18 : 1 Iaso͘ koh kā ha̍kseng kóng chi̍t ê phíjū, sī ài in tiāⁿtiāⁿ kîtó, m̄ thang hòngkhì.
18 : 2 I áne kóng: ”Tī bó͘ chi̍t ê siâⁿchhī, ū chi̍t ê hoatkoaⁿ, m̄ kiaⁿ SiōgChú iā bē chuntiōng lâng.
18 : 3 Tī hit ê siâⁿ nih ū chi̍t ê kóaⁿhū, tiāⁿtiāⁿ khì chhōe i kóng:「Ū lâng lâi chhōe góa ê mâhoân, kiû lí theh góa chúchhî kongtō.」
18 : 4 Hoatkoaⁿ kengkòe chi̍t tōaⁿ sîkan lóng bô pānlí, āulâi katī siō͘ⁿ:「Góa suijiân m̄ kiaⁿ SiōngChú, mā bē chuntiōng lâng ,
18 : 5 m̄ku inūi i tiāⁿtiāⁿ lâi chhá góa, chiū lâi theh i sinoan, bián koh hō͘ i lâi ló͘ góa !」
18 : 6 Chú koh kóng: ” Lín tio̍h thiaⁿ chi̍t ê putgī ê hoatkoaⁿ só͘ kóng ê ōe.
18 : 7 Hô hóng SiōngChú só͘ kéngsoán ê lâng, mêji̍t tōasiaⁿ ǹg I ho͘kiû, Siōngchú suijiân iau iântî, chòeāu kám bô theh in sinoan mā?
18 : 8 Góa kā lín kóng, I ē kóaⁿkín theh in chúchhî kongtō. M̄ku , Góa lâi ê sî, kám tú ē tio̍h chit sèkan ū sìnsim ê lâng? ”
18 : 9 Iaso͘ ǹg hia ê jīnûi katī sī gīlâng, lâi biáusī pa̍tlâng ê, kóng chi̍t ê phí-jū,
18 : 10 “ Ū nn̄g ê lâng ji̍p khì sèngtiān kîtó, chi̍t ê sī hoatlīsài lâng, lēnggōa chi̍t ê sī siusòe ê.
18 : 11 Hit ê Hoatlīsài lâng katī khiā leh kîtó kóng:「SiōngChú á, góa kámsiā Lí, góa bô chhiō͘ⁿ pa̍tlâng khì khiónghat lâng, ásī chò bô chèngtong ê sū, sīmchì kiâⁿ kanîm, mā bô chhiō͘ⁿ chit ê siusòe ê.
18 : 12 Góa chi̍t lépài kímchia̍h nn̄g pái, mā hiàn góa ê só͘ tit ê cha̍phun chi it hō͘ Lí.」
18 : 13 M̄ku, hit ê siusòe ê, khiā tī lī i khah hn̄g ê só͘chāi, liân thâu mā m̄ káⁿ gia̍h khí lâi ǹg thiⁿ, kānā tûi heng kóng:「SiōngChú á, chhiáⁿ Lí siun lînbín góa chit ê ū chōe ê lâng!」
18 : 14 Góa kā lín kóng, chit ê siusòe ê tńgkhì chhù í āu, sī pí lēnggōa hit ê khah hō͘ SiōngChú khòaⁿ chò gī; Inūi nā katī thêseng katī ê, ê kā ah lo̍h khì; katī chūjīn bô siáⁿ ê, ē koseng i .”
18 : 15 Ū chi̍t kóa lâng mā phō eⁿá lâi Iaso͘ hia, chhiáⁿ I bong in, ha̍kseng khòaⁿ tio̍h chiū chekpī in.
18 : 16 Iaso͘ hoántńg kiò in óalâi, kóng: ” Kā sèkiáⁿ chhōa lâi Góa chia, m̄ thang chó͘tóng in, inūi tī SiōngChú ê koktō͘ ê chiū chhinchhiō͘ⁿ sèkiáⁿ chi̍t iō͘ⁿ,
18 : 17 Góa si̍tchāi kā lín kóng, Sêng siū SiōngChú koktō͘ ê lâng, nā bô chhinchhiō͘ⁿ gín'á chi̍t iō͘ⁿ, ittēng bē tàng li̍p khì.”
18 : 18 Ū chit ê chò koaⁿ ê lâi mn̄g Iaso͘ kóng: ” Liôngsiān ê lāusu, góa tio̍h chò siáⁿmih chiah ē thang tittio̍h éngoán ê oa̍hmiā? ”
18 : 19 Iaso͘ ìn i: ” LÍ sī ánchóaⁿ kóng Góa sī liôngsiān, tûliáu SiōngChú ígōa, bô chit ê sī liôngsiān ê.
