Lō͘ka hokim su Tē chhit cho͘ⁿ

 7 : 1 Chia̍h ê ōe Iaso͘ kā tāike kóng liáu ,chiū kiâⁿ li̍p khì Kape̍klông .

7 : 2 Ū chi̍t ê Lômá ê liântió͘ⁿ , i só͘ thiàⁿsioh ê po̍kjîn phòapēⁿ íkeng tī seⁿsí koanthâu .

7 : 3 Chit ūi liântió͘ⁿ ū thiaⁿ kòe Iaso͘ ê sū ,sūi úithok kúi ê Iûthài lâng ê tió͘ⁿló khì kiû Iaso͘ lâi kiù i ê po̍kjîn .

7 : 4 In chi̍t ē kàu Iaso͘ hia ,chiū chin sêngkhún kiû I kóng : ” Chit ê lâng ū ta̍ttit Lí kā tàu khachhiú .

7 : 5 Inūi i thiàⁿsioh lán Iûthài lâng ,iā katī khí hōetn̂g hō͘ lán . ”

7 : 6 Iaso͘ chiū kap in chòhóe khì . Lī beh khì ê chhù bô lōa hn̄g , liântió͘ⁿ úithok kúi ê pêngiú khì chhōe Iaso͘ ,kā I kóng : ” Chú à! M̄ bián mâhoân Lí lâi kàu goán tau ,góa si̍tchāi sêngtam bē khí ,

7 : 7 góa mā jīnûi katī bô chukeh thang khì kìⁿ Lí ,m̄ku nā ū Lí ê chi̍t kū ōe ,góa ê po̍kjîn chiū ē ho̍kgoân .

7 : 8 Inūi góa pī siūkoân ,mā ū pengá thiaⁿ góa ê bēnglēng ,kā chit ê kóng「Khì!」 i chiū khì ; kā hit ê kóng「Lâi!」i chiū lâi ; kā góa ê po̍kjîn kóng「Khì chò!」i chiū chò . ”

7 : 9 Iaso͘ thiaⁿtio̍h chia̍h ê ôe ,kámkak chin hihán ,sūi oa̍t tńgsin kā tòe tī I āubīn ê lâng kóng : ” Góa kā lín kóng ,chiah nih tōa ê sìnsim ,liân tī Íseklia̍t lâng ê tiongkan ,Góa iau m̄ bat tú tio̍h . ”

7 : 10 Hia ê siū úithok ê lâng tńg khì liântió͘ⁿ in tau , khòaⁿtio̍h hit ê po̍kjîn íkeng ho̍kgoân .

7 : 11 Kòe bô kúi ji̍t , Iaso͘ chiânóng chi̍t ê siâⁿchhī , hōchò Ná-in , I ê ha̍kseng hām chin chē lâng kap I chòhóe khì .

7 : 12 The be̍h kiâⁿ kàu siâⁿ mn̂gkháu ê sî , tú tio̍h lâng kng chi̍t ê silâng kiâⁿ chhut lâi . Chit ê sí khì ê lâng sī in lāubó ê ko͘ kiáⁿ , in lāubó sī kóaⁿhū . Siâⁿ nih chin chē lâng pôe chit ūi kóaⁿhū sàng i ê kiáⁿ kàu bōngtē .

7 : 13 Chú Iaso͘ khòaⁿtio̍h hit ūi kóaⁿhū , chiū lînbín i ,kā i kóng : ” Mài koh háu à . ”

7 : 14 Chôaⁿ kiâⁿ óa—khì hōaⁿ kng sin-si ê nńgkiō chhn̂g , in chiū thêngkha . Iaso͘ kóng : ” Siàuliân eh ,Góa kiò lí khí lâi ! ”

7 : 15 Hit ê sí khì ê lâng sūi peh khí lâi chē ,koh khuichhùi kóngōe . Iaso͘ chiū kā i kau hō͘ i ê lāubó .

7 : 16 Tāike lóng gangkhì , mā kui êngkng hō͘ Siōngchú ,kóng : ” Tī lán tiongkan ū chi̍t ūi tōa sianti chhuthiān ló͘ ! ” iā kóng : ” Siōngchú chinchiàⁿ ū pópì ! ”

7 : 17 Koanhē chit kiāⁿ sū ê siausit , thoânkàu Iûthài séng hām chiuûi ê hiongtìn .

7 : 18 Iokhān ê ha̍kseng lóng chiong chia̍h ê sū kā Iokhān kóng .

