Iokhān Hokim su Tē la̍k chio͘ⁿ 約翰福音 第六章

6:1 Chit ê tāichì íāu, Iaso͘ kòe khì Kalīlī ô͘ chiūsī Thêpílīa ô͘ ê hit pêng hōaⁿ.

6:2 Ū chin chē lâng lâi tòe I, inūi khòaⁿtio̍h I tī pēⁿ lâng ê sinchiō͘ⁿ só͘ kiâⁿ ê sînjiah.

6:3 Iaso͘ chiō͘ⁿ soaⁿ, hām ha̍kseng chòhóe chē tī hia.

6:4 Hitsî Iûthài lâng ê Pôaⁿkòecheh tehbeh kàu.

6:5 Iaso͘ kia̍h ba̍k khòaⁿtio̍h chin chē lâng ǹg I kiâⁿ óa lâi, chiū kā Huile̍k kóng:” Lán beh khì tóūi bé piáⁿ, hō͘ chiah chē lâng chia̍h?”

6:6 I ánne kóng sī teh chhìgiām Huile̍k, kîsi̍t I katī íkeng chaiiáⁿ beh ánchóaⁿ chò.

6:7 Huile̍k ìn:” Ēng nn̄g pah ê gînà khì bé piáⁿ, mā bô kàu thang hō͘ in chi̍t lâng chia̍h chi̍t-chhùi.”

6:8 Ū chi̍t ê ha̍kseng sī Sebûn Pítek ê siótī Anteklia̍t, kā Iaso͘ kóng:

6:9 “ Chia ū chi̍t ê gín-á, i ū gō͘ teh tōa be̍hpiáⁿ hām nn̄g bóe hî, m̄ku lâng chiahnih chē, nāū kàu?”

6:10 Iaso͘ kóng:” Lí kiò tāike chē lo̍hlâi.” Hit só͘chāi ê chháuá chin chē, tāike chiū lóng chē lo̍h lâi, lângsò͘ tāiiok ū gō͘ chheng.

6:11 Iaso͘ chiū the̍h hia ê piáⁿ, tī I kámsiā liáu, sūi pun hō͘ chē tī hia ê lâng, hî mā sī ánne, in ài lōachē chiū hō͘ in.

6:12 Tī in lóng íkeng chia̍hpá, Iaso͘ kā ha̍kseng kóng:” Chiong chia̍h chhun ê khioh chòhóe, m̄thang phahsńg.”

6:13 In chiū kā hit gō͘ teh piáⁿ, chiūsī tāike chia̍h chhun ê, khioh chòhóe, lóngchóng móa cha̍p jī nâ.

6:14 Tng hia ê lâng khòaⁿtio̍h Iaso͘ só͘ kiâⁿ ê sînjiah, chiū kóng:” Chit ê lâng chinchiàⁿ sī beh lâi chit sèkan ê sianti.

6:15 Iaso͘ chin chaiiáⁿ chènglâng lâi ê goânin, sī beh pek I chò ông, chiū katī chi̍t ê koh thè khì soaⁿ lāi.

6:16 Hônghun ê sî, I ê ha̍kseng lo̍h khì ô͘piⁿ,

6:17 chiō͘ⁿchûn, beh khì Kape̍klông. Hit sî thiⁿ íkeng àm, Iaso͘ iáubē kàuui,

6:18 ô͘ inūi tháu tōahong, chiū giâ tōaéng.

6:19 Ha̍kseng kòchûn, tāiiok kiâⁿ ū gō͘ la̍k konglí, khòaⁿtio̍h Iaso͘ tī ô͘bīn ǹg in ê chûn kiâⁿ óa lâi, lóng chin kiaⁿ.

6:20 Iaso͘ kā in kóng:” Sī Góa, m̄bián kiaⁿ!”

6:21 Ha̍kseng sūi chin hoaⁿhí chiap i chiō͘ⁿchûn, in chin kín chiū kàu só͘ beh khì ê só͘chāi.

6:22 Keh ji̍t, iáu tī ô͘ ê tùibīn hōaⁿ ê hit tīn lâng, hoatkak chí ū chi̍t chiah chûn tī hia nāniāⁿ, Iaso͘ pēng bô kap ha̍kseng tah siāng chi̍t chiah chûn, kánā ha̍kseng in katī kòekhì.

6:23 M̄ku ū kúi chiah chûn án Thêpílīa lâi, khòkīn Iaso͘ kámsiā liáu, pun piáⁿ hō͘ in chia̍h ê só͘chāi.

6:24 Tng in khòaⁿ bô Iaso͘ tī hia, liân ha̍kseng mā bô, in katī chiū tah chûn kòekhì Kape̍klông chhōe Iaso͘.

