Iokhān Hokim su Tē it chio͘ⁿ 約翰福音 第一章

1:1 Tī chit ê sèkài khaisí ê sî, chiū íkeng ū Tō ê chûnchāi, koh chit ê Tō kap SiōngChú chòhóe chûnchāi, jîchhiáⁿ chit ê Tō chiūsì SiōngChú.

1:2 Siâng khoán chit ê Tō tī sèkài khaisí ê sî, chiū hām SiōngChú chòhóe.

1:3 Bānbu̍t lóng sī thongkòe I lâi chō ê. Pīchō ê mi̍hkiāⁿ, bô chi̍t hāng m̄sī thongkòe I lâi chō.

1:4 Chitê Tō ū oa̍hmiā tī I lāibīn, koh chit ê Oa̍hmiā chiūsì jînlūi ê kng.

1:5 Chit ê Kng chiò tī o͘àm tiong, o͘àm bē tàng iâⁿ kòe I.

1:6 Ū chit ê lâng lâi lán chia, I sī SiōngChú phàilâi ê, miâ chò Iokhān.

1:7 I siang khoán sī chit ē kiànchèng jîn, sī ūi tio̍h Kng chò kiànchèng, hō͘ tāike thongkòe I lâi siongsìn.

1:8 I m̄sī hitê Kng, káná sī siūphài lâi ūi Kng chò kiànchèng nā niā.

1:9 Chi̍t ê chin ê Kng íkeng ji̍p lâi sèkài, beh chiò kng móe chit ê lâng.

1:10 I lâi kàu sèkài, koh chi̍t ê sèkài sī thongkòe I lâi chō ê, m̄ ku in khiok m̄ pat I.

1:11 I lâi kàu katī ê só͘chāi, hia ê katī ê lâng soah m̄ chiapthāi I.

1:12 M̄ ku, hoân nā chiapthāi I ê, chiū sī sìn I ê miâ ê lâng, I chiū hō͘ in ū koân chiâⁿchò Siōngchú ê jîlú.

1:13 In m̄ sī tùi hiatiân, mā m̄ sī tùi chêngio̍k, mā m̄ sī án lâng ê ìsù seⁿ ê, sī tùi Siōngchú seⁿ ê.

1:14 Chit ê Tō chiâⁿ chò jio̍kthé, koh tòa tī lán tiongkan. Goán ū khòaⁿ kòe I ê êngkng, chiū sī Pē ê to̍kseⁿKiáⁿ chiah ū ê êngkng, chhiongmóa untián kap chinlí.

1:15 Iokhān ūi I chò kiànchèng, tōa siaⁿ hoah:” Chit ê lâng, chiū sī góa bat thê khí ê, I pí góa khah bān chhutsì, m̄ ku ē chhiauoa̍t kòe góa, inūi I goânpún chiū pí góa khah úitāi.

1:16 Lán lóng tùi I cha̍pchiok ê honghù niásiū liáu ìgōa ê untián.

1:17 Inūi Lu̍thoat sī thong kòe Mô͘se sù hō͘ lán. Untián kap chinlí sī thong kòe Kitok Iaso͘.

1:18 Chū kó͘ í lâi, bô lâng khòaⁿ kòe Siōngchú. Chí ū tī Pē simhoâi tiong ê to̍kseⁿ Kiáⁿ kā I piáubêng chhutlâi.

1:19 I hā sī Iokhān ê kiànchèng, tng Iûthàilâng án Iâlō͘satléng phài chèsi hām Lībīlâng khì mn̄g i kóng:” Lí sī siáⁿ mih lâng?”

1:20 I chiū kòpe̍k pèng bô kūchoa̍t, kongkhai sêngjīn kóng:” Góa m̄ sī Kitok.”

1:21 In koh mn̄g:” Án ne, lí kám sī Ílīa?” I ìn:” M̄ sī.” “ Kám sī hit ê sian-ti?” I mā ìn “ M̄ sī.”

1:22 Só͘í in kā i kóng:” LÍ sī siáⁿmih lâng. Chhiáⁿ lí hō͘ goán chi̍t ê tapàn, thang khì kā phài goán lâi ê lâng hôehok. Koanhē lí katī, lí án-chóaⁿ kóng ?”

1:23 I kóng:” Góa sī tī khòngiá teh hánhoah ê hit ê siaⁿ, chhinchhio͘ⁿ Ísàia kóng ê, 「Tio̍h siuti̍t Chú ê lō͘.」”

1:24 Hia ê hō͘ Hoatlīsài phài ê lâng phài lâi ê,

1:25 Mn̄g Iokhān:” Lí ná m̄ sī Kitok, mā m̄ sī Ílīa, mā m̄ sī hit ê sianti, ná ē kā lâng kiâⁿ sélé?”

1:26 I kā in kóng:” Góa ēng chúi kiâⁿ sélé, m̄ ku ū chi̍t ūi khiā tī lín tiongkan ê, lín m̄ bat I.”

1:27 I chiū sī góa íchêng só͘ thêkhí tī góa āubīn lâi ê hit ūi, góa liân kā I thǹg ê, tō bô chukeh.

1:28 Chiah ê tāichì hoatseng tī Io̍ktàn hô tangpêng ê Pektāinî, chiū sī Iokhān kā lâng kiâⁿ sélé ê só͘chāi.

