Iok-hān Hok-im-su Tē-saⁿ chio͘ⁿ 約翰福音 第三章

3:1 Ū chi̍t-ê Hoat-lī-sài-phài ê lâng miâ-chò Nî-ko-tí-bú, sī Iû-thài-lâng ê koaⁿ-oân.

3:2 Tī àm-sî lâi chhōe Ia-so͘, ǹg I kóng:” Lāu-su, goán lóng chai-iáⁿ Lí-sī Siōng-chú só͘ phài lâi ê, in-ūi LÍ só͘ kiâⁿ ê chē-chē sîn-jiah, nā-bô Siōng-chú kap Lí chò-hóe, bô lâng ē-tàng chò i.

3:3 Ia-so͘ ìn i:” Góa si̍t-si̍t chāi-chāi kā lí kóng, lâng ná bô têng-thâu-seⁿ, chiū bē-tàng khòaⁿ-tio̍h Siōng-chú ê kok.”

3:4 Nî-ko-tí-bú mn̄g I kóng:” Lâng í-keng lāu, ná ē têng-thâu-seⁿ? Kám ē-tàng ji̍p-khì in lāu-bú ê pak-tó͘ lāi, koh chài seⁿ chhut-lâi mah?”

3:5 Ia-so͘ kóng:” Góa si̍t-si̍t chāi-chāi kā lí kóng, lâng ná bô tùi chúi kap Sèng-sîn lâi têng-thâu-seⁿ, chiū bē-tàng ji̍p-khì Siōng-chú ê kok.

3:6 Àn jio̍k-thé seⁿ ê chiū-sī jio̍k-thé, àn Sèng-sîn seⁿ ê chiū-sī sîn,

3:7 M̄-bián in-ūi Góa kā lí kóng ê ōe, lí pit-su têng-thâu-seⁿ lâi tio̍h chheⁿ-kiaⁿ.

3:8 Hong beh chhoe khì tó-ūi sī chiàu i só͘ ài, koh lí ū thiaⁿ-tio̍h i ê siaⁿ, m̄-ku kóng bē-chhut i àn tó-ūi lâi hām beh khì tó-ūi, só͘-í móe chi̍t-ê àn Sèng-sîn seⁿ ê lâng, mā-sī án-ne.

3:9 Nî-ko-tí-bú sūi ìn:” Chit-chióng tāi-chì ná ū khó-lêng ē án-ne?”

3:10 Ia-so͘ hôe-tap, kóng:” Lí kám-m̄-sī Í-sek-lia̍t lâng ê lāu-su, liân chia-ê tāi-chì lí iā m̄-chai?”

3:11 Góa si̍t-sit chāi-chāi kā lí kóng, goán kóng goán só͘ chai ê, kiàn-chèng goán só͘ khòaⁿ-kòe ê, m̄-ku lín m̄ chhái-la̍p goán ê kiàn-chèng sī chin—ê.

3:12 Góa kā lí kóng koan-hē tē-chiō͘ⁿ ê sū, lí to m̄-sìn, ná-ē siong-sìn Góa kā lí kóng koan-hē thiⁿ-ni̍h ê tāi-chì?

3:13 Bô chi̍t-ê lâng bat chiō͘ⁿ-thiⁿ kòe, chi-ū àn thiⁿ kàng-lîm ê Jîn-chú nā-niāⁿ.

3:14 Koh chhin-chhiō͘ⁿ chôa hō͘ Mô͘-se tī khòng-iá gia̍h khí-lâi, Jîn-chú mā pit-su án-ne pī gia̍h khí-lâi.

3:15 Hō͘ móe-chi̍t-ê sìn-khò ê lâng, tī I lāi-bīn ū éng-oán ê oa̍h-miā.

3:16 In-ūi Siōng-chú chiah-nī thiàⁿ sè-kan-lâng, só͘-í chiong to̍k-seⁿ-kiáⁿ sió͘ⁿ-sù in, hō͘ só͘-ū sìn I ê bē tîm-lûn, hoán-tńg ē tit-tio̍h éng-oán ê oa̍h-miā.

3:17 Siōng-chú m̄-sī phài Kiáⁿ lâi sè-kan beh sím-phòaⁿ sè-kan-lâng, I phài I lâi sī beh hō͘ sè-kan thang chià-tio̍h I tit-tio̍h chín-kiù.

3:18 Sìn I ê lâng bē siū sím-phòaⁿ, m̄-ku m̄-sìn ê lâng í-keng pī tēng-chōe, in-ūi i m̄-sìn Siōng-chú ê Kiáⁿ ê miâ.

