28:1 Goán í-keng lóng pī kiù chhut-lâi, chiah chai-iáⁿ hit-ê tó miâ-chò Bí-lī-tāi.
28:2 Tong-tē-lâng
tùi goán piáu-hiān chhut hui-siông ê iú-siān. In-ūi tú-leh lo̍h-hō͘ koh kôaⁿ,
chiū khí-hóe hō͘ goán móe chi̍t-ê-lâng hang, lâi chiap-thāi .
28:3 Tng Pó-lô
khioh chi̍t-pé chhâ, hiat-lo̍h hóe-tui ê sî, in-ūi hóe ê jia̍t-tō͘, ū chi̍t-bóe
to̍k-chôa chông chhut-lâi, sūi kā i ê chhiú sńg tiâu leh.
28:4 Tong-tē-lâng
khòaⁿ tio̍h hit-bóe to̍k-chôa tī i ê chhiú iau kòa tiâu leh, chiū hō͘-siong
kóng:” Chit-ê lâng it-tēng sī hiong-chhiú, sui-jiân i án hái-lān-tiong
khioh-tio̍h sèⁿ-miā, Thian-lí iû-goân m̄-chún i oa̍h lo̍h-khì.
28:5 M̄-ku Pó-lô
kā hit-bóe to̍k-chôa hiat lo̍h-khì hóe-ni̍h, pèng-bô siū-siong.
28:6 In lóng
phah-sǹg i ê chhiú ê chéng khí-lâi, á-sī hut-jiân-kan tó-lo̍h chôaⁿ sí-khì,
tān-sī tán chin-kú lóng bô khòaⁿ-tio̍h i hoat-seng tāi-chì, in chiū kái-piàn
siō͘ⁿ-hoat, jīn-tēng i sī sîn-bêng.
28:7 Tī hit
hù-kīn ū chi̍t-kóa chhân-hn̂g sī siok hit ê tó ê thâu-bak Pō͘-pek-liû só͘-iú. I chin jia̍t-chêng chiap-thāi goán ū
saⁿ-ji̍t kú.
28:8 Hit-sî
Pō͘-pek-liû ê lāu-pē hoat-sio kiam làu-sái, tó tī chhn̂g-téng. Pó-lô chiū
ji̍p-khì kā i hōaⁿ-chhiú kî-tó, hō͘ i ê pēⁿ hó khì.
28:9 In-ūi ah-ne,
chit-tè tó kî-thaⁿ ê pēⁿ-lâng mā lóng óa-lâi, iā tit-tio̍h i-tī.
28:10 In iā
koh-khah kèng-tiōng goán, tī goán beh khui-chûn ê sî, chiong goán só͘ su-iàu ê
mi̍h-kiāⁿ sàng lâi chûn-téng.
28:11
Saⁿ-goe̍h-ji̍t āu, goán chē A-le̍k-san-tāi ê chûn khí-thêng, hit-chiah chûn
hō-chò「Tiū-su ê
siang-seⁿ-á-kiáⁿ」tī hit-tè tó kòe
tang-thiⁿ.
28:12
Lâi-kàu Sū-lah-kó͘, goán tī hia thêng-liû saⁿ-ji̍t.
28:13 Án
hia se̍h kàu Lī-kî-ong. Keh-ji̍t thàu lâm-hong, koh kòe chi̍t-ji̍t goán chiū
kàu Pō͘-tiú-lī;
28:14 Tī
hia tú-tio̍h kúi-ê sìn-tô͘, in chhiáⁿ goán tòa tī in hia, ū chhit-ji̍t kú. Ah-ne
goán chiū kàu Lô-má.
28:15 Lô-má
ê sìn-tô͘ thiaⁿ-tio̍h goán ê siau-sit, chiū lâi A-pí-o͘ chhī hām Sam-koán gêng-chiap
goán. Pó-lô khòaⁿ-tio̍h in chiū kám-siā Siōng-chú, tit-tio̍h kek-lē.
28:16 Tng
goán kiâⁿ-ji̍p Lô-má-siâⁿ liáu-āu, Pó-lô tit-tio̍h ún-chún hām khòaⁿ-siú i ê
peng-á lēng-gōa tòa chi̍t-ūi.
