Iokhān Hokim su Tē káu chio͘ⁿ 約翰福音 第九章

9:1 Tng Iaso͘ tī kelō͘ leh kiâⁿ ê sî, khòaⁿtio̍h chū chhutsì ba̍kchiu chiū sitbêng ê lâng.

9:2 Ha̍kseng mn̄g I kóng:” Lāusu, chit ê lâng chū chhutsì ba̍kchiu chiū khòaⁿ bô, tàuté sī siáⁿlâng hoānchōe? Sī chit ê lâng? Á sī i ê pēbó?”

9:3 Iaso͘ kóng:” Ē ánne pēng m̄sī chit ê lâng hoānchōe, mā m̄sī i ê pēbó. Khiok sī beh tī i ê sinchiō͘ⁿ hiánbêng Siōngchú ê chokûi.

9:4 Lán tio̍h thàn iáu sī ji̍tsî lâi chò phài Góa lâi ê ê kang, àmsî nā kàu tō bô lâng ētàng chòkang.

9:5 Góa tī sèkan ê sî, Góa chiūsī sèkan ê kng.”

9:6 Chiah ê ōe kóng soah, Iaso͘ chiū phùi chhùinōa tī thô͘kha, ēng nōa kiáuthô͘, kô͘ tī hit ê sitbêng è ê ba̍k-chiu,

9:7 Koh kā i kóng:” Khì Selôa chúi-tî sé.” (Selôa ê ìsù sī pī chhekhián) i chiū khì sé, tótńg ê sî íkeng ē khòaⁿ kìⁿ.

9:8 I ê chhùpiⁿ hām hia ê pêngsî khòaⁿtio̍h i ichêng chò khitchia̍h ê, chiū kóng

9:9 ” Chiūsī I lah!” koh ū lâng kóng:” M̄ sī, sī kap i siókhóa siāngkhoán nāniā.” I katī kóng:” Góa chiūsī.”

9:10 Só͘í in mn̄g I:” LÍ ê ba̍kchiu sī ánchóaⁿ pìⁿ ē khòaⁿkìⁿ?”

9:11 I ìn:” Hit ê hōchò Iaso͘ ê, phùi chhùinōa kiáuthô͘, kô͘ góa ê ba̍kchiu, kā góa kóng:「Khì Selôa tî sé.」Góa sûi khì sé, chiū pìⁿ ē khòaⁿkìⁿ.”

9:12 In mn̄g:” I tī tóūi?” I ìn:” Góa m̄ chai.”

9:13 In kā hit ê chêng ba̍kchiu sitbêng ê, chhōa khì Hoatlīsài phài ê lâng hia.

9:14 Taⁿ Iaso͘ kiáu thô͘ lâi ihó i ê ba̍kchiu sī tī Anhiohji̍t.

9:15 Hoatlīsài phài ê lâng mā mn̄g i sī ánchóaⁿ ē khòaⁿkìⁿ. I chiū kā in kóng:” I ēng thô͘môe kô͘ góa ê ba̍kchiu, góa khì sé liáu chiū ū khòaⁿkìⁿ.”

9:16 Hoatlīsài phài lâng ê tiongkan, ū lâng kóng:” Chit ê lâng m̄sī án Siōngchú hia lâi è, inūi I bô siú Anhiohji̍t.” Ū ê kóng:” Ū chōe ê lâng ná ē kiâⁿ chit chióng sînjiah?” In tùi ánne chôaⁿ hun chò nn̄gpêng.

9:17 In koh mn̄g i kóng:” I íkeng khui lí ê ba̍kchiu, lí lâi kóng I sī siáⁿmih khoán lâng?” I ìn:” I sī sianti.”

9:18 Hia ê Iûthài lâng m̄sìn I chêng sitbêng, chitmá pìⁿ ē khòaⁿkìⁿ, chiū kiò i ê pēbú lâi,

9:19 mn̄g in kóng:” Chit ê kámsī lín só͘ kóng chhutsì chiū sitbêng ê kiáⁿ? Taⁿ i ná ē khòaⁿkìⁿ?”

9:20 I ê pēbó ìn:” Goán chaiiáⁿ chit ê sī goán ê kiáⁿ, chū chhutsì chiū bô khoāiⁿ;

9:21 taⁿ i sī ánchóaⁿ ē khoāiⁿ, goán m̄chai, mā m̄chai siáⁿlâng kā ihó è; lín mn̄g i, i íkeng sī tōalâng à, hō͘ i katī kóng.”

