Iokhān Hokim su Tē cha̍psaⁿ chio͘ⁿ 約翰福音 第十三章

13:1 Tī Pôaⁿkòe-cheh chìn chêng, Iaso͘ chaiiáⁿ I līkhui chit sèkan tńg khì Pē hia ê sîkan íkeng kàu à. I itti̍t thiàⁿsioh chit sèkan siok I ê lâng, chiū thiàⁿ in kàu té.

13:2 Iaso͘ kap ha̍kseng chia̍h àmtǹg ê sî, Mô͘kúi chiong chhutbē Iaso͘ ê ìsù hē tī Kalio̍k lâng Sebûn ê kiáⁿ  Iûtāi ê sim.

13:3 Iaso͘ chaiiáⁿ Pē íkeng chiong itchhè kau tī I ê chhiú, koh chai I àn Siōngchú hia lâi, mā beh tńg khì  Siōngchú hia.

13:4 I chiū līkhui chēūi, thǹg gōasaⁿ, thē chit tiâu kiná hâ tī io.

13:5 Jiânāu chiong chúi tò tī bīn-phûn, lâi sóe bûntô͘ ê kha, koh ēng hâ tī io ê kiná kā in chhit.

13:6 I sé kàu Sebûn Pítek ê sî, Pítek kā I kóng: “Chú à, Lí iā beh sé góa ê kha sī bô?“

13:7 Iaso͘ ìn: “Góa só͘ chò ê, lí chitmá m̄ chai, āulâi chiū ē bêngpe̍k.“

13:8 Pítek ìn: “Góa ê kha ittēng bē hō͘ Lí sé, choa̍ttùi bē. “Iaso͘ kā I kóng: “Góa nā bô sé lí ê kha, lí chiū  kap Góa bô koanhē. “

13:9 Sebûn Pítek chiū kóng: “M̄niā góa ê kha, liân chhiú kap thâukhak mā lóng kā góa sé.”

13:10 Iaso͘ kóng: “Lâng sée̍k liáuāu, kui sengkhu chiū chhengkhì, chí-iàu sé kha to̍h hó. M̄ku, bô ta̍kê  án-ne.

13:11 Inūi Iaso͘ chai siáⁿ lâng beh chhutbē I, só͘í chiah kóng:” Lín bô ta̍k ê chhengkhì.”

13:12 Iaso͘ kā in sé kha liáuāu, chiū chhēng gōasaⁿ tńgkhì chēūi, mn̄g in kóng: “Lín kám ū liáukái Góa  tùi lín só͘ chò ê sū?”

13:13 Lín chheng Góa chò Lāusu, hām Chú; ánne chhengho͘ sī tio̍h ē, inūi Góa chiūsī.

13:14 Góa sī Chú, sī lāusu, to iau leh sé lín ê kha, lín hō͘siong sékha mā sī sektong ê.

13:15 Góa íkeng lâu chi̍t ê iō͘ⁿ hō͘ lín, só͘í lín thang chiàu Góa ūi lín só͘ chò ê khì chò.

13:16 Góa si̍tchāi kā lín kóng, Po̍kjîn bē pí chúlâng khah tōa, siū phài ê bē pí phài I ê khah tōa.

13:17 Chiah ê tāichì lín nā liáukái, koh chiàu ánne khì chò, chiū chin ū hokkhì.

13:18 Góa m̄ sī leh kóng tāike lóng ánne, Góa jīnbat Góa chin ê ha̍kseng, che putkoh sī beh ènggiām  kengchheh só͘ kìchài ê:“ Kap Góa chòhóe chia̍hpn̄g ê lâng ē khílâi pōege̍k Góa.”

13:19 Taⁿ tāichì iáubē hoatseng chìnchêng, Góa seng kā lín kóng, kàu tāichì hoatseng ê sî, lín thang sìn Góa chiūsī “ I “.

13:20 Góa si̍tchāi kā lín kóng, Chiapla̍p Góa só͘ phài ê līmhô chi̍t ê lâng, chiūsī chiapla̍p Góa; koh chiapla̍p Góa ê, chiūsī chiapla̍p phài Góa ê.

