Sú-tô͘ hêng-toān Te jī-cha̍p-chhit chio͘ⁿ 使徒行傳 第二十七章

27:1 Chhâi-koat khak-tēng, goán tio̍h chē-chûn khì Í-tāi-lī. In chiū kā Pó-lô kap kî-thaⁿ ê hoān-lâng, kau hō͘ Ò-kó͘-su-iâⁿ ê liân-tió͘ⁿ, i miâ-chò Iû-liâu.

27:2 Goán tah chi̍t-chiah A-tāi-bí-tiân ê chûn, i ē iân-tio̍h A-se-a ê hái-hōaⁿ kúi-ā-ê káng-kháu kiâⁿ, goán chiū chhut-hái. A-lí-ta̍t-kó͘ sī Má-kî-tùn ê Thia̍p-sat-lô-nî-ka-lâng, kap goán siāng-khoán tah chit-chiah chûn.

27:3 Keh-ji̍t goán kàu Se-tùn, Iû-liû tùi Pó-lô chin iú-siān, ún-chún i khì chhōe i ê pêng-iú, chiap-siū in ê khoán-thāi.

27:4 Án hia koh khui-chûn, goán in-ūi chìⁿ-hong ê goân-in, chiū sūn Ku-pí-lō͘ ê tó siám-hong keng-kòe.

27:5 Goán ū keng-kòe Ki-lī-ka, Pông-hui-lī-a ê hái-bīn, lâi-kàu Lū-ka ê Múi-lah.

27:6 Tī hia, liân-tió͘ⁿ tú-tio̍h chi̍t-chiah A-le̍k-san-tāi ê chûn, beh khí Í-tāi-lī, chiū kiò goán tah hit-chiah chûn.

27:7 Chûn kiâⁿ chin-bān, kòe chin-chē ji̍t chiah kàu Kek-nî-thó͘ ê gōa-hái. In-ūi hō͘ hong chó͘-tòng, goán chiū sūn Kek-lí-tí ê tó siám-hong, kiâⁿ kòe Sat-mô͘-nî.

27:8 Iân-tio̍h hái-hōaⁿ, chin bô kán-tan kiâⁿ lâi-kàu hō-chò Súi-káng, lî Lah-se-a-siâⁿ bô-lōa-hn̄g.

27:9 Tī hái-bīn kòe chin-chē ji̍t, kìm-chia̍h ê kî-kan í-keng kòe, kiâⁿ-chûn ē chin gûi-hiám, Pó-lô chiū khǹg tāi-ke,

27:10 kóng:” Kok-ūi, góa khòaⁿ kiâⁿ chi̍t-chōa chûn, m̄-niā chiah-ê hòe ē phah-sǹg, chûn mā-ē siū phò-hoāi kah chin siong-tiōng, sīm-chì liân lán ê sèⁿ-miā mā chin gûi-hiám.

27:11 M̄-ku liân-tió͘ⁿ khah sìn-ho̍k khui-chûn sai-hū kap chûn thâu-ke ê kóng-hoat, bô thiaⁿ Pó-lô só͘ kóng ê.

27:12 In-ūi tī hit-ê hái-káng bô sek-ha̍p kòe tang-thiⁿ, tōa-pō͘-hūn ê lâng lóng kiàn-gī lī-khui hia, kè-sio̍k chhut-hái ǹg-bāng ē-thang khì-kàu Hui-nî-ki kòe tang-thiⁿ. Hui-nî-ki sī Kek-lí-tí ê káng-kháu, chi̍t-pêng ǹg tang-pak, chi̍t-pêng ǹg tang-lâm.

27:13 Hit-sî ū sió-khóa khí lâm-hong, in siō͘ⁿ kóng ē-tàng sūn-lī kàu-ui, chiū kā tiàⁿ siu khí-lâi, iân Kek-lí-tí ê hái- hōaⁿ kiâⁿ.

27:14 Kiâⁿ bô lōa-kú, án lio̍k-tē ê soaⁿ-thâu thàu-tōa-hong, kiò-chò「Iú-lah-ku-lûn」sàu-lo̍h-lâi.

27:15 Chûn soah hō͘ po̍k-hong khòng-chè tiâu leh, bô-hoat-tō͘ kè-sio̍k chin-chêng, chí-hó chhut-chāi i khì.

27:16 Chûn lâi-kàu chi̍t-ê kiò-chò Ko-tāi ê sió-tó, tī siám-hong ê iân-hōaⁿ bián-kióng kā sam-pán siu khí-lâi.

27:17 Sam-pán giú khí-lâi chûn-téng liáu-āu, chiū ēng tōa-soh pa̍k chûn-té. Koh kiaⁿ-liáu ē tī Sài-ní-tí ê soa-chiu khò-chhián, chiū kā hong-phâng lūi-lo̍h-lâi, chhut-chāi  chûn phiau-liû.

27:18 Tng goán khì hō͘ po̍k-hong-ú sàu kah chin siong-tiōng, keh-ji̍t tāi-ke chiū kā  chûn-téng só͘-ū ê hòe hiat-lo̍h hái.

27:19 Te-saⁿ-ji̍t, in koh chhin-chhiú kā chûn-lāi ê kang-khū tàn loh hái.

27:20 Kúi-nā-ji̍t bô khòaⁿ-tio̍h ji̍t-thâu kap chheⁿ-sîn, po̍k-hong-ú koh kè-sio̍k pek goán, hō͘ goán oân-choân sit-khì pī kiù ê ǹg-bāng.