6:25 Ta̍kke tī ô͘ ê tùibīn hōaⁿ chhōe tio̍h Iaso͘, chiū tùi I kóng:” Sianseⁿ, Lí tangsî lâi kàu chia?

6:26 Iaso͘ ìn in:” Góa si̍tsi̍t chāichāi kā lín kóng, lín chhōe Góa m̄sī inūi khòaⁿtio̍h sînjiah, sī inūi ū piáⁿ thang chia̍h kàu pá.

6:27 M̄thang ūitio̍h ē pháiⁿ khì ê chia̍hmi̍h lâi phahpiàⁿ nāniāⁿ, tio̍hài ūitio̍h hit ê kútn̂g ê oa̍hmiā, chiūsī Jînchú só͘ beh hō͘ lín ê lâi phahpiàⁿ. Inūi Pē íkeng kā I khàmìn.

6:28 In chiū mn̄g I:” Goán tio̍h chò siáⁿ? Chiah sī chò Siōngchú ê kangchok?”

6:29 Iaso͘ ìn kóng:” Sìn I só͘ phài lâi ê, chiūsī chò Siōngchú ê kang.”

6:30 In koh mn̄g:” LÍ beh kiâⁿ siáⁿmih sînjiah hō͘ goán khòaⁿ koh thang lâi sìn Lí? LÍ beh lâi choh siáⁿ?”

6:31 Goán ê chó͘sian tī khòngiá chia̍h kòe máná, túhó chiàu só͘ kìchài ê:「I kā thiⁿténg lâi ê piáⁿ hō͘ in chia̍h.」

6:32 Iaso͘ kā in kóng:” Góa si̍tchāi kā lín kóng, m̄sī Mô͘-se kā àn thiⁿténg lâi ê piáⁿ hō͘ lín, sī Góa ê Pē kā àn thiⁿténg lâi ê chin ê piáⁿ hō͘ lín.

6:33 Inūi Siōngchú só͘ sù ê piáⁿ chiūsī àn thiⁿ kàng lo̍h lâi ê, iā sù oa̍hmiā hō͘ sèkan.”

6:34 In sūi kā I kóng:” Sinseⁿ, chhiáⁿ Lí tiāⁿtiāⁿ kā chit khoán piáⁿ hō͘ goán.”

6:35 Iaso͘ kóng:” Góa chiūsī oa̍hmiā ê piáⁿ, jīmhô chi̍t ê lâi Góa chia ê lâng, tekkhak bē iau, koh sìn Góa ê choa̍ttùi bē chhùi ta.”

6:36 M̄ku Góa bat kā lín kóng kòe, lín íkeng khòaⁿkòe Góa, iáukú m̄ sìn Góa.

6:37 Hoānnā Pē só͘ hō͘ Góa ê lâng lóng ē lâi Góa chia; lâi Góa chia ê lâng, Góa choa̍ttùi bē khìsak i.

6:38 Inūi Góa sī àn thiⁿténg kàng lo̍h lâi ê, m̄sī beh chiàu katī ê ìsù choh tāichì, sī chiàu hit ūi phài Góa lâi ê ê chíì khì choh.

6:39 Phài Góa lâi ê hit ūi ê chíì, chiūsī I só͘ hō͘ Góa ê lâng, liân chi̍t ê Góa to bē sòngsit i, tī boa̍tji̍t ē hō͘ i kohoa̍h.

6:40 Inūi Góa ê Pē ê ìsù sī beh hō͘ só͘ū khòaⁿkòe Kiáⁿ chiū lâi sìn Kiáⁿ ê lâng lóng ē tittio̍h éngoán ê oa̍hmiā, tī boa̍tji̍t Góa ē hō͘ i kohoa̍h.

6:41 Iûthài lâng inūi Iaso͘ kóng「Góa sī àn thiⁿ kàng lo̍h lâi ê piáⁿ.」chiū suhā gīlūn,

6:42 kóng:” Chit ê kám m̄ sī Ioksek ê kiáⁿ Iaso͘? Lán bat I ê pēbú; I chitmá ná ē kóng Góa sī àn thiⁿ kàng lo̍h lâi ê?”

6:43 Iaso͘ ìn:” Lín m̄bián tī hia gīlūn,

6:44 nā m̄sī phài Góa lâi ê Pē ínchhōa i, bô chi̍t ê lâng ē lâi Góa chia. Lâi Góa chia ê, tī boa̍tji̍t Góa ē hō͘ i kohoa̍h.

6:45 Sianti ê chheh ū kìchài:「In lóng ē pī Siōngchú kàutō.」Móe chi̍t ê àn Pē thiaⁿtio̍h koh ha̍ksip ê, ē lâi Góa chia.

6:46 He m̄sī kóng ū lâng khòaⁿkòe Siōngchú, chí ū àn Siōngchú hia lâi ê hi-ūi bat khòaⁿkòe.