7 : 19 Iokhān chiū kiò nn̄g ê ha̍kseng lâi , phài in khí Chú Iaso͘ hia , mn̄g I : ” Hit ūi teh beh lâi ê sī Lí mā ? Á sī goán koh tán pat lâng ? ”

7 : 20 Hit nn̄g ê lâi kàu Iaso͘ hia , ahne kóng : ” Kiâⁿ sélé ê Iokhān phài goán lâi mn̄g Lí ,「Hit ūi teh beh lâi ê kám sī Lí ? Á sī goán koh tán pat lâng ?」”

7 : 21 Tī hit sî Iaso͘ íkeng ihó chēchē simkhó͘ pēⁿthiàⁿ ê lâng , iāū pī siâsîn hūsin ê , koh hō͘ kúi ā ê ba̍kchiu bô khòaⁿ ê tittio̍h ho̍kgoân .

7 : 22 Iaso͘ ìn in ” Tńg khì kā Iokhān kóng lín só͘ thiaⁿ , só͘ khòaⁿtio̍h ê , chiū sī chheⁿmê ê ē khòaⁿkìⁿ , páikha ê ē kiâⁿ lō͘ , tio̍h mâhong pēⁿ ê tittio̍h chhengkhì , chhàu hīⁿàng ê ē thiaⁿtio̍h , silâng kohoa̍h , bôchîⁿ lâng ū hó siausit thang thiaⁿ ,

7 : 23 Nā bô inūi Góa lâi siū chó͘ tòng ê , hit ê lâng chiū ū hokkhì là ! ”

7 : 24 Iokhān só͘ phài lâi ê lâng līkhui liáuāu , Iaso͘ chiū tùi hia ê lâng kóng khí Iokhān : ” Lín khì kàu khòngiá sī beh khòaⁿ siáⁿmih ? Kám sī beh khòaⁿ lô͘ tek hō͘ hong chhoe lâi chhoe khì mā ?

7 : 25 khì kàu hia sī beh khòaⁿ siáⁿmih leh ? Kám sī beh khòaⁿ chhēng iùnńg iho̍k ê lâng mà ? Hit khoán chhēngchhah hôhôa , chhiahoa kòe ji̍t ê lâng sī tī ôngkiong lāi .

7 : 26 Ahne , lín sī beh khòaⁿ siáⁿmih ? Kám sī sianti ? Sī lah! Góa kā lín kóng , i pí sianti koh khah úitāi .

7 : 27 Kengchheh ū kì-chài :「Khòaⁿ à ! Góa beh phài Góa ê sùchiá kiâⁿ tī Lí ê thâuchêng , theh Lí khuilō͘ .」Chit ê sùchiá chiūsī I .

7 : 28 Góa kā lín kóng , só͘ ū tùi hūlú seⁿ ê , bô chi̍t ê pí i koh khah úitāi , m̄ku tī Siōngchú ê kok lāibīn , siōngsè ê iau pí i khah tōa . ”

7 : 29 Pī Iokhān sélé kòe ê lâng hām koaⁿoân , tī hia thiaⁿtio̍h chia̍h ê ōe , long sêngjīn Siōngchú sī konggī ê ,

7 : 30 khósioh , Hoatlīsài lâng kap kàusu m̄ niásiū Iokhān ê sélé , in phaukhì Siōngchú tùi in ê kèōe .

7 : 31 Chú Iaso͘ koh kóng : ” Chit khoán chênghêng , Góa thang ēng siáⁿmih lâi píphēng chit sè tāi ê lâng? In na chhinchhiō͘ⁿ siáⁿmih leh ?

7 : 32 In chhinchhiō͘ⁿ chi̍t tīn chē tī chhàichhīá kháu ê gíná , chòhóe leh sńg kóng : goán ǹg lín pûn ta̍tá , lín m̄ thiàubú ; goán ǹg lín chhiò chhutsoaⁿ ê khàutiāuá , lín bē lâu ba̍ksái .

7 : 33 Kiâⁿ sélé ê Iokhān lâi , bô chia̍hpiáⁿ iā bô limchiú , lín kóng i sī hō͘ siâsîn hūsin .

7 : 34 Góa lâi kàu lín chia , iā chia̍h iā lim , lín mā ū ōe thang kóng . Khòaⁿ leh ! Chit ê thamchia̍h koh hò͘ⁿchiú ê lâng , sī siusòe koaⁿoân kap chōejîn ê pêngiú .