9:22 (I ê pēbó ánne kóng, sī inūi kiaⁿ Iûthài lâng, inūi Iûthài lâng íkeng chhamsiông hósè, nā ū lâng jīn Iaso͘ sī Kitok chiū kā i kóaⁿchhut hōetn̂g.)

9:23 Só͘í i ê pēbó chiah kóng:「I íkeng sī tōalâng à, lín khì mn̄g i.」

9:24 Chiū ánne Hoatlīsài phài ê lâng koh chi̍t pái kiò chinchêng sitbêng è, kā i kóng:” LÍ tio̍h kā êngkng kui hō͘ Siōngchú, goán chaiiáⁿ hit ê lâng sī chōejîn.”

9:25 I ìn:” I sī m̄sī chōejîn, góa m̄ chai, góa kāⁿnā chai chit hāng, góa íchêng khoàiⁿ bô, chitmá khòaⁿ ū.” 

9:26 In chiū mn̄g i kóng:” I kā lí chò siáⁿmih? I sī ánchóaⁿ ihó lí ê ba̍kchiu ?”

9:27 I ìn:” Góa íkeng kā lín kóng kòe, lín m̄ thiaⁿ, sī ánchóaⁿ beh koh thiaⁿ chi̍t pái, kám kóng lín mā beh chò I ê ha̍kseng?”

9:28 In chiū mē i kóng:” Lí chiah sī I ê ha̍kseng, goán sī Mô͘se ê bûntô͘.

9:29 Goán chaiiáⁿ Siōngchú ū tùi Mô͘se kóngōe, nā sī chit ê lâng án tóūi lâi, goán m̄ chai!”

9:30 I chiū ìn in:” Che tō chin kî-koài, I ihó góa ê ba̍kchiu, lín iáukú m̄ chai I tùi tóūi lâi.

9:31 Lán lóng chai Siōngchú bē thiaⁿ chōejîn ê kîtó, chí ū kèngpài Siōngchú koh chunchiàu I ê chí ì ê lâng, Siōngchú chiah ē thiaⁿ i.

9:32 Chū kó͘ ílâi, m̄bat thiaⁿ kòe ū lâng hō͘ chhutsì chiū sitbêng ê lâng, ē tàng khòaⁿkìⁿ.

9:33 Chit ê lâng nā m̄ sī án Siōngchú lâi ê, I chiū bē tàng chò chit khoán tāichì.”

9:34 In chiū kā ìn:” Lí chhutsì chiū tī chōeok tiong, tiantó beh lâi kàsī goán sībô?” Chiū kā i kóaⁿ chhut hōetn̂g.

9:35 Iaso͘ ū thiaⁿtio̍h in kā I kóaⁿchhut hōetn̂g. Āulâi chhōe tio̍h i, chiū mn̄g i kóng:” Lí kám ū sìn Jînchú ?”

9:36 I mn̄g:” Sinseⁿ, siáⁿlâng sī Jînchú? Chhiáⁿ Lí kā góa kóng, thang hō͘ góa sìn I.”

9:37 Iaso͘ kā i kóng:” Lí íkeng khòaⁿtio̍h I, chitmá hām lí kóngōe ê chiū sī.”

9:38 I kóng:” Chú ah, góa sìn.” Chiū kūi lo̍h khì pài I.

9:39 Iaso͘ kóng:” Góa ūi tio̍h símphòaⁿ lâi kàu chit sèkan, hō͘ bô khòaⁿkìⁿ è ē khòaⁿkìⁿ, mā hō͘ ū khòaⁿkìⁿ ê lâng, pìⁿ chò chheⁿmê.”

9:40 Chi̍t kóa khiā tī Iaso͘ piⁿ á ê Hoatlīsài phài ê lâng thiaⁿtio̍h chiah ê ōe, chiū mn̄g I kóng:” Kám kóng goán mā chheⁿmê ò͘!”

9:41 Iaso͘ kā in kóng:“ Lín nā chheⁿmê chiū bô chōe, m̄ku chitmá lín kóng, goán ū khòaⁿtio̍h, ánne lín chiū ū chōe.”　　　　　20191110       2025.06.22. Siukái