19:1 Āu-lâi, Pí-lia̍p-to kiò lâng chhōa Ia-so͘ chhut-lâi, ēng piⁿ phah I.
19:2 Hia-ê
peng-á ēng chhì-á piⁿ-chò chit-téng ông-koan kā tì tī I ê thâu-khak, koh ēng
chi̍t-niá chí-sek ê tn̂g-phâu kā moa leh.
19:3 In
lâi-kàu Ia-so͘ ê bīn-chêng, kóng:“ Iû-thài-lâng ê ông, bān-sòe ! “ Jiân-āu siàn
I ê chhùi-phóe.
19:4
Pí-lia̍p-to koh chhut-lâi gōa-bīn, kā hia-ê Iû-thài-lâng kóng:“ Lín khòaⁿ, góa
chhōa I chhut-lâi hō͘ lín, hō͘ lín chai-iáⁿ góa chhâ bē-chhut I ū chōe. “
19:5 Ia-so͘
chiū chhut-lâi, thâu tì chit-téng chhì-á ê ông-koan, iā chhēng chi̍t-niá chí-sek
ê tn̂g-phâu. Pí-lia̍p-to tùi in kóng:“ Lín khòaⁿ chit-ê lâng ! “
19:6 Tng
hia-ê chè-si-tió͘ⁿ hām chèng koaⁿ-oân khòaⁿ-tio̍h Ia-so͘ chiū tōa-siaⁿ hoah-hiu:“
Kā téng si̍p-jī-kè ! Kā téng si̍p-jī-kè ! “ Pí-lia̍p-to tùi in kóng:“ Lín ka-tī
chhōa I khì téng, in-ūi góa chhâ bē chhut I ū chōe. “
19:7 Hia-ê
Iû-thài-lâng ìn:“ Goán ū lu̍t-hoat, chiàu Lu̍t-hoat I eng-kai sí, in-ūi I ka-tī
kóng I sī Siōng-chú ê Kiáⁿ. “
19:8 Tng
Pí-lia̍p-to thiaⁿ-tio̍h in án-ne kóng, koh-khah kiaⁿ.
19:9 I koh
ji̍p-khì chóng-tok-hú, mn̄g Ia-so͘ kóng:” LÍ sī án tó-ūi lâi eh ? “ M̄-ku
Ia-so͘ bô ìn i.
19:10
Só͘-í, Pí-lia̍p-to tùi I kóng:“ Lí m̄ kā góa kóng sī-bô ? Lí kám m̄-chai góa ū
koân thang pàng Lí, mā ū koân téng Lí tī si̍p-jī-kè téng ? “
19:11
Ia-so͘ ìn i:“ Nā m̄-sī Siōng-chú sù lí koân-pèng, lí bô koân thang pān Góa. Tùi
án-ne, kā Góa kau hō͘ lí ê hit-ê lâng, i ê chōe sī koh-khah tāng. “
19:12
Pí-lia̍p-to thiaⁿ-tio̍h chiah-ê ōe, jú siō͘ⁿ-beh pàng Ia-so͘, m̄-ku
Iû-thài-lâng tōa-siaⁿ hoah:“ Lí nā pàng chit-ê lâng, lí chiū m̄-sī Lô-má
hông-tè ê pêng-iú. In-ūi nā hong ka-tī chò ông, chiū-sī pōe-poān Lô-má hông-tè.
“
19:13 Tng
Pí-lia̍p-to thiaⁿ-tio̍h chiah-ê ōe, chiū kā Ia-so͘ chhōa chhut-lâi, ka-tī chē
tī hō-chò「Pho͘ chio̍h-á
lō͘」ê só͘-chāi ê
sím-phòaⁿ-se̍k, hit-ūi Hi-pek-lâi-ōe kiò-chò「Le̍k-pa-tāi」.
19:14
Hit-ji̍t sī Pôaⁿ-kòe-chat ê Chún-pī-ji̍t, chha-put-to tī tiong-tàu ê sî.