13:21 Tng Iaso͘ kóng liáu chiah ê ōe, simlêng chin thòngkhó͘, chiū kongkhai kóng: “Góa si̍tchāi kā lín kóng, lín tiongkan ū chi̍t ê lâng ē chhutbē Góa.”

13:22 Ha̍kseng chôaⁿ hō͘siong khòaⁿ lâi khòaⁿ khì, m̄chai Iaso͘ sī leh kóng siáⁿlâng.

13:23 Tī pn̄gtoh piⁿ, ū chi̍t ê Iaso͘ só͘ thiàⁿ ê ha̍kseng, kā I ê thâu thē tī Iaso͘ ê hengchêng.

13:24 Sebûn Pítek kā I pí chi̍t ê chhiúsè kóng: “I só͘ kóng hit ê lâng, sī siáⁿlâng?”

13:25 Hit ê kā I ê thâu thē tī Iaso͘ hengchêng ê ha̍kseng chiū mn̄g Iaso͘ kóng: “Chú ah, sī siáⁿlâng? “

13:26 Iaso͘ ìn kóng: “Góa beh ùn piáⁿ thē hō͘ chi̍t ê lâng, hit ê lâng chiūsī. “I chiū ùn chi̍t tè piáⁿ thē hō͘ Kalio̍k lâng Sebûn ê kiáⁿ Iûtāi.

13:27 Tng Iûtāi chia̍h hit tè piáⁿ, Sattàn chiū ji̍p i ê sim. Iaso͘ chiū kā I kóng: “Lí kóaⁿkín khì chò lí siō͘ⁿ beh chò ê tāichì. “

13:28 Kàu taⁿ, siāng toh ê lâng bô chi̍t ê chaiiáⁿ, I ūisiáⁿmi̍h kā i kóng chit kù ōe.

13:29 Inūi Iûtāi sī hūchek koánchîⁿ, só͘í ū lâng siō͘ⁿ chò Iaso͘ sī kiò i khì bé siú chehkî só͘ suiàu ê mi̍hkiāⁿ, ásī kiò i khì chinchè sànhiong lâng.

13:30 Iûtāi chia̍h liáu hit tè piáⁿ sûisî chhutkhì. Hitsî sī àmsî.

13:31 Tī Iûtāi chhut khì liáuāu, Iaso͘ kóng:” Taⁿ Jînchú tittio̍h êngkng, Siōngchú mā thongkòe I tittio̍h êngkng.

13:32 Kìjiân Siōngchú thongkòe Jînchú tittio̍h êngkng, Siōngchú mā ē katī êngkng Jînchú, koh ē cheksî hō͘ I tittio̍h.

13:33 Sèkiáⁿ ah, Góa kap lín chòhóe koh chi̍ttiámá kú ê sîkan. Lín ē chhōe Góa. Chiàu Góa bat kā Iûthài lâng kóng ê, taⁿ Góa kā lín kóng:“ Góa beh khì ê só͘chāi, lín bētàng khì.

13:34 Góa hō͘ lín chit tiâu sinê kàibēng: “Lín tio̍h hō͘siong saⁿthiàⁿ, chiūsī Góa ū bat thiàⁿ lín; só͘í lín mā tio̍h ánne saⁿthiàⁿ.

13:35 Lín nā saⁿthiàⁿ, chènglâng chiu ē chaiiáⁿ lín sī Góa ê ha̍kseng.“

13:36 Sebûn Pítek mn̄g I kóng: “Chú à, Lí beh khì tóūi? “Iaso͘ ìn I: “Góa beh khì ê só͘chāi, lí chitmá bē tàng kap Góa chòhóe khì, m̄ku íāu lí ē kàu hia.”

13:37 Pítek kóng: “Chú à, sī ánchóaⁿ góa chitmá bētàng kap Lí khì? Góa kamgoān ūi Lí pangsat sèⁿmiā.“

13:38 Iaso͘ kóng: “Lí beh ūi Góa pangsat sèⁿmiā? Góa si̍tchāi kā lí kóng, tī ke bōe thî chìnchêng, lí ē saⁿ paiⁿ m̄ sêngjīn lí sī Góa ê ha̍kseng.“　　

　　　　　　　　　　　　　　　　20191207      2025.06.26. Siukái