27:21 Chèng-lâng kúi-nā-ji̍t bô chia̍h mi̍h-kiāⁿ, Pó-lô lâi khiā tī in tiong-kan, kóng:” Kok-ūi, lín ná ū thiaⁿ góa, bô lī-khui Kek-lí-tí, chiū bô chiah-ê siong-hāi kap sún-sit.

27:22 Taⁿ góa khǹg lín chín-chok khí-lâi, in-ūi lín tiong-kan bô chi̍t-ê ē sit-lo̍h i ê sèⁿ-miā, kan-taⁿ ē sit-khì chit-chiah chûn niā-niā.

27:23 In-ūi góa só͘-siok, só͘ ho̍k-sāi ê Siōng-chú, I ê thiⁿ-sài cha-àm khiā tī góa sin-piⁿ,

27:24 tùi góa kóng:「Pó-lô m̄-bián kiaⁿ! LÍ it-tēng ē khiā tī Kai-sat ê bīn-chêng, khòaⁿ leh, hām lí kāng chûn ê lâng, Siōng-chú í-keng úi-thok lí ah.」

27:25 Só͘-í, lán tio̍h chín-chok khí-lâi, in-ūi góa siong-sìn Siōng-chú ē chiâⁿ I só͘ kóng ê tāi-chì.

27:26 M̄-ku, lán it-tēng ē tī chi̍t-ê tó khò-chhián.

27:27 Kàu tē-cha̍p-sì mê ê sî, chûn tī A-tí-a-hái phiau-lâi se̍h-khì, kàu-kah pòaⁿ-mê, chúi-chhiú lia̍h-chò teh-beh óa-kīn lio̍k-tē,

27:28 in chiū thàm hái-té ê chhim-chhián, ū sì-cha̍p-bí chhim, koh chin-chêng sió-khóa, chha-put-to saⁿ-cha̍p-bí,

27:29 In kiaⁿ chûn ē khò tī chio̍h-thâu téng, chôaⁿ án chûn-bóe tàn sì-liap tiàⁿ, ǹg-bāng thiⁿ kóaⁿ-kín kng.

27:30 Tng hia-ê chúi-chhiú siō͘ⁿ beh lī-khui chûn tô-cháu, chiū pàng sam-pán loh hái, ké-chò beh án chûn-thâu pha-tiàⁿ.

27:31 Pó-lô tùi iâⁿ-tió͘ⁿ hām hia-ê peng-á kóng:” In nā-bô lâu tiàm chûn-téng, lín chiū bô kiù.

27:32 Chiū ah-ne, peng-á khì chám-tn̄g sam-pán ê tōa-soh, chhut-chāi i khì.

27:33 Kàu thiⁿ beh kng ê sî, Pó-lô khoàn-khǹg tāi-ke chia̍h kóa mi̍h-kiāⁿ, kóng:” Kàu kin-á-ji̍t í-keng tē-cha̍p-sì ji̍t, lín iáu-teh ǹg-bāng hām kìm-chia̍h, lóng bô chia̍h pòaⁿ-hāng.

27:34 Só͘-í góa khǹg lín chia̍h kóa mi̍h-kiāⁿ, che hām lín ê sèⁿ-miā iú-koan, in-ūi lín bô-lâng ē sit-lo̍h chi̍t-ki thâu-mn̂g.

27:35 Pó-lô kóng liáu, chiū theh piáⁿ khí-lâi, tī chèng-lâng ê bīn-chêng kám-siā Siōng-chú, koh peh-khui lâi chia̍h.

27:36 Tùi ah-ne in ê sim lóng khui ah, mā khai-sí chia̍h mi̍h-kiāⁿ.

27:37 Choân chûn-téng ê lâng-sò͘, goán chóng-kiōng ū nn̄g-pah chhit-cha̍p la̍k ê.

27:38 Tng in lóng chia̍h-pá, chiū kā chhun ê be̍h-á tàn loh hái, hō͘ chûn bián chái kah hiah tang.

27:39 Thiⁿ-kng ê sî, in m̄-chai sî tī siáⁿ-mih só͘-chāi, m̄-ku khòaⁿ-tio̍h ū soa-than ê hái-káng, chiū koat-tēng beh chhì khòaⁿ-māi ah, ē-tàng kā chûn sái khí-lih á-bē.

27:40 In chiū kā tiāⁿ-soh chám-tn̄g, tàn loh hái, siâng-sî tháu-khui chûn-tōa ê soh, iā kā chûn-thâu ê hong-phâng giú khí-lâi hō͘ i chia̍h hong, kā chûn sái khí-lih soa-than.

27:41 M̄-ku tú-tio̍h nn̄g-tiâu chúi-lâu sio-kap ê só͘-chāi, kui-chiah chûn chôaⁿ khá tī hia, chûn-thâu bē-tin-bē-tang, chûn-bóe hō͘ tōa-éng phah kah khai-sí li̍h-khui.

27:42 Peng-á ê ì-sù beh kā hoān-lâng chhú-sí, kiaⁿ-liáu in thau siû cháu.

27:43 M̄-ku iâⁿ-tió͘ⁿ beh kiù Pó-lô, sūi chó͘-tóng in ê phah-sǹg, koh hā-lēng ē-hiáu siû-chúi ê, seng thiàu-lo̍h chúi siû chō͘ⁿ-hōaⁿ,

27:44 Kî-thaⁿ ê lâng lī-iōng pang-à, á-sī chûn-téng ê kî-thaⁿ mi̍h-kiāⁿ, tòe in chiō͘ⁿ-hōaⁿ. Ah-ne, goán choân-pō͘ ê lâng lóng an-choân chiō͘ⁿ kàu lio̍k-tē.

　　　　　　　　　　　　　　　　　　　　2019/09/11