Pí-lia̍p-to tùi hia-ê Iû-thài-lâng kóng:” Khòaⁿ leh ! Lín ê ông. “
19:15 M̄-ku
in tōa-siaⁿ hoah:“ Hō͘ sí ! Hō͘ sí ! Kā tèng si̍p-jī-kè ! “ Pí-lia̍p-to kóng:” Góa
ē-sái kā lín ê ông tèng si̍p-jī-kè sī-bô ? “ Hia-ê chè-si-tió͘ⁿ ìn:” Tû-liáu
Kai-sat í-gōa, goán bô ông. “
19:16 Tùi
án-ne, Pí-lia̍p-to chiū kā Ia-so͘ kau hō͘ in khì tèng si̍p-jī-kè.
19:17
Ia-so͘ chiū ka-tī giâ I ê si̍p-jī-kè chhut-khì, lâi-kàu hō-chò “ Thâu-khak-óaⁿ
“ ê só͘-chāi, Hi-pek-lâi-ōe kiò-chò “ Kok-kok-thaⁿ “.
19:18 In tī
hia kā Ia-so͘ tèng tī si̍p-jī-kè, lēng-gōa ū nn̄g-ê iā kap I chò-hóe tèng,
chi̍t-pêng chi̍t-ê, Ia-so͘ tī tiong-ng.
19:19
Pí-lia̍p-to siá chi̍t-tè chōe-chn̄g, tèng tī si̍p-jī-kè téng, téng-bīn siá “
Iû-thài-lâng ê ông, Ná-sat-le̍k-lâng Ia-so͘. “
19:20
Ia-so͘ pī tèng ê só͘-chāi lī Iâ-lō͘-sat-léng-siâⁿ bô hn̄g, koh chōe-chn̄g ēng
Hi-pek-lâi-bûn, Lia̍p-teng-bûn, Hi-lia̍p-bûn siá ê, só͘-í chin-chē Iû-thài-lâng
ū tha̍k-tio̍h.
19:21 In ê
chè-si-tió͘ⁿ chiū khí chhōe Pí-lia̍p-to kóng:“ Mài sià「Iû-thài-lâng ê ông」, tio̍h siá「Chit-ê lâng ka-tī kóng:Góa sī
Iû-thài-lâng ê ông.」
19:22
Pí-lia̍p-to ìn in:” Góa tio̍h siá siáⁿ, í-keng siá-liáu ah. “
19:23 Hia-ê
peng-á kā Ia-so͘ tèng si̍p-jī-kè liáu-āu, the̍h I ê gōa-phâu thiah-chò sì-tè,
chi̍t-lâng pun chi̍t-tè. Koh the̍h I ê lāi-saⁿ mā siāng-khoán beh án-ne pun.
Chi̍t-niá sī bô kap-chōa, téng-ē chit-chò chi̍t-tè.
19:24
Só͘-í, in chham-siông kóng:“ Lán mài kā thiah-phòa, lâi thiu-khau, khòaⁿ
siáⁿ-lâng tit-tio̍h. “ Che beh èng-giām keng-chheh só͘ kì ê:“ In thiah-li̍h Góa
ê gōa-saⁿ sûi-lâng the̍h chi̍t-hun, koh ūi-tio̍h Góa ê lāi-saⁿ thiu-khau. “
Chiah-ê peng-á tu chiàu án-ne chò.
19:25 Khiā
tī Ia-so͘ si̍p-jī-kè piⁿ ê, ū I ê lāu-bú, I ê a-î, Kek-liû-pa ê Má-lī-a,
Boa̍t-tāi-lah ê Má-lī-a.
19:26 Tng
Ia-so͘ khòaⁿ-tio̍h I-ê lāu-bú hām I só͘-thiàⁿ ê hit-ê ha̍k-seng khiā tī piⁿ-á,
kā I ê lāu-bú kóng:” A-bú, khòaⁿ, lí ê kiáⁿ ! “
19:27 Sûi
koh tùi hit-ê ha̍k-seng kóng:” Khòaⁿ, lí ê lāu-bú. “ Án hit-sî khí, hit-ê
ha̍k-seng chiū chiap i tńg-khì in tau.