3:19 Kng chìn-ji̍p sè-kan, m̄-ku lâng khah ài o͘-àm, m̄-ài kng, in-ūi in ê hêng-ûi sī siâ-ok ê, só͘-í kā in tēng-chōe.

3:20 Múi-chi̍t-ê chò-pháiⁿ ê lâng lóng oàn-hūn kng, in-ūi kiaⁿ i ê pháiⁿ hêng-ûi pī hoat-hiān, chiū m̄-káⁿ chiap-kīn kng.

3:21 Chí-ū seng-oa̍h tī chin-si̍t ê lâng ē chiap-kīn kng, só͘-í i ê hêng-ûi chin chheng-chhó hō͘ lâng chai-iáⁿ sī khò-tio̍h Siōng-chú ê pang-chō͘.

3:22 Chia̍h-ê tāi-chì í-āu, Ia-so͘ hām ha̍k-seng chìn-ji̍p Iû-thài séng, kap in chò-hóe tòa chi̍t-tōaⁿ sî-kan kā lâng kiâⁿ sé-lé.

3:23 Taⁿ Iok-hān mā tī Sat-léng ê hù-kīn ê Ái-loán kiâⁿ sé-lé, in-ūi hia-ê chúi chin-chē, chèng-lâng lâi-kàu hia hō͘ i si-sé.

3:24 Chit-ê sî-chūn Iok-hān iáu-bōe hō͘ lâng koaiⁿ tī kaⁿ-ga̍k.

3:25 Chôaⁿ ū chi̍t-kóa Iok-hān ê ha̍k-seng hām chi̍t-ê Iû-thài-lâng, ūi-tio̍h kiat-chēng ê lé-gî sán-seng piàn-lūn.

3:26 In khì-kàu Iok-hān hia, mn̄g i kóng:” Lāu-su, hit-ê hām lí chò-hóe tī Io̍k-tàn-hô tang-pêng, lí mā ūi I chò-chèng ê hit-ūi, hiān-chāi mā kā lâng kiâⁿ sé-lé, ta̍k-ê mā lóng khì tī I hia.

3:27 Iok-hān chiū án-ne ìn in:” Ná m̄-sī tùi thiⁿ só͘ sió͘ⁿ-sù, lâng bē-tàng tit-tio̍h sit-mi̍h.”

3:28 Lín ka-tī chò góa só͘ kóng ê ōe ê chèng-jîn, góa bat kóng-kòe góa m̄-sī Ki-tok, sī pī phài lâi thè I pho͘-lō͘.

3:29 Chhōa sin-niô͘ ê sī sin-lông, sin-lông ê pêng-iú khiā tī piⁿ-á, in chim-chiok thiaⁿ i ê siaⁿ, thiaⁿ-tio̍h ê sî chiū chiok hoaⁿ-hí, só͘-í góa chin hí-lo̍k, góa chin boán-chiok.

3:30 I ē lú-lâi lú heng-ōng, siàng-sî góa ē lú-lâi lú soe-bî.

3:31 Àn thiⁿ-téng lâi ê sī tī bān-mi̍h ê téng-bīn; àn tē-nih lâi ê sī siok tī tē, i kóng ê ōe mā sī siok tī tē. Àn thiⁿ-téng lâi ê sī chhiau-kòe bān-mi̍h.

3:32 I kiàn-chèng só͘ khòaⁿ-tio̍h hām só͘ thiaⁿ-tio̍h ê, m̄-ku bô-lâng chiap-siū i ê kiàn-chèng.

3:33 Chiap-siu ê lâng chiū-sī tī hit téng-bīn khàm-ìn, kóng Siōng-chú sī chin-si̍t.

3:34 In-ūi Siōng-chú só͘ phài ê kóng Siōng-chú ê ōe, koh Siōng-chú sù i bô hān-liōng ê Sèng-sîn.

3:35 Thiⁿ-pē thiàⁿ Sèng-kiáⁿ, mā chiong só͘-ū ê lóng kau tī I ê siang-chhiú.

3:36 Siong-sìn Sèng-kiáⁿ ê, chiū ū éng-oán ê oa̍h-miā; m̄-sìn Sèng-kiáⁿ ê bē-tàng khòaⁿ-tio̍h oa̍h-miā, jî-chhiáⁿ Siōng-chú ê siū-khì siông-siông tī i ê sin-chiō͘ⁿ.

　　　　　　　　　　　　　　　　　　　　　　20191004