1:29 Kehji̍t, Iokhān khòaⁿtio̍h Ia-so͘ tu leh kiâⁿ óa lâi, chiū kóng:” Lín khòaⁿ leh, Siōngchú ê iô͘ⁿko, I beh lâi tû khí sèkanlâng ê chōe.

1:30 I chiàⁿ sī góa só͘ thêkhí ê, I sī pí góa khah bān lâi chia, m̄ ku iâⁿ kòe góa, inūi I pí  góa khah tāi seng chûnchāi.

1:31 Góa chín chêng mā m̄ bat I, m̄ ku ūi tio̍h ǹg Íseklia̍tlâng hiánbêng I katī, góa chiah ēng chúi kā lâng kiâⁿ sélé.

1:32 Iokhān koh kiànchèng kóng:” Góa ū khòaⁿ kòe Sèngsîn chhinchhiō͘ⁿ húnchiáu á án thiⁿténg poe lo̍h lâi, hioh tī I ê sinchiō͘ⁿ.

1:33 Góa m̄bat I, tānsī hitūi phài góa ēng chúi kiâⁿ sélé ê, I ū tùi góa kóng:” Lí ē khòaⁿtio̍h Sèngsîn kàng lo̍h lâi hioh tī I sinchiō͘ⁿ ê hitūi, siāngkhoán I iā beh ēng Sèngsîn kā lâng kiâⁿ sélé.

1:34 Góa íkeng khòaⁿ tio̍h, koh kiànchèng, chit ūi chiū sī Siōngchú ê Kiáⁿ.”

1:35 Koh kè ji̍t, Iokhān hām nn̄g ê ha̍kseng tú hó khiā chòhóe,

1:36 I khòaⁿ tio̍h Ia-so͘ leh kiâⁿ, sūi kóng:” Khòaⁿ leh, sī Siōngchú ê iô͘ⁿko!”

1:37 Hit nn̄g ê ha̍kseng thiaⁿ tio̍h i só͘ kóng ê, chiū khì tòe Iaso͘.

1:38 Iaso͘ oa̍tthâu kòe lâi, khòaⁿtio̍h in leh tòe I, chiū mn̄g in kóng:” Lín leh chhōe siáⁿmih?” In ìn:” Lāusu, Lí hiānchāi tòa tī tóūi?”

1:39 I kā in kóng:” Lín lâi khòaⁿ!” In chiū khì khòaⁿ I tòa ê só͘chāi, hit ji̍t chiū kap I tòa chò hóe. Hit chūn tāiiok sī ēpo͘ sì tiám.

1:40 Thiaⁿ Iok hān ê ōe sūi khì tòe Iaso͘ ê hit nn̄g ê ha̍kseng, kît iong chi̍t ê miâ chò Anteklia̍t, sī Sebûn Pítek ê siótī.

1:41 I tāi seng khì chhōe in hiaⁿko Sebûn, kā i kóng:” Goán íkeng chhōe tio̍h Kitok!”

1:42 Chiū chhōa i khì Iaso͘ hia, Iaso͘ chùba̍k khòaⁿ i, sūi kóng:” Lí sī Iokhān ê kiáⁿ Sebûn. Lí beh pī chheng chò Pí-tek.”

1:43 Koh keh ji̍t, Iaso͘ khì kàu Kalīlī, tī hia I tú tio̍h Huile̍k. Ia-so͘ kā i kóng:” Lâi tòe Góa!”

1:44 Huile̍k sī Peksàitài ê lâng, hām Anteklia̍t kap Pítek lóng siāng tòa hit ê siâⁿchhī.

1:45 Huile̍k khì chhōe Nátàngia̍p, kā i kóng:” Goán íkeng chhōe tio̍h Mô͘se ê Lu̍thoat hām Siantichheh só͘ kìchài ê hit ūi, chiū sī Ioksek ê kiáⁿ, Násatle̍k ê Iaso͘.”

1:46 Nátàngia̍p ìn i kóng:” Násatle̍k hit khoán só͘chāi kám ē chhut siáⁿmih hó mi̍h?” Huile̍k kā i kóng:” Lí lâi khòaⁿ chiū sī.”

1:47 Iaso͘ chi̍t ē khòaⁿ tio̍h Nátàngia̍p ǹg I kiâⁿ lâi, sūi lūn-khí i kóng:” Lín kā khòaⁿ leh, chi̍t ê sī chiàⁿkáng ê Íseklia̍t lâng, tī i lāisim bô hiké.”

1:48 Nátàngia̍p ìn Iaso͘ kóng:” Lí ná ē bat góa?” Iaso͘ ìn i:” Tī Huile̍k kiò lí ê tāi seng, Góa chiū khòaⁿ tio̍h lí khiā tī Bûhoakó chhiū kha.”

1:49 Nátàngia̍p ìn Iaso͘ kóng:” Lāusu, Lí sī Siōng chú ê kiáⁿ, sī Íseklia̍t ê ông.”

1:50 Iaso͘ kā i kóng;” Inūi Góa kā lí kóng, Góa ū khòaⁿ tio̍h lí khiā tī Bûhoakó chhiū kha, lí chiū sìn sī bô? Lí ē khòaⁿ tio̍h koh khah tōa ê tāichì!”

1:51 Iaso͘ koh kā i kóng:” Góa si̍tchāi kā lí kóng, tùi taⁿ íāu, lí ē khòaⁿ tio̍h thiⁿ khui khì, Siōngchú ê thiⁿsài tī Jînchú ê sin chiō͘ⁿ khíkhí lo̍hlo̍h.”

2025/06/13 siukái