19:28
Chiah-ê tāi-chì liáu-āu, Ia-so͘ chai-iáⁿ só͘-ū ê tāi-chì lóng oân-sêng,
ūi-tio̍h beh èng-giām keng-chheh só͘ kì ê, chiū kóng:“ Góa chhùi-ta. “
19:29 Tī
hia ū chi̍t-pân tīⁿ-boán-boán ê sng-chhò͘, in chiū the̍h hái-mî pa̍k tī
gû-chhek-chháu ê bé, chìm sng-chhò͘, tu-kàu Ia-so͘ ê chhùi.
19:30
Ia-so͘ tam chhò͘ liáu-āu, chiū kóng:“ Tāi-chì lóng oân-sêng ah ! “ Kóng-liáu
thâu-khak chiū tàm lo̍h-khì, sūi tn̄g-khùi.
19:31
Hit-ji̍t sī Pī-pān-cheh, in-ūi keh-ji̍t sī tek-pia̍t ê An-hioh-ji̍t,
Iû-thài-lâng ūi-tio̍h bô-ài tī An-hioh-ji̍t lâu sin-si tī si̍p-jī-kè téng, chiū
kiû Pí-lia̍p-to kiò lâng kòng-tn̄g siû-hoān ê kha-kut, thang kā sin-si siu
lo̍h-lâi.
19:32
Só͘-í, hia-ê peng-á chiū kā hām Ia-so͘ chò-hóe tèng si̍p-jī-kè ê hit nn̄g-ê ê
kha-kut kòng-tn̄g.
19:33
M̄-ku, tng in lâi-kàu Ia-so͘ hia, khòaⁿ-tio̍h I í-keng sí, chiū bô kòng-tn̄g I
ê kha-kut.
19:34 Chí-ū
chi̍t-ê peng-á ēng chhio͘ⁿ chhak Ia-so͘ ê hia̍p-ē, ū hoeh hām chúi sûi-sî lâu
chhut-lâi.
19:35 Khòaⁿ-tio̍h
chiah-ê keng-kòe lâi chò kiàn-chèng ê, i ê kiàn-chèng sī chin—ê, mā chai i só͘
kóng ê lóng-sī sū-si̍t, ūi-tio̍h hō͘ lín iā thang sìn.
19:36
Chiah-ê tāi-chì hoat-seng sī beh èng-giām keng-chheh só͘ kóng ê,「I ê kha-kut, bô chi̍t-ki ē hō͘ lâng
kòng-tn̄g.」
19:37 Koh
lēng-gōa chi̍t-kū kóng:「In ē giong-bōng
in ēng chhio͘ⁿ só͘ chhak ê lâng.」
19:38
Chiah-ê tāi-chì liáu-āu, ū A-lī-má-thài lâng ê Iok-sek, I in-ūi kiaⁿ
Iû-thài-lâng só͘-í àm-tiong chò Ia-so͘ ê sìn-tô͘, khì kiû Pí-lia̍p-to chún i
siu Ia-so͘ ê ûi-thé. Pí-lia̍p-to ún-chún, i chiū khì siu Ia-so͘ ê ûi-thé.
19:39 Koh
chêng bat àm-sî lâi kìⁿ Ia-so͘ ê Nî-ko-tí-bú, tòa-lâi tāi-iok saⁿ-cha̍p
kong-kin ê bu̍t-io̍h chhiau tîm-hio͘ⁿ ê cheng-iû.
19:40 In
nn̄g-ê khì siu Ia-so͘ ê ûi-thé, chiàu Iû-thài-lâng bâi-chòng ê si̍p-sio̍k, ēng
chìm-móa cheng-iû ê iù-môa-pò͘ kā i chat hó-sè pau khí-lâi.
19:41
Ia-so͘ pī tèng ê só͘-chāi, ū chi̍t-ê hoe-hn̂g, hn̂g-lāi ū chi̍t-ê iáu-bōe
chòng-kòe sin-si ê sin-bōng.
19:42 In-ūi
hit-ji̍t sī Iû-thài-lâng ê Pī-pān-ji̍t, hit-ê bōng koh chin-kīn, in chiū kā
Ia-so͘ an-chòng tī hia.
2020/01/14
沒有留言:
張貼留言