7 : 35 M̄ku , Siōngchú ê tìhūi hō͘ hiah ê íkeng chiapsiū ê lâng khòaⁿchò tio̍h . ”

7 : 36 Ū chi̍t ê Hoatlīsài lâng , chin siō͘ⁿ beh kap Iaso͘ chia̍hpn̄g , Iaso͘ chiū khì kàu in tau hām i chòhóe chia̍h .

7 : 37 Siângsî , tī hit ê siâⁿ ū chi̍t ê hūlú , sī chi̍t ê pī tēngchōe ê , tng i chaiiáⁿ Iaso͘ tī Hoatlīsài lâng in tau leh chia̍hpn̄g ê sî , chiū kōaⁿ chi̍t koán té chengiû ê ge̍kpân ,

7 : 38 khì khiā tiàm Iaso͘ ê āupiah , kūi lo̍h lâi óa I ê kha āuteⁿ thîkhàu , ēng katī ê ba̍ksái hôe tī Iaso͘ ê khapôaⁿ , koh ēng thâumn̂g chhit hō͘ chhengkhì , soaloh ēng i ê chhùi chia̍pchia̍p chim Iaso͘ ê kha , chòeāu chiah ēng chengiû boah khitlih .

7 : 39 Hit ê chhiáⁿ Iaso͘ chia̍hpn̄g ê Hoatlīsài lâng khòaⁿtio̍h chit ê chênghêng , simlāi leh siō͘ⁿ : ” Chit ê Iaso͘ nā sī sianti , ittēng chaiiáⁿ leh bong I ê sī siáⁿmih lâng , sī chi̍t ê siáⁿmih khoán ê hūlú , i sī chi̍t ê ū chōe ê lâng neh ! ”

7 : 40 Iaso͘ kā i kóng : ” Sebûn ! Góa ū ōe beh mn̄g lí . ” I ìn : ” Lāusu , chhiáⁿ kóng . ”

7 : 41 Iaso͘ kóng : ” Ū chi̍t ê ūchîⁿ lâng chioh chîⁿ hō͘ nn̄g ê lâng , chi̍t ê khiàm gō͘ cha̍p lió͘ⁿ gîn , chi̍t ê khiàm gō͘ lió͘ⁿ ,

7 : 42 inūi in lóng hêng bē chhut lâi , chèchú chiū kā in nn̄g ê lâng ê chèbū lóng boahsiau . Chāi lí khòaⁿ , tó chi̍t ê ē khah kèngtiōng I ? ”

7 : 43 Sebûn ìn : ” Góa siō͘ⁿ sī hit ê khiàm khah chē ê . ” Iaso͘ kóng : ” Lí ê phòaⁿtoàn bô m̄ tio̍h . ”

7 : 44 Koh oat kòe ǹg hitê hū-lú , kā Sebûn kóng : ” Lí kám ū khòaⁿtio̍h I ? Góa li̍p lâi lín tau ,  lí bô ió͘ⁿchúi hō͘ Góa sékha , m̄ku i ēng ba̍ksái sé Góa ê kha , koh ēng thâumn̂g chhit hō͘ chhengkhì .

7 : 45 Lí bô kap Góa chimchhùi , hoán-tńg sī I , ān Góa li̍p lâi ê sî chiū itti̍t chim Góa ê kha .

7 : 46 LÍ bô ēng iû boah Góa ê thâu , iáukú , chit ê hūlú ēng chengiû lâi boah Góa ê kha .

7 : 47 Só͘í Góa kā lí kóng , i só͘ hoān tio̍h chēchē ê chōe lóng tittio̍h siàbián lah , in-ūi i hùchhut ê ài khah chē , nāsī hit ê tittio̍h siàbián chió ê lâng , i ê ài chiū chió . ”

7 : 48 Chú Iaso͘ sūi kā hit ê hūlú kóng : ” Lí ê chōe tittio̍h sià lah . ”

7 : 49 Kap I chē kāng toh ê lâng simlāi teh siō͘ⁿ : ” Chit ūi sī siáⁿ lâng , kèngjiân ē tàng siàbián lâng ê chōe ? ”

7 : 50 Iaso͘ tùi hit ê hūlú kóng : ” Li ê sìn hō͘ lí tittio̍h chinkiù , thang pêngpêng anan tńg khì ! ”     

2019/01/26     20 : 00                 2025.07.14. Siukái tī Lâmthâm