18 : 20 Lí chaiiáⁿ chia̍h ê kàibēng bô :「M̄ thang kiâⁿ kanîm, m̄ thang thâilâng, m̄ thang thauthe̍h, m̄ thang chò ké kiànchèng, tio̍h hàukèng pēbó. 」”
18 : 21 Hit ê lâng kóng: ” Chiah ê kàibēng, góa án sèhàn chiū lóng ū chunsiú.”
18 : 22 Iaso͘ thiaⁿliáu chiū kā i kóng: ” Lí iau kiám chò chi̍t hāng, chiū sī bē lí só͘ū ê itchhè, chiong chîⁿ pun hō͘ ū khiàmkhoeh ê lâng, tī thiⁿténg chiū ū lí ê châipó tī hia , koh mā tio̍h ài lâi tóe Góa.”
18 : 23 I thiaⁿ liáu chiū chin iuchhiû, inūi i chin hó gia̍h.
18 : 24 Iaso͘ khòaⁿ tio̍h i ê piáuchêng, chiū kóng: ” Ū chîⁿ lâng beh ji̍p SiōngChú ê kok-tō͘ , sī chin bô kántan !
18 : 25 Lo̍ktô nǹg kòe chiamphīⁿ iau pí ū chîⁿ lâng li̍p khì SiōngChú ê kok khah kántan leh ! ”
18 : 26 Thiaⁿ tio̍h chiah ê ôe ê lâng kóng: ” Áne, ū siáⁿlâng thang tittio̍h kiù leh ? ”
18 : 27 Iaso͘ kóng: ” Tī lâng só͘ bô hoattō͘ chò ê, SiōngChú lóng ē .”
18 : 28 Pítek kóng: ” Lí khòaⁿ leh, goán íkeng pang lo̍h goán só͘ū ê itchhè, lâi tóe Lí à.”
18 : 29 Iaso͘ kóng: ” Góa si̍tchāi kā lín kóng, lín ūi SiōngChú ê koktō͘ pang lo̍h katī ê chhùthe̍h, ásī bó͘, hiaⁿtī, pēbó, jîlú,
18 : 30 Tī kimsè ē tit tio̍h kúi ā pōe ê pòsió͘ⁿ, tī lâisè ē tit tio̍h éngoán ê oa̍hmiā.”
18 : 31 Iaso͘ chhōa cha̍pjī ê ha̍kseng khì piⁿ á kā ín kóng: ” Lín khòaⁿ leh , Lán teh beh khì kàu Iâlō͘satléng, sianti só͘ siá koanhē Góa itchhè ê sū lóng ē ènggiām .
18 : 32 Inūi I ē hō͘ lâng sàngkau gōakok lâng, in ē hilāng I, bújio̍k I, phùi nōa tī I ê bīn,
18 : 33 Koh ēng piⁿ phah I, chòeāu kā chhú sí; tī tē saⁿ ji̍t I ē kohoa̍h.”
18 : 34 Ha̍kseng tùi I só͘ kóng chiah ê tāichì thiaⁿ lóng bô, bē liáukái I só͘ kóng ê ìsù, só͘í m̄ chai Iaso͘ leh kóng siáⁿmih.
18 : 35 Iaso͘ teh beh kiâⁿ kàu Iâlīko siâⁿ ê sî, ū chi̍t ê ba̍kchiu khòaⁿbô ê lâng chē tī lō͘piⁿ leh kiûthó.
18 : 36 I thiaⁿ tio̍h chin chē lâng tùi i hia kengkòe, chiū mn̄g lâng sī ū siáⁿmih tāichì.
18 : 37 Ū lâng kā ìn, sī Násatle̍k ê Iaso͘ beh tùi chia kengkòe.
18 : 38 I sūi tōa siaⁿ hoah: ” Tāipi̍t ê kiáⁿsun Iaso͘, khó-liân góa ! ”
18 : 39 Hia ê kā Iaso͘ khuilō͘ ê lâng chiū chekpī i, kiò i tiām khì, m̄ku i soah lú tōa siaⁿ hoah: ” Tāipi̍t ê kiáⁿsun, khó-liân góa o͘h ! ”
18 : 40 Iaso͘ chôaⁿ thêng leh khiā tī hia, kiò lâng kā i chhōa lâi, chi̍t ē lâi-kàu I ê bīnchêng, chiū mn̄g i: ”
18 : 41 “ Lí ài Góa kā lí chò siáⁿmih?” I ìn: ” Chú à , Góa beh ē tàng koh khòaⁿ tio̍h.”
18 : 42 Iaso͘ kóng: ” Lí ē tàng khòaⁿ tio̍h! Lí ê sìnsim i hó lí à .”
18 : 43 I cheksî ū khoáiⁿ, chiū tòe Iaso͘ kiâⁿ, kui lō͘ chiong êngkng kui hō͘ SiōngChú. Tng chènglâng khòaⁿ tio̍h áne , mā lóng lâi oló SiōngChú .
2019/03/03－08
2025.07.30. Siukái tī Lâmthâm
沒有留言:
張貼留言