6:47 Góa si̍tchāi kā lín kóng, sìn Góa ê lâng ū éngoán ê oa̍hmiā.

6:48 Góa chiū sī oa̍hmiā ê piáⁿ.

6:49 Lín ê chó͘sian tī khòngiá chia̍h máná iā sí ah.

6:50 Che chiūsī àn thiⁿ kàng lo̍h lâi ê piáⁿ, só͘í chia̍h i ê bē sí.

6:51 Góa chiūsī àn thiⁿ kàng lo̍h lâi ê oa̍hmiā ê piáⁿ, jīmhô lâng nā chia̍h chit ê piáⁿ ē éngoán oa̍h leh. Koh Góa só͘ beh hō͘ sèkan lâng ê piáⁿ chiūsī Góa ê bah.”

6:52 Tùi ánne, Iûthài lâng hō͘siong chenglūn kóng:” Chit ê lâng ná ētàng kā I ê bah hō͘ lâng chia̍h?”

6:53 Iaso͘ kóng:” Góa si̍tsit chāichāi kā lín kóng, lín nā bô chia̍h Jînchú ê bah, lim I ê hoeh, lín ê lāibīn chiū bô oa̍hmiā.

6:54 Chia̍h Góa ê bah lim Góa ê hoeh ê, chiū ū éngoán ê oa̍hmiā, koh tī boa̍tji̍t ê sî Góa ē hō͘ i kohoa̍h.

6:55 Góa ê bah sī chinchiàⁿ ê thang chia̍h, Góa ê hoeh sī chinchiàⁿ ētàng lim è.

6:56 Hia ê chia̍h Góa ê bat lim Góa ê hoeh ê lâng, chiū tiàm tī Góa lāibīn, Góa mā tiàm i lāibīn.

6:57 Éngoa̍h ê Pē phài Góa lâi, Góa mā inūi I lâi oa̍h leh, só͘í hia ê chia̍h Góa ê mā siāngkhoán ē inūi Góa lâi oa̍h leh.

6:58 Che chiūsī àn thiⁿ kàng lo̍h lâi ê piáⁿ, kap lín ê chó͘sian chia̍h ê piáⁿ bôsiāng, in chia̍h liáu mā sí ah.”

6:59 Chiah ê ōe sī Iaso͘ tī Ka-pe̍k-lông ê hōetn̂g chíkà lâng ê sî kóng ê.

6:60 I ê ha̍kseng tiongkan ū kúiā ê thiaⁿtio̍h chiū kóng:” Chit chióng ōe chin oh liáukái, siáⁿlâng thiaⁿ ē lo̍h?”

6:61 Iaso͘ ê lāisim chaiiáⁿ ha̍kseng leh gīlūn chiah ê só͘ thiaⁿtio̍h ê ōe, chiū mn̄g in kóng:” Lín hō͘ chiah ê ōe chó͘tòng sī bô?”

6:62 Lín nā khòaⁿtio̍h Jînchú chiō͘ⁿ khì I goânlâi ê só͘chāi, lín ē ánchóaⁿ?

6:63 Hō͘ lâng ū oa̍hmiā ê, sī Siōngchú ê Sîn, jio̍kthé choânjiân bô lō͘ēng. Góa só͘ kā lín kóng ê ōe, chiūsī Sîn hām oa̍hmiā.

6:64 M̄ku lín tiongkan ū lâng m̄sìn.” Inūi Iaso͘ àn khíthâu chiū chaiiáⁿ siáⁿmih lâng m̄ sìn, koh siáⁿmih lâng ē chhutbē I.

6:65 Iaso͘ koh kóng:” Inūi ánne, Góa bat kā lín kóng kòe, nā m̄sī Pē tôngì, bô lâng ētàng lâi Góa chia.”

6:66 Chiū ánne, I ê ha̍kseng tiong chin chē lâng thèchhut, bô koh kap I chòtīn kiâⁿ.

6:67 Iaso͘ mn̄g hit cha̍p jī ê ha̍kseng kóng:” Lín mā beh līkhui sī bô?”

6:68 Semn̂g Pítek ìn:” Chú ah, LÍ ū éngoán oa̍h ê tō, goán beh khì tòe siáⁿ-lâng?

6:69 Goán íkeng sìn, koh kha̍hsìn LÍ sī Siōngchú ê Sèngchiá.”

6:70 Iaso͘ kóng:” Góa kám m̄sī kéngsoán lín cha̍p jī ê ? M̄ku lín kîtiong ū chi̍t ê sī mô͘kúi.”

6:71 I ánne kóng sī leh chí Kaliok lâng Semn̂g ê kiáⁿ Iûtāi, i sī cha̍p jī ê ha̍kseng tiong ê chi̍t ê, í āu ē chhutbē I.

2025.06.19. siukái