Iokhān Hokim su Tē cha̍psì chio͘ⁿ 約翰福音 第十四章

14:1 Iaso͘ koh kóng:“ Lín ê sim m̄bián hoanló putan, lín tio̍h sìn Siōngchú, mā tio̍h sìn Góa.

14:2 Tī Góa ê Pē ê ke ū chin chē chhù, nāsī bô, Góa kám ē kóng sī beh khì ūi lín chúnpī só͘chāi.

14:3 Koh Góa nā khì, iā ūi lín chúnpī só͘chāi liáu, Góa ē koh tńglâi chhōa lín kap Góa chòhóe khì, ánne  lín chiū ē hām Góa tī hia.

14:4 Góa beh khì tóūi lín lóng chāi, hit tiâu lō͘ lín mā chai. “

14:5 Tomá mn̄g: “Chú à, goán m̄ chaiiáⁿ Lí beh khì tóūi, náē chai hit tiâu lō͘ ?“

14:6 Iaso͘ kā i kóng: “Góa chiūsī Tōlō͘, Chinlí, Oa̍hmiā. Nā m̄sī chià tio̍h Góa, bô lâng ētàng khì kàu Pē  hia.

14:7 Lín nā bat Góa, chiū mā íkeng bat Góa ê Pē. Taⁿ lín íkeng bat I, mā íkeng khòaⁿtio̍h I. “

14:8 Huile̍k kā Iaso͘ kóng: “Chú à, kā Pē hō͘ goán kohàⁿ, ánne chiū ū kàu ah ! “

14:9 Iaso͘ ìn i kóng:“ Huile̍k, Góa kap lín chòhóe chiah nih kú, lí iau m̄ bat Góa sī bô ? Khòaⁿtio̍h Góa    chiūsī khòaⁿtio̍h Pē, lí ná ē kóng, kā Pē hō͘ goán khòaⁿ leh ?

14:10 Góa tī Pē lāibīn, Pē iā tī Góa lāibīn, lí m̄ sìn sī bô ? Góa kā lín kóng ê ōe, m̄ sī chhut tī Góa katī,    sī tiàm tī Góa lāibīn ê Pē bô thênghioh leh chò I katī ê kang.

14:11 Lín tio̍h sìn Góa tiàm tī Pē lāi-bīn, Pē mā tī Góa lāi-bīn. Chìchió bô mā tio̍h sìn Góa só͘ chò ê        tāichì. “

14:12 Góa si̍tsi̍t chāichāi kā lín kóng, sìn Góa ê lâng, i ē chò Góa só͘ chò kòe ê tāichì, sīmchì ē chò pí      chiah ê koh khah tōa ê tāichì. Inūi Góa teh beh tńg khì Pē hia.

14:13 Lín hōng Góa ê miâ, bôlūn kiû siáⁿmih, Góa ittēng ē khì chò, thang hō͘ Pē tùi Kiáⁿ tittio̍h êngkng.

14:14 Lí nā hōng Góa ê miâ ǹg Góa kiû jīmhô tāichì, Góa ittēng ē khì chò.

14:15 Lín nā thiàⁿ Góa chiū ē chunsiú Góa ê bēnglēng.

14:16 Góa beh ǹg Pē kûi, I ē lēnggōa sù lín chi̍t ūi Póhūisu, hō͘ I éngoán kap lín tôngchāi.

14:17 I chiūsī chinlí ê Sîn, sèkan lâng bē chiap-la̍p I, inūi khòaⁿ bē tio̍h I, mā m̄ bat I ; m̄ku lín bat I, inūi I kap lín tôngchāi, mā ittēng tiàm tī lín lāibīn.

14:18 Góa bē pàng lín chò ko͘jî, Góa ē koh tńg lâi lín chia.

14:19 Koh bô lōa kú, sèkan lâng bē koh khòaⁿtio̍h Góa, m̄ku lín ē khòaⁿtio̍h Góa, inūi Góa oa̍h leh, lín mā ē oa̍h leh.

14:20 Kàu tī hit ji̍t, lín ē liáukái, Góa tī Góa ê Pē lāibīn, lín tī Góa lāibīn, Góa mā tī lín lāibīn.

14:21 Íkeng ū Góa ê bēnglēng, koh chunsiú ê lâng, chiūsī thiàⁿ Góa ê lâng; thiàⁿ Góa ê lâng ē pī Góa ê Pē thiàⁿ i, Góa mā ē thiàⁿ i, koh chiong Góa katī hián-hiān hō͘ i khòaⁿ. “

14:22 Iûtāi (M̄ sī hit ê Kalio̍k lâng ) mn̄g Iaso͘ kóng:“ Chú à ! Ūisiáⁿmi̍h? Lí beh chiong púnsin ǹg goán hiánhiān, bô beh ǹg sèkan lâng hiánhiān? “

14:23 Iaso͘ ìn: “Jīmhô chi̍t ê thiàⁿ Góa ê lâng, ē chunsiú Góa ê ōe, Góa ê Pē ē thiàⁿ i, Pē kap Góa ē lâi i hia, kap i chòhóe tòa.

14:24 Bô thiàⁿ Góa ê, chiū bē chunsiú Góa ê ōe. Lín só͘ thiaⁿtio̍h ê ōe m̄ sī Góa katī ê, sī phài Góa lâi ê Pē ê.

14:25 Góa iau kap lín chòhóe ê sî, íkeng ū chiong chiah ê ōe kā lín kóng kòe.

14:26 M̄ku Póhūisu, chiūsī Pē ēng Góa ê miâ beh phài lâi ê Sèngsîn, I ē kà lín bat itchhè ê tāichì, koh hō͘ lín kìtit itchhè Góa kā lín kóng kòe ê ōe.

14:27 Góa kā pêngan lâu hō͘ lín, chiong Góa ê pêngan hō͘ lín. Góa hō͘ lín ê kap chit sèkan leh hō͘ lâng ê bô siāngkhoán. Lín ê sim m̄ bián chhauhoân, mā m̄ bián kiaⁿ.

14:28 Lín ū thiaⁿ kòe Góa kā lín kóng, Góa līkhui lín, mā ē koh tńglâi lín chia. Lín nā ū thiàⁿ Góa, ē inūi Góa khì Pē hia lâi hoaⁿhí, inūi Pē pí Góa khah tōa.

14:29 Taⁿ tāichì iáu bē hoatseng, Góa seng kā lín kóng, hō͘ tāichì lâi ê sî thang sìn.

14:30 Tùi taⁿ íāu, Góa bē koh hām lín kóng chin chē ōe, inūi chit sèkan ê thóngtīchiá teh beh lâi à, i bē  tàng chiàmiú Góa.

14:31 M̄ku beh hō͘ sèkan lâng chaiiáⁿ Góa ū thiàⁿ Pē, mā ū chiàu Pē ê bēnglēng khì chò. “Khí lâi, lán lâi khì ! “　

　　　            2019/12/17     2025.06.27. Siukái