28:17 Kòe
liáu saⁿ-ji̍t, Pó-lô chhiáⁿ Iû-thài-lâng ê tāi-piáu chip óa-lâi, tùi in kóng:”
Hiaⁿ-tī à, sui-jiân góa m̄-bat hoān-tio̍h kok-jîn kap chó͘-sian ê si̍p-sio̍k, khiok
tī Iâ-lō͘-sat-léng pī lia̍h, hō͘ lâng kau hō͘ Lô-má-lâng ê chhiú-thâu.
28:18 In tī
sím-mn̄g góa í-āu, jīn-ûi góa bô hoān-tio̍h kai-sí ê chōe, chiū siō͘ⁿ beh pàng
góa.
28:19 M̄-ku
Iû-thài-lâng phian-phian hoán-tùi, góa put-tek-í chiah tùi Kai-sat siōng-sò͘,
M̄-sī beh
khòng-kò ka-tī ê tông-pau.
28:20
Ūi-tio̍h ah-ne, chiah chhiáⁿ lín lâi hōe-bīn, ńg tāi-ke pò-kò. Góa sī ūi-tio̍h
Í-sek-lia̍t só͘ leh ǹg-bāng-ê, chiah pī chit-ê thih-liān khàu tiâu leh.
28:21 In kā
Pó-lô kóng:” Goán m̄-bat án Iû-thài siū-tio̍h thê-khí iú-koan lí ê tāi-chì ê
phoe-sìn, mā-bô chi̍t-ê hiaⁿ-tī lâi goán chia pò-kò, kóng-khí lí ê m̄-sī.
28:22 M̄-ku
goán beh thiaⁿ lí ê siō͘ⁿ-hoat. In-ūi goán chai-iáⁿ chit-ê kàu-phài, khì-kàu
tó-ūi lóng hō͘ lâng hoán-tùi.
28:23 Tī in
kap i iok-tēng ê hit-ji̍t, chin-chē-lâng lâi i tòa ê só͘-chāi. Pó-lô án
chái-khí kàu eng-àm, ǹg in káng-kái iú-koan Siōng-chú ê kok-tō͘, iā ín-iōng
Mô͘-se ê Lu̍t-hoat hām Sian-ti ê chheh chò-chèng, lâi soat-ho̍k in sìn-khò
Ia-so͘.
28:24 I só͘
kóng ê ōe, ū-ê siong-sìn, ū-ê m̄-sìn.
28:25 In
hō͘-siong bē ha̍h chôaⁿ sòaⁿ-hōe; tī bē sòaⁿ-khì chin-chêng, Pó-lô kóng
chi̍t-tōaⁿ ōe:” Sèng-sîn thong-kòe Sian-ti Í-sài-a ǹg lín ê chó͘-sian só͘ kóng
ê, chin-chiàⁿ tio̍h.
28:26 I ah-ne
kóng:「Khì kā chiah-ê
lâng kóng, Lín leh thiaⁿ sī ū thiaⁿ-tio̍h, m̄-ku khiok bē liáu-kái, Lín leh
khòaⁿ tō ū leh khòaⁿ, mā—ku khòaⁿ bē bêng-pe̍k.
28:27 In-ūi
in ê tūn, hī-khang tang, ba̍k-chiu kheh-kheh; khióng-kiaⁿ in ê ba̍k-chiu
khòaⁿ-tio̍h, hī-khang thiaⁿ-tio̍h, sim-lāi bêng-pe̍k, Góa it-tēng ē i-hó in.
28:28 Só͘-í
lín tio̍h-ài chai, Siōng-chú ê kiù-un taⁿ í-keng thoân hō͘ chē-chē gōa-kok lâng,
in mā thiaⁿ-tio̍h ah.
28:29 Pó-lô
kóng chiah-ê ōe liáu, Iû-thài-lâng chiū gī-lūn hun-hun lī-khui.
28:30 Pó-lô
tòa tī ka-tī cho͘ ê chhù chiok-chiok ū nn̄g-nî kú, mā chiap-thāi só͘-ū lâi
chhōe i ê lâng.
28:31 I
ióng-khì cha̍p-chiok thôaⁿ-kóng Siōng-chú ê kok-tō͘, iā kàu-tō koan-hē Chú
Ia-so͘ ê sū, pèng-bô lâng kā kìm-chí.
2019/09/23 Siōng-ngó͘ 10 tiám khóng 7 hun tī Tâi-lâm Kui-jîn Lâm-thâm oân-sêng.
2021/01/13 Siōng-ngó͘ 11 tiám, choân-pún tak-chio͘ⁿsiu-kái āu, pho͘ tī chia, kèng-chhiáⁿ chí-kàu!
沒有留言:
張貼留言