ūi Siōng-chú leh chhōe chit-khoán lâng lâi kèng-pài I.

4:24 Lán ê Siōng-chú sī Sîn, só͘-í kèng-pài I ê lâng, tio̍h ēng sim-sîn kap chin-lí kèng-pài I.

4:25 I ìn:” Góa chai-iáⁿ Mî-sài-a teh-beh kàu à. Tng I kàu chiū ē kā só͘-ū ê tāi-chì lóng kā goán kóng.”

4:26 Ia-so͘ kóng:” Góa chiū-sī, chit-ê leh hām lí kóng ōe ê.”

4:27 Hit-sî Ia-so͘ ê ha̍k-seng tńg-lâi, khòaⁿ-tio̍h Ia-so͘ hām chit-ê hū-lú kóng-ōe, kám-kak koài-koài, m̄-ku bô-lâng mn̄g:” LÍ leh chhōe siáⁿ-mih?” Á-sī “ Lí sī án-chóaⁿ hām I kóng-ōe?”

4:28 Hit-ūi hū-lú kā chúi-pân khǹg leh, sūi lī-khui ji̍p-siâⁿ, kā lâng kóng:

4:29 “ Lín lâi khòaⁿ! Ū chi̍t-ê lâng kā góa só͘-ū chò-kòe ê tāi-chì lóng kóng chhut-lâi. Chit-ê lâng kám-ē sī Mî-sài-a?”

4:30 Tāi-ke chiū chhut siâⁿ, lâi-kàu Ia-so͘ hia.

4:31 Tī chit-ê sî-chūn, ha̍k-seng chhiok-chhiáⁿ Ia-so͘ lâi chia̍h mi̍h-kiāⁿ.

4:32 Ia-so͘ kóng:” Góa ū mi̍h-kiāⁿ thang chia̍h, sī lín só͘ m̄-chai ê.

4:33 Ha̍k-seng chiū hō͘-siong sio-mn̄g:” kám-ū siáⁿ-mih lâng hō͘ I chia̍h mi̍h-kiāⁿ mah?”

4:34 Ia-so͘ kóng:” Góa ê chia̍h-mi̍h chiū-sī khì chò phài Góa lâi ê ê chí-ì, koh kā i oân-sêng.

4:35 Lín kám-bô leh kóng「Iáu-ū sì-goe̍h ji̍t, chiah thang siu-sêng」? Góa kā lín kóng, lín tio̍h kia̍h-ba̍k chù-ì khòaⁿ sì-ûi ê chhân-hn̂g, só͘ chèng-choh ê í-keng ē-tàng siu-sêng à.

4:36 Siu-koah ê lâng tit-tio̍h kang-chîⁿ, mā siu-chi̍p só͘ koah ê kàu éng-oán, hō͘ iā-chéng ê hām siu-koah ê chò-hóe hoaⁿ-hí.

4:37 In-ūi sio̍k-gú án-ne kóng:” Chi̍t-ê iá-chéng, lēng-gōa chi̍t-ê siu-koah.” Si̍t-chāi chin-tio̍h.

4:38 Góa phài lín khì siu-koah m̄-sī lín lô-khó͘ keng-choh kòe ê, pa̍t-lâng só͘ lô-khó͘ kòe ê, lín iā ji̍p-khì hióng-siū in ê lô-khó͘.”

4:39 Hit-ê siâⁿ ū chiok-chē Sat-má-lī-a-lâng lâi sìn Ia-so͘, in-ūi hit-ê hū-lú kiàn-chèng kóng,:” Chit-ê lâng chiong góa kòe-khì só͘ chò ê it-chhè, lóng kā góa kóng chhut-lâi.”

4:40 Só͘-í, Sat-má-lī-a-lâng lâi-kàu Ia-so͘ hia, kiû I tī in hia tòa lo̍h-lâi. I chiū tī hia tòa nn̄g-ji̍t.

4:41 In-ūi I ê ōe-gú chiū lâi sìn ê lâng, koh-khah chē.

4:42 In kā hit-ê hū-lú kóng:” Goán chit-má sìn m̄-sī àn lí ê ōe, sī in-ūi goán í-keng chhin-hīⁿ thiaⁿ-tio̍h, mā chai chit-ūi chin-chiàⁿ sī Ki-tok, īs sè-kài ê Kiù-chú.”

4:43 Nn̄g-ji̍t āu Ia-so͘ chiū lī-khui hia, khì Ka-lī-lī-séng.

4:44 In-ūi Ia-so͘ ka-tī bat kóng kòe,” Sian-ti tī ka-tī ê kò͘-hiong bē siū lâng ê chun-tiōng.”

4:45 Só͘-í tng Ia-so͘ lâi-kàu Ka-lī-lī, in lâi hoaⁿ-gêng I, in-ūi in khì Iâ-lō͘-sat-léng kòe-cheh, ū khòaⁿ-tio̍h I tī hia só͘ kiâⁿ ê tāi-chì.

4:46 Ia-so͘ koh lâi-kàu Ka-lī-lī-séng ê Ka-ná, chiū-sī I kā chúi piàn-chó chiú ê só͘-chāi. Ū chi̍t-ê tōa-koaⁿ ê kiáⁿ tī Ka-pe̍k-lông phòa-pēⁿ.

4:47 I thiaⁿ-tio̍h Ia-so͘ àn Iû-thài-séng lâi-kàu Ka-lī-lī-séng, chiū lâi kìⁿ Ia-so͘, kiû I lo̍h-khì i-tī i ê kiáⁿ, in-ūi i ê kiáⁿ teh-beh sí à.

4:48 Ia-so͘ tùi i kóng:” Lín nā-bô khòaⁿ-tio̍h sîn-jiah kî-sū, lín it-tēng sìn bē lo̍h-khì.”

4:49 Hit-ê tōa-koaⁿ ìn:” Sin-seⁿ à, thàn góa ê kiáⁿ iáu-bē sí, kín lâi-khì.”

4:50 Ia-so͘ kā i kóng:” Lí tńg-khì, lí ê kiáⁿ bē sí!” Hit-ê lâng siong-sìn Ia-so͘ kā i kóng ê ōe, chiū tńg-khì.

4:51 I chiah lo̍h-khì ê sî, chiū tú-tio̍h kúi-ê po̍k-jîn lâi ǹg i pò-kò kóng:” Lí ê kiáⁿ oa̍h khí-lâi à!”

4:52 I chiū mn̄g in, I ê kiáⁿ tng-sî khai-sí hó khí-lâi. In ìn:” Chā-ji̍t ē-tàu chi̍t-tiám, jia̍t chiū thè.”

4:53 Chit-ê chò lāu-pē ê chai-iáⁿ, hit-ê sî-chūn tú-tú sī Ia-so͘ kā i kóng「Lí ê kiáⁿ bē sí!」ê sî, i ka-tī hām choân-ke chiū lóng sìn Ia-so͘.

4:54 Che-sī Ia-so͘ àn Iû-thài-séng lâi-kàu Ka-lī-lī-séng í-āu, só͘ kiâⁿ tē-jī pái ê sîn-jiah.

　　　　　　　　　　　　　　　　　　　　　　　　　　　　　　　　　20191009